har grah ke karak ghar, sthayi ghar, uchcha-nich ghar adi nishchit hain. fir bhale hi vah grah ‘atithi’ bane ya kirayedar! grah ka samay pura hone par grahrupi diya bujh jaega. har grah uski apni rashi men, bhale hi vah rashi anya grah ki karak kyon n ho, shubh fal hi dega. grah jis ghar men baitha hoga us grah ki chijen sthapit karne se uska prabhav barhega. udahrnartha-ketu naunve ghar men baitha ho to kutta palne se ketu ke prabhav men barhottari hogi. naisargik janmakundli men dusre ghar men shukra ki rashi rahti hai evan dusra ghar brihaspati ka karak hai. yahan shukra baitha ho to uske shubh fal prapt honge. tisre ghar men budh ki rashi rahti hai. tisra ghar mangal ka karak hai. mangal shubh ho to yahan budh ka bhi shubh fal milega. chaithe ghar men chandra ki rashi kark ati hai. rashi svami chandra hai.
yahan rahu ka ashubh fal prapt nahin hota. varsh janmakundli men rahu chaithe ghar men baithe to rahu ke karya-makan ki chat badlna, koyle ki boriyon ka sangrah karna, naya taeylet banvana, kale admi ko sajhedar banana jaise kam nahin karne chahie anyatha jhagre hote rahenge. panchven ghar men surya ki rashi sinh rahti hai. is ghar ke karak grah brihaspati tatha surya hain. is ghar men iske shubh fal hi prapt honge. chathe ghar men budh ki rashi kanya parti hai. yah ketu ka karak ghar hai. yahan budh ke shubh fal milte hain. yahan ketu hone par uski chijon par bura prabhav parega. budh-ketu sath men baithe hon to budh ke achche aur ketu ke bure fal milenge. satven ghar men shukra ki rashi tula rahti hai. yah ghar shukra evan budh ka karak ghar hai. yahan shukra ke shubh fal milte hain evan budh dusre grahon ki madad karta hai. athven ghar men mangal ki rashi vrishchik rahti hai.
yah mangal, shani evan chandra ka karak ghar hai. ye tinon grah janmakundli men alg-alag gharon men baithe hon to achcha fal prapt hota hai. ikatthe hone par ashubh fal dete hain. varshafal men athven ghar men ashubh grah ane par uske ashubh fal hi milenge. lal kitab ke anusar nauvan ghar bhagya ka aranbh aur kismat bhi batlata hai. janmakundli men is ghar ka sarvadhik mahattva hai. sari janmakundli ke fal ko nauvan ghar prabhavit karta hai. jatak ke purusharth rupi karmon ka antim nirnay bhagya se hi hota hai. kal ke tinon khandon men bhutkal is ghar ka vishay hai. nauven ghar men brihaspati ki rashi dhanu parti hai. iska karak brihaspati hai tatha shani rashifal ka hai aur brihaspati grahafal ka. shani ka koi upay nahin, brihaspati ka upay hai. is ghar men brihaspati aur surya ke achche fal prapt hote hain. dharti ke niche rahne vali vanaspati ka yah karak ghar hai.
dasvan ghar vishvasghati mana jata hai. is ghar men baithe grah vishvasghati hote hain. vishvasghati grah dusre evan gyarhven ghar men labhdayak bante hain. gyarhvan ghar brihaspati ka sthayi ghar hai. yahan shani shubh fal deta hai. shani ke alava kafi grah ashubh fal pradan karte hain. gyarhven ghar men shani ki rashi kunbh parti hai. is ghar ka karak grah shani hai. janmakundli men shubh ya ashubh grah jab khud ki apni rashi men ya karak ghar men ate hain tab shubh fal dete hain. janmakundli men baitha uchch grah jab varsh janmakundli men bhi uchch ka hokar baithe tab uchch shubh fal deta hai. brihaspati janmakundli men uchch ka ho aur varsh janmakundli men dusre ya chaithe ghar men ho tab shubh faldayak hoga. surya, chandra, mangal ye purush grah din men, budh, shani, rahu, ketu ye napunsak grah savere evan sham ko prabhavi bante hain. koi bhi ashubh ya shubh grah chahe jis ghar men baitha hua ho, vah nimnanusar anya gharon men bhi faldayi hoga.
- brihaspati-shukra ashubh asrdar hon to dusre aur chaithe gharon men bhi ve ashubh fal denge.
- pahle ghar men budh hone par surya, mangal tatha shani bhi faldayi honge.
- dusre ghar men brihaspati hone par shukra bhi faldayi hoga.
- tisre ghar men budh hone par mangal evan shani bhi faldayi honge.
- chaturth ghar men brihaspati hone par surya aur chandra bhi faldayi honge.
- panchven ghar men brihaspati hone par surya, rahu v ketu bhi faldayi honge.
- chathe ghar men ketu hone par shukra bhi faldayi hoga.
- satven ghar men shukra hone par budh bhi faldayi hoga.
- athven ghar men mangal hone par shani, chandra bhi faldayi honge.
- nauven ghar men brihaspati hone par anya grah faldayi nahin honge.
- dasven ghar men shani hone par rahu-ketu bhi faldayi honge.
- gyarhven ghar men shani hone par brihaspati faldayi hoga.
- barhven ghar men rahu hone par brihaspati, shani faldayi honge.