shrimad bhagavat mahapuran ke anusar chandrama ka janm maharshi atri ki patni anusuiya se hua tha. manyata hai ki chandrama pratyek manushya men vas karta hai. chandrama ki kul kalaon ki sankhya solah hai tatha chandrama ko in sabhi men nipunta prapt hai. lokmanyata hai ki bhagvan shrikrishn ka janm bhi chandravansh men hi hua tha jo ki solah kalaon men purn parangat the. bhagvan brahmadev ne chandrama ko bij, aushdhi, jal tatha samast gyanvan brahmanon ka svamitva pradan kiya tha. aisi bhi manyata hai ki chandrama ka vivah daksharaj ki 27 kanyaon ke sath hua. daksharaj ki 27 kanyaon ke chandrama se vivah ke vishay men bahut hi sundar katha ka varnan milta hai. iske anusar raja daksh ki sabhi kanyaon men rohini sabse adhik rup aur gunon se paripurn thi. vah n keval atyant sundar thi apitu sabhi kalaon men bhi nipun thi. chandrama use dekhte hi us par mugdh ho gaya aur uske pita daksharaj ke pas jakar rohini se vivah karne ki ichcha prakat ki.
is par raja daksh ne uske sammukh apna prastav rakha ki yadi vah unki anya 26 kanyaon se bhi vivah karega to daksh rohini ka vivah uske sath kar sakte hain. unki is shart ko chandrama ne saharsh svikar kar liya aur uska vivah raja daksh ki 27 kanyaon ke sath ho gaya. kintu chandrama ke man men to keval rohini hi samai hui thi. atah vah apni anya patniyon ko chodakar keval rohini ke sath hi raman karne laga. is prakar un donon ne ek-dusre ke pyar men hajar varsh vyatit kie tatha apne is vyavhar par anya 26 patniyon dvara ki gai kisi bhi prakar ki alochna par koi dhyan nahin diya. chandrama ke is vyavhar se dukhi hokar, uski anya patniyon ne apne pita raja daksh se uski shikayat ki. daksharaj ne chandrama ko samjhane ka bahut prayas kiya kintu chandrama ne unki kisi bat par dhyan nahin diya to daksharaj ne krodh men akar apne damad ko shrap diya ki vah apna rup khokar kala ho jaega aur akash se chandrama ka prakash ekadam lupt ho jaega.
yah ek bahut hi sundar akhyan hai jo chandrama ke svabhav ke vishay men hi nahin balki ham sabke vishay men bhi bahut kuch kahta hai. jyotish men chandrama manav man ki purn abhivyakti karta hai arthat ismen chetan, avchetan aur achetan man ke atirikt kuch-kuch manvta ki samuhik avchetna ka bhi bhag rahta hai. aisi manyata hai ki daksh ke shap se pahle ratri men purn chandrama hi akash men hota tha. atah chandrama ke is tarah lupt ho jane ka prabhav keval daksh ki 27 kanyaon par hi nahin apitu samast manav samaj par pada kyonki isse pahle purn chandra ka shubh aur shital prakash ratri ko sukhamay bana deta tha. achanak hi chandrama ke lop ho jane se utpann in amavasyaon ki kali raton ne jivan ko kashtamay kar diya. isse charon or bahut hahakar mach gaya tatha jivan ke sabhi kshetron se jude hue logon ne raja daksh se apne shrap ko vapas lene ka anurodh kiya. raja daksh pahle to iske lie taiyar nahin hue kintu bahut anuny-vinay ke bad unhonne logon se kaha ki yadi chandrama apne apradh ko man le aur bhavishya men aisa vyavhar n karna svikar kare to vah shrap ko samapt to nahin kuch parivartit avashya kar sakte hain.
