होली

holi  

Sambandhit Lekh | Views : 2859 |  

vasantagaman ka pratik

bhartiya jyotish ke anusar chaitra shudi pratipda ke din se navavarsh ka bhi aranbh mana jata hai. is utsav ke bad hi chaitra mahine ka aranbh hota hai. atah yah parva navsanvat ka aranbh tatha vasantagaman ka pratik bhi hai. isi din pratham purush manu ka janm hua tha, is karan ise manvaditithi kahte hain.

holi vasant ritu men manaya jane vala ek mahatvapurn bhartiya tyohar hai. yah parva hindu panchang ke anusar falgun mas ki purnima ko manaya jata hai.

holi bharat ka atyant prachin parva hai jo holi, holika ya holaka nam se manaya jata tha. vasant ki ritu men harshollas ke sath manae jane ke karan ise vasantotsav aur kam-mahotsav bhi kaha gaya hai.

itihaskaron ka manna hai ki aryon men bhi is parva ka prachalan tha lekin adhikatar yah purvi bharat men hi manaya jata tha. is parva ka varnan anek puratan dharmik pustakon men milta hai. inmen pramukh hain, jaimini ke purva mimansa-sutra aur katha garhya-sutra. narad puran aur bhavishya puran jaise puranon ki prachin hastalipiyon aur granthon men bhi is parva ka ullekh milta hai.

rangon ka tyohar kaha jane vala yah parva paranprik rup se do din manaya jata hai. yah pramukhta se bharat tatha nepal men manaya jata hain !

yah tyauhar kai anya deshon jinmen alpasankhyak hindu log rahte hain vahan bhi dhum dham ke sath manaya jata hai. pahle din ko holika jalayi jati hai, jise holika dahan bhi kahte hain! dusre din, jise dhuraddi, dhulendi, dhurkhel ya dhulivandan kaha jata hai, log ek dusre par rang, abir-gulal ityadi fenkte hain, dhol baja kar holi ke git gaye jate hain aur ghar-ghar ja kar logon ko rang lagaya jata hai. aisa mana jata hai ki holi ke din log purani katuta ko bhul kar gale milte hain aur fir se dost ban jate hain. ek dusre ko rangne aur gane-bajane ka daur dopahar tak chalta hai. iske bad snan kar ke vishram karne ke bad nae kapde pahan kar sham ko log ek dusre ke ghar milne jate hain, gale milte hain aur mithaiyan khilate hain.

rag-rang ka yah lokapriya parva vasant ka sandeshvahak bhi hai.

rag arthat sangit aur rang to iske pramukh ang hain hi, par inko utkarsh tak pahunchane vali prakriti bhi is samay rang-birange yauvan ke sath apni charam avastha par hoti hai. falgun mah men manae jane ke karan ise falguni bhi kahte hain. holi ka tyohar vasant panchmi se hi aranbh ho jata hai. usi din pahli bar gulal udaya jata hai. is din se fag aur dhamar ka gana praranbh ho jata hai. kheton men sarson khil uthti hai. bag-bagichon men fulon ki akarshak chata cha jati hai. ped-paudhe, pashu-pakshi aur manushya sab ullas se paripurn ho jate hain. kheton men gehun ki baliyan ithlane lagti hain. kisanon ka hraday khushi se nach uthta hai. bachche-budhe sabhi vyakti sab kuch sankoch aur rudhiyan bhulakar dholk-jhanjh-manjiron ki dhun ke sath nritya-sangit v rangon men dub jate hain. charon taraf rangon ki fuhar fut padti hai. holi ke din amra manjri tatha chandan ko milakar khane ka bada mahatmya hai.

holi ke parva se anek kahaniyan judi hui hain. inmen se sabse prasiddh kahani hai prahlad ki.

