mahimamay bharat desh ke dakshin prant andhra pradesh ke shantimay, saundaryayukt v ramniya vatavaran se sarabor pavitra punit tirumlai parvatmala ke anchal men virajman shri venkteshvar tirupti balaji ka sthan yugon-yugon se bhakton, paryatkon v dharm premiyon ke akarshan ka kendra raha hai. jis prakar adi mahamaya vaishnodevi darshan hetu uttar bharat men logon ko bulave ka intjar rahta hai thik usi prakar vishvas kiya jata hai
ki dakshin bhartiya is tirth ke sirmaur men bina bulave ke yahan koi nahin ja pata aur jo bhi ek bar yahan akar darshan kar leta hai vah is bhulok ki mahima ke karan bar-bar yahan ane ke lie lalayit hota hai. desh-videsh men nivasarat sanatan dharmavlanbiyon ka yah prasiddh tirth andhra pradesh ke chittur jile ke chandragiri taluka men sthit samudra ki satah se 2800 fit se bhi adhik unchai par avasthit saptaparvatasin hai jinhen dharm itihas men sheshadri (sheshachalam) vrishadri (vrishbhachalam), gururadri (gururachalam), venktadri (venktachalam), anjnadri (anjnachalam), vedradi (vedachalam) aur naraynadri (anandagiri) ke rup men ullekh kiya gaya hai. in saptaparvaton ke samuh jise ‘tirumala’, ‘tirumlai’ athva ‘anand nilp’ kaha jata hai. tirupti tirth ko jagat niyanta shri vishnu ka sakshat baikunthdham mana jata hai, tabhi to bahusankhya bhakt nange panv paidal hi parvat ki yatra karte hain.
parvat samuh ke chah shikhar ko par kar satven v antim shikhar par tirupti bala ji ka mandir shobhayman hai jo aj ek laghu dharm tirth nagri ke rup men samast vyavastha ke sath bhakton ke svagtarth susajjit hai. tirupti relve steshan se kul 22 ki.mi. (14.5 kimi. parvatiya duri) duri tay karne ke lie yahan pratyek das pandrah minat par basen sahjta se upalabdh hain. vaise paidal marg ka bhi prayog log karte hain. yahan dev darshan hetu tirumala tirupti devasthanam (ti. ti. di.) ki taraf se kafi achchi vyavastha hai jahan bhojan, avas v mandir darshan sashulk sahaj men upalabdh hota hai.
ab to parvat par do-do marg ban jane se yahan jana pahle se asan ho gaya hai. bhakton ke madhya balaji, shri nivas, govinda, venkteshvar, tirupti svami, shrihri vainkutheshvar, sheshchlapti, vaikunthi adi kitne hi namon se sanbodhit dev shri tirupti ji is kaliyug men sakshat narayan ke rup men bhakton ke param sanrakshak aur margadarshak mane jate hain. shrimadbhagavat, skand puran, ramanuj sanpraday ka mahagranth prapannamrit (51van adhyay), tirth dipika, shri venktesh stotram adi amar bhartiya sahityon se hamen yahan se jure kitne hi akhyan v tirth mahatmya ki spasht jankari hoti hai.
uttar bharat men is tirth ke devta ko jahan ‘balaji’ kaha jata hai vahin dakshin bharat men shri (vadikasul svami) ke nam se inki yashah mahima gai jati hai. shri venktachal mahatmya ke anurup - venktadri nivasan te chintayan ghatikadvathay kulaik vishanti dhritva vishnu loke mahiyate. - (skandpuran 38-40) bharat desh ke sabse kimti mandir men pratham sthan par virajit tirupti ke shilp saundarya ka varnan vivechan avarnaniya hai. lagabhag do ekar jamin par bane is mandir ka bahar se sirf shikhar najar ata hai. is mandir ka vaibhav aisa hai ki ghantane andar rahne par bhi mandir darshan ke trishna ki tripti nahin hoti hai.
shri venkteshvar mandir tin parkoton ke andar hai aur usmen lagabhag sava do mitar unchi kale patthar ki murti sthapit hai jo vaishnavon ko shri nivas dev, shaivon ko venkteshvar svami to shakton ko balaji pratit hote hain. dev shri balaji ke donon taraf adhishthatri shaktiyan ‘shri devi’ v ‘bhu devi’ bhi mandir men hain. yahan sahastra sfatik shilaon se bana vishal mandap aur alankrit sabha grih chittakarshak hai. mandir ka 247 fit uncha gopuram dravir sthapatya kala ka bejor namuna hai. yahan ke parkotane par gopuram bane hain jin par sundar svarnakalash sthapit hai. svarnadvar ke samne hi tirumhamandapam namak mandap hai.
