apke vichar prashna: jyotish men surya grahan aur chandra grahan ka kya mahatva hai ? grahan ke purva ya grahan ke samay puja adi ka kya vidhan hai? sutak kya hai? ismen kaun se karm varjit hain? is dauran kin grahon ka upay, mantra jap adi karna shubh hai?
karn: grahan chandrama ke janm ke sath hi aranbh ho gae. ganna dvara gyat kiya gaya hai ki prati shatabdi ausatan 154 chandra gahan tatha 237 surya grahan hote hain. ye grahan har purnima tatha amavasya ko nahin hote. iska karan chandrama ka parikraman prithvi ke parikraman ki sidh men nahin hai balki kuch jhuka hua hai.
iska jhukav kabhi barhakar 5 ansh 20 kala ka ho jata hai to kabhi 4 ansh 57 kala ka hi rah jata hai. kintu prithvi ke surya ki parikrama karne ke karan chandrama ka tal varsh men kam se kam do bar surya ke kendra ki disha men a jata hai aur tabhi surya, chandrama aur prithvi ek sidh men hote hain. yahi grahan ka samay hota hai. jab prithvi aur chandrama ke ye parikraman tal ek-dusre ko ek sidhi rekha men katte hain to is rekha ke siron ke milan binduon ko sanpat kahte hain.
jab chandrama prithvi ke samatal ko katakar upar charhta hai to use arohi sanpat aur jab niche utrta hai to use avrohi sanpat kahte hain. arohi sanpat ko rahu tatha avrohi sanpat ko ketu kaha gaya hai. grahan ke lie rahu ya ketu ki upasthiti anivarya hai.
amavasya ke din surya aur chandrama ek hi rashi men hote hain. us din yadi ketu bhi upasthit ho to surya grahan hoga tatha purnima ke din surya aur chandrama ek-dusre ko saptam rashi men dekhte hain arthat viprit sthiti men hote hain. us din chandrama ki rashi men rahu ke hone par hi chandra grahan hoga. varsh men 2 grahan hona anivarya hai tatha inki adhitam sankhya 7 hai jinmen 4 ya 5 suryagrahan tatha 2 ya 3 chandragahan hote hain.
jab chandrama ek sanpat se chalakar punah usi sanpat men laut ata hai to is avdhi ko sanpat mas kahte hain. yah avdhi 27 din 5 ghante 5 minat aur 35.8 sekand ke barabar hoti hai. is hisab se sanpat varsh saur varsh ki tulna men 18.62 din chota hota hai. atah saur varsh ke hisab se grahan piche ki or khiskte jate hain jisse sabhi rituon men grahan lagta hai.
in grahnon ka ek chakra 18 saur varsh aur 11 din men pura hota hai. is avdhi ke bad punah iska vaisa hi kram dikhai deta hai. yadi 18.5 varsh (6585 din) ki avdhi ke sab grahan gyat hon to age ke grahan gyat kie ja sakte hain.
chandra grahan dekhna: bhano panchdshe rikshe chandrama yadi tishthati. paurnamasyan nishasheshe chandragrahnmadishet.. surya ke nakshatra se chandrama 15ven nakshatra par ho to purnamasi ko chandragrahan hota hai aur ketu tatha chandrama ek rashi par hon to chandragrahan hota hai.
surya grahan dekhna: magho n grastanakshatrat shodshan yadi suryabham. amavasya divasheshe suryagrahnmadishet.. amavasya ke din surya chandrama ek rashi par hon aur amavasya surya nakshatra aur din nakshatra ek ho to padva ki sandhi men surya grahan hota hai. surya nakshatra se chandra nakshatra tak ginen, usmen se 11 nikal len, shesh 16 nakshatra bachen to nishchay hi surya grahan hota hai.
doha: chandra se ravi satven, ravi rahu ekant. punon men padva mile, nishchay grahan padant.. ravi se rahu satven, shashi ravi ho ekant. mavas men padva mile, nishchay grahan padant..
prabhav: purn surya grahan ke avasar par prithvi par ek vichitra evan bhayavah vatavaran utpann ho jata hai jisse manushya v pashu pakshi bhaybhit dikhai dete hain. din ke samay surya rashmiyon ka prithvi par parna band ho jata hai jisse surya grahan ke 10 minat purva hi ek ajib sa andhera cha jata hai jo ratri ke andhkar se bhinn prakar ka hota hai.
is samay surya ka parimandal saf dikhai deta hai. is vichitra sthiti ka adhyayan karne ke lie jyotishi inke foto lete hain, tapman napte hain, parimandal ke dvara surya ke kai rahasyon ka pata lagate hain. yah purn surya grahan ki thori si avdhi, jo karib sat minat ki hoti hai tatha kai varshon bad ati hai, jyotishiyon ke lie ek suavasar hai.
us samay yadi durbhagyavash badal cha jae ya mausam kharab ho jae to sara prayatn vyarth ho jata hai. surya rashmiyon ke prithvi par nahin parne ka prabhav manushya ke sharir par bhi parta hai. uski pachan kriya mand par jati hai tatha vayumandal men kai prakar ke vishanuon ki vriddhi ho jati hai sharir men tapman men kami a jati hai, rakt pravah shithil ho jata hai.
is surya grahan ko kori ankh se dekhne par ankhon ki jyoti bhi nasht ho sakti hai. islie bhartiya dharmon ne is samay bhojan n karne evan grahnoprant snan adi ka vidhan kiya hai taki in dushprabhavon se bacha ja sake. dharmik asthaon se jorakar is samay dan punya ka bhi mahatva bataya hai.
