prachinkal ke vidvanon ne apni duradarshita aur anubhuti ke adhar par tatha janmakundli men grah-rashiyon ke vinyas se yah akalan karne ka prayas kiya ki kis ratn ke prayog se manushya ki daihik aur mansik visangtiyan dur hoti hain. jyotish shastra ke atirikt ayurved shastra men bhi ratn prayog se daihik rog mukti ka vidhan hai. ratn siddhant: akash, agni, jal, vayu aur prithvi namak panchmhabhuton se prani deh ka hi nahin, balki sanpurn prakriti ka nirman hua hai. samanvit panchmhabhuton ke sthapan se hamari deh svasth rahti hai, magar inmen samanvay ke abhav se deh anek vyadhiyon se prakupit hone lagti hai.
bhautik shastra ka niyam hai ki is brahmand men sabhi chetan aur achetan padarth ek-dusre ko akarshit karne ki adbhut kshamata rakhte hain, jise gurutvakarshan bal kahte hain. isi bal ke karan rashi, nakshatra aur grahon ke rup men sabhi akashiya pindon ki nishchit sthiti bani hui hai. in pindon men samahit urja ka prakash aur chunbakatva ke rup men hamesha vikiran hota rahta hai, jisse is prithvi par upasthit jiv jantu aur vanaspati chetan svarup arthat kriyashil hokar apna jivan yapan kar rahe hain. dehantargat panchmhabhuton ki avastha men nyunadhikya asantulan hona svabhavik hai.
kisi avastha vishesh men sharir men upasthit sat, raj aur tam gunon men se ek ya do gun nyun athva pradhan hokar daihik koshikaon ki yantrik aur vidyut-chunbkiya pranali men vyapak parivartan kar dete hain, jinse deh vyadhi yukt ho jati hai. akashiya pindon se utsarjit urja manushya ko daihik aur mansik rup se bahut prabhavit kartie hai.
shishu ke janm ke samay yah urja shishu ke sanvednshil koshikaon ki karya pranali ko kuch is prakar sanvedit, uÿojit aur niyantrit karti hai, jisse ki uske sanpurn jivan ka disha-nirdeshan ho jata hai. hamari daihik sanrchna aisi jatil hai ki hamari mastishkiya koshikaon aur utkon ki karya pranali jaise pratyakshan, smriti, chintana- abhivinyas, vishleshan kshamata aur anya mansik karyo men akashiya grahon ke vicharan ke karan unse utsarjit urja ki nyunadhikya matra se vyapak parivartan hote hain, jinse manushya ke sangyanatmak, bhavatmak aur kriyatmak kshetron men anek shubh-ashubh parinam utpann hote hain. grahon ki kisi vishesh avastha aur unse utsarjit urja ki kisi vishesh matra se daihik aur mansik pushtata hoti hai, jo utsah, umang, virta, vivekshilta aur parakram ki dyotak hai tatha grahon ki kisi viprit avastha men daihik aur mansik durbalata hoti hai, jo, nirasha, hatasha aur asflta ki dyotak hai.
aisi durbalata ki avastha jin grah aur nakshatron ke karan hoti hai, usse sanbandhit ratn dharan karne se mukti milti hai. is prakar ratn sanbandhit grah ki rashmiyon ko ekatra karke hamari deh men samavesh kara kar us grah ko anukul karne ka mahatvapurn karya karte hain. iske lie ratn jarit mudrika is prakar banai jati hai ki ratn daihik tvacha ko sparsh karta rahe. vibhinn ratnon ko vibhinn ungliyon men dharan kiya jata hai, kyonki pratyek ungli se niklne vali sandesh sanvahik tantrika mastishk ke vibhinn hisson men jati hai.
islie ratn vishesh ka prabhav ungli vishesh ke madhyam se mastishk ki vishesh koshikaon ko sanvedit karti hai. jyotish ke anusar jab janm kundli, gochar kundli ya vinshoÿari dasha men koi grah nirbal hota hai aur uski nirbalata se sharir men rog utpann hota hai, tab us grah se sanbandhit ratn dharan karke ya us ratn ki bhasm ka sevan karke us grah ko balvan kiya jata hai.
