prashnah svapnon ka shastriya evan vaigyanik adhar kya hai? ‘svapn fal vichar’ bhavishya men jatak ke sath ghatne vali ghatna ko batata hai ya matra vyakti ke chintan v sharirik svasthya ka prabhav hai. svapn kal ka, ghatna ghatne ki avdhi se kya sanbandh hain. sath hi svapn fal vichar ki vistrit suchi den. ssvapn ya sapna ek aisi ghatna hai jo pratyek manushya ke jivan men ghatit hoti .hi rahti hai. nidravastha men pahunchakar sharir sthir hone par bhi man rupi sukshm sharir se ham ek aisi duniya men pahunch jate hain jahan kabhi hamare jivan se juri ya jivan men ghatne vali chijon ka hame drishya-darshan hota hai to kabhi aise drishya samne ate hain jinhen n kabhi dekha, n hi ve hamare jivan se sanbandhit hote hanai. adhikatar log sapne dekhakar unhen bhul jate hain tatha kuch unhen yadakar unka arth nikalna chahte hain. sapnon ke vishay men bhartiya vidvanon men ya shastriya drishti v vaigyanik drishti men svapna-fal vichar ko chorakar anya samantaen milti hai.
svapnon ka shastriya evan vaigyanik adhar pratyek manushya ya jiv ki do sthitiyan hoti hain-
1. pahli - jagrit ya anidrit sthiti (avastha) tatha.
2. dusri - purn nidrit (nidra) ya sushupt sthiti (avastha).
in donon avasthaon men do bar sandhi kal ata hai. pratham sandhikal tab ata hai jab sone ke liye jate hain arthat purn nidra men jane se pahle tatha dvitiya sandhikal tab ata hai jab pratah sokar uthne se pahle ka kuch samay purva ka kal hota hai. svapn prayah jagrat aur purn nidravastha ke bich ke samay men hi ate hain. manovaigyanikon ke anusar, svapn, man ke sochne-vicharne ki upaj hai. jyotishshastranusar, man ka karak chandra grah hai jo anya ath grahon (mukhyatah chah) ki tulna men teji se gati karta hai. atah ismen chanchlta ke gun hain. yah (man) chandrama, ek sekend men kitne hi kilomitar ki duri tay kar leta hai. atah yah man bhi din bhar men apne mastishk men anek vikaron ko janm deta hai. atah chandrama ya man hi sapnon (svapnon) ka data (jank) hain. achche evan bure, shubh evan ashubh vicharon ke anusar svapn bhi achche, bure tatha shubh, ashubh ate hain. prasiddh manovaigyanik ‘‘sigmand franeyd’’ ke anusar manushya ke do mastishk hote hain. 1) chetan 2) avchetan. jab chetan mastishk suptavastha men hota hai to achetan mastishk sakriya (ektiv) hona aranbh hota hai aur manushya ke jivan men ghati dhatnaon ke un pahluon par gaur karta hai, jin par chetan mastishk gaur nahin kar pata.
manovaigyanik ‘vaibastara’ ke anusar sapne soye huye vyakti ke achetan mastishk men chetnavastha ke dauran ghatit ghatnaon, dekhi hui akritiyon, kalpanaon v vicharon ka samekit chitrankan hota hai. bhartiya vaigyanik rishi-muniyon adi ke anusar svapnon ka ana ishvariya shakti ka vardan hai tatha nidra ki chaturth avastha ya ratri ke antim prahar mane aye svapn vyakti ko bhavishya men ghatit hone vali ghatnaon ka purvabhas karate hain. svapnon ke bare men san 1953 men ‘yusin serinsaki’ tatha 1976 men ‘ailene habsn’ evan ‘rabart maikarle ne adhyan kiya tatha inhonne frayad ki avchetan mastishk ki avdharna ko parivartit rup men pratipadit kiya. jiske karan inhen alochnaon ka samna bhi karna para. inke anusar, nind ki char avasthayen (stejej) hoti hain. inmen chaithi avastha ‘‘rem’’ siddhant par karya karti hain. ismen chetan mastishk dvara upekshit ghatnaon ka pratikriti ke rup men samne ata hai jise svapn kahte hain. ek vaigyanik vivechnanusar, nidravastha ke dauran dabav kam karne vale harmon ‘kaertisol’ ka srav adhik hota hai aur manushya man ki smritiyan dhire-dhire kam hoti chali jati hain. aisi sthiti men avchetan mastishk mane shesh bachi smritiyan hi svapn ke rup men sakar hoti hai.
