कष्ट निवारण हेतु देव आराधना

kasht nivaran hetu dev aradhna  

Ank ke aur Lekh | Sambandhit Lekh | Views : 16271 |  

prashna: kya sabhi kashton ke shaman ke lie ek hi devta ki aradhna ki ja sakti hai? yadi han, to kaise ? kis kasht ke lie kis devta ki aradhna karni chahie aur kyon? savistar likhen.

hindu dharmavlanbiyon ke 33 karor devi devta hain. anek vedon men unka ullekh milta hai tatha anek attharah puranon men unki vividh gathaen tatha puja archana ki vidhiyan vistarpurvak di gai hain.

gita men bhi adhyay tin men is vishay par bhagvan krishn ne arjun se vistrit charcha ki hai ki manav matra ko devi devtaon ki aradhna, yagya, havan, dan, mantra jap adi unhen prasann karne ke lie karne chahie. badle men devi devta bhi unhen paryapt sukh, bhog, ann adi denge.

ek hi devta ki aradhna kar use prasann kar sabhi kashton se tran pa lene ko ichchuk jatak apni atut astha ki siddhi evan bhavna ki drirhta ko purn karne ke manovichar se apne aradhya devta men sanpurn devtaon ko dekhta hai tatha us ek hi devta vishesh ka agrahi hokar bhi anya devtaon se paranmukh nahin ho sakta. vastutah dekha jae to ‘‘ek dev aradhan dvara sanpurn kashton ka nivarn’’ kar sakne men koi yogi hi safal ho sakta hai.

mantre tirthe dvije deve daivagyae bheshje gurau.
yadrishi bhavna yasya siddhirbhavati tadrishi..

shri ganeshadi panch devtaon aur suryadi navagrahon ke karya vibhag alg-alag hain. sabhi dev, grah adi karm ke adhin hain. ye apne-apne vishisht karya varg ke pratishthat hain. in sabhi devtaon ka manushya jivan men pramukh sthan hai. isi bat ko drishtigat rakhte hue hamen sabhi ki vandna stuti karni chahie, sabhi ki puja karni chahie taki dukhadi dur hon aur sukh shanti vyapt ho.

apne samast jivan ke sabhi kashton ke nivarnarth pratidin nimn puja evan stuti kar sakte hain.

  • ganesh stuti
  • purush suktan (16 mantra yajurved se)
  • shri suktan (16 mantra rigved se)
  • nau grahon ke devtaon ka pujan
  • bhagvan shankar ka abhishek
  • tulsi tatha anya per-paudhon ki suraksha
  • anhisa ka palan
  • mata-pita aur acharya ka samman

inke atirikt buri adton se parhej evan satya ka acharan bhi karna chahie.

ye sabhi karya shraddha aur vishvaspurvak kie jane chahie. yagya, dan, tap adi karm kisi bhi paristhiti men nahin tyagne chahie kyonki ye kashton ko dur karke manushya ke man ko pavitra karte hain tatha purvakrit pap karmon ke prabhav se use bachate hain.

yagya, dan, tapah karm n tyajyan karyamev tat.
yagyao danan tapashchaiv pavnani manishinam.. (bh.gi.a.-18-shlok.5)

lekin ye sabhi karm shraddhapurvak kie jane chahie. ashraddha se kie gae karya n is janm men shubhafal dete hain n agle janmon men unse kuch bhi labh prapt hota hai.

surya se raja ramchandraji, chandrama se bhagvan krishn, mangal se nrisinh bhagvan, budh se bhagvan buddh, brihaspati se vaman avtar, shukra se bhagvan parshuramji, shani se kurmavtar, ketu se matsyavtar- nau grahon evan lagn se in dashavtaron ki sadhna athva aradhna ka vichar kiya jata hai. dasham avtar kalki bhagvan hain.

in dash avtaron ko keval hindu dharm men hi nahin varan sikh dharm men dash guruji ki aradhna vidhan men bhi vidvanon v daivagyaon dvara manyata di gai hai.

isai men bhi isi tarah surya se holi ghost, chandrama se madar meri, brihaspati tatha shukra se sant mahatma isa masih tatha anya ki manyata hai.

isi prakar jyotish ke vidvan ko isht devta ki aradhna ke sanbandh men jatak ko batana chahie. parashrji ne to yahan tak kaha hai ki pratyek vyakti ko is sanbandh men bhali bhanti gyan arjan karna chahie.

