सुखी गृहस्थ जीवन एवं ज्योतिष योग

sukhi grihasth jivan evan jyotish yog  

Ank ke aur Lekh | Sambandhit Lekh | Views : 2276 |  
sabse praranbh men yah prashn vicharniya hai ki kya vivah karna avashyak hai? prachin ved puranon men manav jivan men palan ke lie char ashramon ki vyavastha ki thi ve hain - brahmacharya ashram, grihasth ashram, vanaprasth ashram aur sanyas ashram. prachin kal men isi vyavastha ke lie bachchon ko guru kul bhej diya jata tha. vahan bachche brahmacharya vrat ka palan karke vidya adhyayan karte the. fir apne mata-pita ke pas vidya adhyayan ke pashchat akar grihasth ashram men ane ke lie vivah sanpann hote the. vivah karna avashyak kyon hai iske uttar men sankshep men ham yah kahenge ki jis manushya ke man men bhogechcha hai ya jo apni vansh paranpra chalana chahta hai to aise vyakti ko vivah karna chahie. kyonki grihasth ashram hi sab ashramon ka palak hai. manushya sharir aur grihasth ashram uddhar karne ka khas jariya hai. bhog bhogne aur aram karne ke lie yah manushya sharir nahin hai. prani matra ki hit ki bhavna rakhte hue grihasth ashram men rahna chahiye aur apni shakti ke anusar tan-man, buddhi, dhan adi ke dvara dusron ko sukh pahunchana chahie. dusron ki sukh suvidha ke lie tyag karna manushyata hai. isi ke sath ishvar ka chintan, manan satat karne se moksh prapti hoti hai. vaidik riti ya anya samaj men manya riti rivaj se sanpann vivah ki manyata samaj men hoti hai. bhartiya samaj men stri-purush ka bina vivah sanpann kiye sath men rahna uchit nahin mana jata. unhen samaj men adar prapt nahin hota. islie yadi uproktanusar vivah karna avashyak hai to apne vansh paranpra ke anusar vidhan se vivah sanpann karana chahie. aise vivah ki manyata samaj men hoti hai. ab ham jyotish ke anusar vivah ka vishleshan karenge. janmapatrika men saptam sthan vivah sthal mana jata hai. larka ho ya larki - us sthan men gaye hue vibhinn grah ke gun, dharm, svabhav, somya krur grah, pap grah adi ki vyakhya karke vaivahik jivan ka vichar kiya jata hai. isi ke sath yah bhi yad rakhne yogya bat hai ki pratyek prani apne bhagya ke anusar fal bhogta hai. karm ke siddhant ke anusar kanya bari ho jay to bhi vivah ki vishesh chinta nahin karna chahiye kyonki vah kanya apna prarabdh lekar ayi hai aur usko anukul ya pratikul paristhiti uske prarabdh ke anusar milegi. mata-pita ko to uske vivah ke vishay men yah vichar karna hai ki jahan kanya sukhi rahe, vahin uska vivah sanpann karna hai. aisa vichar karna mata-pita ka kartavya hai. parantu ham usko sukhi kar hi denge, uska achcha parivar mil hi jayega, yah hamare vash ki bat nahin hai. hamen apne kartavya ka palan karna hai, par chinta nahin honi chahiye. nimnalikhit jyotish yog vale vyakti ka vaivahik jivan uski patni ke pativrat dharm ka palan karne ke karan sukhi rahta hai. aise yog vale vyakti birle hi hote hain. yadi kisi larke ki janmapatrika men aisa yog ho aur janmapatrika larke -larki ki uttam milti ho to vivah sanpann karna shubh rahta hai. uprokt yog ki paribhasha niche di gai hai. 1. saptamesh chaturth bhav athva dasven bhav men gaya ho to stri pativrata hogi. 2. saptamesh ravi ho aur vah shubh grah se drisht ho to stri pativrata hogi. 3. saptam bhav ka svami shukra ho aur vah shubh grah se drisht ho to pativrata stri vala hoga. 4. saptam bhav men guru gaya ho to dharmashila aur pativrata stri vala hoga. nimnalikhit yog men bhi sushil, dharmashila patni milne ke sanbhavna rahti hai. 1. saptamesh athva saptam ka karak grah (shukra) shubh grah se yut ya drisht ho, ya shubh grah ke madhya gaya ho to achchi patni milegi. 