परी कथा

pari katha  

Ank ke aur Lekh | Sambandhit Lekh | Views : 1436 |  
pratyek bachcha janm lete hi apna bhagya apne sath lata hai. yah jaruri nahin ki dhanvan vyakti ka bachcha bhi bhagyashali aur dhanvan hi bane. yadi grah pratikul hon, to sanchit dhan bhi chutkiyon men ur jata hai, aur vahin yadi grah anukul ho, to bhagya se garib ka bachcha bhi desh ke sarvochch shikhar par pahunch sakta hai. yah to bachche ka apna bhagya hai, jo kichar men khile gulab ki tarah use gandgi se nikal kar kisi ghar ki shobha bana sakta hai. mai 2009 ka grishm kal. chandigarh ke nari niketan men ek avivahit muk badhir aur mansik rup se vikshipt yuvti ke achanak sharirik parivartan se vahan ka vard staf chaink gaya. adhikariyon ka matha thanka. medikal janch se pata chala ki yuvti garbhavati hai. bat gopniya rakhne ka prayas kiya gaya aur garbhapat karane ka nirnay liya gaya. tab tak bat fail chuki thi aur sarvajnik ho gai thi. fir silsila aranbh ho gaya - pulis kes, nyayalay, haspatal, prashasan, samajik sansthaon ke sakriya hone ka. yah yuvti thi kajal, jise koi chandigarh ki sarak ke kinare ek sal purva fenk gaya tha. kya kajal janm lene vali santan ke paln-poshan ka jimma utha sakegi? kaun palega bhavi jiv ko? kaun hai jimmevar ane vali avaidh santan ka? aise kitne hi prashn chihn samaj men tairne lage. ek varg ane vale jiv ko rokne ke paksh men tha, to ek bhrun hatya ke viruddh. mamla daektaron aur kort ke madhya latak gaya, kyonki bhavi santan medikal ki drishti se svasth najar nahin a rahi thi. samaj sevi sanstha sitijan foram aen hyuman raits ke adhyaksh shri sushil gupta ne morcha sanbhala aur ant men ek nanhi jan ne is dharti par kafi vivadon ke bad nanhe kadam rakhe. panjab evan hariyana uchch nyayalay ke nirdeeshanusar, bachche ki dilivri ka jimma sektar 32 ke sarkari kaelej evan haspatal ke dairektar dae. raj bahadur aur dae. vipin kaushal ko tatha laln-palan ka dayitva samaj evan kalyan vibhag ko saunpa gaya. pulis ko avaidh santan ke pita ko pakrne ka jimma diya gaya. pulis ne adha darjan karmachariyon ko hirasat men lekar janch aranbh kar di, parantu natija kuch nahin nikla. karan spasht tha ki karmachariyon ki milibhagat se nari niketan men kukritya ho rahe the. mansik rup se vikshipt, muk aur badhir kajal ko is bat ki bhanak bhi nahin thi ki usse durachar kiya ja raha hai. vah n to kisi ko pahchan sakti thi, n bol sakti thi. sara chandigarh utsukta se ek vivadit janm ki pratiksha kar raha tha. aur ek subah khabar chapi ki kajal ne 3 disanbar, 2009 ki pratah 00ah44 baje ek sundr-si bachchi ko janm diya hai. sitijan foram aen hyuman raits ke adhyaksh shri sushil gupta aur unki patni ne us navjat ka namakaran kiya - pari. 13 janvri ko sektar 47 sthit ashray men unhonne nanhi pari ki pahli lohri manai. kajal ko nae kapre pahnae gae, mekap kiya gaya aur uski god men pari ko bithaya gaya. kajal kahin se muk aur badhir aur mansik rup se mand nahin lag rahi thi. garbhadhan ke bad uchch shreni ke chikitsakon ne uska ilaj kiya. ashray ka prangan chandigarh ke sanpurn midiya aur vi.ai. pi. se khachakhach bhara tha mano pari n ho, baelivud ki hiroin ashray ki sarjmin par utar ai ho! pari ki god men gift, nae vastra, mithaiyan, khilaune, shagun