हथेली पर ग्रहों का स्थान एक अध्ययन

hatheli par grahon ka sthan ek adhyayn  

Ank ke aur Lekh | Sambandhit Lekh | Views : 4600 |  
hatheli par grahon ka sthan ek adhyayan pan. satyanarayan jangir svabhav aur bhagya ki drishti se hathon ko chah sat bhagon men banta gaya. pratyek varg ya vibhajan ka alag sankay rakha gaya. is prakar hath ki banavat ko dekh lene bhar se hi jatak ke svabhav ka kachcha chittha samne a jata hai. iske sath-sath anguliyan, kar prishth (hatheli ke piche ka bhag), hathon ke roen ya bal, nakhun v anguliyon, anguthon ke jor adi ke sanbandh men ek pura shastra garh diya gaya hai. hatheli par grahon ki avdharna hatheli men kyonki grah apne sthan se uth jate hain ya khisak jate hain atah inko ek nam parvat bhi diya gaya hai. hatheli ko chote-chote nau hisson (parvat ya kshetra) men vibhajit kar pratyek hisse ko ek prithak v svatantra nam diya gaya hai v asani ke lie inko saur mandal ke grahon ke nam par inka namakaran kar diya gaya hai. ayrlaind ke vishva prasiddh hastarekha shastri shri kaunt luis heman (kiro) bhi yah mante hain ki in namon ki sthapna atakal ya kalpana par adharit hai. kiro ne svayan in grahon ko jyada mahatva nahin diya tha. parantu yah nishchit hai ki grahon ke hatheli par unnat hone par jivan men bhautik sukh ki prapti hoti hai. yah ek sanpurn satya hai. agar grah kshetra unnat nahin hai to jivan men saflta vishesh rup se bhautik saflta kam hi milti hai. dhan ki hamesha pareshani bani rahti hai. hatheli par jin nau grahon ki sthapna ki gai hai ve hain- surya, chandrama, mangal, budh, brihaspati, shukra, shani, rahu aur ketu. in sabhi ko apna ek prithak sthan avantit hai jaisa ki is chitra men dikhaya gaya hai. sabse vishal sthan shukra aur chandrama ko amne-samne diya gaya hai. mangal ko do kshetron ka svami banaya gaya hai. anguthe ke pas ka mangal sthan nakaratmak kahlata hai aur chandrama ke upar ka mangal sakaratmak kaha gaya hai. hatheli ke madhya bhag ko rahu ka kshetra kaha jata hai. janmakalin grahon ka prabhav hatheli ke parvaton par bhi hota hai. yadi janmakundli bhagyashali grahon ko darshati hai to sabhi grah hatheli men apne sthanon par ubhar ate hain. aksar yah bhi dekhne men ata hai ki janm kundli men jo grah akarak ho vah bhi hatheli men unnat hi dikhai deta hai. is prakar vah apne prabhav ki bajae apne svabhav ko darshata hai. hatheli men brihaspati ka sidha sanbandh buddhi se hai. janmakundli men vah chahe kisi bhi bhavon ka svami kyon n ho hatheli men jin logon ke guru kshetra ka abhav hai arthat brihaspati daba hua hai, aise jatak atyant samanya buddhi ke hote hain. aur matra bhogi ban kar jivan ko nasht kar dete hain. ye log shramshil jivan bitate hain aur buddhi ko kam-se-kam upyog men lete hain. aksar aviksit brihaspati ke jatak kuen ke menrhak paye jate hain. shodh ke dauran yah bhi samne aya ki aviksit ya ardhaviksit guru ke kshetra ke svami dharmik pravritti ke paye gae. dusri taraf guru pradhan ya unnat aur viksit guru ke svami prakhar buddhi vale hote hain. jivan men mili upalabdhiyon se santusht n hone vale ye jatak idhr-udhar hath panv marte rahte hain aur 40 varsh ki ayu ke ate-ate samaj men ek nishchit aur pratishthit sthan bana lete hain. yadi brihaspati ka parvat anya parvaton ki tulna men bahut jyada ubhar lie ho to aisa jatak abhimani hota hai. brihaspati grah ke pas v madhyama anguli ke thik niche jo sthan shani adhikrit hai vah gufa ki tarah ganbhir pravritti ko vyakt karta hai. bahut adhik hathon men ise aviksit paya gaya. kuch mamlon men yah brihaspati parvat se bhi ja milta hai. jin logon ki hatheliyon men ek matra shani hi viksit ho ve avashyakta se jyada ganbhir hote hain. ye log ekantvas pasand karte hain aur kam se kam logon se mel rakhte hain. prayah ye log nigurh vidyaon men kuch asar rakhte hain. anamika ke niche ka kshetra jisko surya ka kshetra kahte hain, svatantra rup se utha hua nahin dekha gaya. jin logon ke hath men yah kshetra gadhedar hai ve apni shiksha purn nahin kar pate. achche aur purn viksit surya kshetra ke svami samaj men pratishthit aur dhanik hote hain. upar ke charon grahon ke saman hi surya ki bhi sthiti rahti hai. yadi tin anya grah aviksit hain to surya bhi prayah aviksit hi hoga. akela guru pradhan jatak mil sakta hai tathapi akela surya