yah ratn chikitsa ka mulbhut adhar hai. yah vigyan sammat hai ki ratn ek lens aur prijm ki bhanti karya karte hain, jo akashiya prakash kirnon ko sangrah karke apavartit karte hain, jinse hamare koshikiya tantuon ka poshan hota hai. ayurved ke anusar saÿv gun pradhan deh ka arth hai- daya, dan, kshama, satya, dharm, gyan, smriti, medha, dhriti, astikta buddhi, aur anasakti se yukt manviya deh ka nirman. raj gun pradhanta ka arth hai
- ahankar, adhirta, krurta, jhuth, dhong, kapat, atyadhik harsh, man, kam aur krodh se yukt deh ka nirman. tamo gun pradhanta ka arth hai
- agyanta, alasya, adharmikta, nastikta, mansik udvignata, mudhta aur nidraluta se yukt deh ka nirman. satva gun deh pushti ka aur anya donon deh kshay ka karak hain, jo duahkh aur vishadi avgun hain. atah sat gun ki nyunta aur raj tatha tamo gun ki pradhanta vibhinn prakar ke rogon ki sanbhavnaen vyakt karte hain. in rogon ki chikitsa hetu anek pranaliyon men se ek hai
- ratn chikitsa. yadyapi hamare shastron men 84 ratnon ka varnan hai, kintu vyavharik rup se keval 9 ratnon ka upyog hota hai. in sabhi ratnon men bhi saÿv, raj aur tam gun hote hain, islie sharir men jab kisi aise gun ki nyunta ya adhikta ho jati hai, to uski samya avastha sthapan ke lie arthat kshay yukt dosh dhatu ke vardhan ke lie aur vriddhi yukt dosh dhatu ke hasan ke lie ratn vishesh ko dharan ya uski bhasm ka sevan kiya jata hai.
ratnon ki pahchan: ratn vishisht gunon se labdh pashan hain, jinki sankhya 84 anki gai hai. inmen bhi apne gun vaishishtya ke karan 9 ratn variyata prapt hain. ratn men koi dhabba, gaddha, darar, bindu, kali, nili ya lal dhari nahin ho. dudh men dalne se ratn ki kirnon ki abha prakat ho. vaigyanik drishtikon se pratyek ratn ke lie apekshik ghanatva, apekshik kathorta aur apavartanank sankhya nishchit hoti hai, jiske adhar par ratnon ki pahchan sugmta se ki ja sakti hai.
jab prakash ki kirnen ek madhyam se dusre madhyam men pravesh karti hain to n keval unke marg ka apavartan hota hai, balki unki gati men bhi parivartan hota hai, jiska apavartanank se bodh hota hai. pratyek ratn ke lie iska man nishchit hai, jiske adhar par ratn ke asli ya nakli hone ki pahchan ki jati hai.
kuch ratnon ka apekshik ghanatva aur apavartanank is prakar hai: ratn apekshik ghanatva apavartanank manikya 4.03 1.76 panna 2.70 1.58 pukhraj 3.53 1.62 hira 3.52 2.42-2.46 nilam - 1.77 gomed 4.20 1.93-1.98 lahsuniya - 1.75 ratn dharan ke kuch niyam
1. jis ratn ko dharan karen, us ratn ka svami grah lagnesh ka mitra ho. yadi donon grah apas men shatru hon tab aise ratn ko keval aise grah ki mahadsha ya antardasha men hi dharan karen.
2. samanya rup se kundli ke kendra ya trikon bhavon ke svami grah ke ratn dharan karke in bhavon ko balvan karna shreshth hota hai. kundli men kendra aur trikon sthan shubh hote hain, islie inke svamiyon ko balvan karna abhisht abhipray hai.
3. dvitiya aur saptam bhav ke svami apni mahadsha ya antardasha men markesh hote hain. yadyapi yen grah jatak ko dhan-daulat pradan karne vale hote hain, kintu mrityu ya mrityu tulya kasht bhi utpann kar sakte hain, islie aise grah ke ratn dharan n karen, balki in grahon ki vrat, puja-dan adi se shanti karen.
4. tritiya, shashth, ashtam, ekadash aur dvadash bhavon ke svami grahon se sanbandhit ratn dharan n karen, kyonki ye bhav mansik aur daihik kashton ke sthan hain. islie in bhavon ko balvan karne ki avashyakta nahin hai. tritiya aur ashtam bhav ayu ke bhi sthan hain. yadi in bhavon ke svami nirbal hain, tab inki mahadsha ya antardasha men sanbandhit ratn ko asthai rup se dharan kar sakte hain.
5. shatru grahon ke ratn ek sath dharan n karen, jaise surya, chandra, mangal aur brihaspati apas men mitra hain, magar shani, rahu aur ketu ke shatru hain. atah manikya, moti, manuga aur pukhraj ke sang nilam, gomed evan lahsuniya kadapi dharan n karen. bahut se vyakti anek prakar ke ratn dharan kie rahte hain. yadi un ratnon ke grahon men mitrata nahin hai, tab vanchit fal ki asha nahin karni chahie.
