ek nakam rishta...  

kahte hain rishte upar vala banata hai. manviya prayas to keval aupcharikta matra hi hote hain. kai bar rishton men aisi karvahat a jati hai ki insan chah kar bhi kuch nahin kar pata. yah katha hai ritesh aur ragini ki. ritesh ne ek achche sansthan se injiniyaring ki thi aur ek em. en. si. men achche pad par karya kar raha tha jab uske mata-pita ne uske vivah ki bat ragini se chalai. ragini ek susanskrit parivar se thi aur vah bhi ek achchi naukri karti thi. ritesh aur ragini donon ne ek dusre ko pasand kiya aur donon ne hi vivah ke lie apni rajamandi de di. donon ka vivah khub dhum-dham se hua. vivah ke pashchat ragini gurganv chali gai aur usne apni naukri chor di. ritesh ne to use dobara kam karne ke lie kaha bhi par usne bahar kam karne men koi utsah nahin dikhaya. kuch hi din men ritesh ko uski kanpni ne nyujilaind bhejne ka nirnay liya to ragini bahut khush ho gai, use ghumna firna, nai-nai jagah dekhna bahut pasand tha. vah apni kalpana ki duniya men kho gai aur roj nit naye khvab sajane lagi ki shayad vah to pariyon ka desh hoga aur vahan jakar vah bahut masti abha bansal, fyuchar paeint karegi aur sabhi ichchaon ki purti kar legi. kuch din bad donon nyujilaind chale gaye. vahan par ritesh ko naye karyalay men bare pad par bari jimmedari ka kam saunpa gaya jismen vah kafi vyast rahta, subah aefis jakar kab sham ho jati use pata nahin chalta aur ghar pahunch kar use yahi ichcha hoti thi ki ragini achcha sa khana khilae aur uski mithi-mithi baton men vah aefis ki sari thakan mita de. idhar ragini ko apne sare sapne chur hote dikh rahe the. vah hava men urna chahti thi, sab jagah ghumna chahti thi vahan use ghar par rahna parta tha aur ritesh ke ane ka intjar karna parta tha. dhire-dhire ragini is jindgi se ubne lagi. use sabne kam karne ke lie kaha bhi par use kam karne bahar jana achcha nahin lagta tha. apna gussa vah ritesh par nikalne lagi. vah usse khinchi-khinchi rahti aur uska man khana banane ko bhi n karta. ritesh kuch kahta to bahar jane ki jid karti. do bar to ritesh use bahar le gaya aur usne ragini ko samjhane ki koshish bhi ki. abhi unhen apna parivar barhana hai aur ghar set karna hai to paise ko dekh kar kharch karna hoga aur karyalay men bhi use apne ko sabit karna tha islie vah jyada chutti bhi nahin lena chahta tha par ragini ko lagta tha ki ritesh uski ahmiyat nahin samjhta aur use ignor karta hai. aur use uski khvahishon ko pura karne men koi khushi nahin milti aur shayad vah uske lie kuch bhi nahin. isi udherbun ke chalte ragini ko pata chala ki vah man banne vali hai. yah jan kar ritesh bhi bahut khush hua ki shayad ab ragini ke svabhav men parivartan a jaega aur vah ab khush rahegi. lekin bhagvan ko kuch aur hi manjur tha. tin char mahine bad achanak ragini ka garbhapat ho gaya aur ragini ko andar tak hila gaya. ragini ab apne ap ko bahut akela mahsus karne lagi aur bachche khone ka kasur apni sas aur ritesh ke sar manrhne lagi ki sas ne bharat se uski khoj khabar nahin li aur uski parvah nahin ki. donon ke bich khai nirantar barhne lagi. ritesh ne bhi apne ap ko karyalay men samet liya vah ghar se karyalay jata aur ane ke bad bas apne men rahta. usne bhi ragini ke dukh ko samjhne ki cheshta nahin ki. donon ko lagne laga tha ki shayad ab ve donon sath khush nahin rah paenge. islie donon ne kuch samay ke lie alag hona hi thik samjha aur ragini vapis apne mata-pita ke ghar a gai. aj ragini ko vapis ae lagabhag 10 mahine ho gaye hain aur ritesh vahin nyujilaind men rah raha hai. n ta ragini apne sas sasur se bat karna chahti hai aur n hi ritesh se. vah jana to chahti hai par apni sharton par udhar ritesh bhi use apni sharton par hi bulana chahta hai. ritesh ki kundli ke anusar unki agni tatva rashi hai aur lagn men shani rahu mangal ki guru ke sath yuti hai. lagnesh surya ashtam bhav men chale gaye hain. panchmesh guru, chaturthesh evan bhagyesh mangal v saptamesh shani ki pratham bhav men yuti hai aur dhanesh evan labhesh