तंत्र और शक्तिपात

tantra aur shaktipat  

Views : 2264 | July 2017

jiv ka param uddeshya hai jivatva se mukt hokar shivatva men pravesh karna. yah tabhi sanbhav hai jab jiv vastu sthiti ka gyan ka leta hai, vah apni atm sthiti ka anusandhan karte hue usmen avasthit ho jata hai. svarup sthiti men sthayitva prapt karna hi mukti dvar tak pahunchne ka lakshan hai. iske abhav men yah saflta prapt karna asanbhav hai. is svarup sthiti tak pahunchne ke lie jo upay kam men laya jata hai, use shaktipat kahte hain. tantracharyon ka mat hai ki mukti marg avruddh karne vale malavaran hain jinhen dur karne ke lie tantron men param shiv ka anugrah hi bataya gaya hai. is kripa athva bhagavadnugrah ko hi shaktipat kaha jata hai. yah ek aisi adhyatmik prakriya hai jiske madhyam se sadguru apni shakti ko shishya men sanchrit karta hai taki uski supt adhyatmik shaktiyon ka jagaran ho jae athva uski buddhi atindriya vishay ko samajh sake. guru kripa shaktipat guru kripa par nirbhar karti hai. sadguru sarvatattva vetta aur adhyatm vidya ke janne vale hote hain. ‘malini vijy’ men bhi kaha hai- s gurumantsamah prokto mantravirya prakashkah. arthat vahi guru mere saman kaha gaya hai jo tantron ke virya ka prakash karne vala ho.

siddhi prapt karne ke lie shaktipat avashyak mana gaya hai jiske lie guru hi ekmatra sadhan hai. shaktipat ke n hone se siddhi ki prapti nahin ho sakti. mahatmya sut sanhita men shaktipat ki mahima ka varnan karte hue kaha gaya hai- tatvagyanen mayva badho nanyen karmana. gya nan vedantavakyotthan brahmatmaikatvagocharam.. tachch devaprasaden gurauah sakshatrinikshanat. jayte shaktipaten vakyadevdhikarinam.. tattva gyan ke atirikt aur kisi upay se maya ka niras nahin ho sakta. yah tattva gyan brahm aur atma ki abhed siddhi ka nirupan karne vale vedant vakyon se prapt hota hai. iska adhikar guru dvara shishya ko shaktipat se hi diya jata hai. sant gyaneshvar ne likha hai ki shaktipat hone par, hone ko to vah jiv hi rahta hai. parantu maheshvar ke saman mana jata hai. labh: shishya ke parishram tatha guru kripa se hi shakti ka jagaran hota hai. is lakshya tak pahunchne ke lie shishya ko bahut kasht sahne parte hain aur sadhna men savdhani bhi bartni parti hai. iske ho jane par yaugik kriyaon ki apeksha nahin rahti. vah sadhak ki prakriti ke anurup svarup hone lagti hai. prabuddh kundlini brahmarandhra ki or pravahit hone ke lie chatptati hai, isi se sabhi kriyaen hone lagti hain.

shaktipat ke dvara sadhak ke atmik kshetra men krantikari parivartan ho jata hai. usmen bhagavadbhakti ka vikas, chidatma ka prakash hota hai, mantra siddhi hoti hai jisse shraddha vishvas ka jagaran hota hai, sab shastron ka arthagyan ho jata hai, sab tatvon ko svayatt karne ka samathrya prapt hota hai. sharir bhav jata rahta hai, shivatva labh hota hai. krishn ke shaktipat se kis tarah arjun ko atmanubhuti hui, iska hridyanugrahi varnan gyaneshvari gita men kiya gaya hai. lakshan shaktipat ka mukhya lakshan hai- sadhak men bhagavadbhakti ka unmesh hona tatha sabhi prandhariyon ko apne anukul banane ki yogyata hona. uske prarabdh karm samapt ho jate hain, unke bina bhoge hi uski mukti ho jati hai. aisa tab tak hota rahta hai, jab tak sharir rahta hai. sukh duahkh ki paristhiti men bhi anand ki mudra rahti hai. sadhak par samast shastron ka gyan prakat ho jata hai aur use kavita rachne ka samathrya prapt ho jata hai. shastron men shaktipat ke lakshan is rakar se varnit kiye gaye hain: dehpatastatha kamp parmanandaharshane. svedo romanch ityetachchaktipatasya lakshanam.. shishyasya dehe viprendraah dharanya patitesti. prasadah shankarastasya dvij sanjat ev hi.. yasya prasadah sanjato dehpatavsankah. kritarth ev viprendra n s bhuyo'bhijatyte..