mana jata hai ki prachin kal men hiranyakshipu nam ka ek atyant balshali asur tha. apne bal ke darp men vah svayan ko hi ishvar manne laga tha. usne apne rajya men ishvar ka nam lene par hi pabandi laga di thi. hiranyakshipu ka putra prahlad ishvar bhakt tha. prahlad ki ishvar bhakti se kruddh hokar hiranyakshipu ne use anek kathor dand die, parantu usne ishvar ki bhakti ka marg n choda. hiranyakshipu ki bahan holika ko vardan prapt tha ki vah ag men bhasm nahin ho sakti. hiranyakshipu ne adesh diya ki holika prahlad ko god men lekar ag men baithe. ag men baithne par holika to jal gai, par prahlad bach gaya. ishvar bhakt prahlad ki yad men is din holi jalai jati hai. pratik rup se yah bhi mana jata hai ki prahlad ka arth anand hota hai. vair aur utpidan ki pratik holika (jalane ki lakdi) jalti hai aur prem tatha ullas ka pratik prahlad (anand) akshunn rahta hai.

prahlad ki katha ke atirikt yah parva rakshasi dhundhi, radha krishn ke ras aur kamdev ke punarjanm se bhi juda hua hai.

kuch logon ka manna hai ki holi men rang lagakar, nach-gakar log shiv ke ganon ka vesh dharan karte hain tatha shiv ki barat ka drishya banate hain. kuch logon ka yah bhi manna hai ki bhagvan shrikrishn ne is din putnanamak rakshasi ka vadh kiya tha. isi khushi men gopiyon aur gvalon ne raslila ki aur rang khela tha.

holi ke parva ki tarah iski paranpraen bhi atyant prachin hain aur iska svarup aur uddeshya samay ke sath badlta raha hai.

prachin kal men yah vivahit mahilaon dvara parivar ki sukh samriddhi ke lie manaya jata tha aur purn chandra ki puja karne ki paranpra thi. vaidik kal men is parva ko navatraishti yagya kaha jata tha. us samay khet ke adhpke ann ko yagya men dan karke prasad lene ka vidhan samaj men vyapt tha. ann ko hola kahte hain, isi se iska nam holikotsav pada.

holika dahn

holi ka pahla kam jhanda ya danda gadna hota hai. ise kisi sarvajnik sthal ya ghar ke ahate men gada jata hai. iske pas hi holika ki agni ikatthi ki jati hai. holi se kafi din pahle se hi yah sab taiyariyan shuru ho jati hain. parva ka pahla din holika dahan ka din kahlata hai. is din chaurahon par v jahan kahin agni ke lie lakdi ekatra ki gai hoti hai, vahan holi jalai jati hai. ismen lakdiyan aur uple pramukh rup se hote hain. kai sthalon par holika men bharbholie[16] jalane ki bhi paranpra hai. bharbholie gay ke gobar se bane aise uple hote hain jinke bich men ched hota hai. is ched men munj ki rassi dal kar mala banai jati hai. ek mala men sat bharbholie hote hain. holi men ag lagane se pahle is mala ko bhaiyon ke sir ke upar se sat bar ghuma kar fenk diya jata hai. rat ko holika dahan ke samay yah mala holika ke sath jala di jati hai. iska yah ashay hai ki holi ke sath bhaiyon par lagi buri najar bhi jal jae. lakdiyon v uplon se bani is holi ka dopahar se hi vidhivat pujan aranbh ho jata hai. gharon men bane pakvanon ka yahan bhog lagaya jata hai. din dhalne par jyotishiyon dvara nikale muhurt par holi ka dahan kiya jata hai. is ag men nai fasal ki gehun ki baliyon aur chane ke hole ko bhi bhuna jata hai.

holika ka dahan samaj ki samast buraiyon ke ant ka pratik hai. yah buraiyon par achchaiyon ki vijay ka suchak hai. ganvon men log der rat tak holi ke git gate hain tatha nachte hain.

sarvajnik holi miln

holi se agla din dhulivandan kahlata hai. is din log rangon se khelte hain. subah hote hi sab apne mitron aur rishtedaron se milne nikal padte hain. gulal aur rangon se sabka svagat kiya jata hai. log apni irshya-dvesh ki bhavna bhulakar prempurvak gale milte hain tatha ek-dusre ko rang lagate hain. is din jagh-jagah toliyan rang-birange kapde pahne nachti-gati dikhai padti hain. bachche pichkariyon se rang chodakar apna manoranjan karte hain. sara samaj holi ke rang men rangakar ek-sa ban jata hai. rang khelne ke bad der dopahar tak log nahate hain aur sham ko nae vastra pahanakar sabse milne jate hain. priti bhoj tatha gane-bajane ke karyakramon ka ayojan karte hain.