chandrama apni nai paristhiti ke karan itna kshubdh aur dukhi tha ki vah kshama mangne ke lie taiyar nahin hua. tab sadhu-santon ke sath lokapratinidhiyon ne daksharaj se chandrama ko kshama karne ka punah anurodh kiya. yadyapi raja daksh apne jamata ke is vyavhar se khush nahin the kintu lokhit ko dekhte hue unhonne apne shrap men kuch sanshodhan kar diya aur kaha ki ab chandrama sada ke lie purn prakash nahin dega kintu pratidin uske prakash men kuch ansh ki vriddhi hoti jayegi aur purn hote hi punah apna prakash khona praranbh kar dega. uske bad se hi krishn paksh aur shukla paksh astitva men aye. mah men ek bar purnima aur ek bar amavasya hone lagi. jyotish ke anusar chandrama vyaktitva ka dyotak hai. vyaktitva ek bahuayami madhyam hai jisse vyakti apne ap ko vibhinn rupon men abhivyakt karta hai. udaharan ke lie vyakti ka vyavhar apni patni athva preysi ke sath bahut hi premamay hota hai.
jabki apne karyasthal par vahi vyakti bahut hi vyavharik buddhi ke sath vyapar karta dikhai deta hai. kathin paristhitiyon men vyakti kabhi to dridhta se unka samna karta hai tatha kabhi vahan se bhag khada hota hai. vyakti ko sada apni paristhitiyon aur parivesh ke anusar apne ap ko badlte rahne ki avashyakta hoti hai. chandrama ham sabke samuhik avchetan ka pratinidhitva karta hai tatha vah purnatah apni chetan, avchetan tatha achetan avastha ke sath manav man ka dyotak hai. jyotish men chandrama manav man ka pratinidhitva karta hai tatha chandrama se sanbandhit uparyukt katha man ki vibhinn avasthaon ka bahut hi sundar varnan karti hai. is katha ka vishleshan karne par ham man ke vyavhar ke vishay men bahut kuch jan sakte hain. yah man lene par ki chandrama manav man ka dyotak hai chandrama ke vibhinn paristhitiyon men bhinna-bhinn vyavhar hamen manav man ke vishay men bahut kuch batate hain. katha men ham chandrama ko daksharaj ki rupvan kanya par mugdh hota dekhte hain jo kisi bhi prakar use pana chahta hai. isi prakar ham pate hain ki man bhi yadi ekagrachit ho, kisi kam men lagta hai to vah yen ken prakaren apne uddeshya ko pakar hi rahta hai.
daksh ki kanyaon se vivah hote hi chandrama ne apne man ke anusar vyavhar karna praranbh kar diya. vah apni 26 striyon men koi ruchi nahin rakhta tha. atah usne apna purn dhyan rohini par hi diya jo ki un sab men rupvan hi nahin balki premkla men bhi purn parangat thi. prem ras men vibhor hokar donane hajar varsh tak ek-dusre ke prem men dube rahe. yah hajar varsh ki bat atishyoktipurn ho sakti hai kintu vah spasht sanket deti hai ki achchai ya burai se grasit man kisi bhi sima ko nahin manta. aisa hi vyavhar chandrama ka apni anya striyon ke prati tha jab unhonne uske is vyavhar ki alochna ki. yadi use buddhimani ki bat batate hue samjhaya jae to bhi grasit man us par dhyan nahin deta. aise hi chandrama ne daksharaj ke samjhane par dhyan nahin diya.
halanki chandrama apni galti ko janta hai lekin galti manne ko raji nahin hota. isilie chandrama svayan daksharaj se kshama mangne nahin gaya. antatah daksharaj ne svayan apne shrap men sanshodhan kar chandrama se kaha ki ab vah sada ke lie purn nahin rahega kintu ghatta-badhta rahega. badhte hue mas men ek bar purn hone par punah ghatne lagega. man ke svabhav ki ek aur vichitrata yah hai ki apni galti ke lie pashchattap men bhi use vaisa hi santosh milta hai jaisa jivan ke sukh bhog men. man men shayad apni sabhi kamjoriyon par vijay pane ki ichcha hoti hai chahe vah apne prayas se prapt ho ya kisi dusre ke dvara ingit ki jae. man sada purnata ko pane ke lie laga rahta hai aur uska ek hi tarika hai nirantar prayas tatha apni galtiyon se shiksha lena. ve aijak nyutan hi the jinhonne seb ke girne ko dekhakar gurutvakarshan ke siddhant ki khoj ki. yun to bahut-se logon ne ped se seb girte dekhe honge kintu nyutan hi uska sukshm adhyayan kar yah mahan khoj kar sake.
