बराक हुसैन ओबामा

barak husain obama  

Ank ke aur Lekh | Sambandhit Lekh | Views : 2974 |  
barak husain obama pan. sharad triapathi pratyek ank men ham vishva ki prakhyat hastiyon ka jyotishiya vishleshan prastut karte hain. is bar ham duniya ke sabse shaktishali rashtra amerika ke nav nirvachit rashtrapti barak husain obama ke jivan ka jyotishiya vishleshan prastut kar rahe hain ki kaise-kaise sangharshon aur jivan ke utar-charhav ko par karke ve adamya ichchashakti ke balbute par sarvochch pad tak pahunche. kuch raja mahlon men janm lete hain, kuch galiyon men paida hote hain, lekin kuch sachchai aur ummid ke avaran ke pare kalpanaon men janm lete hain. barak obama ka praranbhik jivan kuch aisa tha ki unke itne bare pad ko sushobhit karne ke bare men keval kalpana hi ki ja sakti thi. barak husain obama siniyar (obama ke pita) kenya ke nyaja provins men apne pita ke sath bakriyan charaya karte the. unki man en danhaim ka bachapan kainsas ke vichita shahar men bita. danhaim ke pita ne parlaharbar par japani hamle ke bad dvitiya vishva yuddh men apni sevaen dene ka faisla kiya. yuddh ke bad ye log havai shahar a gae. is dauran barak siniyar ko skolrship mili. ve kenya chorakar apne sapnon ko pura karne ke lie havai shahar akar bas gae. manao sthit yunivarsiti auf havai ke ist vest sentar men muslim obama siniyar aur en danhaim donon vidyarthi the. yahin par donon ki mulakat hui. mulakaton ka yah silsila prem men badal gaya aur 2 farvri 1961 ko danhaim aur obama siniyar ne vivah kar liya. unke din hansi-khushi men bit rahe the. 4 agast 1961 ko honolulu men kainpi oleni medikal sentar for viman end children men barak husain obama dvitiya ne janm liya. danhaim aur obama siniyar donon behad khush the. kintu yah khushi jyada din nahin rahi aur jab nanha obama do varsh ka tha, tabhi uske mata-pita ka talak ho gaya. fir obama siniyar piech. di. ke lie harvard chale gae aur nanha obama apni man ke sath raha. udhar talak ke bad en danhaim ki jindgi men lolo setoro nam ka ek indoneshiyai bhugarbh vigyani a gaya aur shighra hi donon ne shadi kar li. varsh 1967 men yah parivar jakarta chala gaya jahan obama ki sauteli bahan maya setoro ka janm hua. man aur sautele pita lolo ne obama ki vartaman jindgi ko akar dene men ji jan laga di. aie, rashtrapti obama ki kudli aur jivan ka jyotishiya vishleshan karen. barak obama ka janmang tula lagn ka hai jismen lagnesh shukra navam bhav men sthit hai jo unke bhagyashali hone ka dyotak hai. bhagya bhav men baitha lagnesh shukra mithun rashi men 080-23' arthat rahu ke nakshatra men sthit hai jo ekadash arthat labh bhav ka suchak hai. ekadash bhav men rahu ke sath mangal bhi sthit hai jo dvitiya arthat kutunb tatha saptam arthat patni ya mitra bhav ka adhipti hai aur sanpurn samaj ka svami hokar sthit hai. barak isi yog v lagnesh shukra ke karan saumya svabhav tatha lagnesh shukra ke rahu ke nakshatra men hone se unchi soch vale bane. ekadash men saptamesh aur dvitiyesh hon, to jatak ko adar milta hai. barak ki 2 varsh ki avastha men un par chandra ki mahadsha praranbh hui. halanki chandra dashmesh hai aur uchch ka hai, lekin 2 varsh ke jatak ke lie dasham (karyakshetra) ka koi arth nahin hota hai. yahan par iska arth dusre rup se lete hain. dasham bhav arthat navam