aj ke is mashini yug evan ek dusre se age niklne ki andhi pratispardha ne n keval hamare jivan, rahn-sahan aur karyapranali ko hi asantulit kiya hai, balki svasth rahne ke lie avashyak shuddh vatavaran tatha paryavaran ko bhi dushit kar diya hai. parinamasvarup aj adhisankhya log kisi n kisi vyadhi se pirit rahte hain. svabhavik hai ki pirit vyakti upchar ke lie chikitsakon ka sahara leta hai. adhunik chikitsak keval vyakti ke dvara bataye gaye lakshanon tatha uski sharirik avastha ka hi upchar karta hai.
prayah uska dhyan rogi ke rahne evan karyasthal ke vatavaran, vyavastha tatha paryavaran ki taraf jyada nahin jata hai, jabki hamare ghar ka vatavaran, vyavastha tatha antrik evan bahya paryavaran se n sirf ek vyakti, balki pura parivar prabhavit hota hai. hamare shastron men bhi arogya ko jivan ke pramukh sukhon men pahla sukh batlaya hai:
arogyamanrinyamvipravasah sadbhirmanushyaiah sah sanprayogah.
svapratyaya vrittirbhitvasah, shad jivlokasya sukhani rajan.. (mahabhart)
artha: nirogi rahna, rini n hona, pardesh men n rahna, satpurushon ke sath mel jol hona, apni kamai se jivika chalana aur nirbhay ho kar rahna , ye chah manav lok ke sukh hain.
sach puchie to svasthya sharir ke bina vyakti n to yog ka anand le sakta hai, n bhog ka. vastu shastra hamen svasth evan sukhi jivan prapt karne ke lie uchit vatavaran, vyavastha tatha paryavaran ke vishay men sahi - sahi jankari deta hai.
svasthya evan sukhi jivan ki prapti ke lie vastu shastra rajya, nagar, ganv, nij avasiya bhavan ka nirman karte samay, panch tatvon - prithvi, jal, vayu, agni aur akash ke uchit samayojan hetu disha nirdesh deta hai. vastu shastra ke niyamon ko dhyan men rakh kar banayi gayi avasiya vyavastha usmen rahne vale logon ke jivan ko har prakar se svasth, sanpann evan sukhi banane men sahayak siddh hoti hai.
naye bhavan nirman ke lie bhi tatha purva nirmit bhavan men vastu dosh ki janch tatha uska nivaran bina kisi vastu visheshagya ke bina kathin hai. parantu is lekh men ham vastu shastra ke kuch saral, hitkari aur sukhkari aise nirdesh evan sujhav prastut karne ka prayas kar rahe hain, jinka apni avasiya vyavastha men dhyan rakh kar ap apne jivan ko aur adhik svasth evan sukhi bana sakte hain.
bhavan ki sthiti:
1. jankshan par, ya sarke ke antim chor par sthit bhukhand par bane bhavan svasthya sanbandhi kasht pradan karne vale mane jate hain.
2. yadi bhavan ke donon or, athva bhavan ke samne uttar ya purva disha men bhavan se kafi unchi imarat bani ho, to aise bhavan men rahna bhi svasthya sanbandhi kasht deta hai.
bhavan men vibhinn kakshon ki antrik vyavastha:
1.dakshin men puja kaksh n banaen.
2. puja sthal ke thik upar, ya niche, sath-sath, shauchalay n banaen.
3. rasoi agney, athva vayavya bhag men hi banaen.
4. rasoi ke andar chulha agney kon tatha jal vyavastha uttar, uttar purva men karen.
5. rasoi ghar men purva, uttar, uttara-purva men adhik se adhik khirkiyan hon.
6. uttara-purva bhag men ovar hed taink n banaen.
7. shauchalay, athva saiptik taink uttara-purva bhag men n banaen.
8. bhavan ke mukhya dvar ke samne, ya dayen -bayen shauchalay n ho.
bhavan men bagiche / laen/vrikshon ki vyavastha: bhavan men utri, purvi tatha uttara-purva bhag men laen banaen. inmen kam unchai vale paudhe evan vriksh lagaen. kantedar (gulab ko chor kar) faldar, dudh vale tatha bonsai paudhe n lagaen. fuldar paudhe evan vriksh achche rahte hain. bare per, chaire patte vale unche vriksh ityadi keval dakshin-purva, athva pashchim bhag men lagaen. faldar vriksh, ya anya vriksh lagane se pahle kisi vastuvid se salah len.
khula sthan/khirkiyan: bhavan men uttar, uttara-purva men adhik khula bhag hona chahie. khirkiyan evan baramde bhi isi disha men adhik se adhik hone chahie.
kuch samanya baten:
1. khana banate samay purva disha men mukh hona achcha rahta hai.
2. khana khate samay munh parva, ya uttar disha men hona chahie.
3. khane ke ekadam bad pey padarth nahin lena chahie.
4. sote samay sir dakshin, ya purva ki taraf rakhen.
5. farsh ko saf karte samay pani men thora samudri namak, ya fitkri milaen.
6. bim ke niche n baithen evan n soen.
7. ghar men prakash ki vyavastha achchi honi chahie.
8. ghar ke andar keval taje evan khile hue ful rakhen.
9. ghar men avashyak vastuon ka sangrah, makri ke jale, avyavasthit saman ityadi hone se svasthya sanbandhi pareshaniyan tatha ashanti barhti hain.
10. kure-kachre ke dher/kuredan ko ishan disha tatha ghar ke mukhya dvar ke nikat n rakhen.
yadyapi aj ke samay men vastu niyamon ka purnatah palan karna kathin hai, fir bhi niyamon ka shraddha, vishvas ke sath yathasanbhav palan kar ke prakriti ka ashirvad evan labh prapt kiye ja sakte hanai.
jivan men jarurat hai jyotishiya margadarshan ki? abhi bat karen fyuchar point jyotishiyon se!