isi prakar chandrama ke ghatne-badhne ko to log bahut samay se dekhte a rahe hain kintu ve prachin bhartiya manishi hi the jinhonne chandrama aur daksh ki kanyaon ka rupak de itne arthapurn dhang se manav vyavhar ko samjhane ka prayas kiya. bhartiya mahan kathakar hain tatha unke pas vibhinn rituon, logon, devtaon adi ke vishay men anekanek katha-kahaniyan hain. ve sabhi kathaen kuch prakat aur gupt arthon se paripurn hain tatha unka uddeshya lok kalyan hai. rashichakra ke 27 nakshatra hi katha men chandrama ki 27 striyon ke rup men chitrit hain tatha chandrama pratyek nakshatra par mas men ek bar hota hai. is prakar vah prithvi ki parikrama lagabhag sava sattais din men puri karta hai. chandrama vrish rashi ke rohini nakshatra men purnata ko prapt karta hai.
atah is nakshatra men chandrama ko uchch ka chandra kaha jata hai. jyotish ke anusar chandrama dudh se safed rang ka, solah kalaon ka svami hota hai. pretatmaon aur pashuon par svamitva rakhta hai. brahmadev ne use bijon, aushdhiyon, jal tatha brahmanon ki jivndayini shakti hone ka vardan diya tha. chandrama chaval, kapur, chandi, safed vastra, safed ful, shakkar tatha bailon par niyantran rakhta hai. isse sanbandhit ratn moti hai. chandrama kark rashi ka svami hai. kark rashichakra ki chaithi rashi hai jo mata, sukh, aishvarya, makan tatha sanpatti ko darshati hai. chandrama hamare samuhik avchetan ka bhi pratinidhitva karta hai. vrish rashi men uchch ka hota hai tatha 3 ansh par uchchatam avastha ko prapt karta hai. vrishchik iski nich ki rashi hai tatha ismen bhi nichatam sthan 3 ansh par hai. yah dhyan dene yogya hai ki vrish rashi ki 0-3 ansh tak vah purn uchchata ka bhog karta hai tatha vrish ka shesh tin se 30 ansh ka bhag hi iska mul trikon hai.
vibhinn bhavon par chandrama ka prabhav: pratham bhav pratham bhav ka chandrama jatak ko viprit ling ke prati akarshit, rasik, sabhya, saumya tatha samasyaon ke nirakaran men mahir banata hai. vrishabh ya kark ka chandrama use bhavyata, bhagya v saumyata pradan karta hai. pratham bhav ka chandrama adhyayan men abhiruchi v khyati ka bhi dyotak hai. is bhav men nich ka chandra vyakti ko vyasnon ka adi tatha svabhav se kanjus banata hai. jivan ke 27ven varsh asvasthata v rog ka bhay rahta hai. dvitiya bhav dvitiya bhav ka chandrama vyakti ko dhanvan, adhyayan ka premi, achcha vakta, dhan v sukh ka chahne vala tatha kisi vishay ka gahra gyan rakhne vala banata hai. chandrama par budh ka prabhav use pita ki sanpatti se vanchit rakhta hai. videshon se achcha dhan kamata hai. kintu dhan ki sthiti hamesha upr-niche hoti rahti hai. shubh grahon ke prabhav se chandrama jatak ko kisi vishesh vishay ka gyata, dhan vyay karne ka ichchuk kintu bahut dhan kamane vala banata hai. jivan ke 27ven varsh men jatak ko vishesh labh hota hai.
