vivah grihasth ashram arthat vanshvriksh ki vatika men pravesh karne ka pratham sopan hai. is madhur saubhagya ki prapti hetu har yuva svapn ki kalpanaon men sarvada lin rahta hai. parantu kalpanaon ke is kram men kuch aise saubhagyashali hain jinki ye ashaen purn ho jati hain to kuch aise bhi hain, jinhen apne sanpurn jivan men is sukh ka saubhagya nahin milta. yadi mila bhi to unke jivan men vaivahik sanbandh ki yah prakriya adhik dinon tak yathavat nahin rah pati. iske atirikt is kram men kurup, kripan, apang adi jaisi trasdiyon se pirit hi nahin apitu apradhi pravrittiyon se jure tatvon ke bhi udaharan hain
jinhen vivah sanskar ke saubhagya se vanchit rahna to bahut dur balki unhen anek vivahon arthat anek pati ya anek patniyon ke sanyog ko bhi prapt karte hue dekha gaya hai. yahan tak ki is pariprekshya men samajik v vaidhanik niyam bhi tutte dekhe gae hain. sadharntya vivah karya ke purn hone men vartaman yug men prachlit dhan, saundarya, bhautik sukh suvidhaon, pad, pratishtha adi jaise mapdandon ko jyotishiya shastra men bahut adhik pradhanta nahin di gai hai.
vastav men yadi aise kathan purn vastavik hote to in sarvagunon se purn sanpann hone vala ek bhi jatak jivan men kabhi kunvara nahin rahta. atah in tathyon se jure anek aise praman vidyaman hain, jinhen samriddhi v ati sarvochch padon ke upar asinta ke bavjud bhi apne sare jivan kal men vivah sanskar se vanchit rahna para. vastutah is shastra men janmakundli men virajman grahon ki avasthaen, bhav, yog v nakshatron ki bhumikaen sarvapratham mahatvapurn hain.