karm aur punarjanm ek dusre se jure hue hain. karmon ke fal ke bhog ke lie hi punarjanm hota hai tatha punarjanm ke karan fir naye karm sangrahit hote hain. is prakar punarjanm ke do uddeshya hain.
pahla yah ki manushya apne purva janmon ke karmon ke fal ka bhog karta hai jisse vah unse mukt ho jata hai.
dusra yah ki in bhogon se anubhav prapt karke naye jivan men inke sudhar ka upay karta hai jisse bar-bar janm lekar jivatma vikas ki or nirantar barhti jati hai tatha ant men apne sanpurn karmon dvara jivan ka kshay karke muktavastha ko prapt hoti hai.
ek janm men ek varsh men manushya ka purn vikas nahin ho sakta. punarjanm ka ek karan hai apne purva janmon men kie gae sthul karmon ka bhog. ye sthul karm sthul lok men hi bhoge ja sakte hain, islie un samast sthul karmon ka fal ansh sanchit kosh men vidyaman rahta hai jiska thora sa ansh ek janm men bhog hetu nirdharit kiya jata hai jise ‘prarabdha’ kaha jata hai. yah prarabdh avashya bhogna parta hai. bhoge bina isse mukti nahin hoti.
kintu is sanchit kosh men kai aise karm hain jo ek hi janm men nahin bhoge ja sakte hain. ek karm ek hi sthan ya pad se bhoga ja sakta hai kintu dusra iske viprit aisa karm hai jiske lie dusri avastha chahie. iske lie manushya ko dusra janm lena parega. sanchit karm ka kitna ansh ek janm men bhogna hai iska nirnay karm ke adhikari devta karte hain.
isi bhog karm ke anusar use kul, desh, sthan, vatavaran, shariradi milte hain. ye karm kitne samay men bhukt ho jaenge iske anusar uski ayu ka nirdharan hota hai. karmon ke anusar hi vyakti ke sharir men aise chihn prakat hote hain, jinke adhar par hast samudrik ka vikas hua.
isi prarabdh bhog ke anusar uske gyan tantuon ka vikas evan mastishk ki rachna hoti hai, jisse vah mansik gunon evan avgunon ko prakat kar sake. yadi karm niyam aur punarjanm ko nahin mana jae to ishvar use sukh dukh kyon deta hai jabki purva ke uske bure karm hain hi nahin.
ishvar ne bina karan kisi ko din-hin v kisi ko sanpann kyon banaya, kisi ko murh v kisi ko pratibhashali, kisi ko imandar v kisi ko beiman, kisi ko dayalu v kisi ko dusht, kisi ko paropkari v kisi ko atyachari adi kyon banaya? aise anek prashnon ka uttar ek janm manne vale nahin de sakte jabki in sabka uttar karm niyam aur punarjanm se hi milta hai, anya koi karan gyat nahin hai.
jab purvajanm ka koi karm hi nahin hai to vah kiske bhog bhog raha hai? yadi karmon ka fal evan bhog nahin hai to karm arthahin ho jate hain. fir achche aur bure karm ka auchitya hi nahin rahta. fir to karm pet bharne ka sadhan matra rah jate hain.
aise men naitikta, sadachar, prem, daya, karuna adi gun arthahin ho jaenge. manushya ki bhavishya ki sari ashaen tatha uski unnati ka adhar hi samapt ho jaega. panch mahabhuton se nirmit is sthul sharir ke andar ek sukshm sharir bhi hota hai tatha in donon ko cheshta jivatma karati hai, jise karan sharir bhi kahte hain.
yahi karan sharir jiv mrityu hone par sthul deh ko yahin chorakar sukshm sharir ke sath dusri nai sthul deh men nirman ki praranbhik sthiti men hi pravesh kar jata hai. vah garbh men barhta hua nishchit samay par garbh se bahar akar dhire-dhire ek viksit bhinn svabhavyukt manav ya koi anya prani ban jata hai.
