लक्ष्मी जी के साथ गणेश पूजन क्यों

lakshmi ji ke sath ganesh pujan kyon  

Ank ke aur Lekh | Sambandhit Lekh | Views : 15840 |  
lakshmi ji ke sath ganesh pujan kyon? rashmi chaidhri am admi ko hamesha yah jigyasa rahti hai ki lakshmi ji ke sath ganesh ji ka pujan kyon kiya jata hai? is lekh men lekhika ne shastron ke uddharan ke madhyam se yah spasht kiya hai ki lakshmi ji ke sath ganesh pujan ka shastra sammat adhar kya hai aur lakshmi ji ke sath ganesh ji ki bhi puja akhir kyon ki jati hai? h to hamesha sabhi jante hain ki dipavli parva ka atyant prachin kal se atyadhik mahatva hai. sadharntya sabhi tyauharon ko manane ka ek karan manv-jivan men parivartan shilta lana hai. isi uddeshya se dipavli parva ko bhi ek nahin, balki pure panch din atyant harshollas ke sath manaya jata hai. is din sabhi log apne-apne gharon ko saf suthra karke, svayan bhi shuddh pavitra hokar ratri ko vidhi-vidhan se ganesh lakshmi ka pujan kar unko prasann karne ka purn prayatn karte hain. is puja-archana ke piche prayah yahi bhavna vidyaman rahti hai ki lakshmi ji prasann hokar hamare ghar men pravisht hon tatha hamen dhan samriddhi se yukt karen, kintu yadi ham lakshmi ji ko prasann kar dhan, samriddhi aur khushhali pana chahte hain aur keval yahi kamna rakhte hain ki lakshmi ji ka sthai nivas hamare ghar men ho to matra is kamna ki siddhi ke liye unke sath ganesh pujan karte hain? is abhisht ki prapti ke liye to lakshmi ji ke sath unke pati vishnu ji ka ahvan karna chahiye. lakshmi ji, vishnu ji ki pran vallabha, priyatma mani gai hain. yadi unhen prasann karna hai to unke pati vishnu ji ka unke sath pujan karna chahiye. jaisi ki shastra sammat manyata hai ki lakshmi ji vishnu ji ko kabhi nahin chortin, vedon ke anusar bhi vishnu ji ke pratyek avtar men lakshmi ji ko hi unki patni ka sthan mila hai. jahan vishnu ji hain vahin unki pranapriya patni lakshmi ji bhi hain. lekin fir bhi dipavli par lakshmi ji ke sath ganesh-pujan ka vidhan hai. aisa kyon? ‘‘ganesh ji ko lakshmi ji ka mans-putra mana gaya hai.’’ fir mata aur putra ka ek sath pujan karke vyakti kya pana chahta hai? in sare prashnon ka uttar janne ke liye sarvapratham hamen dipavli ka mahatva tatha lakshmi evan ganesh ke parasparik evan gurh sanbandh ko samjhna ati avashyak hai. tantrik drishti se dipavli ko tantra-mantra ko siddh karne tatha mahashaktiyon ko jagrit karne ki sarvashreshth ratri mana gaya hai. ganesh ji ka kisi bhi karya men sarvapratham pujan is bat ka sanketak to hai hi ki hamare sabhi karya nirvighn sanpann hon, sath hi ganesh ji ke vividh namon ka smaran sabhi siddhiyon ko prapt karne ka sarvottam sadhan evan niyamak bhi hai. atah dipavli ki ratri ko lakshmi ji ke sath nimn ganesh mantra ka jap sarva siddhi pradayak mana gaya hai. ‘‘pranamya shirsa devan gauri putran vinayakam.. bhaktavasan smarennityan ayushya kamarth siddhaye.. ganesh ji ka smaran vakratund, ekadant, gajavaktra, lanbodar, vighn rajendra, dhumravarn, bhalchandra, vinayak, ganpti, evan gajanan ityadi vibhinn namon dvara kiya jata hai. pauranik manyata ke anusar- ganesh ji ne vakratund rup men ‘matsarasur’ namak daitya ko abhydan dekar devtaon ki usse raksha ki thi. ‘ekadanta’ rup men ganesh ji ne maharshi chyavan ke putra balvan parakrami daitya ‘madasur’ ko parajit kar usse kaha tha ki jahan meri puja ho vahan tum kadapi mat jana’’ . ‘mahodr’ rup men ganesh ji ne guru shukracharya ke shishya ‘mohasur’ ka darp chur-chur karke devtaon ko nirbhay kiya tha. mohasur ne ganesh ji ki bhakti karke unse nivedan kiya tha ki ‘‘ab main kabhi bhi devtaon aur muniyon ke kisi bhi dharmacharan men vighn nahin upasthit karunga.’’ isi prakar ganesh ji ka ‘lanbodr’ rup krodhasur ‘gajanan rup’ lobhasur, ‘vikat rup- kamasur ‘vighnaraj rup’ mamtasur tatha ‘dhumravarn svarup ahantasur namak daityon ka sanharak mana gaya hai. ganesh ji ne apne pratyek rup men daityon ko parajit kar unhen yatharth ka gyan karaya, devtaon ki raksha ki tatha unhen arogya, amaratva evan ajey hone ka vardan diya. danvon ke atyachar ke karan us samay jo adharm aur durachar ka rajya sthapit ho gaya tha, use purnataya samapt kar n keval devtaon ko balki daityon ko bhi abhay dan dekar unhen apni bhakti ka prasad diya aur unka bhi kalyan hi kiya. atah spasht hai ki dipavli ki ratri ko lakshmi ji ke sath ganesh pujan ka dharmik, adhyatmik, tantrik evan bhautik sabhi drishtiyon se atyant mahatvapurn sthan hai taki lakshmi ji prasann hokar hamen dhan-sanpda pradan karen tatha us dhan ko prapt karne men hamen koi bhi kathinai ya vighn na aye, hamen ayushya prapt ho, sabhi kamnaon ki purti ho tatha sabhi siddhiyan bhi prapt hon. hamari hamesha yahi ichcha rahti hai ki hamare samast shubh karyon men vibhinn asuri shaktiyon dvara kisi bhi prakar ka koi bhi vighn upasthit n ho, ham dharm ka acharan karen, jivan men dharm karm ki sthapna ho tatha lakshmi ji ke prasad se jo dhan vaibhav hamen prapt ho, ganesh ji ki kripa se vah rog, grahan ityadi jaise ashubh karyon men vyay n ho, ham purn sukhopbhog karke, kalyanamay evan nirogi jivan vyatit karen. dipavli ki pavitra evan shubh ratri ko lakshmi ji ke sath ganesh ji (jo unke mans-putra hain) ka pujan karne men sanbhvtah ek bhavna yah bhi nihit hai ki man lakshmi apne priya putra ki bhanti hamari sadaiv raksha karen, unka matrivat sneh aur shubhashish hamen sada hi prapt hota rahe arthat ham ajivan sukhi, samriddh evan dhan sanpann rahen. lakshmi ji ke sath ganesh pujan men is bat ka vishesh dhyan rakhna chahiye ki ganesh ji ko sada lakshmi ji ki bain or hi rakhen. adikal se patni ko ‘vamangi’ kaha gaya hai. bayan sthan patni ko hi diya jata hai. atah puja karte samay lakshmi-ganesh ko is prakar sthapit karen ki lakshmi ji sada ganesh ji ke dahini or hi rahen. tabhi puja ka purn fal milega.
Kya aapko lekh pasand aaya? Subscribe

