कैलाश मान सरोवर एक अदभुत अनुभूति

kailash man sarovar ek adbhut anubhuti  

Ank ke aur Lekh | Sambandhit Lekh | Views : 2609 |  
kailash mansrovar ek adbhut anubhuti kalash mansrovar kshetra ya manas khand kshetra yadyapi kashmir se bhutan tak faila hai, kintu kailash lhachu aur jhangchu ke bich sthit hai. tibbat 12,000 se 10,000 fit tak ka sabse uncha pathar hai. is kshetra men char pramukh pavitra nadiyan niklti hain - brahmaputra, sindhu, karnali v satalaj. kailash mansrovar yadyapi chin ke adhin hai lekin hinduon ka sabse pavitra divya dham mana jata hai, kyonki yahan svayan shiv ka nivas hai. kailash hinduon ka hi nahin anya kai dharmon ka adhyatmik sthal hai. yahan puja aradhna ke lie bauddh, hindu, jain tibbati lama sabhi ate hain. bauddh iska sanbandh tantrik devta chaksanbhav v sahyogi vajravarahi se mante hain. jain dharm men kailash parvat pratham tirthankar rishabh dev ki pavan sthali hai. yahin unhonne gyan prapt kiya aur iske nikat ka ashtapad parvat unki nirvan sthali hai. ismen andar bari bari gufaen hain jinmen jal ki bunden tapak tapak kar vichitra akritiyan banati hain. ek stanbh par ek chehra spasht bana hua hai jise jain pujya mante hain. tibbati lama kailash ko prithvi aur svarg ke bich ki kari mante hain - ek shakti srot. vedon men kailash sumeru ya meru parvat ke nam se jana jata hai. samudra manthan ke samay ise hi mathni banaya gaya tha. ise prithvi ka madhya mana jata hai. kailash parvat ke sabse nichle hisse par ari dhariyan hain. inhen shesh nag ke gharshan se bani dhariyan mana jata hai. kailash shiv dham hai, shiv ka sinhasan hai. jisne shivatva prapt kiya ho vahi us par charh sakta hai. aj tak kisi ne us par pair nahin rakha hai. parikrama bhi parvat se tin kilomitar dur se lagai jati hai. parvat ki unchai samudra tal se 22027 fut hai. kaha jata hai yudhishthir draupdi aur bhaiyon ke sath isi parvat par charhe the lekin sab raste men gal gaye keval yudhishthar upar tak pahunche the. aspas shushk pahar hai, aktubar se in par bhi varf girni praranbh ho jati hai. sada badlon se ghira rahne vala kailash jab surya ki kirnon men chamkta hai to lagta hai jaise chandi ka parvat jhilmila raha ho. dakshin men gurla mandhata kuch age se tircha hai jo aisa lagta hai jaise kailash ko sir jhuka kar naman kar raha ho. kailash ki parikrama is yatra ka sabse kathin kintu sabse sukhad hissa hai. pura parikrama marg sundar jharne, hariyali varf adi se dhaka hai. gauri kund man parvati ka snan kund mana jata hai gahrai men sidhi utrai vala vrittakar behad svachch nila jal, us tak achche kushal parvatarohi hi pahunch pate hain. pure parikrama marg men anek gufaen hain jahan sadhu sant tapasya karte rahte hain. kabhi kabhi parikrama karne valon par hanumanji ki bhi kripa ho jati hai aur ve unhen darshan de dete hain. parikrama darchen se praranbh hoti hai aur darchen ke dusre hisse par samapt hoti hai. kaha jata hai ki shiv ki puri parikrama nahin lagai jati. kar se kailash man sarovar ki yatra karne valon ke lie parikrama marg ab 42 kilomitar rah gaya hai. pahle 52 kilomitar ki yatra karni parti thi lekin kar marg ban jane se das kilomitar ki yatra kam rah gai hai. is yatra men tin din lagte hain. yatriyon ko yah yatra pahle din barah kilomitar karai jati hai. yatra yam dvar se praranbh hoti hai. derapuk pahunchne men ath ghante lagte hain. dusre din ka parikrama marg sabse kathin hai. lekin marg ki sundrta sab thakan mita deti hai. isi marg par gauri kund hai. yah parikrama marg 22 kilomitar ka hai jismen 9 kilomitar sidhi charhai hai aur sat kilomitar sidhi dhalan. baki ka marg sidha sahaj hai. dolma darra din men hi par kar lena achcha rahta hai. islie is marg ko is hisab se banta gaya hai ki pratah barah baje tak dolma darra par ho jae. tisre din ka das kilomitar ka marg bhi sahaj hai. ismen sat ath ghante lagte hain. ratri vishram tent men karna parta hai. abhi tak parikrama paidal ya yak par ki jati thi lekin ab iske lie ghore upalabdh ho gae hain. chin sarkar dvara yatra marg ko suvidhapurn bana dene ke karan yatri adhik sankhya men pahunch rahe hain. bharat se hi nahin anya deshon se bhi bari sankhya men yatri yahan pahunch rahe hain. ghore par keval savari ja sakti hai uska saman nahin. islie portar sath rakhna avashyak sa ho jata hai. portar tibbati hi hote hain. unka vastra vinyas lanba choga aur lanbi topi ya fir chota uni labada, niche uni pajama sir par gol fundne vali topi hai. ye portar yatra men bahut sahayak hote hain. ye saman to pakrte hi hain khatrnak raste hath pakar kar par bhi