tona totka evan jyotishiya upay prayah ye shabd am admi ke man men bhay, shankaen evan ulajhan utpann karte hain. yah agyat ka bhay hai. inke vastavik svarup ko samajh lene par inmen nishtha tatha vishvas ka bhav utpann hota hai jisse abhisht karyasiddhi saral evan sunishchit ho jati hai. aie, janen kya hai inka nihitarth aur karya-pranali.
tona kisi karya siddhi ke lie kiya jane vala tantrik anushthan hota hai. ye anushthan satvik evan tamsik donon prakar ke hote hain. satvik anushthan men samanya jivan men ane vali vastuon ka prayog kiya jata hai jise koi bhi vyakti apne ghar men kar sakta hai jabki tamsik anushthan tamsik vastuon ka prayog karke shmashan men kie jate hain jismen pashuon ki bali tak dene ka vidhan hai jo man men bhay paida karta hai. tone namak anushthan ke antargat shanti, vashikaran, stanbhan, uchchatan, vidveshan, maran ye chah karm kie jate hain jinhen shatakarm kaha jata hai. satvik tone parui tarah nirapad hate hain jinke dvara apka isht prayojan sarlta se pura ho jata hai.
jahan tak totkon ka sanbandh hai, ye shastro dvara nirdharit aisi kriyaen hai jo kisi bhi apriya ya hanikarak karya ko apne paksh men karne ke lie ki jati hai. ye bahut hi samanya evan surakshit upay hai. ye kisi bhi karya siddhi ki lanbi prakriya se bachakar aj ke vyast samay men samay ki bachat bhi karte hain. islie aj ke samay men totkon ko hi upay ke rup men mukhay sthan diya jata hai. ye totken vyakti ke sath prachin kal se hi jure hue hain. totka purn n hone ki sthiti men koi hani nahin hoti jabki tona namak anushthan savdhani evan niyampurvak n karne se prayog karne valo ki hani ki sanbhavna hoti hai.
jyotishiya upay ya samagri ka prayog, yantra sthapna tatha ratn dharan karna adi kai jyotishiya upay vishisht vidhi vidhan ke anusar shukla paksh jaise shubh samay men hi kie jate hain aisa karne par upay nishfal hone ki sanbhavna nahin hoti. totkon sahit sanpurn totkon ko purn vishvas evan shraddha ke sath karna chahie. acharya varahmihir ne karya siddhi ke lie upay aranbh karne hetu shubh samay ki vishisht sarni nirdharit ki. upay bich men khandit hone par dobara se shuru kiya ja sakta hai. iske lie sharirik evan mansik svasthata evan svachchata anivarya hai.
tona totka kya hai?
sthul rup men agar ham tone totke shabd ke nihitarth ko samjhen to bat is tarah se samajh men a sakti hai.
t- tools to eradicate
o - obstructions &
n – nasty
e - elements of life &
t - transcendental methods
o - of eliminating
t - trivial issues &
k - knock out
e - evils from life
manushya apne jivan kal men kabhi n kabhi sharirik v mansik vedna se gujrta hi hai. tab use ve tamam tone-totke evan sadhnaen yad ate hain jo kabhi rishi-muniyon ne apne anubhvon evan tapobal se manav kalyan hetu ek uphar ke rup men hamko pradan kie. ye jadu tone evan upay chamatkrit rup se karya karte hain. vyakti ki sanbandhit samasya ka hal ho jata hai aur vah prasann mahsus karta hai. sukhi evan shant vaivahik jivan, vyavsayik unnati, shighra, vivah, santan, naukri, makan jaydad, uchch shiksha adi n jane aise kitne vishyon ka samadhan vyakti in prabhavkari upayon se nikal leta hai.
kuch mahatvapurn evan upyogi sujhav :
1. tona-totka kriya ko gupt rakhen. n to kisi ke samne iska jikra karen n kisi ke samne totkon ka prayog karen kyonki ye kriyaen man ki shakti, vishvas evan shraddha par adharit hai. kisi ke hastakshep se (vani ya kriya dvara) is shakti ki dhar kamjor ho jati hai.
2. man men purn vishvas evan shraddha ke sath prayog ko karen.