mandir men bhakton ki bhid ki aisi halat rahti hai ki vahan darshan karne ke lie pratyek ko ek-do minat se adhik samay nahin mil pata. yahan pradhan devta ke darshan ke pahle varah svami ka aur bad men hanuman ji ke darshan ka shastrokt vidhan hai. manyata hai ki is tirth ka avirbhav 5000 varsh purva hua tha. is mandir ko praranbh kal se hi chol, pallav, pandya v age vijay nagar samrajya se rajkiya sanrakshan milta raha aur aj bhi dur desh ke bhakton ki kripa se is mandir ka antrik v bahya rup prakashvan ho jagat mukhrit ho raha hai.
mukhya dvar ke samip hi vijayanagar ke vikhyat samrat shri krishnadev ray, venktpti ray aur shri achyutray ki bhavya murtiyan sthapit hain. ‘tiru’ ka ashay tamil bhasha men ‘shri’ arthat lakshmi aur pati ka ashay shri vishnu se hai. yahan ke hundi (pranami dil) men dene ki purani paranpra hai. lokakhyan hai ki vivah ke kharch ke lie svami venkteshvar ne kuber se rupya udhar liya tha. aj bhi vah udhar n chukae jane ke karan bhakton ki taraf se arthadan ki vishesh paranpra hai aur is arth ki prapti mata padmavti ki kripa se hoti hai jinka devalay tirupti nagar men hi virajman hai. is sandarbh men ek katha hai
ki purvakal men yah sthal varah svami ka kshetra tha is karan tirupti svami ke sthapnoprant yah vidhan banaya gaya ki pratyek bhakt dvara pahle pahal is sthan ke sarvaprachin devta varahasvami ka darshana-pujan kiya jae aur aj bhi yah kram jari hai. shri tirupti tirth darshan men shraddha bhav aur satvikta ka hona parmavashyak hai. shastro men ullekh hai ki atut shraddha aur adamya vishvas ke sath jo log dev shri tirupti ka darshan karte hain unki samast manokamnaen avashya purn hoti hain. darshanarthi sarvapratham kapil tirth men snan pujan ke bad tirumlai kshetra ki or agrasar hote hain. aise to pratyek din devtaon ko priya hota hai par harek shanivar aur varsh men ek din ‘shri baikunth ekadshi’ ko yahan desh-videsh ke bhakton ka jamavra lagta hai. pradhan mandir ke bagal men hi svami pushkarini hai
jahan snan karke shri narsinh svami mandir ke darshan ka vidhan hai. tirumlai parvat par kul 365 tirth virajman hain jinmen vaikanuthtirtham, akashganga, papvinashanam, tumburu tirtham, silashoranapm, dipmandapam, sthanmandapam, chakratirtham, kapiltirth, katah tirth, kumar tirth, pandav tirth, sanak sanandan tirth adi darshaniya hain. aise tirupti nagarasth govindaraj svami mandir, kodramasvami mandir, shri kapileshvar svami mandir aur thori duri par avasthit tiruchanur men mata padmavti devi mandir ka darshan bhaktavrind avashya karte hain.
isi prakar tirupti se lagabhag tis ki.mi. duri par ‘kalahasti’ ek mahan tirth hai jahan bhole bhandari ka vayuling yugon-yugon se pujit hai. sanpurn desh men tirupti manudan (kesh dan) ke lie vishesh rup se prasiddh hai. chote-chote bachche hi kya bare bujurg aur mahilaen bhi prabhu ke shri charnon men apna kesh dan karna saubhagya samjhte hain. kahte hain is paranpra ka shrignesh svayan shri balaji ne kiya tha jiska nirvahan aj tak kiya ja raha hai.
mandir ke pravesh dvar marg par hi vishal bhavan ‘kalyan katta’ ke nam se jana jata hai aur yahi keshdan kendra hai jiski sankhya ab tin hai. keshdan se lekar darshan v prasad pane mane nibandhan avashyak hai aur ab to darshan ke lie aen lain vyavastha upalabdh hai. tirupti ka prasad arthat bare akar ka laddu bhi yahan ki mahatta ko dinane din barha raha hai. bhakt parvat par se anyanya pujan samagri ke sath baba venkteshvar ki tasvir jarur lete hain.
tirupti jane ke lie yahan ka relve steshan tirupti hi hai jo chennai-vijyvara mukhya relmarg par sthit renigunta steshan se age hai jo chennai se 136 ki. mi. aur bangluru se 253 ki. mi. duri par hai. aise shri kalasti, chittur rajkiya rajmarg bhi yahin se hokar jata hai jahan haidrabad, bangluru, chennai adi se bas dvara bhi ana sahaj hai.
tamilnadu rajya se najdik hone ke karan yahan chennai se sarak v rel donon suvidha uttam hai. sachmuch tirupti ki yatra apne ap men ek sukhad anubhuti hai. yahan ki yatra har ghari, har mausam, men ki ja sakti hai. kul milakar yah kahna samichin jan parta hai ki tirupti ka drishyavlokan v devadarshan ki smriti manas patal par sadaiv jivant bani rahti hai.