साढ़ेसाती की वास्तविकता

sarhesati ki vastavikta  

Ank ke aur Lekh | Sambandhit Lekh | Views : 1941 |  
apki sarhesati shuru ho gai hai, islie ye asanbhavit ghatnaain ghat rahi hai. janmakundli dekhne vale panditon ke uprokt vakya har vyakti ko apne 70-80 varsh ke jivan kal men 2-3 bar sunne ko milte hain. ek sarhesati samapt hone ke lagabhag sarhe 22 varsh bad dusri sarhesati shuru ho jati hai. aise vakt par panditon, tantrikon aur jyotishiyon ko yad kiya jata hai aur fir puja-path, anushthan, ratn dharan tatha shanidev ki shanti ka daur chal niklta hai. jo kuch sarhesati ke dauran gujrta hai, uski adharshila ka shilanyas to sarhesati shuru hone ke lagabhag dhai varsh purva hi ho jata hai. chandra rashi se gyarhven sthan ka shani ka gochar jatak ke lie anukul paristhitiyon ko janm de deta hai aur yadi in dhai varshon ke dauran guru aur rahu ka anukul gochar bhi samarthan deta ho to jatak ki pau-barah ho jati hai, bhale hi jatak ki janmakundli ek achche charitra ko ingit karti ho athva ek apradhik pravritti ki. charitravan vyakti to ek sammanniya sopan par charhta jata hai aur apradhik pravritti ka vyakti apradhik safltaon ke kirtiman sthapit karne ki or agrasar hone lagta hai. shani ek papi aur krur grah hai, jo ek or to mahatvakanksha, netritva, sahas aur nirbhayata ka karak hai, vahin udandta, murkhata, tanashahi, ahankar, apradh, durghatana, nirasha, avsad v vishad ka praneta bhi hai. shani ka chandra rashi se gyarhven sthan ka sanchar mahatvakankshaon aur nirbhayata ko deta hai, chahe vah mahatvakanksha sadkaryon ke lie ho athva galat karyon ke lie. janmakundli men visheshakar shani v anya grahon ke balaval tatha mahadsha ki sthiti ke anusar jatak apni mahatvakankshaon ki purti men sadharan athva asadharan saflta prapt karta hai. vastavikta to yah hai ki shanidev is gochar ke dauran jo kuch dete hain, sarhesati ke dauran use chinne ke lie prayatnashil ho jate hain. shanidev ki is karya vidhi ka ek ullekhniya vritant prastut karunga - varsh 1969 ke praranbh men shani ne apni nich rashi ‘mesh’ men pravesh kiya tha. shanidev chunki lohe ke karak mane jate hain, inke mesh rashi men pravesh karte hi ekaek lohe aur ispat ki mang men ek jabardast uchal a gaya. karan tha, bharat sarkar dvara kuch pariyojnaon ki ghoshna jinmen lohe aur ispat ka pramukh yogdan tha. isse purva lauh aur ispat udyog ek jabardast mandi ke daur se gujar raha tha. dekhte hi dekhte mang aur purti men bhari antar hone ke karan lohe ke utpadnon men sath se sau pratishat tak ki mulya vriddhi ho gai. main un dinon ispat ke utpadan se jura hua tha. 1970 ke ant men meri mulakat mere ek sanbandhi ke chachaji se hui jo mithun rashi ke jatak the aur shanidev ki mahakripa ka sukh (gyarhven shani ke karn) bhog rahe the. ve lauh aur ispat skraip ke sangrahakarta aur vikreta the. 1968 ke ant tak skraip ki samuchit mang n hone ke karan ve sangharshashil the. march 1969 ke bad ekaek skraip ke dam lagabhag dugune ho gae. inhonne apne sangrahit mal ki bikri se, jo jang kha raha tha, achcha dhanarjan kiya, sath hi chunki ve is dhandhe men the, unhonne saste damon men skraip kray-vikray se apne vare-nyare kar lie. arjit dhan se inhonne kheton men sinchai ke lie prayukt kie jane vale dijal panpon ki ejensi bhi le li. 1970 men kam varsha hone ke karan panpon ki achchi mang hui, inki mahatvakanksha aur bhi uchal lane lagi aur 1971 ki garmiyon ke lie inhonne baink se rin lekar dijal panpon ka achcha khasa staek jama kar liya, sath hi ek barfakhane ki sthapna bhi kar li. bat 1970 ke ant ki hai jab inhonne apni ahankar janit bhasha men mujh se apne bhavishya ki jyotishiya jankari chahi. chunki aprail 1971 men shani ka sanchar vrish rashi men hone vala tha, jab unki sarhesati shuru hone vali thi, mainne unki kundli v hastarekha dekhakar keval itna hi kaha ki age ka samay apke anukul nahin rahega. islie ve apni vistar yojnaon ko viram de den. itna sunte hi