maharshi jaimini ne apne updesh sutron men isht devta ko janne ke lie atmakarak grah ko pradhanta di hai. kisi bhi jatak ki kundli men lagn, lagnadhipti, lagn nakshatra ke svami evan vah grah jo sabse adhik ansh men hai, chahe vah kisi bhi rashi men ho, atmakarak samjhe jate hain. atah atmakarak grah ke anusar isht ki aradhna ki jani chahie.

pancham sthan v panchmesh tatha pancham bhav men sthit prabal grahon ke adhar par bhi isht aradhna ka vidhan hai. vaidik devtaon men surya se shiv, chandrama se parvati, mangal se kartikey, skand, budh se vishnu, brihaspati se indra, shukra se shani ya lakshmi, shani se brahma, rahu se durga ketu se ganpti ki aradhna ka vidhan hai. ismen pratyek prakar ke kasht ke nivarnarth kie gae upay yagya, dan, mantra jap adi ke karkon ko varah mihir evan parashar donon ki hi sahmti prapt hai.

surya agni tatva hai, iske adhishthata devta rudra hain. chandrama jal tatva hai. iski adhishthatri devi amba parvati hain. mangal agni tatva hai aur devta kartik svami hain. budh prithvi tatva hai, adhishthata dev vishnu hain. brihaspati akash tatva hai aur devta brahma hain. shukra jal tatva aur adhishthatri devi lakshmi hain. shani vayu tatva hai aur devta yam hain. rahu ke adhishthata dev shesh tatha ketu ke brahma hain.

fal dipika ke anusar adhishthata devta batane ka siddhant yah hai ki jis grah ka panchven tatha nauven ghar se sanbandh hoga, us grah se sanbandhit devta men bhakti hogi.

pancham v navam sthan ke sath-sath yah bhi avashyak hai ki inke svami ka lagnesh se uttam sanbandh hona chahie.

yadi pancham men koi grah n ho to jis grah ki drishti ho, usse sanbandhit grah ki aradhna, mantra jap adi faldayi honge. yadi grah se drishti sanbandh bhi n ho tab panchmesh se sanbandhit aradhna faldayi n hogi. yadi lagnesh se uttam sanbandh n ho to aisi sthiti men pancham sthan ke karak se sanbandhit mantra, jap, dan,

yagya adi upay faldayi honge. anubhvhin vyaktiyon ke hathon men mantropchar, aradhna adi falhin ho jate hain.

atah chahe isht sadhna ho ya anya sanbandhit devi devta ki sadhna, sanpurn tathyon ki sahi jankari ke sath karni chahie.

parashar ji ne grahshantyadhyayah-(86) men pratyek grah ki jatak ke lie shubhta hetu tatha manav matra ke kalyan ke lie vistrit vivaran diya hai. unke anusar manushyon ke sukh, dukh adi sabhi navagrahon ke adhin hain.

navagrahon ki shanti hetu aur grah janit kashton ke shaman ke lie navagrahon ko pratishthit kar, unke yantra vishesh ki pratishtha kar akshat, sugandhit dhup, agaravatti, dip, chandan, pushp evan naivedya adi se aradhna karni chahie. dan ki nirdisht vastuen jo prapt hon unka dan karna chahie tatha kashton ke nivaran ke lie jis grah ki shanti ki avashyakta ho, usi grah vishesh ke var ko vrat karna chahie. pratyek grah ke arisht nivaran hetu satya narayan ka pradosh vrat evan gau-pujan sarvottam mane gae hain.

bij mantron ke vidhi vidhan ke sath jap ka bhi apna mahatvapurn sthan hai. nirogi kaya, uttam ayu, yash aur aishvarya ki prapti, bure svapnon ke nash, vighn dukh nash ke lie navagrah stotra tatha navagrah kavach ka niyamit path shraddhaluon ko atyant labh dene vala hota hai. pratyek grah aur devta ke puja-anushthan men hom ki mahti avashyakta rahti hai.

