शुभ मुहूर्त हेतु चंद्र/ताराबल अवश्य देखें

shubh muhurt hetu chandra/tarabal avashya dekhen  

Ank ke aur Lekh | Sambandhit Lekh | Views : 6284 |  
muhurt ke sabhi vicharniya vishyon men chandra bal avashyak vishyon men se ek hai. yadi anukul sthitiyan upalabdh n hon to sahi prakar se chuna hua lagn muhurt ashubh yogon dvara utpann doshon ko dur karne men saksham hota hai. atah kisi bhi karya ke praranbh hone ke samay tara bal dekhna uchit hai. aie janen tara bal nishchit karne ki vidhi .... jis prakar andhere men rakhe hue padarthon ko dipak apne prakash se dikha deta hai, usi prakar jyotish shastra, purva janm men kie hue shubhashubh karmon ke parinam (prarabdha) ko spasht rup se abhivyakt karta hai. islie jyotish ko ‘daiv vimarshan shastra’ bhi kahte hain. vidhata ne vyakti ke lalat par sukh-duahkh ki jo varnavli likhi hai, usko jyotirvid horashastra ke gyanrupi netron se dekhte hain. atah jyotish bhagya janne ka sadhan hai. aise kathan acharya varahmihir ke hain, jo purnatah satya hai. kintu acharya ke in vachnon se is tathya ki pushti hoti hai ki jyotish bhut, vartaman aur bhavishya men ghatit hone vali shubhashubh ghatnaon ki matra suchna deta hai. jab ham jyotish ko suchna shastra kahte hain, to uski upadeyta kam ho jati hai. yadi kisi vyakti ka bhagya kharab hai, to jyotishi sirf bata sakta hai ki apka bhagya achcha nahin hai. kintu vah durbhagya ko saubhagya men nahin badal sakta. (jo bhagya badlne ke dave karte hain, unke dave jhuthe hain.) kyonki pratyek vyakti ko karm ka fal bhogna parta hai, bhog ke dvara hi karm falon ki shanti hoti hai. yah shastra siddh hai. karya ki saflta ka achuk sadhan shubh muhurta: jivan men chahun or nirasha se ghire, bhagyahin vyakti ko ‘shubh muhurta’ andhere men prakash ki kiran ke saman hai. jabki bhagyavan vyakti ke lie shubh muhurt men karya ka shubharanbh karna svarn men sugandhi ke saman hai. kisi bhagyahin vyakti ko yadi anisht grah ki mahadsha chal rahi ho, kintu gochriya grah shubh hon to aisa vyakti kisi karya hetu prashast shubh muhurt men yadi kisi karya ka praranbh karta hai, to use saflta milti hai. atah shubh muhurt karya sadhak hota hai. vibhinn karyon ke lie vibhinn grahon ka balabal dekhen udvahe chotsave jivah, surya bhupal darshane. sangrame dharniputro, vidyabhyase budho bali.. yatrayan bhargavah prakto dikshayan shanaishcharah. chandrama sarva karyeshu prashaste grahyate budhai.. atah buddhiman vyakti ko vivah, samajik-dharmik utsav guru ke balvan aur shubh gochar men karna chahie. surya ke bali hone par rajadarshan (netaon, mantriyon, adhikariyon se mulakat karna) chahie, mangal ke bali hone par larai-jhagra, akraman, mukdma dayar karna, vad-vivad karna, ethletiks, haeki, kriket adi khel pratiyogitaon men bhag lena chahie. shiksha ka praranbh, vidyadhyayan aur shastrarth budh ke bali hone par karna chahie. shukra ki shubhta men yatra -gaman aur shani ki shubhta men mantra diksha grahan karna chahie tatha inke atirikt samast karyon ka praranbh chandrama ke shubh gochar aur balvan hone par karna prashast hai. gochriya grahon ka balabal janmasth chandra