6. jis grah ki mahadsha ya antardasha chal rahi ho, usse sanbandhit ratn ko shubh muhurÿa jaise savarth siddhi, amrit siddhi yog ya shukla paksh ke pratham saptah ke andar abhisht grah ke var aur hora men dharan karen. is paksh men chandra ka bal barhna shuru ho jata hai.
7. ratn jarit anguthi ko dharan karne se purva use shuddh karne ke lie kam se kam 24 ghante tak kachche dudh ya ganga jal men dal kar rakhen. iske bad ratn ki pran-pratishtha hetu pratahkal men sanbandhit grah ki hora men kisi svachch sthan men baithakar ratn ko svachch jal se dhokar dhup, dip aur agrbÿai dikhakar ratn sanbandhit grah ki kam se kam adha ghanta ek mala jap, upasna karke ratn ko dharan karen. is samay dharak ka munh purva disha ki or rahe.
ratn dharan ke pashchat ratn ki man-maryada banakar rakhni chahie, jaise kisi dah-sanskar, ashuddh sthan aur anya ashubh karya ke samay ratn utar dena shreyaskar hai. manikya: yah surya ka ratn hai. surya ek rajsik grah hai, islie shasan aur prabandhan se sanbandhit vyaktiyon ko jinhen kuch atirikt atmabal aur oj ki avashyakta hoti hai, lagabhag sava panch se sava sat raÿai tak ka manikya svarn mudrika men dayen hath ki anamika ungli men dharan karna chahie. surya agni tatva, saÿv-raj gun pradhan aur atmatatva ka praneta hai. saÿv gun akash namak mahabhut ka gun hai.
islie, manushya deh men akash aur agni donon prakar ke dosh ya rog - jaise hriday ka sankachan, dhamniyon ka lachilapan, daihik angon aur asthiyon ka sfuran, netra evan antra gati men vyavdhan hone par manikya ka upyog hitkari hota hai. dvitiya aur dvadash bhavagat surya pirit avastha men netra rog tatha chaturth bhavagat pirit surya hriday rog utpann karta hai. kundli men shani, rahu aur ketu ki yuti ya drishti prabhav se surya nirbal hota hai, jiske karan manushya men hriday rog, netra rog aur antra rog hote hain. ayurved ke anusar mankyi ki bhasm vat, piÿa aur kaf nashak tatha deh angon men snigdhata karak hoti hai. isse kshay rog, pandu rog mandagni aur jannanedriyon ki shithilta nasht hoti hai.
yadyapi surya ki mahadsha ya antardasha men sabhi lagnon ke vyakti manikya ko dharan kar sakte hain, fir bhi naukri, vyapar, prabandhan aur shasan men karyarat mesh, vrish, sinh, vrishchik aur dhanu lagn ke vyakti ise har samay dharan kar sakte hain. moeti: chandra akash aur jal namak do mahabhut tatha saÿivak gunon ka pratinidhi hota hai. chandra ka yah ratn moti saumya, shital, shitvirya aur prakriti tatha shrringar ras ka premi hota hai. jab deh men agni tatvon ke karan piÿajanak rog hote hain, tab moti ka ratn aur bhasm ke rup men upyog karne se sanbandhit rogon ka shaman hota hai.
jo manushya ast ya pap grahon se pirit chandra ke karan daihik aur mansik rup se nirbal hain, kuvriÿiayon ke shikar hain, udvign, vivekhin, aur utsahhin hain, unmen duradarshita nahin hoti aur sahi samay par sahi nirnay lene ki kshamata nahin hoti, aise log amla piÿa, uchch raktachap, mutradhat, shvas rog, rajayakshma, deh ka antardah, mrigi, bhram, histiriya jaise rogon se bahut shighra pirit ho sakte hain. aise manushya moti ko ratn aur bhasm ke rup men avashya upyog karen. moti se kala, prakriti aur nari ke prati prem tatha kalpana shakti ke barhne ke karan lekhan, kavya aur abhinay se jure logon ke lie isko dharan karna labhkari hota hai.