ayurved ke anusar rog shaman hetu dev aradhna

ayurved shastracharyon ne panchatatvon arthat prithvi, pani, pavan, pavak aur prakashvan akash men se pratyek ke bigrne se vividh vyadhiyon ke sankraman ka ullekh kiya hai. charak tatha sushrut ne apne granthon men anubhav ke adhar par panch mahabhuton ke kop janya vikaron ka vistrit vivaran diya hai. panch tatva janit vikaron men vayu vikar sabse pramukh mana jata hai. kaf tatha pitt donon vayu prablta ke karan teji se sharir men failakar manushya ko rogagrast kar dete hain. vayu vikritijanya rogon ke shaman hetu surya ki aradhna shreshth mani gai hai kyonki surya vayu tatvadhipti hain. kushth rog nivritti ke lie bhi suryopasna shastrasammat mani gai hai.

jal ke vikrit hone par bhanti-bhanti ke rog sharir ko kasht pahunchate hain. inke shaman ke lie jalatatvadhipti bhagvan ganesh ki aradhna ka praman shastra dete hain.

panch tatvanusar dev aradhna

manushya ka svabhav naisargik rup men dekha jae to panchatatvatmak hi hai.

  • jin jatkon men satgunon ki bahulta hoti hai unke lie bhagvan vishnu ki seva aradhna faldayi hoti hai. shri hari (vishnu) unke dukhon ka haran kar kashton ke bhar ko halka kar dete hain. (akash)
  • jin jatkon ki pravritti satoguni hone par bhi rajogun se yukt hoti hai unke lie surya ki aradhna shubhdayi hoti hai. surya unke kashtandhkar ko hata dete hain. (vayu)
  • jin jatkon ki pravritti rajogunatmak hoti hai, unke lie shakti svarupa bhavani ki aradhna shreyaskar hoti hai. devi apne rajoguni bhakt jatkon ke kashton ko havan kund ki agni men jalakar nasht kar deti hai. (agni)
  • jal tatvon men raj aur tam donon ka sammishran hota hai. atah jinki prakriti men rajogun v tamogun donon ka ansh vidyaman ho aisi vishishtata vale vyaktiyon ko ganesh aradhna karni chahie. aise vyaktiyon ke kashton ka vilinikaran bhagvan ganesh jal men kar dete hain. (jal)
  • tamsi ya tam tatva ki sanketika prithvi hai. bhagvan shiv prithvi tatva ke adhi-devta hain. inhen srishti ka sanharak dev rudra kaha jata hai. prakriti ke tin gunon sat, raj, tam men se antim gun se avirbhut janon ke lie bhagvan shankar ki aradhna karne se unke kasht bhasm ho jate hain. (prithvi)

shastron ke anusar ek hi devta ki murti ki puja ka nishedh hai. samast kashton ke nivaran evan kamnaon ki siddhi ke lie vividh devon ki aradhna karni chahie.

eka murtirn sampujya grihina sveshtamichchata.
anek murti sampannah sarvan kamanvapnuyat..

bhagvan ganesh

inki mahima kisi se chipi nahin hai. ye adi pujya hain. ‘‘adi pujyo ganeshvarah.’’ sahaj bal svabhav ke karan ye bahut jaldi prasann ho jate hain. inki kripa balkon evan vidyarthiyon par sada barsti rahti hai. palli nagri ke seth kalyanamalla ka nanha sa balak ballal chote chote kankr-pattharon ko ganesh ji manakar apne sathiyon ke sath unki puja karta tha jis karan vah samay par ghar nahin pahunch pate the. tang hokar balkon ke pitaon ne kalyanamalla ko nagar se niklva dene ki dhamki di aur seth ne apne putra ballal ko mar pit kar, dara dhamkakar ek per se bandh diya aur kaha ab kholen ganesh ji tera bandhan. tab ganesh ji ne sakshat prakat hokar ballal balak ko bandhan mukt kiya tha aur svayan ban gae ‘‘ballaleshvar’’.

nau varshiya anaparh vipra balak nanbi ka bhakti bhavna se samarpit prasad sakshat rup men grahan kar use sanskrit aur tamil bhasha ka prakand pandit bana dene vale ganpti ki katha bhi prasiddh hai. ye donon laghu kathaen bhagvan ganesh ki bal-sulabh bhakti aur balkon par vishesh anugrah ke anupam udaharan hain.

