कामदा एकादषी व्रत
Ank ke aur Lekh | Sambandhit Lekh | Views : 501 |  
kamda ekadshi vrat chaitra shukla paksh ekadshi ke din kiya jata hai. ek samay pandunandan dharmavtar maharaj yudhishthir ne trilok nath, yashoda man ke dulare, vasudev-devki nandan bhagvan shri krishn ke shri charnon men pranam kar vinypurvak prashn kiya ki he bhagvan! chaitra mas ke shukla paksha men sthit kamda ekadshi ka vidhan v mahatmya kya hai? kripa karke bataie.’ anant gun vibhushit bhagvan shri krishna ne kaha-‘rajan ek samay yahi prashna raja dilip ne apne gurudev vashishtha ji se kiya tha. tab unhonne jo uttara diya tha vahi main apki jigyasa shant karne hetu shravan karata hun, ap ekagrachitt se shravan karen.’ maharshi vashishth ji bole-‘he rajan. chaitra mah ke shukla paksh ki ekadshi ka nam kamda hai. yah papon ko bhasma karne vali hai. iske vrat se kuyoni chut jati hai aur ant men svarg ki prapti hoti hai. yah putra prapt karane vali evan sanpurn kamnaon ko purna karne vali hai. kamda ekadshi ke vrat men pahle din dashmi ke madhyahn men jau, gehun aur mung adi ka ek bar bhojn karke bhagvan vishnu ka smarana karen. dusre din (ekadshi ko) pratah snanadi karke ‘mamakhil papakshayapurvak parmeshvar pratikamnya kamdaikadshivratan karishye.’ yah sankalp karke jitendriya hokar shraddha, bhakti aur vidhipurvak bhagvan ka pujan karen. uttama prakar ke gandh, pushp, dhup, dip, naivedya adi arpit karke nirajan karen. tatpashchat jap, havan, stotra path aur manohar git-sangit aur nritya karke pradakshina kar dandavat karen. is prakar bhagvan ki seva aur smaran men din vyatit karke ratri men katha, varta, stotra path tatha bhajan, sankirtan adi ke sath jagaran karen. fir dvadshi ko bhagvan vishnu ka pujan karke brahmana bhojnadi karyon ko purn kar paran va bhojan karen. katha: prachin kal men svarn aur ratnon se sushobhit bhogipur nagar ke pundarik raja ke lalit aur lalita nam ke gandharva-gandharvini gayan vidya men bare pravin the. pundarik raja bara hi vilasi tha. uski sabha men anek apsaraen, kinnar tatha gandharva nritya va gayan kiya karte the. ek bar lalit gandharva raja ki raj sabha men nritya gan kar raha tha. sahsa use apni sundri lalita ki yad a gai, jiske karan uske nritya, git tatha lay men arochkta a gai. karkotak namak nag yah rahasya jan gaya tatha raja se kah sunaya. is par krodhatur hokar pundarik raja ne lalit ko rakshas ho jane ka shrap de diya. lalit sahasron varsh tak rakshasa yoni men anek lokon men ghumta raha. itna hi nahin uski sahadharmini lalita bhi unmatt vesh men usi ka anukrn karti rahi. lalita apne pranaballabh lalit ka aisa hal dekhakar bahut dukhi hui. vah sadaiv apne pati ke uddhar ke lie sochne lagi ki main kahan jaun aur kya karun? ek din vah donon ghumte-ghumte vindhyachal parvat ke shikhar par sthit shring rishi ke ashram par pahunche. inki karun tatha sanvednshil sthiti dekhakar muni ko daya a gai aur unhonne chaitra shuklapaksh ki kamda ekadshi vrat karne ka adesh diya. rishi ke batae gae niyamanusar lalita ne prasannatapurvak vrat ka palan kiya. punah bhagvan se prarthana karne lagi ki ‘he prabho! mainne jo vrat kiya hai us vrat ke prabhav se mere pati rakshas yoni se mukt ho jaen. ekadshi ka vrat lete hi uska pati rakshas yoni se mukt ho purva svarup ko prapt ho gaya. donon pushpak viman men baithakar svarg lok ko chale gae. apne kartavya bhul ke karan manav ko anek vipattiyan sahan karni parti hain. atah manav ke lie apne kartavya ka thik se palan karna hi shreyaskar hai. shrikrishn bhagvan ne kaha ‘he dharmaraj yudhishthir ! is vrat ko vidhipurvak karne se daihik, daivik, bhautik tinon prakar ke tap nasht ho jate hain. iski katha ke pathan v shravan se bajpey yagya ka fal prapt hota hai tatha prabhu ka prem v sannidhya milta hai.
Kya aapko lekh pasand aaya? Subscribe
Kya aapko lekh pasand aaya? Subscribe


paravidyaon ko samarpit sarvashreshth masik jyotish patrika  April 2006

sabhyata ke arambhik kal se hi falakathan ki vibhinn paddhatiyan vishva ke vibhinn hisson men prachlit rahi hain. in paddhatiyon men se ank jyotish ka apna alag mahatva raha hai yahan tak ki ank jyotish bhi vishva ke vibhinn hisson men alg-alag rupon men prachlit hai tatha in sab men apas men hi vibhinnata dekhne ko milti hai. halanki sabhi prakar ke ank jyotish ke uddeshya vahi hain tatha inka mul uddeshya manushya ko margadarshan dekar unka bhavishya behatar karna tatha vartaman dasha ko sudharna hai. fyuchar samachar ke is visheshank men ank jyotish ke adhar par falakathan ko variyata di gayi hai. ismen mukhyatah kiro ki paddhati ka anusharan kiya gaya hai. iske antargat samavisht mahatvapurn alekhon men- ank jyotish ka parichay evan mahatva, ank falit ke trikon prem, buddhi evan dhan, mulank se janie bhagyoday ka samay, nam badalakar bhagya badlie, hindi ke namaksharon dvara vyavsay ka chayan, ank jyotish ka mahatvapurn pahlu stup, ank evan aepreshan duryodhan, mulank, rog aur upay, ank vidya dvara janmakundali ka vishleshan adi. in alekhon ke atirikt dusre bhi anek mahatvapurn alekh anya vishyon se sambandhit hain. iske atirikt purva ki bhanti sthayi stambh bhi sanlagn hain.

Subscribe

Apne vichar vyakt karein

blog comments powered by Disqus
.