kara dete hain. yadi sathiyon se piche rah gae to margadarshak hote hain. bhasha ki samasya to ati hai lekin sanketik bhasha vishvavyapi hai jisse kam chal jata hai. man sarovar brahma ji ke manas se utpann hua vishva ka sabse uncha mithe jal ka vishal sarovar hai. yah sarovar 8.5 kimi ke vyas men faila hai. ismen kahin kahin pani 100 mitar tak gahra hai. yah 14950 fut ki unchai par sthit hai. bauddh granthon men man sarovar ko ‘anopta’ ya ‘anvtpta’ kaha jata hai -jhil bina tap vali aur bina kasht vali. svachch, nirmal v mithe jal ke is sarovar ka rang pal pal badlta rahta hai. is kshetra men prakriti ke panchon tatvon ki anubhuti ki ja sakti hai. kailash parvat jo barah mahine him se dhaka aur hariyali se paripurn rahta hai vahin man sarovar mai ke pashchat shushk ho jata hai. hariyali ke nam par vrittakar rup men dur dur par choti vanaspati kahin kahin ugti hai jise sthaniya nivasi sabji ke rup men prayog men late hain. ek prakar ki lanbi ghas ugti hai jise pyaj ke rup men jana jata hai. man sarovar ke aspas kush ghas pai jati hai -ekadam kari tikhi. kahin kahin dur dur par chote ful vale paudhe dikh jate hain. inmen baingni aur pile rang ke ful adhik hote hain. kahte hain ki sukhne par bhi unka rang rup nahin badlta hai. man sarovar par surya ka tap hai to tikshn aur behad thandi hai. akash lagta hai chand sirhiyan laga kar chua ja sakta hai. jal chahe jab baras jata hai. is prakar panch tatva apni upasthiti ka ehsas karate hain. man sarovar ka jal rat men bahut thanda kintu din men surya ke tap ki vajah se kam thanda hota hai. sardiyon men jhil jam jati hai. mai, jun v julai ka samay yatra ke lie shreshth hai. kahte hain man sarovar men snan karke kailash parikrama karne se manushya bhav bandhan se mukt ho jata hai aur mrityoprant shiv men ekakar ho jata hai. man sarovar men moti hain ya nahin yah to nahin kaha ja sakta lekin hans kilol karte dekhe ja sakte hain. jan shruti hai ki man sarovar ke bich men ek per hai jis par har samay fal lage rahte hain. jo vah fal kha leta hai vah devatva prapt kar leta hai. man sarovar men jal gurla mandhata parvat se ata hai aur kailash parvat ka jal rakshas tal men jata hai. rakshas tal vahi sthan hai jahan ravan ne shiv ki aradhna kar das shish charhae the. rakshas tal ke ek or gurla mandhata aur dusri or kailash parvat hai. yah purva se pashchim ki or lanba hai. yadyapi rakshas tal ka pani bhi man sarovar ki tarah svachch aur uska rang bhi nila hai lekin n usmen snan kiya jata hai n use piya jata hai. usmen sise ki matra adhik hai. us ke aspas ke patthar v mitti vajni hai. kailash man sarovar kshetra ko tibbati lama bhi bahut pavitra mante hain. sthan sthan par yak ke pavitra singon ko sthapit karte hain, manyata svarup uski parikrama karte hain aur jhande aur chindiyan bandhte hain. darchen men yamadvar se das kilomitar purva tibbatiyon ka stanbh hai. unki manyata hai ki jo kailash parvat ki parikrama n laga pae vah us stanbh ki tin parikrama laga le to kailash parikrama ka punya milta hai. purnima ki ratri ko shukra behad chamkila dikhai deta hai aur man sarovar ke nikat a jata hai. manyata hai ki do jyotiyan ratri ke tritiya prahar men akash se utar kar mansrovar men snan karne ati hain anya devi, devta, rishi, muni adi bhi taron ke rup men mansrovar men snan karne ate hain. mahan shaktiyon ki sarovar ke upar anubhuti hoti hai. mansrovar ki parikrama hodechu ganv se praranbh hoti hai. vahin chote se tile par chiyu gonpa avasthit hai. ismen lamaon ke guru ke chitra v murtiyan sthapit hain. uske pas hi ek parvat hai jis ki mitti lal hai. kahte hain usmen sona paya jata hai. hodechu se chah kilomitar dur serulam gonpa hai. ismen bhi lama guruon ke chitra, murtiyan v dharm granth rakhe hain. prachin pandulipiyan rakhi bhi hain. unhen dekhakar kahin bhi nahin lagta ki ham hindutva se dur kisi dusre dharm ke samne khare hain. kamovesh unke devi devtaon ka svarup hindu devi devtaon jaisa hai. vaise to pure mansrovar ki mitti pavitra mani jati hai lekin seralum gonpa ke samne ki mansrovar ki mitti panchdhatu ki mani jati hai iski reti men chandi v sona dhatuen mili hain.
Kya aapko lekh pasand aaya? Subscribe

Kya aapko lekh pasand aaya? Subscribe


vastu visheshank  December 2007

grih vastu ke niyam evan upay, uddhogon men vastu niyamon ka upyog, vastu dvara mandir men adhyatam vriddhi, shahri vikas evan vastu, piramid evan vastu, aspatal, sinema ghar evan hotal ke vastu niyam, vastu men jal urja ka sthan

Subscribe

Apne vichar vyakt karein

blog comments powered by Disqus
.