rudraksh athva ratn tulnatmak adhyayn (0 views)

rudraksh ka upyog vibhinn karyo ke lie kiya jata hai. jaise- rog chikitsa, sukh shanti evan grah dosh nivaran. iske alava rudraksh ka vastu dosh dur karne ke lie bhi prayog kiya ja sakta hai. jaise- das mukhi rudraksh ko das dishaon ke dosh dur karne ke lie dharan kiya jata hai. yah kaise nirdharit karen ki ratn dharan karna sahi hoga ya rudraksha?

rudraksh dharak ke sharir ki nakaratmak shaktiyon ko svayan men khinchta hai iske viprit ratn apni sakaratmak shaktiyon ko sharir men pravahit karte hai. rudraksh sharir ki aura shakti ko barhata hai. hamare sharir men nakaratmak shaktiyon ko kam kar sakaratmak shaktiyon ko bal pradan karta hai. abhimantrit rudraksh men adhyatmik shaktiyon ka kendra hota hai. rudaksh dharan ka kai bhi viprit prabhav nahin hota hai. ratn rashmiyon ko sharir men pravahit karte hai. jabki rudraksh nakaratmak shaktiyon ko avshoshit karta hai. ratn keval shubh grahon ka dharan kiya jata hai. ratn dharan se shubh grah ki shubhta barhti hai. parantu rudraksh shubh grah aur ashubh grah donon ka dharan kiya ja sakta hai.

sabhi lagn ke vyakti rudraksh dharan kar sakte hai. iske viprit sabhi lagn ke vyaktiyon ko sabhi ratn dharan karne ki salah nahin di ja sakti hai. ratn ko ek avdhi vishesh ke bad badlne ki salah di jati hai. parantu rudraksh ko badlne ki jarurat nahin parti hai. iske alava rudraksh ko mantra jap ke lie prayog kiya jata hai. is karan inki antarik shaktiyan bani rahti hai. rudraksh ko svarn, rajat aur tamra tinon dhatuon men jarit kar pahna ja sakta hai. khandit hone athva mala ke dane bikhar jane ki sthiti men rudaksh ko vapas dharan nahin karna chahie. aise men inhen jal men pravahit kar dusra rudraksh dharan karna chahie. rudraksh se vishesh labh prapt karne ke lie ise svarn ya rajat dhatu men dharan karna chahie. jo rudraksh mala rup men pahne jate hai vo samanyat: maleshiya ke rudraksh danon se nirmit hote hai. nepal ke rudraksh ka akar bare hone ke karan mala rup men kam hi prayog kie jate hai. rudraksh dharan karne ke bad inhen laib test avashya karana chahie. isse inki gunavatta nirdharit hoti hai.