aj ke yug men pratyek admi dhani banna chahta hai. lekin ishvar ki lila bhi apranpar hai. usne jis tarah hath ki ungliyon ko barabar nahin banaya usi tarah har admi ko bhi dhani nahin banaya. kintu us bhagya vidhata ne kuch aise rahasya hath ki rekhaon men dal die hain, jinka adhyayan kar aur unmen vyapt trutiyon ko dur karne ke upay kar vyakti apni arthik sthiti men sudhar la sakta hai.
vastav men hath ki rekhaen hi admi ke nirdhan ya dhani hone ki pushti karti hain. yadi koi bhrashtachar dvara dhan ki prapti karna chahta hai to uske hathon ki rekhaon ka adhyayan karke yah bat pata lagai ja sakti hai ki aisi kamai use falegi ya nahin.
yahan doshpurn rekhaon ke kuprabhavon se bachav ke vibhinn upayon ka vivaran prastut hai.
yadi jivan rekha sidhi ho, bhagya rekha mastishk rekha par ruki ho, to vyakti ki arthik sthiti bahut achchi nahin hoti, kisi tarah gujar basar hi ho pati hai. is sthiti men sudhar lane ke lie vyakti ko shani ka pujan, lakshmi ke mantra ka jap aur surya tatha shani se sanbandhit padarth dan karna chahie.
kai bar dekhne men ata hai ki do-do bhagya rekhaen hone par bhi vyakti ko vanchit fal nahin mil pata hai. aisa anya rekhaon men dosh hone ke karan hota hai. rekhaon ke doshon ke shaman ke vidhivat upay hone par vyakti dohri bhagya rekha ka labh prapt kar sakta hai.
bhagya rekha ke dhundhle hona ya mite hone, tatha shani, budh aur guru ke dabe hone se vyakti ka jivan atyant sangharshamay hota hai. is dosh se mukti ke lie navagrah pujan, bagulamukhi pujan v lakshmi pujan karvana chahie.
jivan rekha ko yadi moti rekhaen katti hon aur uska ant hriday rekha ya mastishk rekha par ho, guru ki ungli choti ho aur angutha age ki taraf khula hua ho to pas ata hua dhan bhi vapas laut jata hai. is dosh ke nivaran ke lie rahu pujan aur pitri dosh ki shanti avashya karvani chahie.
bhagya rekha adi se ant tak moti v jivan rekha ke pas ho, to vyakti ko jivan bhar sangharshamay karna parta hai aur mehanat ka ulta parinam samne ata hai. is dosh ko dur karne ke lie navagrah pujan, yantra sthapna, grih shuddhi adi karni avashyak hai. bhagya rekha yadi hriday rekha par ruke, hath sakht v ungliyan moti hon, shani aur budh grah baithe hon, vyapar rekha tuti futi hon to bhi vyakti chahe jitni mehanat kar le har taraf se nirasha hi hath lagti hai. apne vyavsay ko kholne ke lie v is dosh se mukti pane ke lie siyar singi yantra ki sthapna v jari butiyon dvara bani bhasm ko ghar men chirkav se labh milta hai. svarn bhasm ka snan bhi hitakar rahta hai.
sabhi ungliyan moti, hath sakht, hath ka rang kala, bhagya rekha men dvip, mastishk rekha choti v lahrdar hone par vyakti ek kadam age barhta hai to takdir use do kadam piche kar deti hai.
is dosh ka karan najar lagna, v purva janmon ke karm hain. isse mukti ke lie dhyan yog, gayatri mantra sadhna v bagulamukhi ka path ya havan avashya karna chahie.
jivan rekha v mastishk rekha ka jor lanba, shani v budh parvaton par atyadhik rekhaon ka jal aur mangal parvat par kat-fat hone se bhi bhagya durbal hota hai. is dosh ke shaman ke lie lakshmi yantra aur shri yantra sthapit karen. lakshmi ka mantra likhakar use roj 7 bar pravahit karne se bhi labh milta hai.
jivan rekha doshpurn, hriday rekha janjirakar v hath sakht hone par bhi bhagya durbal hota hai. is dosh se mukti ke lie pitri dosh ki shanti aur navagrah pujan karana chahie.
is prakar hathon men saikron dosh hote hain. inke shaman ke upay kar bhagya sabal kiya ja sakta hai. jarurat hai to bas vishvas, dhairya aur ichcha shakti ki.