vighn badha nivaran, rog mukti, vidya ki prapti, bandhan se mukti, shri sampatti ki prapti, parivarik prem, putra prapti adi ke lie inki aradhna avashyak hai. sankat nash ke lie ganesh ji ka ‘‘sankashtanashn-stotra’’ nitya parhna chahie jisse vidyarthi ko vidya, dhanarthi ko dhan, putrarthi ko putra aur moksharthi ko moksh ki prapti hoti hai. chinta evan rog-nivaran ke lie ‘‘mayuresh stotra’’ ka path siddhi prad hota hai.

bhagvan shankar

ramayan men likha hai ki- ‘‘ichchit fal binu shiv avradhe. milai n koti jo jap sadhe’’. vidyaon ki kamna karne valon ke lie bhi shankar ji ki puja ki avashyakta ka sanket shastra dete hain- ‘‘vidya kamastu girishan’’. bhagvan shankar ke rudrabhishek aur unke mrityunjay jap ka mahatva kisi se chipa nahin hai. ‘‘un namah shivay mantra panchakshar, japat mitat sab klesh bhayankar.’’ shani ki dhaiya ho ya sarhesati athva kashtaprad mahadshantardasha, shivji ki aradhna kashton ke shaman hetu ramban mani jati hai. un namah shivay ashutosh bhagvan shankar ka shadakshar mantra hai.

  • sanp bichchu aur tataiya, shivnamdhun bhagati bhaiya.
  • koi kitna bhi gussa ho, shiv-shiv bolo chup ho.
  • sab kahlate hain dev, ap kahlate hain mahadev.
  • mrityu bhay hai sabse bhari, jisko harte hain tripurari.
  • chote kashton ke lie koi bhi dev, bare kashton ke lie mahadev.
  • koi bhi mantra kyon n ho, rudraksh mala se avashya siddh ho.

arthik, mansik, sharirik, bauddhik, parivarik evan rajnaitik adi klesh, vyaparik badhaen, durghatanaen, shatru pira, stri-santan adi kasht, rog, shok jhanjhten tatha nana prakar ke kasht shani ke kop se prakat hote hain. asadhya rog, mrityutulya kasht adi aur dukhdata shani ki dhaiya ya sarhesati ke kasht nivaran ke lie vidhi vidhan se bhagvan shankar ke mahamrityunjay mantra ka jap rudraksh mala se karna chahie.

kam se kam panch ya gyarah mala jap vyakti svayan kar sakta hai. svayan n kar saken to kisi karmakandi brahman se mantra jap karvana chahie. mantra jap ghar ke puja sthal par karen ya karvaen svayan japen ya kisi vipra se karvaen. us vakt mrityunjay yantra ki puja pratishtha avashya karvani chahie. yantra men devta ka vas hota hai, atah mantra ke sath yantra ka sthapan jaruri hai. yadi aise samay men ghar men kisi bhi prakar ka shivling upalabdh n ho to dhai angul praman ke sfatik, parad athva chandi ke bane shivling ki sthapna kar leni chahie.

yadi rudraksh ke danon athva rudraksh ki malaon se vishesh avsron par shivling ke rup men bhagvan shankar ka shringar kiya jae to aise rudrakshadhari bhagvan shankar ke darshan se vipattiyon ka nash hota hai aur punya fal ki prapti hoti hai.

anjni sut hanuman

siyaram bhakt hanuman, anjni kishor, pavnsut jagat prasiddh devta hain. inhen saktmochan, kasht kadan hanuman ke rup men prasiddhi prapt hai. ye bhi bhagvan shankar ke hi avtar hain aur artabhav se pukarne par sharnagat jatak ke har kasht ko shighra dur kar dete hain. aisa koi bhi karya nahin hai jise ye purn n kar saken. inhen smaran karte hi bhut pret badha tak dur ho jati hai . nasai rog harain sab pira, japat nirantar hanumat vira. shani ki pira ho, chahe anishtakari mangal ka amangal ya rahu-ketu ki vajraghati pira, hanuman ji ki aradhna karne se dur ho jati hai. chahe sundar kand ka path karen ya hanuman chalisa ka athva sanktmochan hanumannashtak ka ya fir hanuman ke anya kisi stotra adi ka fal, avashya milega. sadhna kal men ghi ka dipak, gugal ya gugal ki agarabatti jalaen aur apne samaksh ram darbar ka chitra rakhen. naivedya men bundi ke laddu, falon men vishesh rup se mausmi, kela aur sev avashya charhane chahie. bhagvan shri ram ke ananya bhakt shri hanuman ji ki puja atyant faldayi hoti hai. jinhen anjnikishor par bharosa hai unke upar shankr-parvati aur ram, lakshman evan janki ka anugrah sadaiv rahta hai.

