इन्द्रियों के दास बनना कितना घातक

indriyon ke das banna kitna ghatk  

Sambandhit Lekh | Views : 1182 |  
sharir, indriyan evan mastishk ke rup men manushya ko parmatma se jo anudan mile hain, ve adbhut hain . unke sadupyog tatha suniyojan ki falashrutiyan bhi utni hi vilakshan ho sakti hain . par utna hi sach yah bhi hai ki indriyan evan gyanendriyan uchchrinkhal ho jayen - manmana bartne lage to patn-parabhav ka marg prashast hone lagta hai . ve vardan ya abhishap donon hi siddh ho sakti hain . chayan ki svatantrata manushya ko puri tarah mili hui hai ki vah inhen kis disha men niyojat karen . vishyon ki asakti se virat rahakar unka svabhavik upyog manushya ke vikas men sahayak ho sakta hai . atmik vikas men bhi sharir evan indriyon ka upyog hai . sadhna ke upadan sharir ki indriyan tatha man hi hain . ve sahachar ban jayen to kathin se kathin manjil par pahunchna sugam ho sakta hai . man ke niyam adbhut hain . jisse manushya bhaybhit hota hai, usse gahre men prabhavit bhi hota hai . saundarya ko dekhakar ankhen band kar lene vala usse adhik prabhavit hota hai jo netron ko khole hue hai vastutah ankhen band karne vala saundarya ki vasna se itna bhaybhit hai ki kahin vah akarshan use jakar n le . par ankhen band kar lene se vicharon par lagam to lagti nahin . man ke bhitar aur bhi tivra veg se saundarya ka chintan shuru ho jata hai . bahut se log sansar se bhaybhit hokar svapn ke sansar men pravisht ho jate hain . jis vahya ras se mukh mora tha, vah man ke bhitar hi bhitar aur bhi pragarh hone lagta hai . svapn men to man aur bhi unmukt hokar apna sansar svayan nirmit kar leta hai . man ki atript vasnaen aur bhi prabal rup men samne ati hain . bahirang jagat jo sankochavash avrodhak bana hua tha, vah bhi dur ho jata hai . ras parityag ka arth - indriyon ko nasht kar dena nahin - unke prati man ki asakti ka parityag hai . indriyan atyant upyogi hain . unse prapt jankariyan adbhut hain . suchnaen, sanvednaen vahya jagat se lekar ve hi ati tatha anubhuti ka madhyam banti hain par yadi man un anubhutiyon men lin nahin hota, sajag bana rahta hai to kisi prakar ka khatra nahin hai . man jab rason men duba rahta hai, to indriyan chetna ki malik ho jati hain . yahi indriyan jab chetanasatta ke margadarshan par chalti hain to tyag ki pravritti chal parti hai . indriyan jab sahyogi ban jati hain chetna ki, to asakti ka dar nahin rahta . hamari indriyon se hamara jo sambandh hai, vah malik ka hai ya gulam ka, is tathya par chetna ka vikas ya patan nirbhar karta hai . indriyon ke sanket par chetna yadi gatishil hai, to iska arth hai, vasna se ham jakre hue hain . yadi chetna unki malik hai to rason ka koi vishesh mahatva nahin rah jata . indriyan aisi sthiti men shuddh halat men rahti hain . jis yogi ki indriyan parishuddh hain, uske dekhne, sunne, sparsh karne adi ka dhang anya vyaktiyon se bhinn star ka hoga . vasna se rahit mahavir, buddh, krishn, isa ki ankhon men jo tej tha vah anyon men nahin hota aise vyaktiyon ke sparsh men bhi divyata ka samavesh rahta hai, jiska labh samy-samay par upyukt patron ko milta rahta hai . adhikansh vyaktiyon ki indriyan apna marg bhul jati hain . murchit malik ke naukar samyak nahin rahte. uski indriyon ke bich koi talmel nahin rahta . bhogi ki sabhi indriyan use viprit dishaon men khinchti hain. ankhen kuch dekhna chahti hain, kan kuch sunna chahte hain, hath kuch sparsh karna chahte hain . in sabke bich paraspar virodh hai . yah vikshipt chetna ke khandit vyaktitva ke lakshan hain . isse jivan men agnit asangtiyan paida hoti hain . adhikansh vyakti ankh ki bat manakar chalte hain . jivan vyapar men vah bari prabhavshali hain bhi . chunavon men prayah nabbe pratishat kam ankhen karti hain . dusri indriyon ki bina parvah kiye log ankh ki bat man bhi lete hain . faltah dusre hi din se kathinai shuru ho jati hai . ankh kahti hai, chehra sundar hai par uski abhivyakti ko nak aur kan bhi svikar kar len, avashyak nahin . ankh ka adhipatya manne ko ve taiyar