dainik jivan men tantra  

dainik jivan men tantra pan. mahesh nand sharma sansar men kisi bhi vidya ki mahatta uski tatkalik upyogita aur labh ke adhar par anki jati hai. tantra ke mahatva ko bhi log isi adhar par svikar karte hain ki usse kai tarike se asanbhav ko bhi sanbhav banaya ja sakta hai aur dainik jivan ki rup-rekha men manovanchit parivartan kiye ja sakte hain. gangajal v gaumutra ko barabar matra men milakar kisi shubh muhurt men ak ke patte se ghar men gyarah din lagatar chidkne se ghar men sukh shanti ati hai. agar parivar ke kisi sadasya ki kundli men shukra ki kisi anya grah ke sath yuti ho to pratidin sandhya ke samay tel ka dipak jalana chahiye. shami, bel, ak ke ful, fal, patte, jar, chal adi se lakshmi upasna karte hue ahuti dene se lakshmi kripa bani rahti hai. kai bar vyakti jis sthan par karya kar raha hota hai vahan se kisi karanavash apna sthan parivartan nahin chahta hai. aise vyakti sev khakar uske bij safed vastra men rakhakar hamesha apne pas rakhen. sthan parivartan ki sanbhavna kam ho jati hai. ghar men klesh hote ho ya apni mehanat ke anusar labh nahin mil raha ho to shukla paksh ke shukravar se prati shukravar ikkis bar ap chaval banaye, unhen parat men khali kar shakkar evan deshi ghi milakar safed gay ko jo baithi ho, use de parantu chaval pakane se pahle snan kar safed vastra pahan lene chahiye. isse ghar ka pratyek vyakti pragti ke marg par agrasar hoga. dudh pita bachcha dinabhar palne men hi soya rahta hai. us ko najar nahi lage, is hetu ek safed naye vastra ka tukra len. us par hanuman ji ke sir ka sindur, thore urad ke dane, ek lal mirch, ek lohe ki kil, kale dhage se palne ke upar bandh de. balak par najar ya tok kar asar nahin hoga. chote bachchon ko najar dosh se bachane hetu kale dhage men kauri pirokar gale men pahnayen. yadi putra se sanbandh kharab rahte ho to sat shanivar pipal ke per ke niche kale-til, urad, shakkar (tinon chijen ek-ek chammacha) pipal ke per ki jar men charhayen v iske pashchat pipal ko sinch kar sarso ke tel ka dipak jalayen. bahan ya bua se sanbandh kharab ho to panch budhvar sava 5 kilo gram hara chara gay ko khilaye. bhai se sanbandh kharab rahte ho to shukla paksh ke manglvar ko hanuman ji ka shrringar karayen v char manglvar usi mandir men prasad charhayen. ghar men nakaratmak drishti ya shaktiyon ka agaman n ho iske lie pratidin sham ko loban ya guggal ki dhup jalayen. bahera ka banda (kabhi-kabhi vriksho ki do shakhaon ke jor men kisi dusri prajati ka vriksh bina bij boe svatah hi ug ata hai. kabhi-kabhi usi prajati ka naya vriksh bhi ug ata hai) usi ko banda kahte hain. somvar ke din ashlesha nakshatra men lakar pujne se dhan vriddhi hoti hai. durva ka banda purvashadha nakshatra men lakar puja karen. fir dukan ya karyasthal par rakhe to vyavsay men vriddhi hoti hai. pati-patni men prem n ho, apas men larai-jhagra, manmutav ho to uttarafalguni nakshatra men am ka banda lakar dani bhuja par bandhne se jivan sukhi rahta hai. bera ka banda svati nakshatra men lakar puja ke bad ghar ke lakar men rakhne se sansarik sukhon men vriddhi hoti hain. lahsun v hing ki dhuni se pret badha dur hoti hai. pili sarso, nim ke patte v sanp ki kenchuli ki dhuni se pret-badha dur hoti hai. bachche ke svayan tute dant ko santan ki ichchuk stri agar apne shayan kaksh men rakh le to shighra santan-sukh prapt hota hai. jis ghar ke uttar ki or ashok vriksh laga hota hai us ghar men hamesha sukh-shanti, khushi rahti hai. satyanarayan bhagvan ke pujan men kadli patra rakhne se vishesh shubhatva ki prapti hoti hai. ravi pushya yog men nikali gai safed ankre ki jar ko jo vyakti