tritiya bhav tritiya bhav ka chandrama vyakti ko bhratri prem tatha arthik sanpannata pradan karta hai. vah svasth, buddhiman, kathin vishyon ka gyata, dur sthanon ki yatra karne vala, achcha lekhak kintu manmauji banata hai. bhagyoday jivan ke tisre varsh men tatha 27 se 30ven varsh men yatraon se vishesh labh hota hai. vrishchik ka chandrama use kanon men kasht, kanjus, parpidak tatha dharm ki taraf jhukav vala banata hai. is sthan par shubh rashi ka chandrama vyakti ko prasiddh kavi v lekhak banata hai. chaturth bhav chaturth bhav ka chandrama vyakti ko sukhi, prasiddh, khadanon se labh pane vala, vivah ke bad bhagyoday, achchi ay, uttam vahan, mata ka sukh, dushkarmon se darne vala tatha dhani logon ka sanrakshan pane vala hota hai. viprit ling valon ko akarshit karne vala, rajsi logon se labh pane vala evan chandra-mangal sanyog hone par adhik khane vala banata hai. shukra-chandrama se vah bhrasht ho bure logon ki sangat men padta hai.
santan se kasht pata hai. jivan ke 22ven varsh men bhagyoday. pancham bhav pancham bhav ka chandrama jatak ko dhanvan, bhagyavan, adhyayan ka premi, sammanit, rahasyamay vishyon men ruchi vala, karun hriday, dayavan, anandit, khush rahne vala, atmavishvasi, santusht tatha lalit kalaon men ruchi lene vala banata hai. bhagyavan santti, jivan men dhan labh. yadi vrish ya kark men chandrama ho to adhik kanyaen paida hoti hain. gyanvan, satte v latri se labh, achche vastra v bhojan ka shaukin, dharm men astha tatha puja path men ruchi lene vala banata hai. shani se prabhavit chandrama use shararti, dusron ki hansi udane vala, masumon ko satane vala banata hai. jivan ke chathe varsh men bijli v agni se bhay rahta hai. chatha bhav chathe bhav ka chandrama vyakti ko spasht vakta, vyayshil tatha naukron-chakron se pareshan rakhta hai. kamjor ya bure grahon ke prabhav men jatak ki ayu men hani hoti hai kintu purn athva badhta hua chand use dirghayu pradan karta hai.
is bhav ka chandrama anek shatru, alasya, ati kamukta tatha amliya dosh se pidit rakhta hai. vrishabh ka chandrama gale ka kasht tatha vrishchik ka chandra bavasir ka karan hota hai. chandrama v shukra ka yog vyakti ko ati kamuk, bhaiyon se droh rakhne vala tatha viprit lingiyon par bhari vyay karne vala tatha adalti mamlon men parajay pane vala banata hai. jivan ke panchven varsh men sharirik kasht ki sanbhavna rahti hai. saptam bhav saptam bhav ka chandrama vyakti ko karunamay, videsh men rahne ka atyant ichchuk tatha viprit lingiyon se prabhavit hone vala banata hai. vyapar se labh pane vala, mithe ka shaukin, prasann v prasiddh banata hai. guru v budh se yukt chandrama sanpattiyon ka svamitva tatha patni v putron ka sukh prapt karne vala banata hai. shani-chandra ki yuti vivah men ashanti ki dyotak hai. dushit chandra vyakti ko ati kamuk tatha patni se dukh pane vala banata hai. jivan ke 24ven varsh men vivah ka yog hota hai.
ashtam bhav ashtam bhav ka chandrama asvasth deh tatha dusron ki sukh-sanpatti se ishrya karne vala banata hai. jivan men purn sukh ka abhav rahta hai. balvan chandrama videsh men jivan v sajhedari se labh prapt karata hai kintu man purvagrahon v durbhavnaon se grasit rahta hai. shukra v mangal ke dushprabhav se akasmat mrityu ki sanbhavna rahti hai tatha mata ke svasthya ki hani hoti hai. brihaspati ke sanyog se jatak ki ruchi rahasyavad men bhi hoti hai. jivan ke 32ven varsh men durghatana ka bhay rahta hai. navam bhav navam bhav ka chandrama jatak ko pitribhakt, guni putra vala, danshil, dhanvan, dharmik vyaktiyon ki seva karne vala tatha apne achche kamon ke lie jana ja sakne vala banata hai. shukra-chandrama ka yog ise natakhat jivan sathi pradan karta hai. vah dusron ke adhin seva karne vala hota hai. is bhav men chandrama durbhagya v manhani ka karak hota hai.