shaktipat hote hi sharir bhumi par gir jata hai, kanpan hone lagte hain, man men apar prasannata ka uday hota hai aur param anand ki prapti hoti hai, jisse romanch hota hai, prasved hota hai. is tarah se shaktipat se dehpat ke lakshan drishtigochar hone lagen to yah janna chahie ki shiv kripa hui. shaktipat se dehpat ke lakshan ane par kritarthata ka bhav ana chahie, kyonki iske bad fir janm grahan karne ki sanbhavna nahin rahti. ghatnaen: kaha jata hai ki svami ramkrishn parmhans ne svami vivekanand par shaktipat kar unki shakti ka jagaran kiya tha. tabhi nastik narendra svami vivekanand ban sake. sant gyaneshvar ke anusar bhagvan krishn ne arjun par shaktipat kiya tha. sant eknath ne bhagavat tika men apne janardan svami ka bhi udaharan diya hai ki unhen kis prakar dattatrey dvara shaktipat ka anugrah prapt hua. vah apne guru ko dattatrey ki shishya paranpra men mante hain. guru ne shishya ke mastak par hath rakha aur shakti ka jagaran ho gaya. prakar shaktipat tin prakar ka hota hai - tivra, madhya aur mand. jaise vidyutchalit pankhen men mand, madhya aur tivra gati ka prabhav turant prabhav ki gati se parilakshit hone lagta hai.

tivra shaktipat se to sharir ka nash hota hai, parantu madhya tivra men aisa nahin hota, usmen agyan ka nash aur gyan ka uday hota hai. mand tivra shaktipat se man men vivek ke prati jigyasa utpann hoti hai, sadguru ki prapti ki ichcha jagrit hoti hai. tattva ko janne ki utkantha hi iska lakshan hai. ichcha hone par sadguru ki prapti bhi hoti hai. guru ki prapti hone par jigyasaon ka shaman hota hai tatha shishya mukti path ki or agrasar hota hai. gita ke shabdon men: yathedhan s samiddho'gnirbhasmasatkurute'rjun. gyanagniah sarvakarmani bhasmasat kurute tatha.. arthat he arjun ! teji se jali hui agni jis tarah indhnon ko jalakar bhasm kar deti hai, usi prakar gyan rupi agni bhi samast karmon ko bhasmasat kar diya karti hai. adhikar shaktipat ke lie guru ke samathrya ka hona to avashyak hai, parantu shishya ko iske lie koi taiyari nahin karni parti. taiyari ki avashyakta n hone par bhi uska adhikar to use prapt hona hi chahie anyatha shaktipat to ek khel matra banakar rah jayega. is adhikar ke lie shastra ne kuch maryadaen niyat ki hanai, unka palan v vikas avashyak hai. tabhi vah sadguru ka patra ban jata hai.

jo indriyon ko jine vala, brahmachari, gurubhakt ho usi ke sammukh yah rahasya prakat karna uchit hai. tasmai s vidvanupasannay samyak prashantay chittay shamanvitay. yenaksharan purushan ved satyan provach tan tatvato brahm vidyam.. -mundak vah gyani guru us shraddhapurn, shantichitt evan titiksha aur sadhnanishth shishya ko brahma-vidya ka updesh kare, jisse vah avinashi satsvarup atma ko jan len. yah bhi dhyan rakhne ki bat hai ki satpatra, shraddhalu aur vishvasi shishya hi guru kripa ka labh utha sakta hai. jismen yah gun nahin, us par bhumi men kisi bhi guru ka boya gaya gyan bij nahin jam sakta hai. guru ke ekapakshiya prayatn se bhi shishya ka kalyan nahin ho sakta. donon hi pakshon ki shreshthata se guru-shishya sanyog ka sachcha labh milta hai. vaigyanik drishtikon yah ek vaigyanik prakriya hai, jisse guru shakti ka sanchar shishya men karta hai. guru ka adhyatmik shaktiyon se ot-prot hona avashyak bataya gaya hai. unke shatchakra aur kundlini ka jagaran hona avashyak hai. tabhi vah shishya ke in mahattvapurn kendron ko prabhavit kar sakta hai. shishya ki yah shaktiyan supt avastha men hoti hain, jinhen jagana hota hai.

