रक्षा बंधन (18 अगस्त 2016)

raksha bandhan (18 agast 2016)  

Ank ke aur Lekh | Sambandhit Lekh | Views : 1489 |  
rashtriya sanghtna ki drishti se yadi dekha jay, to raksha bandhan bharat ka sabse pramukh parva hai. ismen yah mulbhut bhavna chipi hai ki sampurn samaj ko jo bharat men nar aur nari tatha pratyek varg aur pratyek varg ko mila kar banata hai ek dusre ki raksha karte hue, hi jivan path par agrasar hona chahie. parasparik bhedbhav ko mitane tatha rashtriya ekta ko samagra aur sudrirh rup men sthapit karna is parva ka isht hai. raksha bandhan ka yah parva yah nahin sah sakta hai ki vibhinna jatiyon ke log ek dusre se alag rahen, vibhinn pradeshon ke log apni rajnitik aur samajik khichriyan alg-alag pakaen aur vibhinn sampradayon ke log apas men nirantar sir futauvval karte rahen. uski manyata hai ki samaj ke pratyek ghatak ko chahe vah stri ho ya purush chahe vah savarn ho ya avarn chahe vah ishvar pujak ho ya nastik, apni-apni buddhi aur apni-apni nishtha ke anusar jivan vyatit karne ka janmasiddha adhikar hai. parantu iske sath hi un sabko sath milakar ek dusre ki raksha ka aur sab milkr sampurn rashtra ki uski sanskriti ki raksha ka kartavya palan karte hue hi apna jivnyapan karna chahie. bhartiya jivan darshan vishvavyapi vividhta ko svabhavik mankr svikar karta hai aur uske viksit hone ka purn avasar deta hai. parantu iske sath hi vah manv matra ki ekta men bhi avichl shraddha rakhta hai aur use banae rakhne ka prayatn karta hai. vividhta men ekta dekhna tatha prasthapit karna bhartiya sanskriti ka pratham siddhant hai jo vishva ki sabhi sanskritiyon ke adharbhut siddhanton se bhinn hai. ismen samast yatharthon ka samanvay karte hue chalne ki bhavna hai. bharat men raksha bandhan ke is parva ka vividh rupon men vikas hua hai. do pramukh paddhatiyan jo aj prachlit hain brahmanon ke dvara tatha bahnon ke dvara raksha sutra bandhne ki hai. donon ka desh ke sabhi bhagon men prachalan hai tatha adhikansh gharon men brahman tatha bahnen donon hi raksha sutra bandhte hain. donon paddhatiyon ke pashrva men lamba itihas bhi hai aur sath hi anek ghatnaen bhi. lekin is parva ka praranbh multah kahan se tatha kab hua iska nirnay karna kathin nahin to samay aur shramsadhya avashya hai . kahte hain ek bar dev aur danvon ke madhya barah lambe barson tak yuddha chalta raha. indra ki vijay ke lie unki patni indrani ne ek vrat ka ayojan kiya. yuddh karte-karte indra jab bahut thak gae tab unhen khinn dekhakar indrani unse boli thin he dev, divas ka avsan ho chuka ab shivir men laut chalen. kal main apko ajey banane vale raksha sutra se bandhanugi. dusre din jab shravni purnima ka prabhat tha samast anushthan sampanna karne ke uprant indrani ne indra ke dahine kar men shaktivarddhak raksha sutra bandha. brahmanon ke samgan ke madhya raksharakshit indra jab ranbhumi men gae tab unhonne atyalp kal men hi shatruon ko parast kar diya aur tatpashchat vah purvavat tinon lokon par shasan karne lage. is pauraniak katha ke anusar patni ko bhi apne pati ko raksha sutra men bandhne ka utna hi adhikar hai jitna ek bahan ko apne bhai ko rakhi bandhna. puran ki ek anya katha ke anusar aj hi ke din shravan nakshatra ke prarambh men bhagvan vishnu ke hayagriv avtar ka janm hua tha. tabhi se vaishnav samuday ise hayagriv jayanti ke rup men manata hai. dusri katha ke anusar isi din shri hari ne rigved aur yajurved ki sankhya men samved ki abhivriddhi ki thi. bhagvan ka yah samgan pratham bar vitasta aur sindhu ke sangam par shravni purnima ke din kiya gaya tha aur isi se is din sangam par kiya jane vala snan samast siddhiyan pradan karta hai . skand puran men die gae ishvar-sanatkumar sanvad ke anusar shravni purnima ka prabhat hote hi shruti-smriti ke vidhan ko samjhne vale buddhiman dvij hemadri snan karne ke pashchat pitri rishi evan devtaon ka tarpan kar sandhya jap tatha pujan se nivritt hokar motiyon se mandit rangin shuddh resham ke tantu evan guchchon se shobhit sutra lekr akanth jalpurn kalash par use rakh den tatha kumkum akshat