dharadhar girte ja rahe the. kahin lag hi nahin raha tha ki yah ek aisi bachchi ki lohri manai ja rahi hai jiske janmadata ka kuch ata-pata hi nahin hai. man ko yah nahin pata ki yah sab ho kya raha hai. di. en. e. test ke bad pulis ne ek sandigdh karmachari ko giraftar kar us par mukdma dayar kar diya hai. jyotishiya drishti aj bharat men aisi ghatnaen koi nai nahin hain. aise kitne mamle samne hi nahin ate. slam eriya men to is tarah ki ghatnaen ae din hoti rahti hain. akhir aise kaun se grah hain jinhonne ek avaidh shishu ko aisa vi. ai. pi. bana diya, jiski raksha hetu pulis, prashasan, nyayalay, samajik sansthaen, haspatal, midiya jagat adi chatatan ki tarah uth khare hue? pari ke lie prashasan ne ek vishesh nars ki niyukti ki hai. pari ka janm 3 disanbar, 2009 ki subah 00.44 baje , sinh lagn, brish rashi mrigshira nakshatra aur mangal ki dasha men guruvar ki pratah hua. lagnesh surya mangal ki mitra rashi vrishchik men matri bhav men shukra ke sath sthit hai. chaturthesh evan bhagyesh mangal 12ven bhav men nichasth hai. chaturth bhav men surya ke mangal ki rashi men hone ke karan janm sarkari kharche par, vishesh vard men pulis suraksha men hua. shukra ke matri bhav men hone ke karan janm ke samay ve sabhi sukh suvidhaen milin, jo ek samriddh parivar ko prapt hoti hain. shukra chaithe bhav men ho, to vaibhav, vilasita, bhavan, vahnadi pradan karta hai. ek rah chalti, mandbuddhi, muk aur badhir yuvti ko uski santan ne vah sab kuch dila diya, jiski vah kabhi kalpana bhi nahin kar sakti thi. ek bhikharin ko ashray namak sarkari bhavan, jo sabhi adhunik sukh suvidhaon se yukt hai, men dirghakal ke lie ashray mil gaya. ek speshal nars bhi man aur bachchi ki parvrish ke lie niyukt ki gai hai. derh mah ki bachchi ko shukra ki kripa se vahan bhi mil gaya aur vah glaimar se bhi jur gai. lohri par, pari ki pahli lohri ka ayojan rajkiya star par hua. pari ke pitri bhav ka vishleshan yahan atyant avashyak hai. navam evan chaturth bhav donon ke hi svami nich ke hokar 12ven bhav men virajman hain, jo haspatal evan jel donon ka hi dyotak hai. mata garbh dharan ke bad haspatal men rahi aur pita, pari ke janmoprant jel men. bhagyesh ke dushit hone ke karan pita ka dular nahin mil saka. pita ke karak grah surya par shani ki tritiya drishti hone ke falasvarup bhi pari isse vanchit rahi. chandra 12ven bhav ka svami hokar yadi 10ven bhav men ho, to jatak par rajaon arthat sarkar dvara vaibhvshali kharch hota hai, kintu use pita ka pyar kam milta hai. aisa hi pari ke sath hua. sara kharch aj bhi chandigarh prashasan aur gair sarkari svayansevi sansthaen utha rahi hain. dvitiyesh budh pancham men rahu se yukt hai, islie uski shiksha-diksha men badha a sakti hai, par yah badha kab aegi, yah samay hi bataega. han itna avashya hai ki tritiyesh shukra jatka ko buddhiman v dhani banaega. iske alava kai rajyog bhi janmang men vidyaman hain. isi karan garbh men ate hi is balika ko rajya ka sanpurn ashray mil gaya, jo sab ko nasib nahin hota. brihat jatak ke anusar yadi chandra lagn se 10ven bhav men ho, to mata ke karan prasiddhi milti hai ya dhanarjan hota hai. aisa hi hua pari ke sath. chandra uchch ka hai aur shukra se drisht hai. is yog ne use atyant sundar, akarshak tatha glaimaras bana diya hai. madan gupta sapatu, jyotishacharya, mo.