nahin hote . panchon indriyon ko jorne vala kendra man svayan murchit halat men para rahta hai . rason ke bhog men sadaiv sharabi ki tarah duba rahta hai . chetna prasupt pari rahti hai, koi nirnay nahin le pati hai . panchon indriyon ke alg-alag vaktavya itni jatilta paida kar dete hain ki man dvandon se bhar jata hai . bhitar ki chetna jagi rahne par vah asangti nahin paida hone pati . indriyon ki dhapli alg-alag nahin bajti . indriyon ki gati men ek disha ek lay a jati hai jabki murchit manushya indriyon ke dvara vibhinn raston par khincha jata hai . nirarthak bhag-daur men hi uski sari samathrya nasht ho jati hai . jivan nishfal, nishprayojan chala jata hai. adya shankracharya ne rason ko indriyon ka ahar mana hai . kan jo sunte hain, vah kan ka bhojan hai, munh jo grahan karta hai vah uska ahar hai, drishya ankh ka bhojan hai par un sabmen chunav ka hona avashyak hai. har bat suni jaye, har chij dekhi jay, har svad grahan kiya jay, yah avashyak nahin . jo sarthak, upadey tatha atmavishvas men sahayak hain, un rason ko bhitar jane diya jaye, nirarthak ko bahar hi chor diya jaye. par upyogi, anupyogi ka chunav kare kaun? ankhon men dekhne ki to kshamata hai par chunne ki nahin . kan sun sakte hain par uchit anuchit ke bich bhed nahin kar sakte . svadendriya sarthaka-nirarthak ke bich bhed nahin kar patin, vah matra svad ki anubhuti kar pati hain jise chunav karna chahie vah chetna to prasupta-murchit pari rahti hai . faltah indriyan sarthaka-nirarthak sabhi sanvednaon ko bhitar bharti rahti hain . man ke bhitar nirarthak anubhutiyon evan vicharon ka kabar ekatrit hota jata hai . man ka yadi kisi prakar aepreshan kar sakna sambhav ho sake to adhikansh ke bhitar anargal vicharon ke kure ka ambar jama dikhayi dega . dekhne, sunne, svad lene, parhne adi men chunav drishti ke n hone se hi aisa hota hai . man men kya-kya vichar bhare hue hain, jaisi anubhutiyan bhari pari hain, kis tarah ki akankshaen uth rahi hain, ise kisi prakar kagaj par not kiya ja sake to malum hoga ki ek moti-si not buk taiyar ho gayi. unhen man men jama karne men vibhinn indriyon ki kitni shakti lagi, iska lekha-jokha liya ja sake to malum hoga ki adhikansh mansik urja to sachmuch hi vyarth men nasht ho gayi . sahi chunav karke yadi use upyukt disha men lagaya gaya hota to upyogi - sarthak parinam bhi samne ate . indriya-sanyam ka arth n keval indriya nigrah se hai varan yah bhi hai ki shakti ko sahi disha men niyojit bhi kiya jay . shaktiyon ko fenkte rahne se vardhakya evan fir mrityu bhi jaldi a dhamkti hai, kuch srijan ka karya nahin ho pata . mrityu jo atmasantosh ka karan - param anand ka suavasar ban sakti thi, vah atmaghat-si pratit hoti tatha utni hi piradayak siddh hoti hai . asantusht jivatma ko aisa pratit hota hai jaise sab kuch vyarth chala gaya . is muchrchana se bahar niklne ke lie avashyak hai ki ab tak jo indriyon ka pravah tha - man ki gati thi, unhen ulat diya jay . iske lie avashyak hai ki indriyon ko sadhan mana jae - unhen apna gulam samjha jay . chanchal man bhi atm chetna par kisi prakar havi n hone paye, vah anuchar bana rahe . sath hi vastuon ko kabhi bhi atishay mahatva n diya jay, unhen kabhi bhi sadhya n samjha jay, sadhna tak hi simit raha jay . sada iske lie sachesht rahen ki apni milkiyat vastuon tatha indriyon ke hathon n saunp di jay .
Kya aapko lekh pasand aaya? Subscribe
Kya aapko lekh pasand aaya? Subscribe


hanumat aradhna evan shani visheshank  June 2016

fyuchar samachar ke jun mah ke hanumat aradhna evan shani visheshank men ati vishisht v rochak jyotishiya v adhyatmik lekh die gaye hain. kuch lekh jo iske antargat hain- shri ram bhakt hanuman evan shani dev, prem ki jit, shani dev ka anukul karne ke 17 karagar upay, vatsaep aur jyotish, shani grah ka gochar vichar adi. inke atirikt sthayi stambh men jo lekh prakashit hote ae hain. sthayi stambh men bhi purva ki bhanti hi lekh sammilit hain.

Subscribe

Apne vichar vyakt karein

blog comments powered by Disqus
.