videshon se labh, 20 varsh ki ayu men tirthayatra tatha 24ven varsh men bhagya ki devi us par prasann hoti hai. dasham bhav dasham bhav ka chandrama vyakti ko dhanvan, bhagya sukh ko bhogne vala banata hai. sanudar vastuon ka vyapar karne vala, santoshi vyakti, dusron ki sahayta karne vala, parivar men pramukh tatha saumya svabhav vala hota hai. samaj men sammanit sarkari karya men kushal tatha shasan se labh pane vala hota hai. bhagyavan jivnsathi vala, dhanvan striyon ko prabhavit karne vala tatha sarkar se samman pane vala hota hai. dushit chandrama dama, vivah-vichched, alasya aur dusron se apman ka karak hota hai. char rashiyon ka chandrama bahut se vyavsay parivartanon ka karan hota hai. mangal se yuti hani ka tatha shani se yuti vyavsay men kathinaiyon ka dyotak hai. kintu jivan ke 24v v 43ven varsh men labh ko bhi ingit karta hai.
ekadash bhav ekadash bhav ka chandrama vyakti ko dhanvan, santan dvara bhagyoday tatha viprit lingiyon dvara dhan labh ka karan hota hai. is bhav ka chandrama jyotish v dharm men ruchi, sevabhav v jivan ke sukh bhogon ka karan hota hai. vah samaj men khyati sahaj pa leta hai tatha itihas ka gyata hota hai kintu kamjor v dushit chandrama use avara logon ke prati akarshit karta hai jo badnami ka karan hota hai tatha santan se sukh men bhi hani hoti hai. ise samajik apman ka bhay rahta hai kintu labhdayak chandrama 16ven varsh men dhan v 27ven varsh men man ka karan hota hai. dvadash bhav dvadash bhav ka chandrama vyakti ko videshvasi, gupt vidyaon men ruchi rakhne vala, ekant priya, sannyasi vritti vala, tyagi, aushdhiyon ka vyapar karne vala tatha shubh avsron v karyon men vyay men ruchi lene vala banata hai. is bhav men dushit chandrama vyakti ko krodhi vyaktitva, kusangti men ruchi, kanjus mansikta vala, krur v alsi banata hai. surya v mangal se prabhavit chandrama, sarkar v shasan ke dand ka bhagi, kapat karne vala, samasyaen paida karne vala, netra vikar se pidit, jue men harne vala v karagar ka bhogi bhi bana sakta hai.
jivan ke tisre varsh men asvasthata tatha 45ven varsh men jal se bhay ki sanbhavna hoti hai. vibhinn rashiyon men chandrama ka prabhav:- mesh jaisa ki ham jante hain ki mesh rashi ka svami mangal hai tatha chandrama v mangal men sahaj mitrata hai kintu mesh rashi men chandrama atyant bhavuk vyavhar karta hai. iska mukhya karan hai ki chandrama ati gatishil grah hai aur mesh ek kshaitijik (char) rashi hone ke karan use paryapt adhar pradan nahin kar pati. jab tak ki chandrama shubh grahon se sanbaddh ya prabhavit n ho. isi karan se vyakti men chanchlta bani rahti hai tatha vah bahut kuch eksath kar lena chahta hai. vah dharmik ruchi vala, gyaniyon ka man karne vala, deshatan ka premi, karun hriday tatha uthle vyavhar men vishvas n rakhne vala hota hai. vrish yah chandrama ke uchch ka sthan hai yadyapi uchchatam shunya se tin ansh tak shesh 3 se 30 ansh tak mul trikon men mana jata hai. 3 ansh par yah uchchatam hota hai. vrish rashi ka svami shukra hai tatha chandrama v shukra ka nikat ka sanbandh hai islie yahan chandrama ki gatividhi men ham vishesh utsah ke darshan karte hain.