rashi se vicharna chahie. uprokt shlok men ‘chandrama sarva karyeshu-prashaste’ islie kaha gaya hai. kyonki muhurt men chandrama ka fal sau guna hota hai, islie chandrama ka balabal avashya dekhna chahie, kyonki anya grah bhi chandrama ke balabal ke anusar hi shubh ya ashubh fal dete hain. atah chandrama ki shubhta ke bina anya grah shubh fal nahin dete hain. (atharvavediya jyotisham- 92/22) muhurt chintamni ke anusar- shukla paksh men yadi chandrama shubh hai to surya bhi shubh hota hai. surya ke shubh hone par nesht mangal, budh, guru, shukra, shani grah bhi shubh hote hain. chandra bal tritiyo dashmah shashthah prathmah saptamah shashi. shuklapakshe dvitiyastu panchmo navmah shubh.. janm rashi se (shuklapaksh men) chandrama ka gochar 1, 2, 3, 5, 6, 7, 9, 10 aur gyarhven sthan men shubh hota hai. pan. kashinath bhattacharya ne 11ven chandrama ko shubh nahin mana hai. kintu 11van chandrama sabhi prakar ke labh aur vijay dene vala hota hai. inke atirikt shesh bhavon (4, 8, 12ven sthan) ka chandrama ashubh hota hai. islie shubh muhurt men 4, 8, 12 van chandra tyajya hai. katipay acharya janm rashisth gochriya chandrama ko yatra muhurt men ashubh mante hain. guru dvara drisht chandrama ko shubh bal prapt hota hai. suryadi grahon ka balabl: sabhi grah 4, 8, 12ven bhav men ashubh fal dete hain. atah muhurt men janm rashi se chaithe, athven ya gyarhven bhav men yadi surya adi grahon ka gochar ho to us muhurt ka tyag karna chahie. surya, mangal, shani, rahu, ketu janm rashi se 3, 6, 11ven bhav men shubh hote hain. kintu shatru grahon dvara vedhit hone par ashubh hote hain. dashven bhav ka surya chaturthasth grah se vedhit hota hai. pita putra ka vedh nahin hota islie surya shani se vedhit nahin hota hai. pratyek grah uchch, mul trikon aur svarashi men balvan hota hai tatha nich aur shatru rashi men nirbal hota hai. mesh rashi ka surya, kark aur dhanu rashi ka guru 4, 8, 12van bhi shubh manya hai. devarshi narad ke anusar- ”shukle chandrablan grahyan krishne tarablan tatha“ arthat shubh muhurt hetu shukla paksh men chandrama balvan hona avashyak hai aur krishn paksh men tarabal dekhna chahie. muhurt men tarabal ka mahatva: muhurt ke adhikansh granthon men shukla paksh ko hi shubh muhurt ke lie grahya mana hai. kintu atharvaved jyotish men krishn paksh ko bhi shubh muhurt hetu grahan kiya gaya hai. usmen likha hai ‘tarashashti samanvita’ arthat muhurt men tara ka 60 guna bal hota hai. prajapti brahma ji ke anusar pati ke videsh chale jane ya uske bimar ho jane par stri ghar ki adhikari hoti hai. arthat krishn paksh men tara ki pradhanta hone ke karan tara bal dekhna uchit hai. muhurt chintamni ke anusar, krishn paksh men tara ke balvan (shubh) hone par chandrama bhi shubh hota hai aur tara nesht hone par chandrama nesht hota hai. maharshi bhrigu ka mat hai- pratyek nakshatra ka shubh aur ashubh fal janakar karya karne se labh hota hai. atah jo apni unnati chahe unhen uchit hai ki ve svayan ko samriddh banane vale nakshatron ka gyan avashya kar len. tara sadhn: apne janm nakshatra se sidhe kram men abhisht nakshatra tak