apni dahini bhuja men dharan karta hai use hinsak pashuon ka bhay nahin rahta. ak ki jar ka tabij banakar gale men pahnne se ekantar jvar nahin ata hai. jin logon ke karya men bahut badhayen a rahi hon jiske karan ve atyadhik mansik pareshan rahta ho to shanivar ko chorakar kisi bhi din ek pipal ka patta tor le. us patte par purva ki taraf mukh karke uni asan par baithakar kesar ki syahi aur anar ki kalam se ‘‘un namo bhagvte vasudevay’’ aisa tin bar likhakar is patte ko puja sthal par surakshit rakh kar is par nitya agarabatti ki dhuni dane. bhagvan ki kripa se har badha dur hogi. kisi bhi vipra ko jab koi dan de tab usmen nariyal ka samavesh avashya kare. aisa karne se dan ka punya koti-koti guna prapt hota hai. haldi ki ganth ki mala se tantrik siddhiyon ko prapt karne hetu jap kiya jata hai. kali haldi ki do ganthon ko snan ke jal men kuch samay tak pari rahne den. taduprant unhen nikalakar rakh len evan us jal se snan karen. budh grah ki pira ka rahan hota hai. chaturdashi ke din vat ki jar men dudh charhane se dev-badha dur hoti hai. chameli ke tel men sindur milakar hanumanji ka chola har manglvar ko charhane se sankat dur hote hain. gular ke ath vrikshon ka ropan karne vala mrityu ke uprant svargik sukh bhogta hai. pratyek shubh karyo men stri-purush ke dvara hath-pair men menhdi lagana shubhatva men vriddhi karta hai. anidra ki sthiti men mehdi ka ful sirhane rakhne se nind ati hai. shanivar sham ko ek sukhe nariyal men ate, shakkar v deshi ghi ka mishran bharakar pipal ke per ke niche dabane se shighra vivah hone ki sanbhavna rahti hai. yah kriya bhi kam se kam panch shanivar karni chahiye. agar bar-bar vivah ki bat tal jati hai to kanya guruvar tatha larka shukravar ko ek tala lakar band kar shanivar suryoday se purva chabi sahit chairahe par rakh de. vivah men a rahi dikkat dur ho jati hai. lakshmi ki prapti ke lie apne ghar ke pas katahal ka vriksh lagaen evan uski seva karen. dhan sanbandhi samasyaen dhire-dhire samapt ho jayegi. agar rahu evan ketu ka prakop jatak par ho to use pratidin chitiyon ko ata ya chini khilana chahiye. durbhagya ko saubhagya men parivartit karne hetu kisi kune ya bavri ke samip pipal ka paudha lagaven. paudhe ke vriksh men badlne tak usko sinche, palan poshan kare, aisa karne se durbhagya ko saubhagya men badlte der nahin lagti. hamesha aise vriksh ke samaksh sandhya ke samay dipak jalaven. shani ki sarhesati se pirit jatkon ko purane kapre, juton ka dan, amavasya ko pavitra nadi men snan evan shani kavach ka path karna chahiye. aisa karne se shani dev ki kripa se sadhe sati men unnati ke dvar khulte hai, ismen koi sanshay nahin. manglvar ke din hanuman ji ke pairon ka sindur mathe par lagane se bhi saman parinam prapt hote hain. sone ke kamre men til ke tel ka dipak prajjavalit karke sone se bure sapne nahin ate evan gahri nind ati hai. pratah, dopahar tatha sandhya in tinon samay men ganeshji ke barah namon ka smaran karne se sadhak ke bigrte karya banne lagte hain evan uske sanpark men ane vale prani vashibhut hote hain. ghar ke ishan kon men shauchalay, agney kon men jal srot, brahm sthan men vajan, rnaitya kon men khalipan ye sabhi dosh sadasyon ko avnti ki or le jate hain. ghar men baithe hue ganeshji tatha karyasthal par khare ganptiji ka chitra lagana chahiye, kintu yah dhyan rakhen ki khare ganesh ji ke donon pair jamin ka sparsh karte hue ho. sukh-shanti, samriddhi ki chah rakhne valon ko safed rang ke vinayak ki murti athva chitra lagana chahiye. kisi bhi vishesh karya se bahar jate vakt ganesh ji ko arpit kiya hua pushp apne sath rakhne se karya men vighna-badha nahi ati.