bachchon ka shreshth palan poshan kaise kiya jaen? (0 views)

bachchon ka shreshth palan poshan karne ke lie sarvapratham svayan ko sanskar den. unmen shreshth adton ka vikas karne ke lie sabse pahle in adton ko svayan men laen. ap apne bachchon ko jaisa chahte hain thik vaisa ap svayan banen. yadi ap aisa karne men safal ho jate hai to samjhna chahie ki ap apne bachchon ke uttam abhibhavak hai. aksar dekhne men ata hai ki ham apne bachchon ko uttam gun, sanskar aur adten dena chahte hai parantu svayan in sab se koson dur rahte hai. bachchon ke samne hi anek bar jhuth bolte hai, baron ka anadar karte hai athva apas men jhagra karte hai aur bachchon se ummid karte hai ki vo aisa kuch n karen. vyavharik rup men yah sanbhav nahin hain kyonki bachche vahi sikhte hai jo apne aspas dekhte hain. yadi ham bachchon ko dabav, krodh ya jabaradasti se sikhane ka prayas karte hai to bachche in gunon ko apnate hi nahin hai. iske viprit yadi abhibhavak apne men uttam gun, sanskar aur achchi adton ka vikas karne men safal ho jate hain to bachchon ko kuch sikhane ki avashyakta nahin rahegi. aise men bachche apne mata-pita ko dekh kar svayan hi sab kuch grahan kar lenge. islie dekha jae to aj ke samay men shreshth palan poshan ki jarurat bachchon ko nahin apitu abhibhavkon ko hain. mata-pita banne se purva yadi mata-pita is vishay ka gahrai se adhyayan kar lete hai ki vyaktitva ke sarvashreshth gun jaise - satyata, imandari, sanvednshilta aur adar ka palan karne ki adat dalen to samaj ko ek uttam bhavishya yukt santan de sakte hai. sudhar ki jarurat abhibhavkon ke lie hain, bachchen to keval apne mata-pita ka ,pratibinb matra hote hain. bhavi mata-pita yadi santan palan ki shiksha le, shishu nirman men abhibhavkon ka uttaradayitva samjhen to balkon ka samuchit vikas kathin karya nahin hain.