shaktipat vahi vyakti kar sakta hai jo apni adhyatmik shaktiyon ko ekatrit karna janta hai. sadharntah hath ke sparsh se shaktipat kiya jata hai. adhunik vigyan ki bhi yahi manyata hai ki hath ke poruon men vidyut ka sanchar rahta hai aur apni pran vidyut ko dusre ke sharir men pravesh karke uske sharir v man men parivartan laye ja sakte hain. ve hath ke sparsh v marjan adi kriyaon se kashtasadhya rogon ka nivaran tak karte dekhe gaye hain. pran shakti to sare sharir men rahti hai, parantu uska sanchar pramukh rup se hathon se hi kiya ja sakta hai. samathryavan guru ke sare sharir men shakti ki vidyut ka pravah chalta hai jo bhi usse sparsh karta hai, us shakti se labhanvit hota hai parantu yadi uska sanchar ek vishesh vidhi-vidhan aur prabal ichcha shakti se kiya jae to uska prabhav vishesh hota hai. shaktipat jin paristhitiyon men kiya jata hai, donon pakshon ki or se pavitra aur anukul bhavnaon ka adan-pradan hota hai, isse us prakriya ko aur adhik bal prapt hota hai. shaktipat men nishkamta parilakshit hoti hai.

jiske pas shakti ka bhandar ekatrit ho gaya hai, vah use apne tak simit nahin rakhna chahta varan yogya patron men vitaran karna chahta hai. ajakal sthiti viprit hai. apne ahan ki pushti aur vistar ke lie vah apni vidya ko apne tak hi simit rakhna chahta hai. prachin kal men aisa n tha. shishya ki shaktiyon ko viksit karne ke lie guru prayatnashil rahte the, chahe ve vidya bhautik hane ya adhyatmik. shaktipat to udar hriday ka pratyaksh praman hai, jisse guru apni shakti ka vyay karke shishya ke samathrya ko barhata hai. apne tap ki punji men se kharch karke shishya apne samathrya ko barhata hai. apne tap ki punji men se kharch karke shishya ko dena parmarth aur nisvarth bhavnaon ka parinam hai. yah paranpra nirantar chalti rahti hai. jab shishya ki shaktiyon ka purn vikas ho jata hai, to vah apne se kam viksit vyaktiyon ko uncha uthane ka prayatn karta hai. vah ise apna naitik uttaradayitva samjhta hai. atah shaktipat ek aisa vaigyanik aur adhyatmik sadhan hai jisse gupt shaktiyon ka jagaran kiya jata hai.

Kya aapko lekh pasand aaya? Subscribe
Kya aapko lekh pasand aaya? Subscribe

Ask a Question?

Some problems are too personal to share via a written consultation! No matter what kind of predicament it is that you face, the Talk to an Astrologer service at Future Point aims to get you out of all your misery at once.

SHARE YOUR PROBLEM, GET SOLUTIONS

  • Health

  • Family

  • Marriage

  • Career

  • Finance

  • Business

hriday rog evan jyotish visheshank  July 2017

hriday rog evan jyotish visheshank men hriday rog ke jyotishiya yogon v karnon ki charcha karne hetu vibhinn gyanavardhak lekh v vichar goshthi ko sammilit kiya gaya hai. is ank ki satya katha vishesh rochak hai. vastu paricharcha aur pavan tirth sthal yatra varnan sabhi ko pasand aega. devshyni ekadshi parva ka varnan bhi is ank men kiya gaya hai. falit vichar namak sthayi stambh men vibhinn bhavon ke vishesh fal ki charcha ki gai hai. tantra shastra namak sthayi stambh men tantra aur shakti pat par rochak lekh likha gaya hai. tairo stambh men mainar arkana aur tu aef pentakals ki charcha ki gai hai.

Subscribe


.