isse striyon ke yauvan ki vriddhi hoti hai aur purush unke mohpash men bandhne ke lie atur rahte hain, islie jin kundliyon ke bhav 1, 2, 4, 7, 8 ya 12 men mangal aur rahu ki upasthiti se ya kisi anya karan se parivaron men pati-patni ke madhya kalah rahti hai, un parivaron ki striyon ko grih shanti hetu moti dharan karna chahie. manunga: yah mangal ka ratn hai. mangal agnitatva hai aur urja ka srot hai, islie iska ratn munga yuddh, shaurya, parakram, raktapat, dhairyahinta, udvignata, kamukta, sena, pulis, khel aur sahsik karyon ka praneta hai. mangal par surya, shani, rahu ya ketu ke dushprabhav se garbhapat, raktavikar, charmarog, piÿadosh, hriday daurbalya, fore-funsi, bavasir, nirbalata jaise rog hote hain.
aise log munga dharan karke mangal ki nirbalata samapt kar sakte hain. jin vyaktiyon ki kundliyon men mangal kendra ya trikon ka svami hai, unhen svarn mudrika men munga avashya dharan karna chahie. ayurved ke anusar munge ki bhasm kafnashak, kshayanashak, pandurognashak, rakta-piÿashamak aur viryavarddhak hoti hai. iske sevan se hriday ki durbalata nasht hoti hai, mastishk ka bal barhta hai aur raktachap ki vriddhi nahin hoti. panna: yah budh ka ratn hai, islie yuvraj aur rajoguni hai.
isse piÿa ka shaman hota hai, islie piÿa prakriti vale manushyon ko mansik shanti aur smaran shakti ki vriddhi hetu panna bahut labhdayak hai. yah budh grah se utsarjit rashmiyon ko pradan karke dharak ke oj ki vriddhi karta hai agni ko pradipt karke pachan kriya aur dehabal ko barhata hai. iske upyog se yash, dhan-dhanya, dhairya, vivek, vyapar-vanijya aur vakshakti ki vriddhi hoti hai. manushya ke sharir men budh ka prabhav kam hone se shvas sansthan, pachan sansthan aur tantrika sansthan bigrne lagte hain tatha jatak ki kaf prakriti hone lagti hai. svar yantra men namrata aur mithas ka abhav hone lagta hai tatha vak shakti nirbal hoti hai.
aise vyaktiyon ko svarn mudrika men panna dharan karke apne sharir men budh ki hare rang ki rashmiyon ko grahan karna chahie. ayurved ke anusar iski bhasm se vish vikar, amlapiÿa, pandurog, arsh, vaman, pyas aur shoth nasht hote hain. pukhraj: yah devtaon ke guru brihaspati ka ratn hai. brihaspati satvik grah hai, islie pukhraj dharm, nyay, gyan, vivek aur sadachar ka praneta hai. mathadhish, nyayadhish, shasnadhyaksh, prabandhak, prakashak, lekhak aur santanhin vyaktiyon ke lie yah bahut upyogi hai. isse naukri men padonnati, vyapar men labh, striyon ke prasav aur kanyaon ke vivah men ho rahi badhaen nasht hoti hain. yah vat, piÿa aur kafnashak hai tatha hriday, mastishk, jathragni aur virya ke bal ka vriddhikarak hai. isse virya men ek vishesh kromosom ki sankhya badhti hai, jisse putra utpann hone ki sanbhavna hoti hai.
brihaspati par pap grahon ke prabhav se yakrit, gurde aur agnashay se sanbandhit rog hote hain, jaise madhumeh, pathri ityadi. aise logon ko pukhraj dharan karna chahie. yah vishvas kiya jata hai ki dant aur mukh rog vale vyakti yadi pukhraj ko rojana kuch samay ke lie apne munh men rakhen to unke rog nasht hone lagte hain. isi prakar kushth aur kainsar se pirit rogiyon ke kasht isse dur ho sakte hain. iski bhasm se vish, kaf, vat, dah, bavasir aur hriday spandan ke vikar nasht hote hain.
hira: yah danvon ke guru shukra ka ratn hai. yah kamuk aur rasik hai, islie iske dharan karne se nritya, saundarya, shringar ras, nari prem, yauvan, kamoÿojna aur madkta ki vriddhi hoti hai. yah stri-purush men akarshan, vashikaran aur sammohan ka pratik tatha napunskta nashak hai, islie sansar bhar ke stri-purush ise dharan karne ke lie lalayit rahte hain. hire ki bhasm dehabal, netra jyoti aur ayuvarddhak hai.