isse yah spasht hota hai ki svapnon ka sanbandh, ghatit hui ya hone vali ghatnaon se kisi na kisi rup men avashya hi hota hai. itna bhi avashya hai ki inmen sthan, patra evan ghatna ki nirantrta bich-bich men parivartit hoti rahti hai. fraeyad ke anusar bure svapn manushya ko bhavnatmak avsad se bachakar manobal barhate hain aur iske sath hi bhavishya men ghatit hone vali ghatnaon ka purvabhas bhi karate hain jinhen bhavishya batane vali jyotish ki ek shakha -‘‘svapn jyotish’’ kahte hain. manushya ek hi rat men kai sapne dekhta hai. inmen adhikatar log keval ve hi sapne yad rakh pate hain jo ve subah ke karib dekhte hain. kuch log yah bhi dava karte hain ki ve svapn dekhte hi nahin hain, jabki hakikat yah hai ki ve svapnon ko yad nahin rakh pate hain. arthat bhul jate hain. is sansar ka har manushya svapn dekhta hai. yah alag bat hai ki vah un svapnon ko yad nahin rakh pata yani bhul jata hai. nind ki ek anya avastha, jise (naen repid ai muvmentsa) kahte hain ismen vyakti kachchi nind leta hai. ismen sharir ki manspeshiyan aramdayak sthiti men rahti hain, tatha hriday ki dharakan bhi kam (dhimi) ho jati hain. raim nind ki char avasthaon men pratham avastha hai.
iski agli arthat dvitiya evan tritiya avasthaon men vyakti gahri nind men pahunch jata hai aur sharir ka tap girakar kam (nyun) ho jata hai. chaturth avastha arthat rem avastha men ankhe (ai) age-piche ghumti hain. isliye ise raipid ai muvment arthat rem stej kahte hain. yah avastha nind lagne ke 90-120 minat bad ati hai. ‘rem’ stej ko ‘‘delta slip’’ avastha bhi kahte hain aur yah nind ki vah avastha hai jismen svapn sabse adhik ate hain. isi rem avastha ki nind ke dauran punravritti hoti rahti hai. manushya jab svapn dekhta hai, to sharir men kai tarah ke parivartan ate hain. jaise-blad preshar barh jata hai, dharakan tej ho jati hai, shvasan gati men bhi kai parivartan hote hain. kamjor hriday valon ki svapn dekhne ke dauran mrityu bhi ho sakti hain, kyonki unka dil is dauran hone vale asamanya badlavon ko jhel nahin pata hai. nind lagne ke 30-90 minat bad svapn dekhna shuru karte hain. usse pahle nahin. ismen ashcharya ki bat yah hai ki nind ke dauran ham sabhi hilte hain aur karvten bhi badlte hain. lekin chaturth avastha yani rem stej ke dauran mans peshiyan puri tarah aram ki sthiti men rahti hai tatha sharir hil-dul bhi nahin sakta. isliye ise ‘‘rem pairalisis’’ sthiti bhi kahte hain.