gine (jis din shubh karya praranbh karna ho us din ka chandra nakshatra abhisht nakshatra kaha gaya hai.) pratham nakshatra (janm nakshatra) se naven nakshatra tak sampat adi tara hoti hai. yadi nakshatra 9 sankhya se adhik ho to usmen 9 ka bhag dene par jo shesh ank prapt ho usi sheshank ke tulya tara hoti hai. is prakar tin-tin nakshatron ke nau varg bante hain. jinke nam kramshah janm, sampat, vipat, kshem, pratyari, sadhak, vadh, maitra, ati maitra sangyak hote hain. vivah nakshatra gun melapak men var se kanya ki aur kanya se var ki pratham tara (janm tara) shubh mani jati hai tatha iske tin gun (ank) diye jate hain kintu hamare mat se yah uchit nahin hai. vivah adi shubh karyon men tyajya dosh: amavasya, rikta tithi (4, 9, 14) varvela, janm nakshatra, krur var (ravi, mangal, shani) tatha gandant lagn, tithi aur nakshatra shubh karyon men yatnapurvak tyajya karne chahie tatha iske alava bhadra, krakach yog, tithiyant ki do ghati, yamghantak yog, dagdha tithi, nakshatrant ki tin ghati aur kulik yog vivahadi shubh karyon men tyajya hai. inke atirikt aur bhi bahut sare dosh hai, jinka muhurt shastron men ullekh milta hai. yadi samast doshon ka vichar kiya jaye to hamen aisa muhurt dhudhna mushkil hoga, jis muhurt men koi dosh n ho. kyonki pratyek vyakti ke lie pratyek din koi n koi dosh avashya ata hai. aisi sthiti men dosh samuhon ka nash karne vale arthat kuyogon ka parihar karne vale, muhurt siddhi pradayak yogon par dhyan dena avashyak hai tabhi ap kisi vyakti ko shubh muhurt bata paenge anyatha nahin. dosh sangh nashak raviyog: bhadra, vyatipat, vaidhriti, janm nakshatra adi vividh dosh dopahar bad suryoday se 12 ghati uprant nyun rah jate hain. is prakar shubh chandra bal bhi krakach yog, mrityu yog, dagdha tithi, rikta tithi adi yatra doshon ko svatah hi dur kar deta hai. ‘suryabhat chandrakrshe raviyogaah syurdoshasanghavinashkaah.’ surya-chandra janit nakshatra divas ko (raviyog ko) shastrakaron ne doshsangh nashak mana hai. yah muhurt shodhan men ati upyogi siddh hota hai. raviyog gyat karne ki vidhi is prakar hai- gochriya surya jis nakshatra men ho us nakshatra se (abhisht din) 4, 6, 9, 10, 13 ya 20ven nakshatra par chandrama ka gochar hone se kuyog nashak raviyog hota hai. raviyog ki avdhi chandrama ke nakshatra bhogkal ke saman hoti hai, chandra rashi ke saman nahin. nirnay sagar adi panchangon men ravi yog diye rahte hain. safltadayak sarvarthasiddhi yog: var evan vishesh nakshatron ke yog se sarvarthasiddhi yog bante hain. sarvarthasiddhi yog men prayah samast shubh karyon ki siddh hoti hai. hastaditya, chandramrig bhaumashvini, budh-anuradha, guru-pushya, shukra-revti, shani-rohini yog bahut shaktishali aur shubh hote hain, inhen amritsiddhi yog kahte hain. sarvarth aur amrit siddhi ye donon hi yog, dosh nashak aur shuddhi pradayak hai. sarvarthasiddhi yog talika ravivar-ashvini, pushya, tinon uttara, hast, mul somvar- rohini, mrigshira, pushya, anuradha, shravn manglvar- ashvini, kritika, ashlesha, uttarabhadrapd budhvar-krittika, rohini, mrigshira, hast, anuradha guruvar - ashvini, punarvasu, pushya, anuradha, revti shukravar- ashvini, punarvasu, anuradha, shravan, revti shanivar - rohini, svati, shravan. muhurt chintamni ke anusar guru-pushya men vivah, shani-rohini men yatra aur mangl-ashvini siddhi yog men grih pravesh varjit hai. pushyasiddhayantisarvani: jis prakar sabhi chaipayon men sinh balvan hota hai, usi prakar nakshatron men pushya nakshatra balvan hai. tara ya chandra ashubh hone par bhi pushya nakshatra men kiye gaye karya safal hote hain. janm tara ashubh hoti hai- shighrabodh ke lekhak pan. kashinath bhattacharya adi jyotishiyon ke anusar janm tara (1) shubh hoti hai. jabki atharvavediya jyotisham ke anusar yah ashubh hoti hai. ‘taraah shubhapradaah sarvastripanchasaptavarjitaah.’ arthat 3, 5, 7vin tara ashubh hone ke karan tyajya hain. inke atirikt sabhi tarayen shubh hoti hain. (shighrabodh - 2/200) nav nakshatrake varge pratham tritiyan tu varjayet. panchman saptaman chaiv sheshaiah karyani karyet.. (a.jyo-110/10) niche kahe gaye nakshatron ke nau vargon men se pratham, tritiya, pancham evan saptam varg ke nakshatron ko chorakar shesh vargon ke nakshatron men shubh karya praranbh karna chahie. is shlok pratham tara ko bhi shubh karya men varjit kiya gaya hai. shubhashubh tara bodhak chakra janm nakshatra se nakshatra varg tara sangya tara fal abhisht nakshatra (sheshank) 1, 10, 19 1 janma ashubh 2, 11, 20 2 sampata shubh 3, 12, 21 3 vipt ashubh 4, 13, 22 4 kshem shubh 5,14,23 5 pratyari ashubh 6,15,24 6 sadhk shubh 7,16,25 7 vadh ashubh 8,17,26 8 maitra shubh 9,18,27 9 atimaitra shubh papairviddheyute hine chandratara bale'pi ch. pushyasiddhayanti sarvani karmani manglani ch.. yadi chandrama aur tara balhin ho ya papyukta/papviddh ho tab bhi pushya nakshatra men kie gae samast manglik karya safal hote hain. ek sthan par kaha gaya hai-‘pushyastvansarvadhishnayanam.’ arthat pushya ke sannidhya men anisht se anisht dosh bhi nasht hokar hamare anukul ho jata hai aur karya siddhi deta hai. guruvar ko pushya nakshatra ke sanyog se sarvarth siddhi aur amrit siddhi yog banta hai. kintu yadi guru pushya yog navmi tithi men ho to vah vishyog ban jata hai. is karan navmi tithi ko guru-pushya ka tyag karna chahie. muhurt men dhyan rakhne yogya baten- jyotish shastra men pratyek karya ke shubharanbh hetu tithi, var, nakshatra adharit muhurt die hue hain. inmen se tithi ka sirf ek gun hone ke karan tithi ki upeksha ki ja sakti hai kintu var aur nakshatra ke sanyog ki nahin. koi shubh muhurt kisi vyakti ke lie tabhi shubh baithega jab us muhurt ke samay usko chandra ya tara bal prapt ho raha ho. sabal aur shubh chandra yadi gochriya guru dvara drisht ho to aisa muhurt anek doshon ka nashak aur karya siddhidayak hota hai. shubh lagn men karya praranbh karna chahie, lagn shuddhi n hone par godhuli lagn ya abhijit muhurt men karya ka shubhranbh karen. kyonki abhijit sab prakar ki kamnaon ko purn karne vala hai. ”abhijitsarvakamay sarvakamarthasadhkah.“
Kya aapko lekh pasand aaya? Subscribe
Kya aapko lekh pasand aaya? Subscribe


  July 2011

Apne vichar vyakt karein

blog comments powered by Disqus
.