bhagvan se bhakt bare kah gae, sant sujan.
pul bandh raghuvir chale kud pare hanuman..

hanuman ji ki aradhna karne ke purva tulsi ki mala se ‘‘ran ramay namah’’ mantra 108 bar avashya japen.

yashodanandan krishnachandra

santanabhav rupi kashton ka shaman kane ke lie bhagvan shri krishnachandra anand kand ki aradhna karni chahie. inke mantra ka ek lakh jap aur shakkar, shahad, ghi, meva mishrit tilon se das hajar mantra se havan karne ka niyam hai jiske prabhav se nissantan log santanvan, putravan ban sakte hain. santan gopal mantra-

‘‘devkisut govind vasudev jagatpate.
dehi me tanyan krishn tvamhan sharnan gatah’’.

yah bhagvan shri krishn ka battis aksharon vala mantra hai jismen unse yah prarthana ki jati hai ki he ! devki putra, govind, vasudev, shri krishn main apki sharan aya hun, mujhe putra pradan kijie.

japkal men santan gopal yantra ki sthapna evan santan gopal stotra ka subah sham path karne vale ko santan rupi nidhi ki prapti sanbhav hoti hai.

anushthan ke purva jatkon ko yogya brahman, sadguru, purohit adi se jyotishiya paramarsh avashya lena chahie.

bhagvan vishnu

tridevon men bhagvan vishnu ek hain. s brahma s vishnuah s rudrah. brahma srijan, vishnu palan aur shiv sanhar karte hain. lakshmipti vishnu vardayak dev hain jo sadvai parmandan se paripurn rahte hue jagat ki raksha ke lie sab logon ko abhydan dete hain. unke dvadash aksharon vale mahamantra hai ‘‘un namo bhagvte vasudevay’’ ka nitya 108 bar jap karte rahne se dukh kam hone lagte hain aur sukh ka abhas hone lagta hai. unke ath nam, solah nam, attharah nam, bis nam, sau nam aur hajar nam vale stotra prasiddh hain jinke path se nana prakar ke kashton ka shaman hota hai aur dhan dhanya adi ka labh milta hai.

achyutan keshvan vishnun harin satyan janardanam.
hansan naraynan chaivmetannama'shtakan pathet..
trisandhyan yah pathennityan daridryan tasya nashyati.
shatrusainyan kshayan yati duahsvapnah sukhdo bhavet..
gangayan marnan chaiv dridha bhaktistu keshve.
brahm vidya prabodhashch tasmannityan pathennarah..

pratyek lagn ke anusar samasyaon ke nidan evan puja path ke bare men sankshep men varnan is prakar hai -

mesh lagna: mesh lagn ke logon ke lie mangal, surya aur guru karak grah hain. chandrama ko bhi karak grah mana jata hai. mesh lagn ke logon ki kundli men mangal yadi rahu ke sath yut ho to angarak yog banta hai. falasvarup rahu ki dashaon men jatak ko sharirik evan mansik kasht hote hain. ketu-mangal ki yuti yadi mesh lagn vale kisi vyakti ki janm kundli men ho, to ketu ki dashaon men use sharirik evan mansik kasht hote hain. usi prakar mesh lagn ke kisi vyakti ki janm kudli men budh v mangal ki yuti ho, to budh ki dashaon men bhi jatak ko sharirik evan mansik kasht hote hanai. aisi paristhiti men jatak ko pratidin hanuman ji ki puja karni chahie, hanuman chalisa, mahavir ban aur mangal ke mantra ka path karna chahie. mangal ka mantra is prakar hai- ‘‘un kran krin kraun sah bhaumay namah’’. is mantra ka 10000 bar path karna chahie.

yadi kisi vyakti ki janm kundli men surya rahu, ketu ya shani ke sath yut ho ya usse drisht ho, to santan kasht hota hai. is paristhiti men surya ki upasna tatha surya ke mantra ka 6000 bar path karna chahie jo is prakar hai- ‘‘un hran hrin hraun sah suryay namah’’.