pradhan jatak bahut kam dekhne men ata hai. surya pradhan log samaj ko netritva pradan karte hain. yadi surya rekha bhi balvan ho to jatak ko rajniti men saflta prapt hoti hai. kanishthika anguli ke thik niche ka sthan jin logon ke uthavdar hon ve adhikari varg ke jatak hote hain. yadi is parvat par do char khari rekhaen ho to jatak jivan men safal rahta hai. achche budh pradhan jatak apne as-pas ek pratishtha ka ghera bana kar rakhte hain. ye bahut vakptu aur chalak hote hain. uchch padasth adhikariyon ke hathon men budh ki pradhanta dekhi gai hai. vani par inka vishesh adhikar hota hai. jis jatak ka mangal viksit hota hai ve parivartanashil jivan bitate hain. unmen turant shant ho jane vale krodh ki matra adhik hoti hai. ye log rogon ka shighrata se shikar bante hain. yah grah sthan adhik ari tirchi rekhaon ke jal se yukt ho to jatak ka jivan bahut utar-charhav purn rahega. prayah jivan men sangharsh rahega aur larai jhagre hote rahenge. bahut si badhaen a kar jivan men samasyaen paida karti hain. duahsahsi logon ke hathon men mangal ko purn viksit paya gaya hai. mangal atmavishvas deta hai parantu vyakti ko jaldabaj bhi banata hai. chandrama ka kshetra kalpanashakti aur buddhi ka karak hai. kalpanashil vyaktiyon ke hathon men ise viksit paya gaya hai. jin jatkon ke hathon men chandrama ka parvat aviksit ho ya is par ari tirchi rekhaon ka jal ho to aisa jatak pet sanbandhi rogon se grast rahta hai. jivan ke arambhik kal men inko durbhagya ka bhi samna karna par sakta hai. chandrama ke sthan par gahra gaddha ho to jatak mansik rup se pareshan rah sakta hai. aise logon ke parivarik sanbandhon men vaimanasya aur paraspar samanjasya ka abhav hota hai. rahu aur ketu ko hatheli men sarvamanya sthan nahin prapt hai. tathapi jaisa ki chitra men darshaya hai ve sthan rahu aur ketu ke lie vartaman men nirdharit kiye gaye hain. yadi bhagya rekha rahu kshetra se aranbh ho to vah apne sahi samay ki bajae deri se falit karti hai. rahu ke kshetra arthat hatheli ke madhya men gahrapan ho to bhi jatak jivan bhar abhavagrast hi rahta hai. ketu ke sthan se jatak ko achanak milne vali sanpatti ke bare men pata lagaya jata hai. ketu ka sthan viksit ho ya is sthan par koi shubh chihn ho to jatak ko dhan ka abhav nahin hota. shukra ke kshetra ke sanbandh men ek sthul tathya to yah ubhar kar samne aya hai ki jin jatkon ke hathon men ek matra shukra ka kshetra hi viksit ho aur shesh grah viksit nahin ho ya ardhaviksit hon to aisa jatak buddhihin aur sthul vicharon ka hota hai. is shreni ke kuch jatkon ka danpatya jivan bhi uljha hua mila. shukra se sanbandhit jo tathya ab tak pracharit hain ve sab shodh ke nishkarsh men khare nahin utre. adhikatar tathya to viprit hi prapt hue hain. jaise shukra se sanbandhit yah ek sarvamanya tathya hai ki jin jatkon ke shukra ka kshetra purn vikasat ho ve log saundaryapriya, jivan shakti se ot-prot, kala parkhi aur sangit ke shaukin hote hain. parantu uprokt unnat shukra ka falit sarvada viprit hi dikhai deta hai. bare-bare shukra ke svamiyon ko sidha-sadha jivan jite dekha gaya hai. ve kala, sahitya v sangit se parichit hi nahin n unki inmen ruchi hi mili. achche shukra pradhan vyakti kala ya saundarya ke kshetra men bhi kam karte nahin paye gaye. ve sabhi kathin karya men rat mile. anubhav ke adhar par akela shukra yadi viksit ho to vyakti matra bhogi hi hota hai. lekin shukra ke sath yadi brihaspati, surya aur budh bhi purn viksit hon to hi vyakti safal jivan ji sakta hai. yah tathya to anubhav men avashya ata hai ki yadi janmakundli men shukra ast ho to uska sidha asar hatheli ke shukra par hota hai. aisi avastha men shukra bhali prakar se viksit ya kantipurn nahin rahta hai. shukra kshetra par banne vala kala dhabba ya bara til jatak ki kam shakti ko kam karta hai.
Kya aapko lekh pasand aaya? Subscribe

Kya aapko lekh pasand aaya? Subscribe


shri vidya evam dipavli visheshank  November 2010

shrividya v dipavli visheshank fyuchar samachar patrika ka anutha visheshank hai jismen ap rahasyami shrividya, shriyantra v mahalakshmi pujan ki durlabh vidhiyon ke sath-sath is avasar par is mahapuja ki prishthabhumi ke adharbhut sangyan se parichit hokar labhanvit honge.

Subscribe

Apne vichar vyakt karein

blog comments powered by Disqus
.