नवरात्र और विजयादशमी

navratra aur vijyadshmi  

Ank ke aur Lekh | Sambandhit Lekh | Views : 1230 |  
navratra sanpurn brahmand ka sanchalan karne vali jo shakti hai us shakti ko shastron ne adya shakti ki sangya di hai. devi sukt ke anusar- ya devi sarva bhuteshu shaktirupen sansthita. namastasyai, namastasyai, namastasyai namo namah.. arthat jo devi agni, prithvi, vayu, jal, akash aur samast praniyon men shakti rup men sthit hai, us shakti ko namaskar, namaskar, barbar mera namaskar hai. is shakti ko prasann karne ke lie navratra kal ka apna vishesh mahatva hai. man durga ko prasann karne hetu navratra men nimn baton ka vishesh dhyan rakhna chahie. navratra men sadhak ko vrat rakhakar mata durga ki upasna karni chahie. mata durga ki upasna se sabhi sansarik kashton se mukti sahaj hi ho jati hai. navratri men ghat sthapna ke bad sankalp lekar puja sthan ko gobar se lipakar vahan ek bajot par lal kapra bichakar usapar mata durga ki pratima ya chitra ko sthapit kar panchopchar puja kar dhup-dip evan agarabatti jalaen. fir asan par baithakar rudraksh ki mala se kisi ek mantra ka yathasanbhav jap karen. pujan kal evan navratri men vishesh dhyan rakhne yogya baten. 1. durga pujan men lal rang ke fulon ka upyog avashya karen. kabhi bhi tulsi, anvla, ak evan madar ke fulon ka prayog nahin karen. durba bhi nahi charhaen. 2. pujan kal men lal rang ke asan ka prayog karen. yadi lal rang ka uni asan mil jae to uttam anyatha lal rang ke kale kanbal prayog kar sakte hain. 3. puja karte samay lal rang ke vastra pahnane evan kunkum ka tilak lagaen. 4. navratra kal men durga ke nam ki jyoti avashya jalaen. akhand jyoti jala sakte hain to uttam hai anyatha subah sham jyoti avashya jalaen. 5. navratra kal men nau din vrat kar saken to uttam anyatha pratham navratra, chaturth navratra evan homashtami ke din upvas avashya karen. 6. navratra kal men nau kanyaon ko antim navratra ko bhojan avashya karaen. nau kanyaon ko navdurga manakar pujan karen. 7. navratra kal men durga saptashati ka ek bar path purn manoyog se avashya karna chahie. navratri men jap karne hetu vishesh mantra - 1. om dun durgayai namah 2. ain hriin klin chamundaye vichchai 3 hriin shrin klin dun durgayai namah 4. hriin dun durgayai namah 5. grah dosh nivaran hetu navdurga ke bhinna-bhinn rupon ki puja karne se grahon ke dosh ka nivaran hota hai. vijyadshmi ka mahatva ashvinasya site pakshe dashamyan tarkodye. s kalo vijyo gyaeyah sarvakaryarth siddhaye.. arthat ashvin shukla dashmi ko sayankal tara uday hone ke samay vijykal rahta hai islie ise vijyadshmi kaha jata hai. vijyadshmi ka dusra nam dashhra bhi hai. bhagvan shri ram ki patni sita ko jab ahankari evan adharmi ravan apaharan kar le gaya tab narad muni ke nirdeshanusar bhagvan shri ram ne navratra vrat kar nau din bhagvti durga ki archana kar, prasann kar, var prapt kar ravnki lanka par charhai ki. isi ashvin shukla dashmi ke din ram ne ravan ka vadh kar vijay prapt ki thi. tab se ise vijyadshmi ke rup men manaya jane laga. bhagvan ram ke purvaj raghu ne vishvajit yagya kiya tha. is yagya ke pashchat apni sanpurn sanpatti ka dan kar ek parn kutiya men rahne lage. is samay raghu ke pas kauts aya jisne raghu se chaidah karor svarn mudraon ki mang ki. kyonki kauts ko guru dakshina chukane hetu chaidah karor svarn mudraon ki avashyakta thi. tab raghu ne kuber par akraman kar diya. is par kuber ne isi din ashmantak v shami ke paudhane par svarn mudraon ki varsha kar di jise lekar kauts ne guru dakshina chukai. shesh mudraen jansamanya ne apne upbhog ke lie li. isi upalakshya men yah parva manaya jata hai. mahabharat men varnan hai ki duryodhan ne pandvon ko jue men harakar barah varsh ka vanvas diya tha evan terhvan varsh agyatkal ka tha. is varsh men yadi kaurav pandvon ko khoj nikalte to punah barah varsh ka vanvas v ek varsh ka agyatvas ka samna karna parta. is agyat kal men pandvon ne raja virat ke yahan naukri ki thi. arjun is kal men vrihannala ke vesh men rah raha tha. jab gau raksha ke lie ghrishtadyumn ne kaurav sena par akraman karne ki yojna banai tab arjun ne shami vriksh se apne astra-shastra utarakar kaurav sena par vijay isi din prapt ki thi. is karan bhi vijyadshmi ka parva prachlit ho gaya. is prakar se dekha jae to vijyadshmi ka parva mukhyatah vijay dashmi ke rup men manaya jata hai. ashvin mas ke navratra men desh ke adhikansh bhagon men ramlila ka ayojan hota hai. ramlila ka ant ravan dahan ke sath hi ho jata hai. ravan dahan ke sath meghnad v kanubhakarn ke bhi putle banakar jalae jate hain. gujrat men navratra ke avasar par garba nritya ka ayojan kiya jata hai. vijyadshmi ka parva raj parivar men sima ullanghan kar manaya jata tha. parantu samay chakra ke sath rajtantrik vyavastha ka sthan loktantra ne le