ka dvitiya aur ashtam bhav arthat navam ka dvadash hota hai. navam ka dvadash yani pita ki hani hui. chaturth bhav ko lagn banakar dekhte hain to makar lagn banta hai jismen lagnesh shani sthit hai jo purn matri sukh darshata hai. usse saptam bhav arthat kark rashi men surya aur budh sthit hain. surya prithkta ko darshata hai. surya ke sath hi budh sthit hai, jo makar lagn se dekhne par bhagya bhav ka svami hai aur saptam bhav men sthit hai, isilie saptam men bhagya ki vriddhi arthat kai vivah ko darsha raha hai. 1995 men inki man ki mrityu hui, us samay rahu men chandra ki antardasha chal rahi thi. chaturth bhav ko mata ka lagn mante hue vishleshan karen to pate hain ki rahu ashtam bhav men sthit hai aur chandra saptamesh hokar markesh ki sthiti bana raha hai. yah sthiti man ki mrityu ki satik suchna de rahi hai. jahan ek or bairi (obama ka bachapan ka nam) aur lolo ki dosti barh rahi thi, vahin danhaim aur lolo ki grihasthi men darar parni shuru ho gai thi. danhaim indoneshiya ki sanskriti men dubti ja rahi thin aur naukri karna chahti thin, jabki setoro parivar barhane ki bat soch rahe the. donon ki soch ka antar jhagra ka rup lene laga. danhaim bete par in sabka asar nahin parne dena chahti thin, isilie unhonne bairi ko 1971 men honolulu (apne nana-nani ke pas) ki pratishthit punahu akadmi men parhne ke lie bhej diya. bete se alag hona taklifdeh tha, islie vah ek sal bad hi honolulu laut ain aur apne bete ke sath rahne lagin. kintu 1977 men vah fir indoneshiya chali gain aur 1980 men unka talak ho gaya. idhar hai skul men parhte vakt obama juniyar ko sigret, sharab yahan tak ki drags ki bhi lat lag gai, halanki unki parhai chalti rahi. hai skul ki parhai ke bad bairi (obama) amerika ke las enjils shahar a gaya. use apne jivan ke lakshya ka ahsas ho gaya tha. rajniti men ruchi ke karan usne yahan ke auksidental (aksi) kolej men pravesh liya. is vakt vah mahaj 18 varsh ka balak tha. bairi ne auksidental men do sal bitae. dhire-dhire vah antarmukhi v ganbhir ho raha tha. man ki chetavni kam ai thi. rajniti men uski samjhdari barh rahi thi. kolanbiya kolej, nyuyork uski nai manjil thi. yahan obama ne rajniti vigyan ki parhai shuru ki aur sath hi kam karne laga. usne intrneshanal rileshan men bhi mastari hasil ki. 1983 men snatak ki pariksha pas karne ke bad vah bijnes intrneshal korporeshan ke sath kam karne laga. jun 1985 se mai 88 tak kanun ki parhai ki aur fir shikago chala gaya. aie, upar varnit ghatnaon ka jyotishiya vishleshan karte hain. jyotish men ketu nana-nani ka pratinidhitva karta hai, jo obama ki kundli men pancham bhav men sthit hai. nani arthat chaturth bhav ke chaturth bhav ka svami mangal hai jo labh bhav men sthit hai. mangal aur ketu ke bich purn drishti sanbandh hai. isi karan obama ka nani se lagav raha. lagabhag 18 varsh ki avastha men un par mangal ki dasha chal rahi thi aur mangal rahu ke sath sthit hai. aksar dekha gaya hai ki ashtam ke chandra ke karan jatak ko nashe ki lat par jati hai. obama bhi iske shikar hue, parantu shukra ke jyada prabhavi hone ke karan yah lat jald hi chut bhi gai. unke gyan v shiksha ka jyotishiya vishleshan karne par pate hain ki panchmesh shani apni hi rashi men chaturth bhav men tritiyesh vak shakti ya vak nipunta guru ke sath sthit hokar dasham bhav ko purn drishti se dekh raha hai. dasham bhav men sthit labhesh aur bhagyesh surya aur budh shani aur guru par drishti dal rahe hain. ukt grahon ke is drishti sanbandh ne unhen achcha vakta, vakil aur shikshavid banaya. apne kam aur parhai men puri tarah se dube obama ki jindgi ko ab ek naya mor dene vala nam tha mishel. 