holi ke din gharon men khir, puri aur pude adi vibhinn vyanjan pakae jate hain. is avasar par anek mithaiyan banai jati hain jinmen gujhiyon ka sthan atyant mahattvapurn hai. besan ke sev aur dahibde bhi samanya rup se uttar pradesh men rahne vale har parivar men banae v khilae jate hain. kanji, bhang aur thandai is parva ke vishesh pey hote hain. par ye kuch hi logon ko bhate hain. is avasar par uttari bharat ke prayah sabhi rajyon ke sarkari karyalyon men avkash rahta hai, par dakshin bharat men utna lokapriya n hone ki vajah se is din sarkari sansthanon men avkash nahin rahta.

bharat men holi ka utsav alg-alag pradeshon men bhinnata ke sath manaya jata hai.

  • braj ki holi aj bhi sare desh ke akarshan ka bindu hoti hai.
  • barsane ki lathmar holi kafi prasiddh hai. ismen purush mahilaon par rang dalte hain aur mahilaen unhen lathiyon tatha kapde ke banae gae kodon se marti hain.
  • mathura aur vrindavan men bhi 15 dinon tak holi ka parva manaya jata hai.
  • kumaun ki git baithki men shastriya sangit ki goshthiyan hoti hain. yah sab holi ke kai dinon pahle shuru ho jata hai.
  • hariyana ki dhulandi men bhabhi dvara devar ko satae jane ki pratha hai.
  • bangal ki dol jatra chaitanya mahaprabhu ke janmadin ke rup men manai jati hai. jalus niklte hain aur gana bajana bhi sath rahta hai.
  • maharashtra ki rang panchmi men sukha gulal khelne,
  • gova ke shimgo men jalus nikalne ke bad sanskritik karyakramon ka ayojan tatha
  • panjab ke hola mohalla men sikkhon dvara shakti pradarshan ki paranpra hai.
  • tamilnadu ki kaman podigai mukhya rup se kamdev ki katha par adharit vasantotasav hai
  • manipur ke yaosang men yongsang us nanhin jhonpdi ka nam hai jo purnima ke din pratyek nagr-gram men nadi athva sarovar ke tat par banai jati hai.
  • dakshin gujrat ke adivasiyon ke lie holi sabse bada parva hai,
  • chattisagadh ki hori men lok giton ki adbhut paranpra hai aur
  • madhyapradesh ke malva anchal ke adivasi ilakon men behad dhumdham se manaya jata hai bhagoriya, jo holi ka hi ek rup hai.
  • bihar ka fagua jam kar mauj masti karne ka parva hai aur
  • nepal ki holi men is par dharmik v sanskritik rang dikhai deta hai.

isi prakar vibhinn deshon men base pravasiyon tatha dharmik sansthaon jaise iskon ya vrindavan ke banke bihari mandir men alag alag prakar se holi ke shringar v utsav manane ki paranpra hai jismen anek samantaen aur bhinnataen hain.

Kya aapko lekh pasand aaya? Subscribe
Kya aapko lekh pasand aaya? Subscribe


totke visheshank  February 2015

fyuchar samachar patrika ke totke visheshank men vibhinn karyon ke safal hone hetu sahjta tatha sulbhta se kiye jane vale totke diye gaye hain. ye totke am logon ke dvara asani se kiye ja sakte hain. in totkon ko karne se santan sukh, svasthya sukh, ajivika, vaivahik sukh prapt hota hai tatha anisht ka nivaran hota hai. is visheshank men totkon par bahut sare lekh sammilit kiye gaye hain. ye lekh hain: tone-totke kya hain tatha ye kitne karagar hain?, totka vigyan andhvishvas nahin hai, totke tantra ki vishishtata v sutra, santan, svasthya, ajivika evan vaivahik sukh ke lie totke, totkon ka adbhut sansar, janmapatrika ke anishtakari yog evan anisht nivarak totke adi hain. totkon ke alava is visheshank ke masik stambh, samyik charcha, astha, jyotish evan vastu par lekh ullekhniya hain.

Subscribe

Apne vichar vyakt karein

blog comments powered by Disqus
.