2. saptam bhav men shubh grah ki rashi ho to achchi patni milegi. 3. saptam bhav ko guru dekhta ho to sushil patni milegi. aise grah yog adi kisi kanya ki patrika men ho to use sadmarg par chalne vala aur ek patnivratdhari pati milne ki sanbhavna rahegi. nimnalikhit grah yog hon aur ukt yog vale grah ki mahadsha ya antardasha nikat bhavishya men ane vali ho to ukt samay vivah vichched (talak) ki sanbhavna rahti hai. aise grah yog vale vyakti (larke-larki) ka vivah bahut soch-vichar kar karna chahiye. saptamesh, ashtam men ya ashtamesh saptam men ho aur ukt saptamesh ya ashtamesh markesh ki shreni men ata ho ya saptamesh krur grahon ke madhya pancham ya anya sthan men ho aise grah yog ke kuch udaharan vastavik prakrnon dvara niche diye ja rahe hain. 1. kanya janm dinank 23.12.1971, janm lagn kanya evan rashi kunbh. is kanya ki patrika men ashtamesh mangal saptam (vivah sthan) men baitha hai mangal ke karan vivah vichched hua. 1995 men vivah hua. vivah ke ek mah bad se pati-patni vivah vichched ki kanuni larai larte hue larki ne talak le li hai aur dusra vivah kar liya hai. 2. anya prakaran men kanya ki janm dinank 18.06.1969 hai mithun lagn evan kark rashi, is prakaran men saptamesh guru ketu ke sath chaturth men hai. vivah ke kuch mah pashchat vivah vichched ho gaya. iska vivah bhi san 1995 men hua tha. 3. tisre prakaran men mahila ki janm dinank 16.08.1953 hai. inki janm lagn kanya hai evan rashi tula hai. rashi se saptamesh mangal ekadash sthan men ketu evan surya, budh ke sath hone se san 1992 men vivah vichched hua. parantu pati apni patni ka abhi bhi bharan poshan thik se kar rahe hain. inke pati ki kark lagn evan mithun rashi hai. rashi se saptamesh guru ashtam sthan men panchmesh ke sath hai. pati ne dusra vivah kar liya hai. inke atirikt aur bhi kai prakrnon ka vishleshan ukt niyam ki pushti karta hai. aise prakrnon men sanbandhit grah ke mantra, jap, ukt grah ke dan niyampurvak karne se vivah vichched rukne ki sanbhavna prabal rahti hai. kai aise grah yog vale vyaktiyon ke dvara vivah purva hi pirit evan piradayak grah ke mantra jap karane evan grah sanbandhi samagri dan karne se is prakar ki kathinaiyon se bach sakte hain. pirit grah evan piradayak grah ka rashi ratn kabhi bhi dharan nahin karen anyatha labh ke sthan par nuksan ki adhik sanbhavna rahti hai. yadi aise grah yog patrika men hai to grah ke mantra jap evan dan ke atirikt pati-patni ko sadbhav se rahne ki salah dene se aur unke dvara palan karne se bhi achche parinam samne aye hain aur aise pati-patni sukhi jivan ji rahe hain. kai prakrnon men shri shiv ki aradhna se pati-patni ka samjhauta hua hai. yah upay bhi achuk hai. jyotish granthon men ullekh aya hai ki nimnalikhit grah yog vale vyakti apni patni-pati ke prati purn samarpit nahin rahte hain. vivah purva is vishay men khojbin kar len to uttam rahta hai. parantu aise yog ki patrika men ukt yog vale grah par guru ki drishti ho to ukt yog ka bura yog kshin ho jayega. iski sukshm parikshan karna avashyak hai. nimnalikhit yog stri purush donon ki patrika men saman rup se lagu hote hain. 1. shukra aur mangal saptam ya dasham men hona bhi