isse jannang pusht hote hain tatha vat, piÿa, kaf, kshay, kushth, pandu aur bhagandar rog nasht hote hain. ayurved ke granth men varnan hai ki hira bhasm, rassindur, kapur, choti ilaychi aur shakkar ke mishran ko 6 mah tak dudh se sevan karne se saundarya, dehabal, pachan shakti aur sanbhog shakti ki bahut vriddhi hoti hai. nilm: yah shani ka ratn hai. jab kanudli men shani ashubh hota hai to jatak nich, patit, kalhkari aur apradhik svabhav ka hota hai. aise logon ki vaicharikta aur mansikta kalushit hoti hai tatha ve chori, thagi, dhokhadhri, aur rishvatkhori se parhej nahin karte. nilam dharan karne se is prakar ke vyaktiyon ka bauddhik svarup nikhar sakta hai. nilam tvarit karya karne vala ek prabhavshali ratn hai aur yah har kisi ko anukul siddh nahin hota.
islie ise dharan karne se purva ek ya do din jeb men rakhakar iski anukulta ka parikshan kar lena chahie. yah ratn baingni rang ki rashmiyon ko vatavaran se shoshit karke dharak ko pradan karta hai. in rashmiyon men nile aur lal rang ka mishran shanti aur utsah ka sanchar karta hai, jisse dharak ki vichar shaili men utkrishtata, vishleshan karne aur uchit samay par uchit nirnay lene ki kshamata utpann hoti hai tatha darshanikta aur duradarshita ka samavesh hota hai. shani se vayudosh, mastishk, snayumandal aur janendriyon se sanbandhit rog hote hain.
nilam dharan karke in rogon se mukti milti hai. ayurved ke anusar nilam ki bhasm vat, piÿa, kaf, maleriya, bavasir aur asthama ki nashak hai. ise praval bhasm aur sitopladi churn ke sath prayog karne se kaf, khansi aur dama ka nash hota hai tatha ise malla arthat sankhiya bhasm aur bhuni hui fitkri ke sath milakar tulsi ke ras ke sang sevan karne se maleriya nasht hota hai. gomed: yah rahu ka ratn hai.
rahu tamogun pradhan, achanak ghatnaon ko ghatit karne vala, chatur - chalak aur buddhi ko bhrasht karne vala chaya grah hai. tamogun se buddhi ki sahjta aur sarlta nasht hoti hai. gomed tamogun ka nashak hai, islie yah bal, virya, ayu aur mastishk kshamata ko barhane ka gun rakhta hai. jab rahu apni mahadsha ya antardasha men apman, anindra, kutark, rajniti aur prashasan men asflta pradan kar raha ho, tab iske ratn gomed ko dharan karna chahie. yah vad-vivad aur pratiyogitaon men sahayta karta hai tatha prabandhan aur shaskiya karyon men tanav sahne ki kshamata pradan karta hai.
yadi kundli men rahu dvitiya, chaturth, saptam, ashtam aur dvadash bhav men ho to gomed ko dharan karne se purva ek mah tak jeb men rakhakar iski anukulta ka parikshan kar lena chahie. gomed ki bhasm dipak, pachak, buddhivarddhak aur raktanuon ki vriddhikarak hai. rog bhogne ke pashchat jab mandagni ho jati hai, bhukh nahin lagti aur pachan shakti nirbal ho jati hai, tab iski bhasm ke sevan se labh hota hai. iski bhasm ko brahmi aur bach ke sath sevan karne se buddhi ki vriddhi hoti hai.
lahsuniya, vaidurya: yah billi ki ankh jaisa ketu ka ratn hai. rahu ki bhanti ketu bhi tamoguni aur ghatnaon ko achanak ghatit karne vala chaya grah hai. yadi kundli men ketu bhav 2, 7, 8, ya 12 men ho, to iski anukulta ke parikshan ke pashchat hi iske ratn ko dharan karen, anyatha labh ke bajay hani ki ashanka rahegi. is ratn ko dharan karne se bhut-pret ka bhay, prasav vedna, netra rog, shvas rog, ajirn, atisar, amvat, pradar, prameh, pandu, kamla, napunskta, siflis aur gonoriya jaise rogon men labh hota hai. vidvanon ka ek vichar yah hai ki prasuta stri is ratn ko dharan kare to use prasav vedna nahin hoti.
is ratn ko suryast ke pashchat us din dharan karna hitakar hai, jab chandra mesh, dhanu ya min rashi men ho ya us din ashvini, magha ya mul nakshatra ho. yadi kundli men ketu dvitiya, saptam, ashtam aur dvadash bhav men ho to is ratn ko dharan n karen ya fir dharan karne se purva ek mah tak jeb men rakhakar iski anukulta ka parikshan kar lena chahie.