- 098156-19620 makan n. 196,saiktar 20 e ,chandigrh pari ke janm ke samay chandra ki dasha chal rahi thi. janm ke char din pashchat mangal ki dasha aranbh ho gai. pita ke karak surya aur dasham bhav ke svami shukra par shani ki tritiya drishti ke karan use mata-pita ka purn sukh prapt nahin ho raha hai. parantu kendra men purn chandra ati shubh sthiti men hai, jiske karan mata-pita ka pratyaksh sukh n hote hue bhi use anya sansthaon aur logon ka dular mil raha hai. sharirik rup se pari sundar v svasth hai kyonki lagnesh surya kendra men shukra ke sath sthit hai aur purn chandra ki drishti men hai. abhi mangal ki dasha chal rahi hai. mangal sukhesh v bhagyesh hokar apni nich rashi (karka) men barhven bhav men guru ki purn drishti men hai. parantu chunki kark rashi ka svami chandra svayan kendra men apni uchch rashi men sthit hai, islie pari ko nich bhang raj yog ka labh mil raha hai, aur isilie pari ka laln-palan achche dhang se hona chahie. mangal ki mahadsha ke bad rahu ki mahadsha men shiksha uttam rup se honi chahie kyonki rahu guru ke bhav men aur surya ke nakshatra men hai. surya bali hokar kendra men hai. guru vidya ka karak hokar nich rashi men hai, parantu chunki kark rashi (jahan guru uchch ka hota hai) ka svami chandra kendra men uchch rashi men hai, islie guru ka bhi nich bhang ho raha hai. pari ko bahya sahayta se uchch shiksha prapt hogi, ismen sandeh nahin hai, kyonki is lagn ke lie raj yog karak mangal bhi guru ko dekh raha hai. donon ka paraspar drishti sanbandh uchch shiksha ke lie shubh hai. guru ki mahadsha men videshi sahayta se videsh men bhi uchch shiksha sanbhav hai. shashthesh shani par guru ki purn drishti hai aur shani surya ke nakshatra men hai. islie shani ki dasha men uchch pad aur man-samman ki prapti hogi tatha jivan samriddhishali hoga. chandra lagn se navam v dasham ka svami shani pancham men hai, jo shiksha ke kshetra men yash prapti ka dyotak hai. pari ke vaivahik jivan ko dekhen, to saptamesh shani mitra rashi men uchchabhilashi hokar dhan bhav men sthit hai aur dhan karak grah guru se drisht hai. islie pari ka vivah kisi dhanvan vyakti se hoga arthat viprit paristhitiyon men janmi yah nanhi pari apne shubh grahon ki badaulat nishchit rup se ek sukhi, sundar v vaibhvshali jivan vyatit karegi. lagnesh surya, sukh ke karak shukra aur dasham bhav men uchcharashisth chandra ki shreshth sthiti ke karan mata-pita ke sukh se vanchit hone ke bavjud yah bachchi janm se hi rajkiya sanrakshan prapt karke sachmuch ki pari ban gai. yahi to hai grahon ka khel!
Kya aapko lekh pasand aaya? Subscribe
Kya aapko lekh pasand aaya? Subscribe


rudraksh visheshank  May 2010

rudraksh ki utpatti v prapti sthal, dharan niyam v vidhi, rudraksh ke prakar, aushdhiya upyog, jyotishiya mahatva aur upay ke rup men iske prayog adi vishyon par gyanavardhan hetu aj hi parhe fyuchar samachar ka rudraksh visheshank.jyotish premiyon ke lie vichar goshthi stanbh ke antargat vaivahik jivan dosh evan nivaran vishay par ki gai jyotishiya paricharcha atyant upyogi hai.

Subscribe

Apne vichar vyakt karein

blog comments powered by Disqus
.