ye 60 varshiya sajjan buri tarah bigar gae aur bole tumhen jyotishi kisne bana diya ? main to yadi mitti ko hath laga dun to vah bhi sona ban jati hai. shayad yah bat ve svayan nahin bol rahe the, balki unka meshasth shani prerit kar raha tha. jo inki kundli men bhi gyarhven bhav (mesh rashi) men sthit tha. un dinon mujhe jyotish ko haebi ke rup men shuru kie kuch hi varsh hue the, islie main unhen koi adhikarpurn uttar nahin de paya. socha ki shayad inke pas shanidev ko parast karne ke lie koi brahmastra hoga. ab hua yah ki aprail 1971 men shani ne vrish rashi men pravesh kiya jabki gurudev bhi unki rashi se chathe sthan (vrishchik rashi) men sanchrit the aur inke durbhagya se unke pradesh ko vrishthidev ne samay se purva hi tript kar diya, lihaja n to kisanon ko panpon ki avashyakta hui aur n hi thande mausam ke karan jansadharan ko barf ki. panpon aur barf ki nyun bikri hone ke karan inhen bainkon ka byaj aur kishten chukana dubhar ho gaya. is akshamata ke karan bainkon ne inke barfakhane aur mal sanpatti ka adhigrahan kar liya aur ve divaliya ho gae. sare kam dhandhe thap ho jane se inke parivar men khane pine ke bhi lale par gae. mujhe dhyan hai ki unke dhandhe men shamil inke ek putra bhi vrish rashi men hone ke karan sarhesati ki chapet men the. ye sajjan vyapar men hue jabardast ghate ka sadma nahin jhel pae aur divangat ho gae. unki mahatvakanksha aur ahankar ko shanidev is bhayankar tarike se chur-chur kar denge, iski ashanka mujhe bhi nahin thi. unka ‘sona’ kaise ‘mitti’ ban gaya. dusra vritant 1998 ke praranbh ka hai. mere ek injiniyar mitra jo min rashi ke jatak the, mujhse salah lene aya karte the, kyonki ve sarhesati ki chapet men the aur arthik kathinaiyon se jujh rahe the. sarhesati shuru hone se purva makar ke shani men ve ek pratishthit kanpni men mukhya abhiyanta ke pad par pahunch gae the. unhen laga ki apni takniki jankari tatha karya kushlta ke bal par ve svayan hi usi utpadan ke lie faiktari laga kar bahut dhan kama lenge, lihaja ve naukri chorakar apni jama punji lagakar tatha baink se rin lekar apna laghu udyog sthapit karne men jut gae. tab tak unki sarhesati shuru ho gai thi aur shanidev ko bhi akhir apni kargujari karni hi thi. vyavsayik anubhav n hone ke karan ek nae udyog ko khara karne aur vikray viksit karne men samay lag gaya aur inhen arthik sankat ka samna karna para keval takniki jankari hi bera par nahin laga saki. isi bich ve apne ek nikat sanbandhi ki kundli lekar ae, jo bhartiya sena men ek uchch pad (karnala) par tainat the aur unhen sena ke lie saman kharidne ki jimmedari mili hui thi. kundli dekhakar mujhe laga ki ve beimani ko yadi avasar mile, to angikar kar sakte hain. jab mainne apne mitra ko yah ashanka jatai to unhonne svikar kiya ki ve karnal sahab rishvaton ke jor par khub dhanarjan kar rahe hain. chunki ve vrish rashi ke jatak the gayarhven sthan ke minasth shani ki kripa ka bharpur labh utha rahe the. isi varsh (1998) ke aprail mah men shani ka mesh rashi men pravesh nirdharit tha tatha gurudev bhi anukul sthiti men nahin the, mainne unhen salah di ki ve in karnal sahab ko samjhaen ki ve is prakar ke galat dhanarjan ki pravritti par ankush lagaain kyonki age samay kharab hai. unhonne jab yah bat karnal sahab ki dharmapatni ko batai to ve buri tarah bigar gai aur bolin ki in ‘nim hakim jyotishi’ ko batate ki mere pati ka koi kuch bhi nahin bigar sakta hai kyonki unka apne karya kshetra men jabardast rutba hai. aprail mah bhi a gaya aur ek din ve mere mitra ke sath lagabhag roti hui ain aur bataya ki unke pati ko naukri se nilanbit kar diya gaya hai aur unhen giraftar kar liya hai. puchne lagin ki ab kya hoga. mainne unhen bataya ki chunki unki sarhesati shuru ho chuki hai, unke lie us janjal se chutkara milna kathin hai. han, kuch samay bad min rashi men guru ke pravesh ke karan unhen jamanat to sanbhavit hai kintu kes lanba khinchega aur isi bich