1988 men harvard lo skul se juris doktar ki digri lekar mishel ek korporet lo farm men vakil ke rup men kam kar rahi thi. mishel bhi aksar un baton par hansti, jin par obama hanste the. donon ke sanbandhon ko jag jahir hone men samay nahin laga. ek hi mahine men barak ne mishel ke samne shadi ka prastav rakha. pahli bar to mishel ne mana kar diya. fir do salon tak donon men deting chalti rahi. donon shadi ke vishay men baten bhi karte the, lekin abhi koi faisla nahin liya tha. halanki mishel ab obama ke bare men ganbhir thi. aktubar 1992 men barak aur mishel ne triniti yunaited charch auf kraist men shadi kar li. shadi ke kuch sal donon ne ek-dusre ko samjhne men laga die. donon ek dusre ke vyavhar, mijaj aur adton ke anusar khud ko dhal rahe the. 1996 men obama ilinoy sinet men nirvachit hue aur stet sinetar ke rup men shapath grahan ki. is bich 1999 men unki pahli santan maliya ne janm liya. obama danpti behad khush the aur har pal maliya ki dekhbhal men lage rahte the. varsh 2001 men unki choti beti natasha (sasha) ka janm hua. aie upar varnit ghatnaon ko ham jyotishiya drishti se dekhte hain. prem bhav ke lie pancham bhav aur mangal tatha shukra ko dekhna chahie, par yahan ham desh, kal aur paristhiti ko dekhakar barak ke prem paksh ka vishleshan karenge. surya, shani, budh aur guru ke drishti sanbandh ke karan donon ke bich prem pragarh hai jiske falasvarup unka prem vivah hua. aktubar 1992 men barak par rahu-shukra men mangal ki antardasha prabhavi thi. mangal saptamesh aur shukra lagnesh aur ashtamesh hai. rahu ekadash men saptamesh mangal ke sath sthit hai. isse ek nae parivar (vivah) ka sanket milta hai. janm kalin shani jo chaturth ghar men sthit hai. yah shani aktubar 1992 men makar men tha tatha mahadshanath rahu dvitiya arthat kutunb bhav men gochar kar raha tha. grahon ki isi sthiti ke karan unka vaivahik jivan atyant sukhamay hai. varsh 1996 men rahu men mangal ki antardasha chal rahi thi. ekadash bhav men surya ki rashi men sthit rahu aur mangal donon rajnaitik v sarkari labh ko darshate hain. isi yog ke karan unhen sinetar banne ka suavasar prapt hua. santan ka sabse bara karak grah guru hota hai. varsh 1999 men guru men guru ki antardasha chal rahi thi, tab inki pratham santan ka janm hua. varsh 2001 men guru men shani ki antardasha chal rahi thi aur shani panchmesh hokar guru ke sath sthit bhi hai. varsh 2001 men hi shani gochar men vrish rashi men sthit hokar apni dasham drishti se pancham bhav ko dekh raha hai. isi gochar v dasha-antardasha ke karan 2001 men unki dvitiya santan ka janm hua. varsh 1994 se 2002 tak obama ne bataur nideshak shikago ke vuds fand auf shikago men kam kiya. navanbar 2004 men obama ne ilinoy sinetar pad se istifa de diya aur amerikan sinet ke chunav men hissa liya. amerika ke itihas men obama panchven afriki-ameriki sinetar bane aur 4 janvri 2005 men is pad ki shapath grahan ki. is jimmedari ke sath hi obama apni kitab