Kya aapko lekh pasand aaya? Subscribe


shri mahalakshmi visheshank  November 2012

fyuchar samachar patrika ke shri mahalakshmi visheshank men mahalakshmi ke udgam ki pauranikta, hindu dharm shastron men mahalakshmi ke svarup ka varnan, vishva ke anya dharm granthon men mahalakshmi ke samakaksh, devi-devtaon ke nam tatha unse judi dant kathaen, lakshmi pujan vidhi evan shubh muhurt, dipavli pujan paik, devi kamla sadhna, tantrokt lakshmi kavach, lakshmiji ke sath ganpti pujan kyan, lakshmipujan ke vishesh upay, dipavli par kiye jane vale vishesh upay v mantra, lakshmi prapti ke 51 achuk upay, dipavli par kiye jane vale anuthe prayogdipavli par kiye jane vale dipavli par kiye jane vale adbhut totke, mahalakshmi ke pramukh puja sthal tatha unki mahta aur manyata ke atirikt janmakalik sanskar, ahoiashtami vrat, faladesh men ankshastra ki bhumika, vastu paramarsh, vastu prashnotri, vivadit vastu, yantra samiksha/mantra gyan, helth kaipsul, lal kitab, tairo kard, satyaktha, ank jyotish ke rahasya, adi vishyon par gahan charcha ki gai hai.

Subscribe

Apne vichar vyakt karein

blog comments powered by Disqus
.