3. tona totka karne ke bad piche murakar n dekhen. shraddha evan vishvas hi shankar evan shakti hai.
tone-totke pareshani se jujh rahe jatkon ke lie hathiyar ka kam karte hain. prakriti ke niyam to nahin badle ja sakte, parantu yadi jatak ki upay par astha ho to uska sakaratmak manovaigyanik prabhav jatak ke sharir ki kaimistri par parta hai. shraddha, vishvas tatha astha se kie gae karyon ko ishvar shighra pura karte hain. in upayon ko vyakti apni suvidhanusar karke apne dukhon evan samasyaon se mukti prapt kar labh utha sakta hai.
vaigyanik, sainik, nyayadhish jo drirh mansik shakti vale kahe jate hain, ve log apne jivan ko sundar evan arthapurn banane ke lie apne man ko hi kendrit kar dhyan-yog evan atmachintan ka sahara lete hain. ye sari gurh vidhaen bhi adhyatmikta ki charam sima ka hi udaharan hai.
sansar ki anitya vastuon ki prapti ke lie samanyatah asthayi kism ke upay evan tone totko ka sahara liya jata hai. in sabse bhi upar jo sabse bara samadhan ka rasta hai vah hai dhyan, yog evan atmachintan. kyonki 'man ev manushyanam karanam bandhamokshayoah' arthat man hi manushya ke bandhan evan moksh ka karan hai. man ko jit lena safal jivan ki kunji hai. vyakti ka abhamandal uski antrik upalabdhyion ko prakat karta hai. vyakti dhyan evan atmachintan dvara n keval apni nakaratmak urja ko sakaratmak disha pradan kar sakta hai, varan purnatah ishvar tatva ki prapti jo sab gunon, nidhiyon evan siddhiyon ka nidhan hai ki prapti bhi kar sakta hai. atm chintan ka arth hai atma ka chintan. hamara man avchetan, arddhachetan evan chetan, tin staron par karya karta hai. jo kuch bhi ham kshan pratikshan grahan karte hain vah hamare avchetan man men sanchit hota rahta hai. hamara avchetan man kanpyutar ke chip ke saman hai jismen anginat data stord rahte hain. hamara arddhachetan man keval hamari atma ki upri avaj ko hi sunta hai. atah koi bhi karya yadi ham avchetan man tak jakar karen to usmen adhik saflta prapt hoti hai. is star par hamara sanbandh us parlaukik shakti ke sath ho jata hai aur ham, punarjivit, kriyashil, evan urja se bharpur mahsus karte hain. hamare jivan ki sukshm se sukshmatar upalabdhiyan hamen bahut saral lagne lagti hain. atmachintan, dhyan yog ko 'mastar auf aul remidij' ki sangya bhi di ja sakti hain. atm chintan se sanbandhit parantu kuch dhyan dene yogya kuch baten is prakar hain jinse man ki shakti apne charam bindu par pahunch jati hai.
1. ek shant jagah ka chunav kijie jahan par ap 15-30 minat tak bina kisi vyavdhan ke ekagrachitt hokar dhyan kar saken.
2. kursi, kauch, bed ko chorakar yadi niche ek asan lagakar dhyan karenge to jyada achcha rahega.
3. kisi bhi sahaj sthiti men baithna, shvasan men letna ya kisi yog asan ka chunav karna jismen ap jyada suvidha mahsus karen tatha merudand sidha rahe.
4. taimar ko 15-30 minat tak set kar len.
5. ankhe band karke baithen. lanbi sans andar khichen evan apne man ko shant rakhen evan apni shvans ko vapis samanya avastha men laen.
6. koi ek shabd ka uchcharan bar-bar karte rahen. jaise om
tone totke evan jyotishiya upay ek alaukik shakti ka punjbhut svarup hi hai. yah kam karte hain. kaise karte hain ye to isi vishvas par nirbhar karta hai ki dahi chini khakar agar ghar se niklen to yatra safal hoti hai, ninbu mirchi ko kisi naye vahan ya ghar karyashala par lagane se uski shubhta badh jati hai, ya chote bachche ko najar se bachane ke lie kale tika ka lagana.