रमल प्रश्न ज्योतिष

ramal prashn jyotish  

Ank ke aur Lekh | Sambandhit Lekh | Views : 6991 |  
ramal prashn jyotish chandrakant ji. shevale vastav men ramal jyotish bhartiya mul ka shastra hai. nepoliyan prashn pranali ka mul srot bhi ramal vidya hi hai. is shastra ke prachar prasar men yavan vidvanon ka yogdan hone se ise yavniya jyotish bhi kaha jata hai. is alekh men shri chandrakant ji shevale is shastra ke purvapar ki purn jankari sankshep men de rahe hain. jisse is vidya ke sahaj jigyasu janon tatha vigyajanon ko saman rup se gyanarjan hoga. duradarshan par kuch sal pahle pradarshit hue dharavahik 'chandrakanta' men ramal pandit evan ramal jyotish am darshakon ke liye bahut hi alag evan lokapriya bat bani thi. dharavahik 'chandrakanta' ke nirmata evan lekhak tatha digdarshak adi sabhi ne apne apne tarike se yah bat dikhlai. parantu vastav men yah ramal jyotish ek shastra hai aur dharavahik men dikhai gai baton se bhinn hai. mathitarth ki bat matra itni hain ki, puratan kal se ramal shastra prachlit hai. dvapar yug men is shastra ka prachlit hona is bat ka sabut hai. itihas men jimutvahan ke darbar men rahe vishnugupt sharma is shastra ke uttam gyata the. pandvon ke darbar men may bhi is vidya men pravin the. parmpujya adya shankracharya bhi is shastra ka gahan gyan rakhte the. ramal shastra ke adhar par hi, raja sudhanva ke darbar men band ghat men kya rakha gaya tha iska sahi sahi javab diya tha. maharashtra ke param adhyatmik guru evan sant mahatma gulvni maharajji ki mrityu kis din hogi, ise ek ramalagya ne pahle hi bata diya tha. maharashtra ki rajniti ke neta shrisudhakrrav naik mukhymantri banenge aisi bhavishyavani bhalchandra vidyalay ki ek chatra ne ramlshastra ki sahayta se ki thi jo sahi nikli. shri naik ji ke bad kaun banega maharashtra ka mukhymantri is ka sahi anuman bhi isi shastra ke sahare nikala tha. nepoliyan prashnapranali ka mul srot bhi ramlvidya hi hai. isvisan ki pahli athva dusri sadi men anya vidyaon ke sath arab is shastra ko apne desh le gae aisa hinduon ka dava hai. is shastra ka prasar yavan maulviyon ne kiya isliye ise 'yavniya jyotish' bhi kaha jata hai. is shastra ke prachar evan prasar men adam, daniyal, lukman, hakim adi ka mahatvapurn yogdan raha hai. vishvavijeta sikandar ke sath maulvi surkhav hamesha raha karte the. uske apne jyotish salahkar maulvi surkhan hamesha raha karte the. sinkandar ke sath ve bhi bharat ae tab se is shastra ka prachar prasar bharat men hua aisa yavnon ka manna hai. jan kalyan ke liye upyukt anya shastron jaisa hi is shastra ka udgam uma-maheshvar ke dvara hua hai. aisa mana jata hai . mata-pavarti ne bhagvan shankar se sarvakalin shastron ka gyan vishad karne ki vinti ki aur is shastra ka janm hua. dvapar yug ke uttararddh men kisi vidvan yuvak ne shivji ki prakhar aradhna ki aur shivji ke prasann hone par unse bhut, vartaman evan bhavishya ko janne ka gyan prapt hone ka vardan manga. shivji ne tab use 'purva rachit ramal vidya' ke gyan ka vardan diya aur kaha ki prithvi par is gyan ke udgata ke rup men tumhen samman milega aur tum 'adm' nam se jane jaoge. yatha samay adam ke anuyayiyon ne is vidya ka prachar evan prasar kiya. isiliye bhartiya is bat ka dava karte hain ki is ramlvidya ka udagam evan is shastra ka prasar bhi yahin par hua hai. puratan kal se panse istemal hone ki vajah se ise ramlshastra kaha jata hai aisa bhi gyani logon ka manna hai. ham bhartiyon ki tarah yavan bhi is bat ka dava karte hain ki yah shastra unke desh se hi sabhi jaghon par pahuncha hai. unke anusar hajarat daniyal al his salam ne rajasthan ke registan men muhammad paiganbar ki ibadat ki or nemte mangi ki, '' ya khuda, bharat men islam ko pukhta banane ke liye mujh