evan pushpadi se uska pujan karen . tab apne bandhu-bandhvon ke madhya ganikaon ke sangit-nritya adi ka anand lete hue purohit dvara rashtra rishi evan devtaon ke samman ka saugandh khate hue, use bandhvae. bandhte samay purohit jo mantra parhe uska bhavarth yah hona chahie, jiske dvara kartavya purti ke lie mahabli bali ko bhi bandh liya gaya usi raksha sutra se main tujhe bhi bandhta hun. he raksha sutra, tu avichl rahna. is prakar jo vyakti yah parva manata hai vah varshaparyant sabhi paritapon se mukt rahta hai. is prakar brahmanon ke dvara raksha bandhne ki paddhati ka kuch itihas hamen mil jata hai. ismen rashtra tatha sanskriti ki raksha ki bat nihit hai. yah vidhan dhyan dene yogya hai ki tathakthit avarn, antyaj tatha shudra bhi ise utne hi vidhi vidhan se bandhva sakte hain jis vidhi vidhan se savarn athva unchi mani jane vali jatiyon ke log. aj ki paristhiti men hamen is parva par yah sankalp karna chahie ki ham jatibhed, prant bhed tatha sampraday bhed se nitant alag rahte hue apne vikas ke marg par agrasr honge . bahan dvara bhai ke raksha sutra bandhe jane ki pratha ka itihas nahin milta lekin yah nishchit hai ki jis vyakti ne bhi iska aranbh kiya hoga vah avashya hi mahan kavi hriday raha hoga. bhai-bahan ka sneh sanskriti ke abhijatya vikas ka charm sopan hai jis par ham sabhi bhartvasiyon ko garva hona chahie. srishti ki svabhavik yojna men bhai-bahan ka sanbandh nahin hai. pashu-pakshi nar aur mada ke rup men hi rahte hain. manav ne is disha men ek mahatvapurn parivartan kiya hai tatha nar-nari ke prem ka ek naya svarup viksit karne men use puri saflta mili hai. is svarup ka jitna vikas bharat men hua hai utna anyanya kisi bhi desh ya sampraday men nahin. pati-patni ka prem jahan ugra aur ushn hota hai vahan bhai-bahan ke prem men shanti aur shitlta hoti hai. iski pratyaksh anubhuti pratyek bhartvasi ko hogi fir chahe vah kisi bhi anchal ya pradesh ka nivasi ho. pati-patni ko apne is prem ki abhivyakti karne ke lie sampurn jivan milta hai. parantu bhai-bahan ke prem ki abhivyakti ke avasar bahut kam sulabh hote hain. isilie, kisi agyat nam vyakti ne jo apne anupasthit bhai athva bhagini ke prati apne prem ki tivrata ka prabal anubhav karta hoga yah vyavastha ki hogi ki is divs-vishesh ko donon milen aur apne hriday ke madhu se ek dusre ko plavit kar den. yah parampara aj tak jyon ki tyon chali a rahi hai aur atyant ullas ke sath uska karyanvayan hota hai . bhaginivihin purush aur bhratahin nariyan is din durbhagya ki pira ka anubhav karti hain . is pratha ka ek samajik labh yah bhi hua hai ki jin striyon ka koi rakshaka nahin hota vah kisi purush ko rakhi bandh kar apna bhai bana leti hain. itihas men anek bar is pratha ka labh uthaya gaya hai aur hinduon ne hi nahin muslmanon ne bhi uska palan kiya hai . is parva ko uski mahatvapurn bhumika ko hridyangam kar utsahpurvak manana hamara kartavya hai. is din samgan ka praranbh hua tha, atah ise sangit ka parva manna bhi yuktisangat hi hai. hamen chahie ki is din kala ki adhishthatri devi sharda ka pujn karen aur ratri men samarohpurvak sangit goshthiyon ka ayojan kiya jae. is parva ka svarup hi aisa hai ki yadi uska vidhivat paln kiya jae to sabhaen aur bhashn ayojit karne ki avashyakta hi n shesh rahe varan sabhi sanskar svatah hi hamen apni parivritti men le len.
Kya aapko lekh pasand aaya? Subscribe
Kya aapko lekh pasand aaya? Subscribe


shrikrishn visheshank  August 2016

fyuchar samachar ka vartaman ank bhagvan shrikrishn ko samarpit hai. is ank men bhagvan shrikrishn, unse sambandhit kahaniyan evan shrimad bhagavadgita ke mahatvapurn vyakhyanon ko samavisht kiya gaya hai. mahatvapurn alekhon men sammilit hain: gita ke shabdarthon ka mul evan vartaman, shrikrishn ji ka bhagavad prapti sandesh, sankshipt gitopnishad krishn ki ras lila ya jivan ras lila, karm ka dharm adi. iske atirikt patrika ke anya sthayi stambhon ke antargat anek vicharottejak alekhon ko sanlagn kiya gaya hai.

Subscribe

Apne vichar vyakt karein

blog comments powered by Disqus
.