yadi kisi vyakti ki janm kundli men guru rahu ke sath yut ho, to chandal yog banta hai. atah aise vyakti ko guru ke mantra ka 19000 bar path karna chaihae jo is prakar hai- ‘‘un gran grin graun sah guruve namah’’.

yadi janm kundli men kshin chandra ho ya chandra rahu, ketu ya shani ke sath yut athva usse drisht ho, to sukh men badha ati hai tatha mata ko kasht hota hai. aisi paristhiti men chandra ke mantra ka 11000 bar path karna chahie jo is prakar hai- ‘‘un shran shrin shraun sah chandramse namah‘‘.

vrish lagna: vrish lagn ke logon ki janm kundli men shukra yadi surya ke dvara ast ho ya shukra rahu ke sath yut ho, to abhotvak yog banta hai jisse sharirik evan mansik kasht hote hanai. aisi paristhiti men vyakti ko shukra ke mantra ka 9000 bar path karna chahie jo is prakar hai- ‘‘un bran brin braun sah budhay namah‘‘.

kisi vyakti ki janm kundli men yadi shani ki yuti mangal ya rahu ke sath ho to nandi yog banta hai. falasvarup aise jatak ke pita ko samy-samay par kasht hota hai, jatak ki karmashakti ghatti hai tatha bhagya vriddhi men rukavat ati hai. aise jatak ko shani ke mantra ka 23000 bar path karna chahie jo is prakar hai- ‘‘un pran prin praun sah shanye namah‘‘.

vyakti ki janm kundli men yadi surya shani, ketu ya rahu ke sath yut ho, to grahan yog banta hai. aise vyakti ke sukh men kami ati hai tatha uski mata ko kasht hota hai. atah aise jatak ko bhi surya ke mantra ka 6000 bar path karna chahie.

mithun lagna: mithun lagn ke kisi vyakti ki janm kundli men budh mangal ya rahu ke sath ho, to budh ke mantra ka budhvar ko 9000 jap karna chahie.

kisi vyakti ki janm kundli men yadi shukra surya ke dvara ast ho ya rahu ke sath ho, to santan kasht hota hai. is kasht ko dur karne ke lie shukra ke mantra ka jap karen.

kark lagna: kark lagn ke kisi vyakti ki janm kun. dali men yadi kshin chandra ho ya chandrama shani, rahu athva ketu ke sath ho to chandrama ke mantra ka 11000 bar jap karna chahie.

vyakti ki janm kundli men mangal budh ke sath ho ya usse drisht ho athva rahu, ketu ke sath ho, to hanuman chalisa ka path evan mahavir ban tatha mangal ke mantra ka jap karna chahie jisse santan kasht dur hota hai. isse pita ko bhi kasht se mukti milti hai.

vyakti ki janm kundli men guru rahu ke sath ho, to chandal yog banta hai jisse bhagya vriddhi men rukavat ati hai. atah aise vyakti ko guru ke mantra ka 19000 bar jap karna chahie. jap guruvar se praranbh karen.

sinh lagna: sinh lagn ke vyakti ki janm kundli men yadi surya shani, rahu ya ketu ke sath yut athva usse drisht ho, to surya ke mantra ka jap (6000) karna chahie jisse sharirik evan mansik kasht dur ho jate hanai.

vyakti ki janm kundli men mangal, rahu, ketu ya budh ke sath yut ho, to sukh men kami ati hai. atah aise jatak ko mangal ke mantra ka jap (10000) tatha hanuman chalisa ka path karna chahie.

kanya lagna: kanya lagn ke kisi vyakti ki janm kundli men budh yadi mangal ya rahu ke sath ho, to jatak ko sharirik evan mansik kasht hote hain tatha uski karmashakti ghatti hai. sath hi pita ko bhi kasht hota hai. atah aise jatak ko budh ke mantra ka 8000 bar jap budhvar ko karna chahie.

vyakti ki janm kundli men shani rahu ya ketu ke sath ho to santan kasht hota hai. aise jatak shani ke mantra ka jap (23000) karen. vyakti ki janm kundli men shukra surya ke sath ast ho, to bhagya vriddhi men rukavat ati hai aur dhan sanchay nahin ho pata hai. atah use shukra ke mantra ka jap (16000) karna chahie.