audesiti auf hop ko pura karne men vyast the. aktubar 2006 men yah pustak logon ke hathon men thi. janvri 2007 men obama ne envairanment end pablik varks kamiti se istifa dekar shiksha, shram, bhavishyanidhi v svadesh suraksha aur sarkari mamlon ke kam ki jimmedari sanbhal li. ab unka sapna bara rup leta ja raha tha. fir 10 farvri 2007 ke ek sard din ilinoy ke springfild men old stet kaipital bilding ke samne barak obama ne sanyukt rajya amerika ke rashtrapti pad ke lie apni ummidvari ki ghoshna ki. yah kam jue jaisa tha. is vakt barak 45 varsh ke the. rasta asan nahin tha. yu.es. sinet men bitae salon ke alava unke pas bare rajnitik anubhav ki kami thi purva pratham mahila hileri klintan, jo 6 salon se sinet men thin aur jinhen kai sthapit hastiyon ka sarmathan tha, sabki pasandida ummidvar thin. parantu 3 jun ko sabhi rajyon ke maton ki ginti ke bad obama demokretik parti ke akele vijyi ummidvar najar ane lage. hileri ne apna abhiyan rok diya aur obama ke sath akar khari ho gain. obama ne ek aisa staf banaya jo anusashan ke lie mashhur tha aur jismen likej ki koi jagah nahin thi. fir opra vinafre, pol volkar, kairolin, kenedi, kealin povel jaisi hastiyon ka samarthan obama ko mila. neshanal pol ka akhiri din tha 2 navanbar. us din jab sab matdan karne ae, tab obama ki nani medlin ki mrityu ki khabar ai. chote bairi (obama) ki dil se parvrish karne vali medlin duniya men nahin rahin, lekin vah apni jimmevari nibha gain - marne se purva vah matdan kar gain. 4 navanbar 2008 amerika ke itihas ka svarnim din tha, jab demokret ummidvar obama ko 349 aur unke pratidvandvi jan maikken ko 162 vot milne ki ghoshna hui. akhir ashvet kranti ke neta martin luthar king ka sapna sach hua. 4 navanbar 2008 ko bhartiya samay ke anusar rat 11 baje ek ashvet vyakti barak husain obama ne sanyukt rajya amerika ke rashtrapti pad ke lie bhari bahumat prapt kiya. yah adbhut rat sadiyon tak sabki smriti men bani rahegi. is kundli men rahu ekadash arthat achche bhav men sthit hai, shani, jo tula lagn men rajyog ka karak hota hai, makarasth arthat svarashisth hai. shani ke sath guru sthit hai jo dharm, adhyatm aur nitiyon ka karak hota hai. 70-34' ka guru makar men hai aur shani makar men 10-2' ka hai arthat donon hi surya ke nakshatra men hain. surya sthayi rup se rajniti ka karak hota hai aur vah dasham men sthit hai. obama ke jivan men 1980 se 1998 tak rahu ki mahadsha chali. vartaman samay men 1998 se prabhavi guru ki mahadsha 2014 tak rahegi. fir 2014 se shani ki mahadsha shuru hogi jo 2033 tak chalegi. 2033 tak ka samay inke jivan ka sabse achcha samay hoga, kyonki rahu naisargik pap grah hokar shubh bhav men aur shani tatha guru chaturth men vakri hokar sthit hain. yah yog bhi ek prakar se viprit rajyog ki tarah karya kar raha hai. kundli men tin grah shubhta rakhte hon aur vyakti ko lagatar unhin ki mahadsha prapt ho, to yah yog bhi ek prakar se rajyog ki tarah hi karya karta hai. 2 navanbar 2008 ko obama ki pyari nani ka dehant ho gaya. us samay inki guru men shukra ki dasha chal rahi thi. nani ki sthiti janne ke lie saptam bhav ka vishleshan karte hain. saptam bhav ko lagn manen to mesh lagn banta hai. mesh lagn men guru dvadshesh hota hai aur shukra dvitiyesh v saptamesh hokar marak hota hai. gochar men dvadshesh