hindu shastron men kaha gaya hai ki jaisa ham boyenge vaisa hi katenge arthat jaise hamare karm honge vaisa hi parinam hamen bhugtna hoga. yah jaruri nahin ki is janm men kiye karmon ka fal abhi bhugtna pare, yah to agle janmon men bhi chukana par sakta hai. isi tarah kuch karmon ka fal prarabdh ke rup men hamen is janm men milta hai. bachche ka janm bhi use prarabdh ke anusar hi milta hai. aur bhagya bhi usi ke anusar nirdharit hota hai arthat karm aur bhagya donon ek dusre par adharit hain.
karm ke anusar hi bhagya nirdharit hota hai aur bhagya ke anurup hi vyakti karm karta hai, vahi use sahi disha ki prerna deta hai. aur jise sahi disha mil jae, vahi bhagya ka sikandar ban jata hai. k rm aur bhagya men se kiska sthan shreshtha? yadi is par charcha ki jae to anek tathya samne aenge ki karm kie bina kuch nahin hota. bachcha bhi dudh pine ke lie rota hai, tabhi man dudh pilati hai. lekin bhagya ke mahatva ko ham najrandaj nahin kar sakte. bhagya vyakti ko bina karm kare hi kuch bhi de sakta hai aur bhagyahin vyakti jivan bhar karm karta rahe to bhi use kuch nahin milta. janmapatri ka vishleshan karte hue anek kundliyan aisi ati hai
jinmen bhagya ajibogrib khel khelta hai. aisa hi kuch hua virendra aur sunil ke sath . virendra aur sunil ki bahut gahri dosti thi. donon kaelej men ek sath parhte the, ek sath ghumte the aur ek jaise hi nanbar bhi late the. keval ek ya do nanbar ke antar se hi ve pratham athva dvitiya sthan par rahte the. yah bat 1970 ke as-pas ki hai jab bi. e. men pratham ane vale chatra ko landan men age parhne ke lie vahan se vishesh bulava ata tha. virendra kaksha men pratham aya tha aur sunil dvitiya sthan par tha.
virendra shuru se videsh jane ke sapne dekhta tha aur usne pratham ane ke lie ji-tor mehanat ki thi jisse use videsh jane ka avasar mil sake, islie vah pratham ane par bahut khush tha ki uske man ki murad puri hone ja rahi hai. udhar sunil ek sadharan se parivar se tha. vah apne man-bap ka iklauta beta tha. kabhi unko chor kar kahin jane ka nahin socha. usne to dilli vishvavidyalay se hi em. e. karne ka man bana liya tha. virendra ki khushi se vah bhi bahut khush tha.
donon ne ek dusre ki khushi manate hue parti ki. usi din virendra ko enbesi men sakshatkar ke lie bulaya gaya tha. virendra sunil ko bhi apne sath le gaya vahan par sunil virendra ke sath hi baitha tha. tabhi ek ardali akar sabko ek farm de gaya aur sabse use bharne ke lie kaha. virendra ke sath sunil ne bhi farm bhar kar de diya aur kuch der bad virendra ke sakshatkar ke bad sunil ko bhi sakshatkar ke lie bulaya gaya to donon ko hi kafi ashcharya hua.
sunil se kafi saval puche gaye jiska usne atyant sahjta se uttar bhi de diya. donon ghar a gaye parantu virendra ko yahi bat khalti rahi ki sunil ne vahan par bina bat ke kyon farm bhara aur intaravyu bhi diya jabki sunil ne yah sab khel khel men kiya tha. kuch hi din bad sunil ke ghar yu. ke. enbesi se kael letar a gai, use vahan parhne ka vija de diya gaya jabki virendra ko nirast kar diya gaya.
sunil ke lie yah bilkul apratyashit tha. uske ghar vale bhi bilkul bhi is paksh men nahin the ki vah bahar jae. parantu honi ke age kisi ki nahin chalti. sunil ke bhagya ne use videsh le jana tha, to kaise bhi apne mata-pita ko mana kar vahan chala gaya aur vayda kar gaya ki shighra hi parhai khatm karke vapis a jaega. lekin vahan parhai khatm hote-hote naukri mil gai, vahin vivah bhi ho gaya aur fir bachche. kuch sal bad landan se amerika men shift ho gaye aur vahin ke hokar rah gaye.
vireendra se uski kabhi mulakat nahin hui . han, uska chayan hone ke bad usne use bahut khari khoti sunai thi tatha uska sthan churane ka arop bhi lagaya tha parantu us vakt donon hi apne bhagya se bandhe the aur chah kar bhi kuch nahin kar sakte the. aiye, dekhen sunil ki janmapatri men grahon ka khel. sunil ki janmakundli men bhagya ke svami budh, chandra lagnesh hokar chathe bhav men shashthesh guru ke sath baithe hain aur dvadash bhav men sthit shani ko dekh rahe hain.
dvadash bhav men shani yog karak hokar budh aur guru ko drishti de rahe hain. chaturthesh v shukra adhishthit rashi ke svami hokar dvadash men vakri avastha men bahut balvan hain. labhesh surya pancham trikon bhav men shukra, budh v guru ke bich shubhakartari yog men hain tatha apne ghar ekadash bhav arthat labh sthan ko dekh rahe hain. islie sunil ko jivan bhar prachur matra men videsh se dhan prapt hota raha. chandrama dashmesh hokar bhagya sthan men trikon bhav men baithe hain.
chandra kundli ke anusar guru aur chandra lagnesh budh chandra se dasham bhav men baith kar gajkesri yog bhi bana rahe hain. lagn kundli aur chandra kundli donon se hi sunil ki kundli men kai rajyog ban rahe hain. nich ka budh bhagyesh hokar nich bhang rajyog bana rahe hain kyonki chandrama se budh kendra men hain aur guru ke sath hai.
- chaturthesh v panchmesh shani aur shubh grah budh v guru ki apsi drishti se bane rajyog ke karan hi sunil ko makan v vahan ka sukh prapt hua. dhanesh mangal, navansh men ekadash bhav men apni mul trikon rashi men uchch surya ke sath prabal dhanraj yog bana rahe hain.
- surya bhi labhesh hokar navansh men uchch rashi men baithe hain islie sunil ko dhan ka abhav kabhi nahin raha aur lakshmi ji ki kripa sada bani rahi. -sukh ka karak shukra janm kundli men lagnesh hokar sukh sthan men chaturth bhav ke svami shani se trikon men hokar rajyog bana rahe hain. islie sunil ko har prakar ka sukh prapt hua.
matri karak grah chandrama ke lagn se bhagya sthan men tatha guru se kendra men hone se mata se bhi atyadhik lagav raha. inhin sab yogon ke karan 1974 men guru men shani ki dasha shuru hote hi sunil ko bina chahe hi videsh yatra ka mauka mila aur vahan par jakar panchmesh shani ne uchch shiksha dilvai tatha chaturthesh shani ne vahan sthayi nivas bhi karva diya. guru aur shani ki puri dasha men inka jivan videsh men parhai karne ke pashchat kam karte hue bita. vartaman samay men budh ki mahadsha chal rahi hai.
chandra se dasham bhav men budh v guru hone se iski dharm aur jyotish men ruchi barhi v inhonne jyotish sikha aur ajakal videsh men jyotish ki shiksha de rahe hain. 2023 tak budh ki mahadsha chalegi, tab tak sunil jyotish ke kshetra men bhi apne nam ki kirti videsh men failaegen.