isi shreni men ata hai. yani manushya vyabhichari hoga. 2. isi prakar ka yog shukra aur mangal ka dasham aur chaturth ke svami hone se hota hai. 3. chandrama se dasham men shukra se dasham bhav men shani bhi yah yog banata hai. 4. shukra ki rashi men gaye hue budh, shukra aur shani saptam ya dasham sthan men hone se yah yog banta hai. 5. saptamesh, dhanesh aur dashmesh ye tinon grah dasham men gaye ho. 6. pap grah se yut kshin chandra saptam bhav men gaya ho athva ashtamesh navmesh ek rashi men ho to saptamesh pap grah se yut ho. uprokt niyam kramank do ke anusar ek adhikari jiski janm dinank 21.03.1953 hai aur tula lagn, vrish rashi hai-use shukra evan mangal (svagrihi) saptam sthan men hai parantu sath men guru bhi saptam men hone se vah sadachari ek ek patnivrat dhari hai. is karan uprokt yog ka vishleshan karte samay shubh grah ki drishti ka avashya dhyan rakhen. uprokt niyamon ke anusar ek aur janmapatrika men uprokt niyam tin ke anusar hi shukra mangal sath men hai aur donon rashi se chaturth evan dasham ke svami hai. inki janm dinank hai 01.07.1934 varsh lagn evan kunbh rashi hai shukra mangal lagn men hai yah rashi se chaturth evan dasham ke svami hai parantu kanya ka guru un par navam purn drishti se dekh raha hai is karan inke vivah dinank 11.06.1949 se abhi 60 varsh tak sukhpurvak grihasth jivan men hai. pote-poti bhi sath men hain ek aur niyam grihasth jivan men kalah ke bij bo sakta hai-vah hai panchmesh saptam men aur saptamesh pancham sthan men ho ya panchmesh aur saptamesh ki yuti kisi sthan men janmapatri men ho. pancham sthan prem sanbandh, pranay sanbandh ka hai atah iska svami saptamesh (vivah sthan ke svami) se sthan parivartan karta hai to prem vivah ki prabal sanbhavna rahti hai. atah vivah purva is niyam ki avhelna karke vivah sanpann nahin karana chahie. mata-pita yogya jyotishi se kanya var ki janmapatrika parikshan kara kar hi nirnay leven. 1. manniya shri rajesh khanna prasaddhi film star ki janm dinank 29.12.1942 hai aur uski mithun lagn evan sinh rashi hai lagn se panchmesh, shukra saptam men budh aur surya ke sath hone se prem vivah to hua parantu safal nahin hua. saptam men budh surya talak karane men jimmedar hai. kisi bhi patrika men saptam men surya budh ho to janmapatri milan men vishesh dhyan rakhna avashyak hai. 2. shri sunil gavaskar prasiddh kriket khilari ki janm dinank 10.07.1949 hai. makar lagn evan dhanu rashi hai panchmesh shukra saptam men hai. is karan prem vivah sanpann hua. 3. manniya shramti soniya gandhi ki janm dinank 9.12.1946 hai. kark lagn evan mithun rashi hai. rashi se panchmesh shukra, saptamesh guru ke sath rashi se pancham sthan tula men hone se inka prem vivah sanpann hua. apne bachchon ko grihasth jivan men pravesh hone ke purva unki janmapatrika ka parikshan yogya jyotishi se avashya kara len. dharmik aur samajik drishti se vivah manav jivan ka ek mahatvapurn anushthan hai aur var kanya ke parinay sutra men bandhne se chahumukhi pragti sthirta ki prapti hoti hai. atah gahan vichar ke pashchat hi var kanya ko parinay sutra men bandhe, grihasth jivan moksh prapti ki sirhi hai. isse samast indriyon ki ichcha purti ke sath hi ishvar prapti men sarlta rahti hai.
Kya aapko lekh pasand aaya? Subscribe
Kya aapko lekh pasand aaya? Subscribe


  October 2011

Apne vichar vyakt karein

blog comments powered by Disqus
.