guru dhanu rashi men sthit hokar apni panchvin drishti se mesh rashi arthat lagn ko dekh raha tha. shukra ashtam bhav arthat vrishchik rashi men vicharan kar raha tha. gochar v dasha antardasha ki yahi sthiti nani ki mrityu ka karan bani. jyotish ke jankar saval utha sakte hain ki saptam bhav se patni ki sthiti ka vichar bhi kiya jata hai aur aise men patni ki mrityu bhi ho jani chahie, lekin ham jante hain ki jyotish men ek bhav se kai chijen dekhi jati hain. jis dasha kal men nani ki mrityu hui, usi dasha kal men chunav ki vyastata ya anya karnon se obama ka kafi samay patni se dur rahakar vyatit hua. san 2007 men obama aur unki patni ki kul ay 42 lakh dolar thi. adhikansh paisa unki pustakon ki rayalti se aya tha. sangitkar ya pop gayak n hone ke bavjud obama ko unki do kitabon kramshah 'audesiti auf hop' aur 'drim from mai fadr' ke audiyo varjan ke lie unhen graimi avord mil chuka hai. achche lekhak ke lie budh aur tritiya bhav, jisse lekhkiya gunon ka vichar karte hain, ka majbut hona jaruri hai. obama ki kundli men guru tritiyesh hai tatha guru aur budh donon kramshah chaturth aur dasham men baithakar apas men drishti sanbandh bana rahe hain. janvri 2009 ke antim saptah men navnirvachit ameriki rashtrapti barak obama jab shapath lenge, us samay unapar guru men surya men rahu ka antar chal raha hoga. makar rashi men gochar men surya-rahu donon rahenge, jinki drishti janm kalin surya par hongi. jyotish men surya aur rahu ke sanyog ko grahan yog kaha jata hai, lekin is kundli men surya aur rahu donon hi faldayi grah hain. shapath grahan ke samay guru, surya evan rahu tinon hi makar rashi men yani chaturth bhav men sthit hokar dasham bhav ko purn drishti se dekhenge. atah grahon ka yah yog inhen vishva ke sarvadhik shaktishali pad par pahunchaega. atah yahan grahan yog n hokar ek vishesh sudrirh yog ka nirman ho raha hai. fir sitanbar se obama par guru men chandra ki mahadsha praranbh ho jaegi. obama ke janmang men uchch ka chandra ashtam bhav men hai, atah vah puri sujh-bujh ke sath samasyaon ko suljhane ke lie achchi yojnaon ko kriyanvit karenge. iske pashchat un par guru men mangal tatha guru men rahu ki antardashaen chalengi. in donon hi grahon ke ekadash bhav men sthit hone tatha mangal ke dvitiyesh v saptamesh hone ke karan obama amerika ki arthik vyavastha ko punah sadrirh karne men mahatvapurn bhumika nibhaenge. san 2014 se obama par shani ki mahadsha praranbh ho jaegi. is mahadsha ke dauran vah rajniti se kuch dinon ka avkash lekar lekhan karya kar sakte hain. vishesh yog : labheshe karmabhavasthe karmeshe bal sanyute. devendraguruna drishte satkirtishito bhavet॥ - brihad parashar yadi janm patrika men labh ka svami dasham men ho tatha dashmesh bali ho aur dasham bhav par guru ki drishti ho to jatak yashasvi hota hai.
Kya aapko lekh pasand aaya? Subscribe

Kya aapko lekh pasand aaya? Subscribe


vastu evan sheyar bajar visheshank  February 2009

sheyar evan vastu bajar adharit visheshank men sheyar bajar, mediniya jyotish evan sheyar bajar, bharat men senseks ka bhavishya, vyakti vishesh ke liye labhdayak utpadon ka chayan, sheyar bajar men safal vyaktiyon ki kundliyon sanbandhit jankari prapti ki ja sakti hai.

Subscribe

Apne vichar vyakt karein

blog comments powered by Disqus
.