अशून्य शयन व्रत
Ank ke aur Lekh | Sambandhit Lekh | Views : 543 |  
bhavishya puran men ashunya shayn vrat ki mimansha ki gai hai. is vrat ka anushthan shravan mas ke krishn paksh ki dvitiya tithi se praranbh hota hai. is vrat ko karne se stri vaidhavya tatha purush vidhur hone ke pap se mukt ho jata hai. yah vrat sabhi manokamnaon ko purn karne vala tatha moksh pradata hai. is vrat ka vidhan stri evan purush donon ke lie hi hai. ashunya shayan ka arth hai - stri ka shayan pati se shunya tatha pati ka shayan patni se shunya nahin hota. donon ka hi yavajjivan vishuddh sahacharya bana rahta hai. bhagvan vishnu ke sath lakshmi ka nitya-nirantar sahacharya rahta hai. islie pati-patni ke nitya sahacharya ke lie donon ko ashunya shayan vrat men shravan krishn dvitiya tithi ko lakshmi sahit bhagvan vishnu ki murti ko vishisht shayya par adhosthapit kar anek upcharon dvara unka pujn karna chahie. vrati ko chahie ki shravan krishn dvitiya ko pratah snanadi nitya karmon se nivritt ho vidhivat sankalpa lekar shrivatsachihn yukt char bhujaon se vibhushit, shesh shayya par sthit lakshmi sahit bhagvan ka shodshopchar pujn kare. din bhar maun rahe, vrat rakhe aur sayankal punah snan karke bhagvan ka shaynotsav manae. fir chandrody hone par aghryapatra men jal, fal, pushpa aur gandhakshat rakhakar nimnankit mantra se bhagvan ko aghrya de. gagnanganasandip kshirabdhimthnodbhav. bhabhasitadigabhog ramanuj namo'stu te.. he ramanuj ! apka avtar kshir sagar ke manthan se hua hai. apki abha se hi disha-vidishaen abhasit hoti hain. gagan rupi angan ke ap satsvarupi dedipyaman dipak hain. apko namaskar hai. tadnantar bhagvan ko pranam karke bhojan kare. is prakar pratyek mas ki krishn dvitiya ko vrat karke margashirsh krishn tritiya ko us ritu men hone vale mithe fal sadachari brahmana ko dakshina sahit de. karaunde, nibu adi khatte tatha imli, narangi adi stri nam ke fal n de. chandrama lakshmi ka anuj hone ke karn uska priya hai. vah pratyaksh devta hai. uske pujan se lakshmi prasann hoti hai. ukt vidhan ke sath jo vyakti shravan mas se margashirsh tak vrat ke niyamon ka palan karta hai, use kabhi stri-viyog nahin hota aur lakshmi uska sath nahin chorti. jo stri bhaktipurvak is vrat ka anushthan karti hai, vah tin janmon tak n to vidhva hoti hai aur n durbhagya ka samna karti hai. yah ashunya shayan vrat sabhi kamnaon ki purti aur uttam bhogon ko pradan karne vala hai. svayan nripashreshtha rukmangad ne is vrat ka palan kar sabhi bhogon aur kamnaon ko prapta kiya. iski katha is prakar hai. katha: ek samay raja rukmangad ne jan raksharth van men bhraman karte-karte maharshi vamdevji ke ashram par pahunch maharshi ke charnon men sashtang dandavat pranam kiya. raja ne kaha, ‘mahatmana! apke yugal charnarvindon ka darshana karke mainne samast punya karmon ka fal prapt kar liya.’ vamdev ji ne raja ka vidhivat satkar kar kushal kshem puchi. tab raja rukmangad ne kaha- ‘bhagvn ! mere man men bahut dinon se ek sanshy hai. main usi ke vishay men apse puchta hun, kyonki ap sab sandehon ka nivarn karne vale brahman shiromni hain. mujhe kis satkarm ke fal se tribhuvan sundr patni prapt hui hai, jo sada mujhe apni drishti se kamdev se bhi adhik sundr dekhti hai. param sundri devi sandhyavli jahan-jahan pair rakhti hain, vahan-vahan prithvi chipi hui nidhi prakashit kar deti hai. vah sada sharadkal ke chandrama ki prabha ke saman sushobhit hoti hai. vipravar ! bina ag ke bhi vah shadras bhojan taiyar kar leti hai aur yadi thori bhi rasoi banati hai to usmen karoron manushya bhojan kar lete hain. vah pativrata, danshila tatha sabhi praniyon ko sukh dene vali hai. uske garbh