budh se unka paraspar sanbandh bhi ban raha hai isilie ritesh ne ek achche sansthan se injiniyaring ki parhai ki aur unhen ek uchch pad ki pratishthit naukri bhi prapt hui. lekin lagnesh ki ashtam sthiti ke hone evan us par mangal ki drishti ke karan inke vyaktitva par nakaratmak prabhav par raha hai aur isilie apni patni ki ichchaon aur bhavnaon ki kadra karne men nakam rahe. chandrama vyayesh hokar karm sthan men apni mul trikon rashi men sthit hai jiske karan naukri men adhik samay vyatit karna par raha hai. karmesh shukra bhagya sthan men sthit hokar brihaspati se drisht hone se inhen apne karya kshetra men khub man-samman v tarakki mil rahi hai. saptamesh shani vakravastha men rahu v mangal ke sath shatru rashi men lagn men sthit hone se ragini inke prati kathor ravaiya apnae hue hai lekin sath hi saptam sthan men budh ki sthiti tatha patni karak shukra ki shubh sthiti ke karan ritesh ka vivah parhi likhi evan sushikshit larki se hua. ratesh ki kundli men saptam bhav par sabhi krur grahon ka prabhav hone v lagnesh ke ashtamasth hone ke karan vaivahik jivan men samanjasya sthapit karne men kathinaiyon ka samna karna par raha hai. ragini ki makar lagn ki janmakundli hai. lagnesh shani kendra men dasham bhav men apni uchch rashi men sthit hai. iske atirikt uske ekadash bhav men chatugrrahi yog banne se ragini bahut mahattvakankshi ho gayi hai aur vah apna jivan rajsi thath-bat se bitana chahti hai. lekin trik bhavon ke svami hone ke karan ye grah ragini ke parivarik jivan ko pratikul rup se prabhavit kar rahe hain. labhesh mangal ki bhagya sthan men karmesh shukra ke sath yuti se ismen bhautik sukh suvidhaon ke prati chah v mauj masti se jivan yapan karne ki pravritti bhi hai aur inhen apne jivan men prapt bhi hoga. pati sthan ka svami chandrama chathe sthan men hone se tatha chandrama ki barhven sthan par drishti hone se yah apne pati ke sath videsh to chali gai kintu saptamesh ki apne se dvadash sthan men sthiti tatha shani ki saptam bhav par dasham drishti ne ragini ke khvabon ko pura nahin hone diya aur pati se manovanchit sukh men badhaen ayin. pancham bhav men rahu ki sthiti jatak ko prem ke prati vishesh utsahit v utkanthit banata hai lekin prem sanbandhon men aksar nirasha, asflta v kathinaiyon ka samna karna parta hai. aisi sthiti adhik kathinaiyan utpann karti hain. us samay par jab jivnsathi ki kundli men bhi saptam bhav par krur grahon ka prabhav par raha hai. ritesh ki kundli men sthiti adhik ganbhir hai kyonki saptamasth budh par pap grahon ka prabhav hone se vah aur adhik papi ho gaya hai. budh ko saptam bhav men kam sukh men nyunta dene vala mana hi jata hai. sanbhvtah donon ek dusre ke purak nahin ban pa rahe hain. donon ki janmakundli ka milan karen to chandrama donon ki patri men dvidrvadash sthiti men hai. aisi sthiti men apas men mansik matbhed rahte hain. sath hi chunki ragini ki rashi ritesh ki rashi se dusri hai islie parivarik sukh men kami a rahi hai. vartaman samay men ragini ki shani men shani ki antardasha chal rahi hai. chunki shani ki dasham drishti saptam sthan par hai aur udhar ritesh ki bhi guru men shukra ki dasha chal rahi thi islie donon ke jivan par nakaratmak prabhav para aur donon ki choti-choti baton par anaban hone se donon men algav ki sthiti a gai. lekin yah sthiti jald hi badlni chahie. aktubar 2014 men shani men shani ki antardasha samapt hone par aur gochar men shani ke vrishchik rashi men ane ke bad inki vapas ritesh ke pas ane ki purn sanbhavna ban rahi hai. lekin kundli men prem v vaivahik sukh ki drishti se shreshth milan n hone ke abhav men vaivahik jivan men fir se pira ho sakti hai. aisi avastha men yadi ragini kisi karya men lagn ho jae ya koi vyapar ya kisi karyalay men kam karne lage to svatah hi yah upay ka karya karega aur dhan ka agaman ek aur uski ichchaon ki purti karega vahin uski manosthiti bhi thik hogi aur ritesh ki dashaon ke anusar bhi yah darshata hai ki use apni patni se arthik sahyog prapt hoga.