shayad unki seva nivritti ka samay bhi a jae, islie unki punarniyukti ki asha n karen. uprokt vritanton se yah to siddh hota hi hai ki shani pradatt mahatvakanksha aur ahankar ko svayan shani dev hi chur-chur kar dete hain. akhir shani dev hi is kahavat ko charitarth kar dete hain - shchtapakam lavmji thamvitam . thnsasash shanidev ki karyavidhi ke sandarbh men main ek aur drishtant prastut karunga. bat 1992-93 ki hai. un dinon main saudi arab men ek bare projekt ko nirdeshit kar raha tha aur bharat ana jana lagta rahta tha. ek akasmik mulakat men jaypur ke ek yuva vyapari ne apni kundli mujhe dikhai. ve hire javahrat ke vyavsay men saflta ke sopan par charhe ja rahe the, kyonki unki min rashi men gyarhven sthan par sanchrit makarasth shanidev un par kripalu the. chunki march 1993 men shanidev kunbh rashi men pravisht hokar unki sarhesati ki shuruat kar rahe the, mainne unhen salah di ki ve dhan sanbandhi mamlon men savdhani barten aur vishvast karmachariyon par bhi purn vishvas n karke, unhen bhi shak ke dayre men rakhen, kyonki hire-javahrat ke dhandhe men sab kuch vishvas par hi adharit hota hai. mera anubhav hai kisi bhi vyakti par jyotishiya chetavni ka koi vishesh asar nahin hota hai, kyonki shanidev ko to apna karya karna hi hota hai. bahrhal jab main saudi arab men tha to in yuva vyapari ne kisi prakar se mera telifon nanbar gyat karke mujhse sanpark kiya aur bataya ki unka vyavsayik sajhidar hi 32 lakh rupyon ke hire lekar nepal bhag gaya hai, ab kya hoga ? 90 ke dashak men yah rashi bahut aham thi. yadi sajhidar ne hi dhokha de diya to shanidev ko dosh dene ke atirikt kiya bhi kya jae? chunki yah ghatna 1993 ke ant men hui thi jab gurudev tula rashi men unki rashi se ashtam sthan par sanchar kar rahe the, mainne unhen bataya ki ab hire milne ki asha tyag den, kyonki us samay guru aur shani donon hi unhen dhan hani ke kup men fenk rahe the. vaise bhi hire jahvahrat ke dhandhe men koi likhit hisab kitab to hota hi nahin hai, lihaja kort men bhi ja nahin sakte aur pulis men islie riport nahin kar sakte ki usse ayakar ke janjal men fans sakte hain. han ayakar chori ki saja dene ke lie svayan shanidev hi dandnayak ban baithe. iske bad unhonne mujhse sanpark nahin kiya. vastavikta to yah hai ki chandra rashi se gyarhven sthan par bhraman karte hue shanidev jatak ki mahatvakankshaon (sahi ya galt) ko prapt karne men purn sahayak hote hain. is dauran yadi guru bhi anukul ho jaen to fir naukri ya vyavsay ka shrignesh, chalu karyon men saflta v labh, pronnati, dhan prapti adi apekshit hote hain. jatak ki mahatvakankshaain akash ko chune lagti hai aur janmakundli men shani, mangal jaise krur grahon ki sthiti ke anusar janm hota hai ahankar ka jiske vasibhut hokar jatak apne karyakshetra ka vistar karne ke lie utaru ho jata hai jismen shanidev jatak ki yathasanbhav sahayta karte hain. parantu jaise hi jatak ki sarhesati shuru hoti hai shanidev svayan hi jatak ke shatru ho jate hain. guru ke anukul sanchar men to shanidev avashya sankoch karte hain, kintu pratikul gochar men apne van chala hi dete hain. shanidev unko bhi nahin chorte hain jo apni prati ya imandari aur mehanat ke bal par saflta ke uchchatam shikhar par pahunch jate hain. prasiddh abhineta amitabh bachchan ke sath hi 1982 men yahi hua, jab ve shuting ke dauran chot khakar lanbe samay tak abhinay jagat se nirvasit ho gae. 30 varsh bad usi prakar ki sthiti a gai hai jab unki 1982 ki chot ne fir se nishkriya kar diya hai. aisa bhi nahin hai ki puri sarhesati ke dauran shanidev ka prakop vyapt rahta hai. han, is dauran jab jab guru ka anukul gochar hota hai, shanidev ki durbhavna par ankush lag jata hai aur sthiti men sudhar bhi hota hai, jabki pratikul gochar men shanidev ko khuli chut mil jati hai aur isi utar-charhav men sarhesati bit jati hai. han, is dauran jatak ko bhale-bure, dosta-dushman aur ki gai galtiyon ki bhi pahchan ho jati hai. sarhesati bitne par rashi se tisre sthan ke shani ke anukul gochar men jatak funk funk kar kadam rakhne ko tatpar ho jata hai. kintu kab tak? shani ke rashi se chathe sthan ke gochar men galtiyon ki punravritti hone lagti hai. pura jivan usi utar-charhav men bitta hai, jo mirja galib ke is kathan ki pushti karta haiah- ”shama har rang men jalti hai sahar hone tak.