tula lagna: tula lagn ke kisi vyakti ki janm kundli men shukra surya ke dvara ast ho ya rahu ke sath ho, to sharirik evan mansik kasht hote hanai. aise jatak shukra ke mantra ka 16000 jap karen.

janm kundli men shani yadi rahu athva ketu ke sath ho, to shani ke mantra ka 23000 bar jap karen. isse santan kasht dur hota hai tatha sukh men vriddhi hoti hai. sath hi mata ka kasht bhi dur hota hai.

vrishchik lagna: vrishchik lagn ke kisi vyakti ki janm kundli men mangal budh ke sath ya usse drisht ho athva rahu ya ketu ke sath ya usse drisht ho, to sharirik evan mansik kasht hote hanai. aise vyakti ko mangal ke mantra ka 10000 bar jap evan hanuman ji ki puja karni chahie.

janm kundli men guru rahu ya ketu se yut ya usse drisht ho, to guru ke mantra ka 199000 bar jap karen jisse santan kasht dur hoga. janm kundli men yadi chandra rahu ya shani ke sath yut ya usse drisht ho, to chandra ke mantra ka jap (11000) karen. isse bhagya vriddhi hogi aur mansik shanti milegi.

dhanu lagna: dhanu lagn ke kisi vyakti ki janm kundli men guru yadi rahu ke sath sthit athva usse drisht ho, to guru ke mantra ka jap (16000) karna chahie. isse sharirik evan mansik kasht dur hanege tatha sukh men vriddhi hogi. sath hi mata ka kasht bhi dur hoga.

dhanu lagn ke vyakti ki janm kundli men mangal yadi budh, rahu ya ketu se yut athva drisht ho to hanuman chalisa ka path tatha mangal ke mantra ka jap (10000) karna chahie. isse santan ka kasht dur hota hai evan parhai men man lagta hai. kundli men yadi surya rahu, ketu ya shani se yut athva drisht ho, to surya ke mantra ka jap (6000) karen, isse bhagya vriddhi hogi.

makar lagna: makar lagn ke kisi vyakti ki janm kun. dali men yadi shani mangal, rahu, ketu ya chandra ke sath yut athva usse drisht ho, to sharirik evan mansik kasht hote hain. atah shani ke mantra ka jap karen.

janm kundli men shukra yadi surya ke dvara ast ho ya rahu ke sath ho, to shukra ke mantra ka jap karen, isse santan kasht dur hoga aur pita ko bhi kasht se mukti milegi. janm kanudli men budh yadi mangal, rahu ya ketu ke sath yut athva usse drisht ho, to budh ke mantra ka jap karen, isse bhagya men vriddhi hogi.

kunbh lagna: kunbh lagn ke kisi vyakti ki janm kundli men shani mangal, rahu ya chandrama ke sath yut athva usse drisht ho, to sharirik evan mansik kasht hote hanai. atah aise jatak ko shani ke mantra ka jap (23000) karna chahie.

janm kundli men shukra yadi surya ke dvara ast ho ya rahu ke sath yut ho, to shukra ke mantra ka jap (16000) karen. isse bhagya evan sukh men vriddhi hogi aur mata ka kasht dur hoga.

min lagna: min lagn ke kisi vyakti ki janm kun. dali men guru rahu ke sath yut athva usse drisht ho, to guru ke mantra ka jap (19000) karen.

isse sharirik evan mansik kasht dur honge. janm kundli men chandra rahu athva shani ke sath yut ya usse drisht ho, to santan kasht hota hai. aise men chandrama ke mantra ka jap (11000) karen, isse santan kasht dur hoga.

Kya aapko lekh pasand aaya? Subscribe
Kya aapko lekh pasand aaya? Subscribe


rudraksh evan adhyatmik vastu visheshank  February 2007

prakriti ke kosh se hamen kai jivanoparyant vastuen prapt hoti hai. aisi hi vastuon men ek hai rudraksh. rudraksh ka adhyatmik aur aushdhiya mahattva bahut hai. shuddh rudraksh ki pahchan kaise ki jae? rudraksh ka sambandh bhagvan shiv se kaise juda hua hain? rudraksh dharn

Subscribe

Apne vichar vyakt karein

blog comments powered by Disqus
.