‘‘svapn fal vichar’’ bhavishya men jatak ke sath ghatne vali ghatna tatha vyakti ke chintan ka svasthya (sharirik-mansik), donon hi pahluon ko darshata hai. inke piche tark nimn hain. hamare bindu ke piche tark yah hai ki svapn prayah pratyek manushya dekhta hai, kuch yad rahte hain aur kuch bhul jate hain. svapn ve hi vyakti dekhte hain, jo apne vicharon ko vyakt karte hain tatha kisi bhi karya ko kushlta se kar sakte hain. svapn, hamare mansik santulan (chintan, svasthya adi) ko banaye rakhne men sahayta karte hain. yadi ham svapn nahin dekhe to hamara mastishk itne vicharon se bhar jayega ki ham sochne samjhne ki kshamata kho denge jisse hamara chintan evan svasthya prabhavit hoga aur ham asvasth ho jayenge. atah svapn dekhna achche svasthya ke liye ati avashyak hai. arthat jin vyaktiyon ka svasthya achcha rahta hai ve svapn (visheshakar shubh/achche/mnmohk) avashya dekhte hain. tatha ve vyakti jinhen ashubh, bure, daravne svapn ate hain, ve svasth to rahte hain parantu krodhi, gussail adi pravritti ke hote hain. pahle bindu ke piche tark bhartiya vaigyanikon arthat rishi-muniyon adi ke alava vishva ke anya deshon jaise yunan, misra, chin adi ne in sabhyataon ke yug men svapnon ko bhavishya men jatak ke sath ghatne vali ghatna ko mana hai.
arthat svapn, bhavishya ki ghatnaon ka sanket dete hain. svapn, manav jati ko prakriti ki anuthi den hai. svapnon ke vishay men vishva ke takriban har hisse men anek manyatayen prachlit hain. svapnakal ka ghatna ghatne ki avdhi se sanbandh ye ratri ke charo prahron se jure rahte hain. ratri ke pratham prahar (arthat 10 se 12 baje tak (samanyatah ek svasth vyakti ratri 10 baje ke aspas sota hai) is avdhi men dekhe gaye dekhe gaye svapn ke fal ek sanvatsar arthat 1 varsh men milte hain. dvitiya prahar (12-2 baje, jise madhya ratri bhi kahte hain) men dekhe gaye svapn fal 6 mah men milte hain. tritiya prahar (2-4 baje) men dekhe gaye svapnon ke fal 3 mah men milte hain tatha chaturth yani antim prahar (4-6 baje jise brahmamuhurt bhi kahte hain) men dekhe gaye svapnon ke fal ek mah men milte hain. iske alava panchva sutra yah bhi hai ki suryoday ke thik aspas pratah 6 baje ke karib) ki bela men dekhe gaye svapnon ke fal 7 se 10 din men prapt hote hain. iske adhar par yah bhi nishkarsh nikala ja sakta hai ki suryodykalin svapnon ke fal jaldi milte hain tatha ratrikalin ke fal deri se milte hain. din ke svapn mahatvahin hote hain arthat falit nahin hote hain. ek rat men ek se adhik svapn aye to antim svapn hi falit hota hai. atah antim svapn yadi shubh a jaye, fir yadi jag jaye to iske bad sona nahin chahie. yadi iske bad sone par nind men punah svapn (yadi ashubh) aye to iske falit hone ki sanbhavna atyadhik hoti hai. uprokt vivechan svapn kal ka ghatna ghatne ki avdhi se mahatvapurn sanbandh darshata hai. svapnon ke prakar: svapn kai prakar ke hote hain.
inmen sat prakar ke svapn nimn hain.
1. drisht svapn 2. kalpit svapn 3. shrut svapn 4. bhavik svapn 5. anubhut svapn 6. doshaj svapn 7. prarthit svapna
uprokt sat prakar ke svapnon ke alava bhi vyakti kai tarah ke nimn svapn dekhta hai.
8. ‘de’ drims - din ke svapn 9. naitmeyars drims - daravne sapne 10. rekring drims - pratidin vahi sapna 11. lyusid drims - shant svapn 12. profetik drims - bhavishyavakta svapn 13. neked drims - nagn svapn svapn dvara dampatya vaivahik, pranay ya jivan ki sukhad evan dukhad sthiti:
sukhad dampatya sthiti:
1. yadi koi purush svapn men apni darhi banata ho athva dusre se banvata ho to uske jivan ki samast kathinaiyan dur hone vali hai.
2. svapn men indradhnush dekhna shubh hota hai. isse jivan ki sari abhilashayen purn ho jati hain tatha vastavik, vaivahik jivan sukh se bitta hai.