par mehar najar kar. aisa ilm de ki jiski vajah se am log mujh par be-intiha yakin karen aur main islam ki jaren majbut kar sakun.'' daniyal ki is prarthana se khush hokar hajarat jibrail aliyas salam (paiganbar ke dut) pragat hue aur unhonne daniyal ko registan ki reti men apne panjon ko hatheli ki or se dabane ke liye agya di. us dabas se reti men jo akriti nirman hui usi ke gahre abhyas se is shastra ka nirman hua. ramal shabd ka arth bhi reti hai. chunki ret men is shastra ka nirman hua, islie ise 'ramal shastra' kaha jata hai. yavan logon ka yah dava unke dvara prachar evan prasar karne ki vajah se kiya jata hai. donon pakshon ka vichar karne par kis par vishvas jataya jay yah mudda vivadaspad ho sakta hai. satya kuch bhi ho hamara matalab to is shastra ke gahan adhyayan se jura hain. filhal yah shastra pichar gaya aisa lagta hai. iska ek mahatvapurn karan yah hai ki, prachlit samaj men iske bare men faili afvaen ! udaharan ke taur par yah kaha jata hai ki, is shastra ke adhar se yadi bhavishya batlaya jay tab us vyakti ke vansh ka nash (nirvesh) ho jata hain, us vyakti ka ant kal duahkhad ho jata hai, use pagalapan ke jhatke lagte hai, ishvar ki avkripa hoti hai evan uske pure kutunb kabile ko bahut se klesh evan dukh jhelne parte hain. isvi san bis ke shatak ke madhya se yah shastra bari teji se pichrta gaya. (keval maharashtra men hi nahin varan pure bharat bhar men mila kar kul sat-ath ramal visheshagya hain. pichle kuch salon se do-tin jyotish sansthaon ne yah vishay prachar hetu apnaya hai. ramal kundli men solah sthan hote hain jabki falit jyotish kundli barah sthanon ki hoti hai. kundli ka yahan matalab 'jantri' hota hain. ramal jantri taiyar karne ki anek paddhatiyon men se 'paso' ko faink kar taiyar hone vali jantri ki paddhati sarvashreshth anki gai hai. 'posa' taiyar karne ke liye tanba, pital, chandi, nikal, sona, sisa aur loha in sat dhatu ka pramanit mishran istemal hota hai. in pason ko taiyar karne ki vighi ka praman sahit, akar evan khudai sahit ''ramal pravesh'' namak pustak men darshaya gaya hai. ramal shastra ka muladhar-prithvi, jal, tej aur vayu-char tatva hain. in char tatvon, nav grah, aur ramal jantri ke solah sthan adi ka mel pakar bhavishya kathan kiya jata hai. kuch mahatvapurn prashnon ke javab pane ke liye ek bahut hi saral paddhati ka avlanban kiya jata hai. jabav agar sahi sahi pana ho to prashnakarta ko prashn bhi antrik satyata se puchna ati avashyak hota hai. anubhav yahi kuch darshate hain. prastut lekh men paso ke alava prashn ka uttar pane ke liye bahut hi asan tarika bataya gaya hai. pason ke badle 1 se 16 ank alg-alag likhe hue patton ka istemal kiya hai. yah solah patte ap tash ke pattaon se bhi chun sakte hain. pratyek patte ki ek or kagaj chipkakar us par 1 se 16 ank likh len. tash ke patton ke alava koi bhi solah patte ap le sakte hain. udaharan solah vjiiting kardas, jis par 1 se 16 ank likhe hon. 1 se 16 ank ramal jantri ke solah sthanon ke tatha solah shaklon ke nirdeshak hain. jaise ank 1 lahman shakal, 2 ank kabjtul 3. kharij shakal, 4 ank jamat shakal, 5 ank farha shakal, 9 ank bayaj shakal, 5 ank farha shakal, 6 ank ukla humra shakal, 9 ank bayaj shakal, 10 ank nustatul kharij shakal, 11 ank nustatul dakhil shakal, 12 ank utpatul kharij shakal, 13 ank naki shakal, 14 ank utpatul dakhil, 15 ank ijjatama shakal ka, 16 ank tarikh shakal ka nirdeshak hain. yah solah shaklon ka vibhajan sabin svarup ke char, dakhil svarup ke char, munaklib svarup ke char aur kharij svarup ke char shaklon men kiya hain. uske nam aur kramank - sabit svarup ke char shakal (jamat namka shakal jiska kramank 9 hai aur ijjatama namka shakal jiska kramank 15 hai), dakhil svarup ke char shakal (kabjtul dakhil jiska kramank 2 hai, ankish namka shakal jiska kramank 11 hai, nustatul dakhil jiska kramank 14 hai) kharij svarup ke char shakal (lahyan namka shakal jiska kramank 1 hai, kabjtul kharij namka shakal jiska kramank 3 hai, nustatul kharij namka shakal jiska kramank 10 hai aur utpatul kharij jiska kramank 12 hai) munaklib svarup ke char shakal (farha namka shakal jiska kramank 5 hai, ukla namka shakal jiska kramank 13 hai aur tarikh namka shakal jiska kramank 16 hai. prashnon ka vibhajan 'agm' aur 'nirgama' aise do hisso men kiya hain. agam svarup ke prashnon ka jabab han men ane ke lie 'sabit' (jamat (4), humra (8), byaj (9), ijjatama (15) ye) athva 'dakhil' (kabjtul dakhil (11), utpatul dakhil (14) ye) shaklon men se koi bhi ek shakal ana jaruri hai. udaharan ke lie nasib men santan sukh hai ya nahin? kya naukri milegi? kya makan banega? kya nai karki kharidi ho paegi? dhanlabh hoga? urja milegi ye prashn agam svarup men ate hain. atah is prakar ke prashnon ka uttar han men ane ke liye 2, 4, 7, 8, 9, 11, 14, 15 kramankvala koi bhi ek patta ana chahie. 'nirgama' svarup ke prashnon ka javab han men ane ke lie kharij (lahyan (1) kabjtul kharij (3), nustatul kharij (10) utpatul kharij (12) ye) athva munaklib (farha (5), ukla (6), naki (13), tarikh (16) ye shaklon men se koi bhi ek shakal ana chahie. kya rog thik ho jaega? videsh yatra hogi? kirayedar makan chorke jaega? rinmukt hone ka avasar hai? ye prashn nirgam svarup men ate hain. atah is prakar ke prashnon ka uttar han men ane ke lie 1, 3, 5, 6, 10, 12, 13, 16 kramankvala koi bhi ek patta ana chahie. adhik spashtikaran ke lie nimn udaharan drishtavya hai. 1 dhan ka labh hoga kya? is prashn ka han men uttar ane ke lie prashn karta ko 2, 4, 7, 8, 9, 11, 14, 15 kramankvala koi bhi ek patta nikalna jaruri hai. prashn 'agm' svayap ka rahne se dakhil ya sabit shaklon ka kramank ana jaruri hai. yahan niyam ke anusar 2, 7, 11 aur 14 kramank dakhil shakal ke svarup ke hai. 4, 8, 9 aur 15 kramank sabit shakal ke svarup ke hai. 2. kya bimari se chutkara milega? is prashn ka 'han' men uttar ane ke lie prashnakartta ko 1, 3, 5, 6, 10, 12, 13, 16 kramank vala koi bhi ek patta nikalna jaruri hai. prashn nirgam svarup ka rahne se javab han men ane ke lie kharij ya munaklib shaklon ka kramank ana jaruri hai. yahan niyam ke anusar 1, 3, 10 aur 12 kramank kharij shakal ke ruvrup ke hain. 5, 6, 13 aur 16 kramank munaklib shakal k svarup ke hain. prashn ka uttar pane ke liye jatak ne (prichchaka) solah patton men se koi bhi ek patta chunna hai. patta chunne ka tarika solah patte fentakar jatak ke samne rakhne ke bad, jatak usmen ka ek patta chun leta hai. ank likha hua bhag nicha hone se kaun sa ank ka patta chuna jata he yah chunne ke samay malum nahin hota hai. patta chunne ke bad jo ank ata hai us ank ke anusar uttar mil jata hai. is tarah ap kisi bhi prashn ka uttar de sakte hain. is bhavishya kathan men ek truti hai; 'kalnirnaya' ismen nahin kiya jata. jis prashn ka uttar 'han' ya 'na' men hai uske lie hi yah 'ramal prashn jyotish' hai. jinhen jyotish nahin ata unke liye to vardan hai. vaise bhi 'ramal jyotish' bahut hi asan hai. koi bhi jigyasu vyakti keval ek hi din men use sikh sakta hai.
Kya aapko lekh pasand aaya? Subscribe
Kya aapko lekh pasand aaya? Subscribe


navavarsh visheshank  January 2011

varsh 2011 ke navavarsh visheshank men rajnitik dalon v netaon ke bhavishya ke sath-sath bharatavarsh ka navavarsh kaisa rahega adi vishyon par vistrit charcha ki gai hai. soniya gandhi ki janmapatri ka jyotishiya vishleshan kiya gaya hai sath hi 12 mahinon ka vistrit rashifal bhi diya gaya hai.

Subscribe

Apne vichar vyakt karein

blog comments powered by Disqus
.