yahan rachnatmak vritti apni purnata man upalabdh hai. yadi jatak rachnatmak kriyaon par dhyan de to vah ashcharyajanak parinam pa sakta hai. is rashi men chandrama jatak ko sanpda, santan se sukh, bhagya, shasan se samman v sukhkari jivan sathi pradan karta hai. vyakti ko parivar v vahan ka sukh tatha dharmik vritti bhi pradan karta hai. mithun budh mithun rashi ka svami hone ke karan vishesh mahatva rakhta hai. budh v chandrama men achche sanbandh ke karan yahan jivan ke utar-chadhav dekhne men ate hain. is rashi men chandrama uttejit avasthaon men apne utar-chadhav ke sath prabhavi rahta hai. atah mithun men chandrama hone par jivan men udasi ke kshan nahin hote. kabhi-kabhi naisargik buddhi bahut sundar parinam deti hai tatha vyakti shandar upayon ko vyakt karta hai jo apne samay se age ke jan padte hain. mithun ka chandrama vyakti ko mata-pita ka bhakt v dharmik banata hai. jivan men sukh ki koi kami nahin hoti tatha vyakti ko jivan bhar yatra karna ananddayak lagta hai.
kark chandrama kark rashi ka svami hai. atah is rashi men chandrama sahaj hi achche parinam deta hai. yah vyakti ko shant, ekagra tatha apni samast shakti se kam karne vala banata hai. santoshkari parinam hone par vyakti ki ruchi usi karya men bani rahti hai anyatha vah apni ruchi parivartit kar leta hai. kark ka chandrama jatak ko ghar, vahan v kabhi-kabhi bahut sanpatti pradan karta hai. naye adhyavsayon men saflta, dharmik vritti, danshilta kintu gupt rogon se pida bhi sanbhav hoti hai. sinh jaisa ki ham jante hain ki yah rashi surya ke svamitva men hai.
atah chandrama sinh rashi men sukh ka anubhav karta hai. is rashi men hone ke karan chandrama kuch atirikt utsahi hota hai tatha samy-samay par apna prabhav dikhata hai. jatak apni samathrya siddh karna chahta hai tatha bhari chunautiyan svikar karta hai. apne vishay men uski ray bahut unchi hoti hai tatha vah apni badai karne se bhi nahin chukta. sinh ka chandrama shasan se samman, samaj men pratishtha tatha adhikarik pad dene vala hota hai. vah atyadhik dhnarjan karta hai kintu asvasth v sharirik kasht ka bhagi hota hai. kanya kanya rashi ka svami budh hai. atah chandrama kanya rashi ke jatak ko kushagra buddhi pradan karta hai tatha vah turant hi parinamon ko prapt karne men safal hota hai. samasyaon ko vah bahut vyavharik buddhi se dekhta hai. atah kuch bhi bhagya ke bharose nahin chodta. to bhi kabhi uske apni hi tarkikta men ulajh jane ki sanbhavna rahti hai. kanya rashi ka chandrama jatak ko viprit lingon se sahvas v samast aishvarya pradan karta hai.
