tairo dek men kard ‘di san’ 19 nanbar ka kard hai. yah kard khushi, vishvas, saflta, paradarshita, achcha svasthya, suavasar ka pratik hai. tairo riding ke dauran jiske liye is kard ka prakatan hota hai yah ingit karta hai ki us vyakti ka achcha samay ane vala hai.
jis prakar surya niklne par rat ka andhera chant jata hai usi prakar di san kard ke uday hone par vyakti ke jivan men jo bura samay aya tha vah bit gaya aur ab sabhi samasyaon ka ant ho jayega tatha uska jivan prakash se bhar jayega. jaise din men surya ke ujale men sabkuch paradarshi ho jata hai aise hi har samasya ka samadhan nikal ayega. har jhuth se parda hat jayega, agar kisi ka svasthya achcha nahin rahta aur tairo riding men uska yah kard nikal ata hai to iska arth hai ki ab iske svasthya men sudhar hone vala hai.
agar kisi vyakti ko apne har kam men koi n koi badha ati rahti hai to is kard ka prakatya batata hai ki ab uski har badha dur hone vali hai tatha usko apne raste men age barhne ke lie suavasar milne vale hain jinke dvara usko har kshetra men saflta milne ki asha hai. yah kard batata hai ki ab us vyakti ka sahi samay a gaya hai kuch kar dikhane ka v avasar ka labh uthane ka. uske man men jo dabi hui ichchayen hain
unko pura karne ke lie agar vah prayatn kare to use saflta jarur milegi. vivah yogya yuvak, yuvti ke liye agar yah kard niklta hai to prayatn karne par unko achche jivan sathi milne ka uchit avasar hai prayatn chahe unke dvara ho athva unke mata-pita dvara. agar koi yuvak kafi samay se achchi naukri ki talash kar raha hai aur vah tairo riding karvata hai aur agar tairo riding ke dauran kard ‘di san’ nikal ata hai
to spasht hai ki yah uchit samay hai. agar vah prayas kare to usko achchi naukri mil sakti hai. agar koi pratiyogita men baithna chahta hai aur tairo riding men uska yah kard nikal ata hai to nishchay hi uska chayan ho jayega. prastut kard ke uday hone par kisi intaravyu men usko saflta jarur milegi. agar kisi vyakti ko vyapar men ghata ho raha hai aur vah pareshan hai aur is dauran yadi vah tairo riding karvata hai aur uska kard ‘‘di san’’ ka prakatya hota hai
to iska arth hai vah prayas kare to is samay usko labh mil sakta hai, agar v mehanat karega to purane ghate ki bhi purti ho jayegi aur age bhi saflta milegi, kyonki ukt kard ka niklna uski saflta ka suchak hai. yadi kisi vyakti ka dampatya jivan sukhi nahin hai, pati-patni men manmutav rahta hai, ek-dusre ke sath nahin rahna chahte hain, aise samay par agar vah vyakti tairo ridar ke pas jata hai aur apne liye tairo riding karvata hai us samay tairo riding ke dauran agar kard ‘‘di san’’ nikal ata hai to yah ingit karta hai ki agar vah prayas kare to uska danpatya jivan sukhamay ho sakta hai. unke jivan men fir se khushiyan a sakti hai. jis prakar surya ke prakash men rat ke andhere ki kalima dhul jati hai
aur charon or prakash fail jata hai usi prakar unke prayason se pichli karvahat samapt ho sakti hai tatha unke jivan men bhi naya savera a sakta hai aur vah age bhavishya men ek khushamay jivan ji sakte hain. man lijiye koi pati-patni apne bachche ke liye tairo riding karvate hain. jiske pahla bachcha nahin hai to tairo riding ke dauran ‘‘di san’’ kard niklne par ve log asha kar sakte hain ki jaldi hi unki yah ichcha puri hone vali hai. yah unke ghar bachcha hone ka ishvar ke ashirvad ka sanket hai.
jiska riding ke dauran yah kard prakat hota hai yah us vyakti ka uske har kam men, har kshetra men drirh nishchay, vishvas, karyashilta, sakaratmak urja tatha saflta darshata hai. agar vyapar men kinhin do vyaktiyon ki sajhedari hai aur kisi galtfhmi ke karan unmen manmutav ho gaya hai tatha ve donon har samay ek dusre par sandeh karte hain, unke bich ka vishvas purnatah samapt ho gaya hai aur ve donon apas men sath n hokar apna-apna alag vyapar karna chahte hain. aise samay par agar ve tairo ridar ke pas jakar tairo riding karvate hain aur unka kard ‘‘di san’’ niklta hai
to unke liye yah uchit hoga ki ve alag hokar apna svatantra vyapar karen. ismen usko saflta avashya milegi, vah himmat rakhe aur drirh nishchay ke sath apna alag vyapar karane. ishvar usko rah dikhaega aur vah safal hoga.