vavahagniprigrah sanskar ek aisa sanskar hai, jiska vartaman men mahatva bahut kam dikhai deta hai. adhikansh pathak iske bare men jante bhi bahut kam hain. yah sanskar vivah sanskar ke sath jura hua dekha jata hai. isliye iska sankshipt parichay prapt kar lena paryapt rahega. vivah sanskar men laja hom adi kriyayen jis agni men sanpann ki jati hain use avasthya namak agni kaha jata hai. ise vivahagni bhi kaha jata hai. ajakal vivahagni ko prajjvalit karne ka karya vivah karya sanpann karvane vala pandit hi kar leta hai kintu pahle aisa nahin hota tha.
vivahagni ke bare men shastron men nirdesh diya gaya hai ki kisi bahut pashu vale vaishya ke ghar se agni lakar vivah-sthal ki pavitra bhumi par mantron se sthapna karni chahiye. tatpashchat isi agni men vivah sanbandhi laja hom tatha opasan hom karna chahiye. jab vivah sanbandhi karya sanpann ho jaye to is agni ki pradakshina karke svishtakrit hom tatha purnahuti karni chahiye. is bare men kuch vidvanon ka vichar alag hai.
unka kathan hai ki vivahagni ko kahin bahar se n lakar vivah sthal par hi arnimanthan dvara utpann karni chahiye. vivah ke pashchat jab var-vadhu apne ghar ane lagte hain to is sthapit ki gai agni ko ghar par lakar kisi pavitra sthan par sayankal athva apni kul paranpra ke anusar havan karna chahiye. shastron men yah nitya havan vidhi dvijati ke liye avashyak kahi gai hai. ise vyakti ke nitya kiye jane vale karmon men bhi gina jata hai.
parivar men kiye jane vale samast vaishvadevadi smart karm tath pak yagya isi agni se kiye jate hain. is bare men yagyavalkya ne likha hai- karm smart vivahagnau kurvit pratyahan grihi. -yagyavalkya smriti is sanskar ke bare men kuch vidvanon ne apne vichar bhi vyakt kiye hain. unka vichar hai ki praranbh se hi mata-pita is bat ke liye adhik shankit rahte the ki vivah ke bad unke larke ka danpatya jivan sukh se vyatit ho. yah bhavna unhen kuch vishesh prakar ke upay tatha anushthan karne ko badhya karti thi.
is sanskar men yah bhavna prayah balvti rahti thi ki jis agnidev ko sakshi manakar bete ka vivah sanpann hua hai, agnidev ki parikrama lete huye sat fere liye hain, vah agnidev unke bhavi danpatya jivan ko sukhon se bhar den, unke sanbandhon men agni ka tej rahe arthat sanbandhon men urja bani rahe. is bhavna ke karan hi vivahagni ko vivah sanpann ho jane ke bad apne ghar ke pavitra sthan par sthapit kar diya jata tha taki agnidev ki kripa bani rahe. pratidin havan adi bhi navdanpatti ke bhavi jivan men sukhon ki vriddhi ki bhavna ko lekar hi kiye jate the. vartaman men yah sanskar prakash men nahin hai aur n adhik vyakti iske bare men kuch jante hain.
itna avashya hai ki tab ki bhanti aj bhi var-vadhu ke bhavi jivan ke sukh ke liye anek prakar ke upay tatha anushthan samy-samay par kiye jate hain. vivah ke bad var-vadhu ko kisi prakar ke kasht ka anubhav nahin ho, iske liye upvas athva havan adi aj bhi kiye jate hain. vartaman men chahe is sanskar ke bare men logon ko jankari kam ho kintu pahle is sanskar ko bhi usi vidhi-vidhan se sanpann kiya jata tha, jaise ki anya sanskaron ko kiya jata hai.