विवाह रेखा ही बता देती है विवाह सुख

vivah rekha hi bata deti hai vivah sukh  

Ank ke aur Lekh | Sambandhit Lekh | Views : 100752 |  

hatheli men vivah rekha bahut hi choti hoti hai parantu vyakti ke jivan men bahut prabhavshali hoti hai. hath ki rekhaon ka adhyayan karte samay ham vivah rekha ki upeksha nahin kar sakte. hriday rekha evan jivan rekha ki tarah yah rekha itni gahri evan bari nahin hoti. vivah rekha budh ki ungli ke niche shuru hokar anamika ungli ki taraf jati hai. yah hriday rekha ke upar choti ungli ke niche sthit hoti hai.

sukhi jivan ka adhar dampatya sukh hi hai. parivar ka sucharu sanchalan pati-patni men akarshan, prem, samarpan evan vishvas par tika hua hota hai. inka abhav dampatya jivan ko narak tulya bana deta hai. vivah muhurt, kundli milan, janmang men dampatya sukh adi sandarbh se alag manushya ki hatheli men upasthit vivah rekha ki charcha ki ja rahi hai.

hatheli men vivah rekha: hatheli men yah rekha sabse choti lekin sarvadhik mahatvapurn hoti hai. is rekha ko vivah rekha, vasna rekha, pranay rekha adi nam se jana jata hai. kanishtha anguli ke niche hriday rekha ke upar evan budh parvat ke bagal men yah rekha hoti hai. hatheli men vivah rekhaon ki sankhya char tak ho sakti hai. inmen se ek rekha hi sarvadhik pusht evan lanbi hoti hai. vivah rekha hriday rekha ke upar hi sarvadhik pusht evan lanbi hoti hai. vivah rekha hriday rekha ke upar hi hona chahie. jin vyaktiyon ke hathon men yah hriday rekha ke niche hoti hai unka vivah prayah nahin hota hai. vivah rekhaon ka adhik hona is bat ka sanket hai ki vivah purva ya vivah bad utne stri/purushon se pranay sanbandh banenge karan vivah rekha ke sath jo chati-choti rekhaen hain ve pranay rekhaen hai. yadi hatheli men pranay rekhaon ka abhav hai to vyakti kam lolup n hokar sanymit jivan jita hai. dampatya sukh ke lie hatheli men vibhinn parvat vishesh kar guru/shukra parvat tatha anya rekhaon ki sthiti bhi vicharniya rahti hai.

vivah rekha lakshana:

1. yadi vivah rekha purn pusht tatha lalima yukt ho to vyakti ka dampatya sukhamay vyatit hota hai. yadi vivah rekha kanishtha anguli ke dusre por tak charhe to vyakti ko patni ki prapti nahin hoti hai.

2. khandit vivah rekha jivan ke madhya kal men patni viyog deti hai yah yog patni ki mrityu hone ya talak hone se banta hai. vivah rekha niche ki or jakar hriday rekha ko chue to patni ki mrityu ho jati hai.

3. shukra parvat se koi rekha nikalakar vivah rekha ko sparsh kare to vaivahik jivan atyant dukhamay ho jata hai. ant men do munhi vivah rekha bhi dampatya jivan ko kalah yukt banati hai.

4. hatheli men vivah rekha ka chaira hona vivah ke prati koi utsah n hone ka sanket hai. vivah rekha se praranbh hokar koi patli rekha hriday rekha ki or jaye to pati patni ke sath jivan bhar bana rahta hai.

5. vivah rekha ka ant men kai bhagon men bant jana atyant dukhi dampatya ka sanket hai. do munhi vivah rekha ki ek shakha hriday rekha ko sparsh kare to vyakti ka prem sanbandh patni ki bahan se bhi ho jata hai. rekha ki aisi sthiti yadi stri ke hath men ho to uska prem sanbandh pati ke bhai se ho jane ki ashanka rahti hai.

6. vivah rekha surya rekha ko sparsh kar niche ki or jaye to anmel vivah hota hai. yadi budh parvat par vivah rekha kai bhagon men bant jaye to kai bar sagai tutti hai. yadi vivah rekha mastak rekha ko sparsh kare to pati apni patni ki hatya kar deta hai.

7. vivah rekha par kala dhabba patni sukh ka abhav batata hai. yadi vivah rekha se koi rekha nikal kar shukra parvat ko sparsh kar le to patni men charitrik dosh ho sakta hai.

8. yadi vivah rekha ayu rekha ko kate ya vivah rekha bhagya rekha evan mastak rekha paraspar mile to dampatya dukh evan kalah se paripurn rahta hai. ari rekha se vivah rekha ka katna bhi vaivahik sukh hani deta hai.

9. vivah rekha men jhukav aur jhukav par kraes bana ho to pati/patni ki akasmik mrityu ho sakti hai. vivah rekha ke udgam par dvip ka chinh dampatya sukh bigarta hai.

10. vivah rekha par ek se adhik dvip shadi sukh se vanchit rakhte hain. yadi vivah rekha ka jhukav kanishtha ki or ho to jivan sathi ki mrityu usse purva hoti hai. yah lakshan pati ke hath men ho to patni ki aur stri ke hath men ho to pati ki mrityu.