liya. ab yah utsav amajan bhi vishesh utsah evan ullas ke sath mana raha hai. vastav men yah utsav burai ke ant svarup manaya jata hai. yah parva asatya par satya ki jit ka pratik hai to anyay par nyay ki jit, adharm par dharm ki jit, dushkarmon par satkarmon ki jit ka pramukh hai. yah parva hamen satya marg par chalne ki prerna deta hai. satya chahe kitna bhi karva ho, hamesha usi ka anusaran karna chahie kyonki yah sanatan satya hai ki hamesha shubh karmon ki hi jit hoti hai. ise vijay parva bhi kaha jata hai. jyotish shastra men ise abujh muhurt ki sangya di gai hai. is din kiya gaya koi bhi karya avashya safal rahta hai. kisi bhi prakar ke shubh karm ke lie is parva ka avashya upyog karna chahie. kaise manaen vijyadshmi vijyadshmi ka parva prachin kal se hi pure bharat varsh men dhumdham se manaya jata hai. yah parva ravan par ram ki vijay ke pratik rup men mukhyatya manaya jata hai. is din ravan, meghnad v kunbhakarn ka putla banakar unhen jalane ki paranpra mukhya rup se sarvatra prachlit hai. is din aprajita pujan v shami pujan vishesh rup se kai sthanon par kiya jata hai. skand puran ke anusar jab dashmi navmi se sanyukt ho to aprajita devi ka pujan dashmi ko uttar purva disha men aprahn ke samay vijay evan kalyan ki kamna ke lie kiya jana chahie. dharm sindhu ke anusar aprajita pujan ke lie aprahn men ganv ke uttara-purva ki or jakar ek svachch sthal ko gobar se lipna chahie. fir chandan se ath kon dal banakar sankalp karna chahie- ‘mam sakutumbasya kshemsiddhayarth aprajita pujan karishye. iske pashchat us akriti ke bich men aprajita ka avahan karna chahie. iske dahine evan bayen jaya evan vijya ka avahan karna chahie evan sath hi kriya shakti ko namaskar evan uma ko namaskar karna chahie. iske pashchat aprajitayai namah jayayai namah vijyayai namah mantron ke sath shodshopchar pujan karna chahie. iske pashchat yah prarthana karni chahie - ‘he devi, yathashakti mainne jo puja apni raksha ke lie ki hai use svikar kar ap apne sthan ko ja sakti hain. is prakar aprajita pujan ke pashchat uttara-purva ki or shami vriksh ki taraf jakar pujan karna chahie. shami ka arth shatruon ka nash karne vala hota hai. shami pujan ke lie is mantra ka path karna chahie- prarthana mantra- shami shamyte papan shami lohitakantaka. dharishyarjan bananan ramasya priyavadini.. karishyamanyatrayan yathakal sukhan maya. tatra nirvighnakatrritvanbhav shrirampujite.. artha- shami papon ka shaman karti hai. shami ke kante tanbe ke rang ke hote hain. yah arjun ke banon ko dharan karti hai. he shami, ram ne tumhari puja ki hai. main yathakal vijyyatra par niklanuga. tum meri is yatra ko nirvighnakarak v sukhkarak karo. iske pashchat shami vriksh ke niche chaval, supari v tanbe ka sikka rakhte hain. fir vriksh ki pradakshina kar uski jar ke pas mitti v kuch patte ghar lekar ate hain. bhagvan ram ke purvaj raghu ne vishvajit yagya kar apni sampurn dh an-sampatti dan kar di tatha parn kutiya men rahne lage. isi samay kauts ko chaidah karor svarn mudraon ki avashkata guru dakshina ke lie pari. tab raghu ne kuber par akraman kar diya tab kuber ne shami evan ashmantak par svarn mudraon ki varsha ki thi tab se shami v ashmantak ki puja ki jati hai. ashmantak ke patra ghar lakar svarn manakar logon men bantne ka rivaj prachlit hua. ashmantak ki puja ke samay nimn mantra bolna chahie: ashmantak mahavriksh mahadosh nivaranam. ishtanan darshanan dehi kuru shatruvinasham.. arthat he ashmantak mahavriksh tum mahadoshon ka nivaran karne vale ho, mujhe mere mitron ka darshan karakar shatru ka nash karo. is prakar vijyadshmi ka parva manane se sukh samriddhi prapt hokar vijay ki prapti hoti hai.
Kya aapko lekh pasand aaya? Subscribe
Kya aapko lekh pasand aaya? Subscribe


dipavli visheshank  October 2014

fyuchar samachar ke dipavli visheshank men sarvopyogi lakshmi pujan vidhi evan dipavli par lakshmi prapti ke saral upay, dipavli evan panch parva, shubh karm se banaen dipavli ko mangalamay, ashtalakshmi, dipavli svaman men hai ek upay v prayog adi lekh sammalit hain. shubhesh sharman ji ka tantra rahasya aur sadhna men saflta asflta ke karan lekh bhi drashtavya hain. masik sthayi stambh men grah sthiti evan vyapar, sheyar bajar, grah spasht, rahukal, pachang, muhutrt grah gochar, rashifal, gyansrita adi sabhi hain. samvatsara-sukshm vivechan jyotish peramiyon ke lie vishesh gyanavardhak sampadkiya hai. samyik charcha men grahan aur uske prabhav par charcha ki gai hai. jyotishiya lekhon men ajivika vichar, falit vichar, lalkitab v makan sukh tatha satyaktha hai. iske atirikt annaprashan sanskar, vastu prashnottari, adarak ke gun aur purva disha ke band hone ke dushparinamon ka varnan kiya gaya hai.

Subscribe

Apne vichar vyakt karein

blog comments powered by Disqus
.