भीड़ का सच

bhir ka sach  

Ank ke aur Lekh | Sambandhit Lekh | Views : 404 |  
ek bat sada dhyan men rakhna- jo amtaur se samjha jata hai, vah amtaur se galat hota hai. bhir ke pas satya nahin hai - kabhi nahin raha. satya sada vyaktiyon men ghatta hai- aur unmen hi ghatta hai, jo apurva rup se apni patrata nirmit karte hain. virle vyaktiyon men ghatta hai. bhir to kamchlau baton ko manakar chalti rahti hai. bhir to udhar ko manakar chalti rahti hai. bhir to jhuthe par bharosa rakhti hai. islie duniya men sabhi bhiron ke alg-alag nam hain. kisi bhir ko ham kahte hain hindu; kisi bhir ko ham kahte hain muslman; kisi bhir ko ham kahte hain isai. jisas ke pas satya tha, isaiyat ke pas nahin. krishn ke pas satya tha, hindu ke pas nahin. hindu to krishn ko man liya hai; krishn ne jo kaha, use svikar kar liya hai. hindu ne svayan anubhav nahin kiya. svayan anubhav kare to krishn ho jae. dusre ka man le to hindu ho jata hai, muslman, isai, jain, bauddh. aur dhyan rakhna - jo satya svayan nahin jana hai, vah satya nahin ho sakta. mera jana hua mera hai. main tumhen kahun, tum sun bhi lo; shabd se, buddhi se samajh bhi lo - fir bhi tumhare lie satya nahin hoga. tumhare lie to shabda-matra honge; shastra-matra hoga. tumhare lie siddhant-matra hoga, satya nahin. satya to pranon ki gahrai men anubhav ho, tabhi hota hai. tumhare lie bat udhar hogi. jaise kisi ne prem kiya aur usne tumhen prem ki baten kahin, tumne sunin, samjhin bhi; fir bhi kya tum prem samajh paoge? prem to anubhav hai. tum tote ki tarah dohrane lagoge un baton ko. tote ban jaoge, pandit ban jaoge. sabhi pandit tote hote hain. thori-bahut tumhare pas suchnaon ki sanpda ho jaegi. tumhare ahankar men thore abhushan lag jaenge. lekin tumhen prem ka anubhav hoga? jal ke sanbandh men lakh parho, lakh suno; jab tak piya n ho tab tak jal ka gun samajh men n aega. aur dhyan rakhna-pine par bhi tabhi samajh men aega jab gahri pyas ho. agar pyas n ho aur koi jabaradasti tumhen jal pila de to tumhen vah tripti anubhav nahin hoti, dhyan rakhna. tripti to pyas ki tvara se hoti hai. jal to madhyam banta hai; lekin uske pahle pyas chahie. main tummen satya dal dun, to bhi tumhare jivan men kahin kuch parinam nahin hoga. tum pyase hi n the. pyase na the to jal kaise anubhav men aya? han, jal ka shastra samajh men a sakta hai. duniya men satya virlon ko upalabdha hota hai. aur aisa nahin hai ki satya ne koi shart laga rakhi hai ki virlon ko hi upalabdh honge. satya sabhi ko upalabdh ho sakta hai-lekin virle hi pyase hote hain. satya sabhi ki sanpda ho sakti hai. satya sabhi ka adhikar hai- janmasiddh adhikar hai; svarupsiddh adhikar hai. lekin dava karoge, tab n ! ghoshna karoge, tab na! danv par lagaoge apne ko, tab na! to amtaur se jo mana jata hai, vah to samajh lena ki amtaur se galt hi hoga. bhir kya manti hai, isse bahut mat ulajh jana. bhir ko kuch bhi pata nahin hai. bhir ne manne ki chinta bhi nahin ki hai; khoj bhi nahin ki hai. bhir ne to aupcharik rup se man liya hai. jis bhir mane tumne apne ko paya, vahi tum ho gae. mandir ki taraf jati thi to mandir chale gae; masjid jati thi to masjid chale gae. yah dharmik hone ka upay nahin hai. dharm ko to svechcha se chunna hota hai. samjho. tum yahan mere pas baithe ho, yah chunav hai; kyonki yahan tum kisi bhir ke karan nahin a gae ho. yahan tum kisi parivar men paida hone ke karan nahin a gae ho; kisi sanskar ke karan nahin a gae ho. yahan tumhari talash tumhen lai hai. aur is talash ke lie tumhen mulya chukana parega. agar tum isai ho to isai tum par naraj honge. agar tum hindu ho to hindu naraj honge. tum jis bhir ko chorakar yahan a gae ho mujhe sunne, vahi bhir tum par naraj hogi. bhir badhaen khari karegi. aur bhir bari badhaen khari kar sakti hai, kyonki rahna to bhir ke sath hai.
Kya aapko lekh pasand aaya? Subscribe
Kya aapko lekh pasand aaya? Subscribe


paravidyaon ko samarpit sarvashreshth masik jyotish patrika  September 2006

manushya ko jivan ke har kshetra men nana prakar ke kasht, pareshaniyon evan badhaon se do-char hona parta hai. inhen anek sroton se pareshaniyan evan vipatti ka samna karna parta hai. kabhi ashubh grah samasyaen evan kasht pradan karte hain to kai bar kala jadu athva bhut-pret se samasyaen utpann hoti hain. fyuchar samachar ke is visheshank men prabuddh lekhkon ne apne alekhon men inhin sab mahatvapurn baton ki charcha vistar se ki hai tatha inse mukti prapt karne ke nanavidh upay batae hain. mahatvapurn alekhon ki suchi men sanlagn hain- kya hai bandhan aur unke upay, yadi ap ko najar lag jae, sharirik badhaen harne vali vanaspatiyan, bhut-pret badha, mantra shakti se badha mukti, kasht nivaran, badha ke jyotishiya upay v nivaran, kalyankari jivon ke chitra lagaen badhaon ko dur bhagaen adi. in alekhon ke atirikt anya mahatvapurn alekh jivan ke bahuvidh kshetra se sambandhit hain tatha inhen sthayi stambhon men sthan pradan kiya gaya hai.

Subscribe

Apne vichar vyakt karein

blog comments powered by Disqus
.