vah yatra ka ichchuk tatha videshon men rahne vala hota hai. dhan kamane ki achchi kshamata hoti hai. vah jaldabaj, bina soche bolne vala tatha gair kanuni kamon men ruchi lene vala hota hai. tula tula rashi ka svami shukra hai tatha shukra ke prabhav se chandrama apne bhavya gunon ko kho baithta hai kyonki is is rashi men nikrisht mansik vrittiyon ko badhava dene ki vritti hoti hai. atah jatak in prabhavon men bah jata hai aur durbhagyakari gatividhiyon men sanlagn rahta hai. vah dushcharitra vyaktiyon ke sanpark men ata hai tatha dhan v pad ki hani ka bhagi hota hai. dhan ki kami uske jivan men vishesh sthan rakhti hai. viprit lingon se sanbandh n sukhad hote hain n labhdayak. usmen vivad ki vritti, atmavishvas men kami, daridrata tatha kabhi-kabhi hasyaspad vyavhar ki vritti rahti hai. vrishchik vrishchik rashi ka svami mangal hai tatha yah chandrama ke nich ka sthan hai. 3 ansh par yah nichatam hota hai. svabhavik hi nich ka grah apna svabhav v prabhav kho baithta hai aur keval nichbhang ki dasha men hi prabhavi hota hai. is rashi men yahi chandrama ke sath hota hai .
jatak ko apne prayason men apmanit hona padta hai. dusron ki seva men jana padta hai. apnon se dvesh rahta hai tatha dhan ki hani hoti hai. use shasan se samasya, upakramon men nirasha v sharirik kasht hota hai. dhanu dhanu rashi ka svami brihaspati hai. chandrama v brihaspati ki mitrata ke karan dhanu rashi men chandrama achche parinam deta hai kintu ayogya vicharon v vyaktiyon ke prabhav men akar parinamon ka bina vichar kiye ati utsahi rahne ki pravritti rahti hai. ve mehnti v karyakushal hote hanai kintu ekagrata ke abhav men kuch bhi labhaprad nahin kar pate aur uddeshya se bhatak jate hain. inhen paitrik sanpatti ki hani, mansik v sharirik kasht tatha shasan dvara dand ki ashanka rahti hai. in sabhi badhaon ke hote hue bhi inka parishram aur dhairya hi inhen jivan men saflta dilata hai. makar chandrama ka vibhinn rashiyon se vibhinn prakar ka sanbandh hota hai. iske do karan hain.
1. chandrama vibhinn grahon se vibhinn staron par sanbandh sthapit karta hai.
2. usi ke anusar v usmen sahjta athva ashjta ka rashi anusar anubhav karta hai. makar rashi ka svami shani grah hai. is rashi men chandrama bahut hi vyavharik ho jata hai tatha sansarik gyan se labh lene ka prayas karta hai. is rashi ka jatak yatraon ki ichcha vala tatha santan se sukh pane vala hota hai. iske vyavhar men ek satat anishchitta rahti hai tatha vah agyat chintaon se bhaybhit rahta hai. kunbh shani is rashi ka svami bhi hai kintu chandrama ka is rashi se sanbandh makar rashi se kuch alag prakar ka hai.
yahan vishyon ka ek antadrvandva hai jo vyavharik parinamon ki prapti men badhak hai. yah dvandva ki sthiti vyakti ke vikas kram ke sath-sath dekhi ja sakti hai. ve sarvabhaumik star par karya karna chahte hain kintu choti-choti samasyaen unhen ghere rahti hain. unhen sanpatti ki hani, dushchinta, karj lena tatha anaitik karyon men sanlagn hona pad sakta hai. usmen bure logon ki sangat v duvryasnon ki lat padne ki sanbhavna rahti hai. min is rashi ka svami brihaspati hai. chandrama ka brihaspati se vishesh sanbandh hai jo min rashi men chandrama ke hone se hi spasht hota hai. chandrama apni samast yogyata ke sath yahan prakat hota hai tatha jatak ki kalpana ko ek nai disha pradan karta hai. yahan akash ko chu lene ki antrik ichcha kam karti pratit hoti hai jo is nav prapt khyati ka bhag ho jana chahti hai. man rachna ki duniya men vichrne ko atur hota hai tatha ek ke bad ek rachnatmak kritiyon ke nirman men sanlagn rahta hai.
vyakti apne achche karmo se dhanarjan karta hai, bahirmukhi hota hai tatha jal se sanbandhit utpadon men ruchi leta hai aur usse labh pata hai. stri v santan se sukh tatha shatruon ka samul nash karne men bhi jatak saksham hota hai.