3. yadi koi stri svapn men chote bachche ke svetar ya jurab bunti hain to use danpatya ka sara sukh prapt hone ke sath-sath santan sukh bhi prapt hota hai.
4. yadi svapn men anguthi uphar ke rup men prapt ho to uska jivnsathi usse bahut hi prem karta hai.
5. yadi mele men ghumne ka svapn ata hai to yah shuabh rahta hai tatha isse yogya jivan sathi ki prapti hoti hai.
6. yadi svapn men kisi saji-dhaji dulhan ke darshan ho to jivan men anukulta prapt hoti hai.
7. yadi svapn men uphar ke rup men sone ke abhushan prapt ho to uska vivah kisi dhani vyakti se hota hai.
8. svapn men yadi premijan ka viyog dekhne ko mile to virasat men atul dhan sanpda ki prapti hoti hai.
9. svapn men yadi shahad ka sevan ho to yah shighra hi vivah sanpann hone ka sanket hai.
10. yadi svapn men svayan ka prasann hokar nachna dikhe to uska vivah shighra hi ho jata hai aur uska vaivahik jivan sukhad bitta hai.
11. yadi svapn men kisi navvdhu ko jo vyakti alingan karke chumta hai to bhavishya men shatru bhi uske mitra ban jate hen.
12. yadi svapn men kate hue kapre dekhne ko mile to isse sundar evan sushil patni ki prapti hoti hai.
13. svapn men yadi nav par baithe hue dikhe to danpatya jivan sukhad bitta hai.
14. svapn men yadi koi stri kisi ratn jarit anguthi ya naikles dekhti hai to uska vaivahik jivan sukh se bitta hai.
15. svapn men yadi avivahit stri apne premi ko kisi anya yuvti se vivah karta dekhe to uska vivah shighra ho jata he.
16. svapn men yadi koi purush apni khoi hui vastu punah prapt karta hai to use agami jivan men sukh milta hai.
17. svapn men yadi koi stri kisi mitra ke diye huye kangan pahnti hain to uska vivah shighra ho jata hai.
18. svapn men yadi koi purush, stri ko ghunghat nikalte dekhe to uska danpatya jivan sukh se bitta hai.
19. yadi svapn men purush, kisi sundar kapre ko dekhta hai to use madhur svabhav vali vidushi stri (patni) ki prapti hoti hai.
20. yadi svapn men vibhinn pakshi jaise-tota, saras, kabutar, titar, gauraiya, nilkanth adi dikhe to grihasth jivan khushnuma rahta hai. 21. yadi svapn men jebra dikhe to yah shubh rahta hai. jivan men santulan hota hai. shadi shuda jora khushi se jivan bitata hai.
dukhad dampatya jivan sthiti:
1. yadi svapn men vivahit vyakti yah dekhe ki uska vivah ho raha hai to use parivarik jivan ki pareshaniyon ka samna karna parta hai.
2. yadi svapn men koi, kisi ki shav yatra dekhe to uska danpatya jivan kalhpurn bitta hai.
3. yadi svapn men bahut bara chaku ya chura dikhe to danpatya jivan men klesh utpann hota hai.
4. yadi svapn men vivahit purush ya stri kisi dusre se sanbandh sthapit karte huye apne apko dekhte hain to unka danpatya jivan narak tulya ban jata hai.
5. svapn men tel kharidna shubh nahin hota hai, isse parivarik jivan men pareshaniyan ati hain.
6. yadi svapn men svayan ko hira ya hire jarit abhushan uphar ke rup men mila dikhe to yah ashubh hota hai tatha bhavishya men uska danpatya jivan dukhi rahta hai.
7. yadi svapn men abhushan ka gum ho jana dikhe to isse danpatya jivan men kami ati hai.
8. yadi svapn men kisi surang men se gujrna dikhe to danpatya sukh men kami ati hai.
9. yadi svapn men koi purohit, maulvi ya padri dikhe to svayan janit karnon se danpatya jivan men vighatan ki sthitiyan paida hone lagti hai.