“ gauratalab hai ki jab shanidev ko kisi ko charhana hota hai athva girana hota hai to sarkari nitiyan rajnitik paridrishya, vaishvik paristhitiyan aur prakritik utha patak bhi tadnusar jatak ke bhagya ko nirdeshit kar deti hai. meri chandra rashi ‘vrish’ hai aur mere 76 varsh ke jivan kal men tin sarhesatiyan ghatit ho chuki hai. pratham sarhesati to meri valyavastha men hi ghati thi, jab mere pitaji, jo mahatmagandhi ke anuyayi the, 1942 ke ‘bharat choro’ andolan men bhag lene ke karan lagabhag dhai varsh ke lie jel men rahe. unke jel jane se hamare parivar par arthik sankat ke badal cha gae. un dinon shani vrish/mithun rashiyon men sanchrit tha. mere pitaji ki tula rashi thi aur ve bhi ashtam shani ki dhaiya bhugat rahe the. dusri sarhesati 1968-75 men prabhavit thi. tab mujhe apne karyakshetra men virodhiyon ki dushtata ka shikar hona para. jin vyaktiyon ko mainne hi niyukt kiya tha aur padonnati di thi, vahi ekaek pith piche chura bhonkne lage. is karan mujhe tin pratishthanon ki naukri chorni pari. is dauran jahan tula aur dhanu ke guru gochar ne hani pahunchai to vrishchik v makar ke guru ne labh bhi pahunchaya. maine apni karya kushlta aur imandari ke bal par pada/yash banae rakha. is samay tak mujhe jyotish ka bhi kuch gyan ho chuka tha, islie sanbhavit khatron ko tal saka tha. tisri sarhesati 1998-2003 ke dauran gujri, jo vishesh kashtadayi nahin rahi, kyonki tab tak main apne uchchatam pad aur arthik samriddhi ke us chor par pahunch gaya tha jahan dhanarjan ki koi mahatvakanksha nahin rahi thi. is dauran mujhe apni vishisht takniki gyan ke bal par desh-videsh men safltaain milin, kyonki karya dhanarjan ke lie nahin, kintu gyan visarjan ke lie kie the. jyotish ne mujhe ek darshanik drishtikon bhi pradan kar diya tha aur ab to yah kah sakta hun - rahe hasti ka safar kaise kata, voh bura tha ya bhala, bhul gae. ab yadi koi mujhse puche ki sarhesati aur laghu kalyani se nibtne ke lie kya prayatn kie jaain to meri salah yah hogi ki ya to svayan jyotish ka gyan prapt karen, athva kisi achche jyotishi se sanpark banae rakhen, nim-hakim ya dhan lolup jyotishi se nahin. shanidev kab kripalu hote hain aur kab kupit, iski jankari lete rahen. shani ke chandra rashi se tisre, chathe aur gyarhven sthan ke gochar men shani ki kripa ka bharpur labh uthaain, kintu gochar ke samapt hote hote apni mahatvakankshaon ko viram de den aur is dauran hui upalabdhiyon ko apni karya kushlta aur buddhi chaturya ki atiranjit den n samjhen. ati buddhimta aur mahatvakankshaain sarhesati aur laghu kalyani ke dauran fel ho jati hai. rog shok, durghatana, chori, dhan hani aur shatruta to kundli dosh ke anusar honi hi hoti hai, unhen ‘niyati’ manakar svikar karen. gosvami tulsidas bhi niyati se har man baithe the aur yah mante the- hani labhu, jivn-maran, yash-apayash vidhi hath. laghu kalyani aur sarhesati ke dauran gurudev ke anukul sanchar ko to bhunaain, kintu pratikul sanchar (chaithe, chathe, athven aur barhven) ke samay vishesh satarkata barten, kyonki us samay karela ‘nim charha’ se jata hai. rahu bhi apne tisre, chathe aur gyarhven sthan men sanchar karte samay kuch n kuch sahayta avashya pradan karte hain visheshakar shatruon se bachav. laghu kalyani aur sarhesati ke samay mukdmebaji se bachne ki yathasanbhav koshish karen aur krodh ki adhikta par ankush rakhen. yadi ay sahi bhi honge, tab bhi har apki hi hogi.
Kya aapko lekh pasand aaya? Subscribe
Kya aapko lekh pasand aaya? Subscribe


  April 2012

Apne vichar vyakt karein

blog comments powered by Disqus
.