yek grah ya bhavan men jal bhandaran ka sadhan atyant avashyak hota hai. jivan yapan ke lie hi nahin apitu bhavan nirman ke lie bhi jal ki avashyakta hoti hai. islie nirman karya praranbh karne se purva jal ke bhandaran ke lie kuan, boring (nalkup) khudva lena chahie.
yadi sarvajnik jal vitaran pranali se pani lena ho to bhumigat tanki banva leni chahie. jivan men jal ki mahatta svayan siddh hai. jal prakritik urja ka srot hai. iski sabse bari visheshta yah hai ki manushya ka sharirik evan mansik prakshalan karta hai jisse manushya ka tan evan man donon svasth rahte hain. vastu shastra men jaliya vyavastha ke lie ishan kon ka kshetra shreshth mana gaya hai.
iska karan yah hai ki is sthan par pratahkalin surya ki kirnen jab jal se sanpark karti hain tab jal ki prakritik shuddhi hoti hai tatha jal ke sanpark ke prabhavavash in kirnon ki urja kai guna adhik ho jati hai. iska shubh prabhav jivan par parta hai. shuddh jal ka upyog vyakti evan bhavan donon ke lie labhkari hai.
kuan, boring, bhumigat tanki, vastusammat kahan banaya ja sakta hai? is vishay men vastushastra men shubh evan upyukt sthan batlae gae hain jo is prakar hain.
1. bhumigat tanki banane ke lie shreshth evan shubh sthan bhukhand ka ishan kon hai. yahan jal srot hone se parivar ko samriddhi prapt hoti hai.
2. bhukhand ke purvi bhag men jalasrot hone se parivar ko sukh-sampatti ki prapti hoti hai.
3. agney kon men boring hone se putra ko kasht prapt hota hai.
4. bhukhand ki dakshin disha men boring karne se stri ko kasht hota hai.
5. bhukhand ke nairitya kon men jalasrot hone se bhusvami ke lie mrityukarak hota hai.
6. bhukhand ke vayavya kon men boring banane se shatru pira hoti hai.
7. pashchim men boring karne se sukh ki prapti hoti hai.
8. bhukhand ke uttari bhag men jalashay banana shubh hota hai.
9. bhukhand ke madhya bhag men boring hone se dhan ka nash hota hai.
atah bhukhand ke ishan kon men athva purva men, uttar ya pashchim men jalashay, boring, bhumigat tanki ka nirman karna chahie. vastu ke siddhant ke anusar dakshin-pashchim bhag sada uncha tatha purvottar bhag sada nicha rahna chahie. tabhi bhavan men rahne valon ko sukh evan samriddhi ki prapti hoti hai.
aisa tabhi sanbhav hai jab boring uttar ya ishan men ki jae. boring, jalashay ityadi par yadi din ke dusre evan tisre prahar men bhavan ki chaya pare to aisa bhavan aur usmen bane jalsansadhan ashubh hote hain. is karan bhi boring uttar evan purva disha athva ishan kon men hi karni chahie.
bahumanjile bhavnon men jal sansadhan ki vyavastha is prakar karni chahie ki vah sabke lie vastu anusar hitkari ho. yah kathin karya hai parantu aisi sthiti men boring plaet ke ishan kshetra men karne se sukhad fal ki prapti hoti hai.
sahi sthiti ke sath-sath yah bhi avashyak hai ki inka nirman shubh muhurt men karaya jae jisse anisht prabhav se bacha ja sakta hai aur grihasvami ko shubh faldayak ho sakta hai. boring ya kuan khudvane ke lie rohini, mrigshira, pushya, magha, tinon uttara, hast, anuradha, purvasharh, dhanishtha, shatbhisha nakshatra shubh hote hain.
chandrama makar, min evan kark rashi men ho, guru-budh lagn men evan shukra dasham sthan men ho tab kup khanan karya karna shubh hota hai. som, budh, guru aur shukravar ho, yog adi panchang ke anusar shuddh ho aise men jalashay adi ke lie khudai ka karya karna chahie.
boring karte hue is bat ka vishesh dhyan rakhna chahie ki yah mukhya dvar ke madhya n ho. boring ke upar parking nahin honi chahie. boring ke karan mukhya dvar par vedh bhi nahin hona chahie. is prakar bhavan banane se purva jal sansadhan ke bare men vastusammat nirnay lene se bhavan rahne valon ke lie shubh faldayak siddh hota hai.
jivan men jarurat hai jyotishiya margadarshan ki? abhi bat karen fyuchar point jyotishiyon se!