se jo putra utpann hua hai, vah sada meri agya ke palan men tatpar rahta hai. dvijashreshth ! aisa lagta hai, is bhutl par keval main hi putravan hun, jiska putra pita ka bhakt hai aur gunon ke sangrah men pita se bhi barh gaya hai. vah bara hi vir, parakrami, sahsi, shatru rajaon ko parast karne vala hai. usne senapti hokar chah mah tak yuddh kiya aur shatrupaksh ke sainikon ko jitakar sabko astrahin hin kar diya. prithvi par usne jin-jin sundriyon, divya astron evan vastron tatha khajane ko prapt kiya un sabhi vastuon ko lakar mujhe samarpit kiya. isi samarpan bhav ke karan vah apni mata ka bhi prashansniya ban gaya. vah ek hi din men anek yojan vistrit samuchi prithvi ko langhakar rat ko mere pairon men tel malish karne ke lie punah ghar laut ata hai. adhi rat men mere sharir ki seva karke vah dvar par kavach dharan karke khara ho jata hai. munishreshtha! mera yah sharir bhi nirog rahta hai. kis karm ke prabhav se mujhe is samay yah anant sukh prapt hua hai? yah satkarm is janm ka kiya hua hai ya dusre janm ka? brahman ! ap apni buddhi se vichar kar mera punya mujhe bataen. bhagvan ke charnon men meri bhakti hai. vidvanon men mera adr hai. mera putra mujhse barhakar saton dvipon ki prithvi ka palak hai. brahmanon ko dan dene ki mujhmen shakti hai. atah main aisa manta hun ki yah sab kisi (vishesh) punyakarm ka fal hai.’ raja ka yah vachan sunakar mahagyani munishvar vamdevji ne raja ke sukh saubhagya ka karan janakar kaha ‘mahipal ! tum purva janm men shudra jati men utpann hue the. us samay daridrata tatha dushtabharya ne tumhara bara apman kiya tha. rajan ! tum aisi stri ke sath bahut varshon tak rahte hue dukh se santapt hote rahe. ek samay kisi brahman ke sansarg se tum tirth yatra ke lie gae; fir sab tirthon men ghumkr brahman ki seva men tatpar ho, tum punyadayi mathurapuri men ja pahunche. mahipte ! vahan brahman devta ke sang se tumne yamuna ji ke sab tirthon men uttam vishramghat namak tirth men snan karke bhagvan varah ke mandir men hoti hui puran ki katha shravan ki, jo ashunya shayan vrat ke vishay men thi, char parnon se jiski siddhi hoti hai, jiska anushthan kar lene par megh ke saman shyam varn deveshvar lakshmibharta jagannath, jo ashesh pap rashi ka nash karne vale hain, prasann hote hain. rajan ! tumne apne ghar lautakar vah pavitra evan param mangalapradata ashunya shayan vrat kiya, jo ghar men parm abhyuday pradan karne vala hai. mahipte ! shravan mas ke krishn paksh ki dvitiya ko yah punyamay vrat grahan karna chahie. isse janm, mrityu aur jaravastha ka nash hota hai. prithvipte ! is vrat men fal, ful, dhup, lal chandan, shayyadan, vastradan aur brahmana bhojan adi ke dvara lakshmi sahit bhagvan vishnu ki puja karni chahie. rajan ! tumne yah dustar karm bhi pura kiya. mahipte ! tumne jo sukh vistar purvak batae hain, ve sabhi tumhare pahle kie gae ashunya shayan vrat ke falasvarup prapt hue hain. suno, jiske upar bhagvan vishnu prasann n hon, uske yahan ve sukh nishchay hi nahin ho sakte. atah rajan ! ashunya shayan vrat ki bari mahima batai gai hai jo mainne tumhare kalyanarth shravan karai. jo bhi shraddha bhav se is ashunya shayn vrat ka palan karta hai use raja ki hi bhanti sanpurn sukh-vaibhav ke sath-sath bhagvan lakshmipti ka parmdham prapt ho jata hai.
Kya aapko lekh pasand aaya? Subscribe
Kya aapko lekh pasand aaya? Subscribe


paravidyaon ko samarpit sarvashreshth masik jyotish patrika  July 2006

parivarik kalah : karan evan nivaran arakshan par prabhavi hai shani sone-chandi men teji la rahe hai guru aur shukra kalah kyon hoti hai

Subscribe

Apne vichar vyakt karein

blog comments powered by Disqus
.