sukshm sharir ko apne samanya netron se nahin dekha ja sakta. isi sukshm sharir ki akriti ke sthul sharir ki akriti men punah prakat hone ki kriya ko punarjanm ka niyam kahte hain. kisi sthan ke prati pratham drishti men hi anurag jagrat hone ka karan purva jivan men us sthan par rahne ki bhavna hai.
isi prakar pahli bar hi kisi se milne par prem jagaran ka karan bhi purva janm men ek sath vyatit kiya jivan ya kuch kal hi hai. iska tatparya yah hai ki in donon jivatmaon men isse purva bhi prem tha tatha ek dusre ko dekhakar donon aisa sochte hain ki isse purva bhi ve kabhi ek dusre se mile the.
is prakar ke prem ka kadachit hi vichchedan hota hai. vikasvad ke siddhant ke saman hi punarjanm ka siddhant hai. vigyan kahta hai ki manushya apne mastishk ke 15 pratishat bhag ka hi upyog kar raha hai. samanya vyakti to uske dhai pratishat ka hi upyog kar ji raha hai, baki ka ansh supt para hai.
yadi ise viksit kiya ja sake to pratibha ke vikas ki anant sanbhavnaen prakat ho sakti hain. adhyatm bhi sahasrabdiyon se kahta a raha hai ki manushya men sabhi ishvariya shaktiyan vidyaman hain jinhen jagrat karke manushya ishvar tulya banne ki kshamata prapt kar sakta hai. jab jiv apne janm ki taiyari kar raha hota hai tab dusri or uske yogya sthul sharir banane ki taiyari dusron dvara ki ja rahi hoti hai.
us jiv ke purva janmon ke sanskaron ke anusar uske janm ke sthan, samay, kul evan vatavaran ka tatha uski kamnaon ke anusar naye sharir ka nirdharan hota hai. yogya sharir ka nirdharan karmon ke adhikari devta karte hain. sabhi yogyataon vala sharir milna kathin hai islie ek sharir se uske thore se gun hi prakat ho sakte hain.
anya gunon ke vikas ke lie use dusra janm lane a padge a. yah sara karya karm ke adhikari dev karte hain. jivatma ke vikas ki yah svabhavik prakriya hai jisse yadi manushya apne duragrah evan ahankar ke karan badha upasthit n kare to prakriti ke niyam ke anusar chalakar vah svabhavik rup se unnati karta hua kai janmon men jakar purnatva ki prapti kar sakta hai.
har janm men bhogon ko bhogna tatha unse hone vale parinamon se dukh uthana, isse manushya kai janm men jakar yah shiksha grahan karta hai ki in vasnaon ke karan hi asakti hoti hai tatha yahi asakti bandhan ka karan banti hai. isi asakti ke karan manushya ki ichcha bhogon ki or jati hai kintu sabhi bhog ant men dukhdayi hi siddh hote hain.
iske bad uski bhogon ke prati aruchi ho jati hai. yahi uska ‘vairagya’ hai. yah uchch chetna prapt vyaktiyon ka anubhav hai. jo un gyaniyane ke vachan manakar virakt ho jata hai uski pragti shighra hoti hai. anyatha svayan anubhav prapt karne men kai janm ganvane parte hain.
srishti ka niyam hi aisa hai ki karm ka fal avashya hota hai tatha sabhi bhog ant men dukhdayi hote hain. yah tyag antrik prerna se hota hai, tabhi sachcha vairagya hai. maya, bhram, agyan ke anek marg hain kintu satya ka ek hi marg hai.
jab vasna evan kamna se vyakti upar uth jata hai tabhi use ishvar ke samipya ka anubhav hota hai. jab tak mukti n ho jae tab tak is janma-mrityu ke chakra se gujrna parega. ishvar aur atma ko jan lene matra se kuch labh nahin hota.
if you are facing any type of problems in your life you can consult with astrologer in delhi