11. budh kshetra par do samanantar pusht rekhaon ka hona do vivah hone ka sanket hai. do hriday rekhaen hone par vivah nahin hota hai.

12. chandra parvat se koi rekha akar vivah rekha se mile to vyakti bhogi evan kamuk hota hai. mangal rekha se akar koi rekha vivah rekha ko sparsh kare to vivah sukh nahin milta.

13. bhagya rekha aur mastak rekha men yav ka chinh ho, bhagya rekha terhi ho, vivah rekha upar ki or muri ho to vyati vivah nahin karna chahta hai.

14. vyakti adarsh pati siddh hoga yadi tarjani sundar sudaul ho guru parvat par epaiks kendra men ho, shukra, chandra parvat apne kendra men ho, mastak rekha patli ho tatha ayu rekha se mili ho, hriday rekha se ek rekha tarjani ki or tatha dusri tarjani aur madhyama ke bich men ho.

15. vivah rekha par fork ho, shukra parvat ubhar lie hue ho, mastak rekha janjirnuma ho, shukra mudrika dohri ho evan kati ho tatha hriday rekha men yav ho to vyakti ishkabaj hota hai.

16. nimn lakshan hone par charitrik patan hone ki puri sanbhavna rahti hai. shukra parvat ubhra hua ho, us par nakshatra ho, angutha sudrirh ho, bhagya rekha ke praranbh se do samanantar rekhaen ayu rekha ko katti hui age barhe, hriday rekha golai lie hue ho, hriday rekha lanbi ho tatha guru parvat ki gahrai ko par kar jaye. ayu rekha bhi golai lie ho to ye lakshan ati kam vasna hone ke spasht sanket hai.

17. yadi hatheli men chandra kshetra viksit ho to vyakti kam lolup tatha striyon ke piche lagne vala hota hai. hatheli men pranay rekhaen hon surya parvat ubhar lie ho to vyakti kafi soch vichar ke bad hi anya striyon se prem sanpark sthapit karta hai.

18. yadi shani parvat adhik ubhar lie hue ho to vyakti apne se bari ayu ki striyon se prem sanbandh sthapit karta hai use striyon se dhan labh bhi hota hai.

19. gahri pranay rekha gahre prem sanbandh hona batati hai evan kamjor pranay rekha alp samay ke lie prem sanbandh hona vyakt karti hai. pranay rekha par kraes ho to prem sanbandh shighra samapt ho jata hai aur yadi dvip ho to vyakti ko prem men badnami sahna parta hai. pranay rekha surya parvat ki or jaye to vyakti ka prem sanbandh unche gharane ki striyon se hota hai.

20. kamandh vyakti ke lakshan dekhie koi rekha madhyama evan tarjani ke madhya se praranbh hokar budh parvat ko par karti hui kanishtha ke niche tak chali jaye mastak rekha surya parvat ke niche do bhagon men ho jaye ek shakha hriday rekha ke udgam sthal ko chue, dusri shakha chandra parvat ko chue.

21. stri ke hath men vivah rekha janjirnuma ho to vah apne vilas hetu prem ke mamle men charitrik patan pati hai tatha uska svabhav krurta evan nishthurta ka hota hai.

22. mastak rekha choti ho hriday rekha uske najdik ho shukra parvat uncha tatha hriday rekha choti hokar shani parvat ke pahle hi samapt ho to vyakti kukarmi hota hai.

23. shukra parvat ubhra hua ho us par jali ho, anguthe ke pratham parva par nakshatra tatha tarjani ki tisri sandhi par tare ka chinh ho to vyakti dushcharitra hota hai.

24. patibrata stri ke lakshan dekhen - guru parvat achcha tatha us par ek rekha ho, anamika ke pratham parva par kraes ho, mangal maidan men spasht rekhaen hon, anguliyon ki rekhaen lalima yukt hon, hath chota evan saf rekhaon vala ho.

25. adarsh pati ka lakshan dekhen - hatheli sudridh, tarjani sidhi ho mastak rekha mahin, gahri evan sidhi ho, shukra evan chandra parvat achche hon, angutha chaikor ho tatha hriday rekha guru parvat par do munhi ho gai ho tatha shakhaen lanbi hon.

26. stri ke hath men vivah rekha par nakshatra, vivah rekha jhuk kar hriday rekha ko sparsh kare, vivah rekha par kala dhabba, vivah rekha hriday rekha se milakar barik rekhaen donon rekhaon ko kate to vaidhavya ghatit ho sakta hai.

27. sukhad vivah ke lakshan hain yadi chandra parvat se akar koi rekha bhagya rekha men mile, bhagya rekha chandra parvat se nikal kar hriday rekha tak jaye, manibandh se rekha nikalakar shani parvat tak pahunche tatha chandra parvat se koi rekha akar usmen mile.

kundli milan ke sath-sath yadi sanbhav ho to hatheli men maujud vivah rekha, anya rekhaon, parvaton evan vibhinn chinhon dvara sthapit dampatya sukhdayak evan dukhdayak yogon par avashya hi vichar kar lena chahie jisse bhavi danpatti ka vaivahik jivan purn sukhad rahe.

Kya aapko lekh pasand aaya? Subscribe
Kya aapko lekh pasand aaya? Subscribe


  July 2011

Apne vichar vyakt karein

blog comments powered by Disqus
.