jyotish men grahan ka fal: grahan ka fal mas, nakshatra aur var ke anusar alg-alag hota hai. grahan ke samay kisi bachche ka janm hota hai to uske mata-pita ko duahkh aur vipatti ka samna karna parta hai. grahan ke samay janm hone par grahan yog ki shanti karana jaruri hai. suryagrahan ke 15 din bad chandra grahan ho to shubh faldayak chandragrahan ke bad suryagrahan ho to ashubh surya ya chandra grahan grast uday ya ast ho to vyaparik vastuon men teji ati hai.
yadi grahan par shubh grahon ki drishti ho to ashubh falon ko kam karti hai aur ashubh grahon ki drishti dukhdayak hoti hai. jis rashi par grahan ho us rashi ke antargat sangta yukt ya mas rashi ko kasht milta hai aur chij vastu ho to teji ati hai. yadi 15 din ke andar do grahan a jaen to vishva men upadrav tatha prakritik prakopon se jan, dhan aur ann ki hani hoti hai.
surya ya chandra grahan ke samay shani bhi sath men ho to yah sthiti jyada kashtakari hoti hai. aise men dhatu men teji ati hai. khagras grahnon ka fal 20 dinon men parilakshit hota hai. tripad grahnon ka fal 1 mas men aur ardhagrahnon ka fal 2 mason men hota hai. grahan ka asar srishti ke harek padarth, manushya aur jiv jantu sabhi par hota hai. grahan ke pahle tin din aur grahan ke bad tin din shubh karya varjit mana gaya hai aur jis rashi men grahan hota hai us rashi ki sabhi chijon, manushya aur vanaspati par jyada asar hota hai.
surya ya chandra grahan par mangal ki drishti ho to lal vastuon men teji ati hai. budh ki purn drishti ghi, tel, sona, pital ityadi pili vastuon men teji ati hai. shukra ki purn drishti ho to safed vastuon, chandi safed vastron adi men teji ati hai. shani ki purn drishti ho to loha, urad, kale anaj tatha vastron men teji ati hai. yadi grahan par guru ki purn drishti ho to uprokt mangal adi grahon ke ashubh falon ko kam karti hai tatha sukh shanti rahti hai.
grahan sutk: chandragrahan men grahan se 9 ghante aur suryagrahan men 12 ghante pahle grahan ka sutak hota hai. prakriti shishu ke jis ang ka nirman kar rahi hoti hai, grahan ke samay us par uska sidha prabhav parta hai. grahan ke sutkal men tirthasthan, dan, jap, path, mantra tantra, anushthan, dhyan, havnadi shubh krityon ka sanpadan karna shubh rahta hai.
nirnay sindhu men likha gaya hai ki grahan men shraddh ati punyadayi hai. nastikta se jo nahin karta hai vah kichar men fansi hui gau ke tulya dukh bhogta hai. jo savidhi shraddh ke madhyam se dan deta hai mano usne sanpurn prithvi hi bhusur ko dan kar di ho aisa fal prapt hota hai. ann se rahit svarn adi anek vastuon se grahan ke samay hone vala shraddh tab tak pitron ko sukh deta hai jab tak surya chandrama rahte hain.
suryagrahan pare tab surya ka jap tatha surya ka hi dan karna chahie aur chandragrahan ke samay rahu ka jap aur rahu ka dan karna chahie. grahan ke samay varjit karma: grahan kal men sona, bhojan karna, murti sparsh karna, mal mutra adi tyagna varjit hai. ismen balak, vriddh aur rogi ko chut di gai hai. iske atirikt grahan kal men maithun evan hasya vinod adi ka bhi nishedh kiya gaya hai.
‘‘chandragrahe triyamarvak surye yamchtushtayam.
annapanadikan vajrya balvriddhaturairvina..’’
chandragrahan men 3 yam (prahr) purva aur surya grahan men 4 prahar pahle se annadi ka grahan bal, briddh v rogiyon ko chorakar nahin karna chahie.
grahon ka upay, mantra jap adi evan puja vidhan: daivagya manohar granth ke anusar yadi janm rashi men grahan ho to ghat, dusri men hani, tisri men dhanagam, chaithi men dhvans, panchvin men putra chinta, chathi men sukh, satvin men stri viyog, athvin men rog, navin men samman nash, dashvin men siddhi, gyarhvin men labh aur barhvin men grahan hone par apay vishlesh hota hai.
atah grahan janit dosh ko dur karne ke lie jap, puja, dan adi avashya karna chahie. grahan ke samay dan dena grahjnit doshon ko dur karta hai tatha is samay pavitra nadiyon men snan karna dosh shamak evan punyadayak mana jata hai. sarvabhumisman danan sarve brahmasama dvijaah. sarvaganga saman toyan grahne chandrasuryayoah.. grahan men sabhi dan bhumi dan tulya, samast brahman brahm ke saman aur samast jal gangajal ke barabar hota hai. indorlakshagunan punyan raverdashagunan tu tatah. gangadi tirth sampraptau prauktan kotigunan bhavet..
grahan ke samay yadi samathrya ho to bhumi, ganv, sona, dhanya adi dan karne chahie. gay ke dan se surya lok ki prapti, bail ke dan se shiv lok ki prapti, svarn ke dan se aishvarya ki, svarn nirmit sarp ke dan se rajapad, ghore ke dan se bainkunth ki tatha ann dan karne se sabhi sukhon ki prapti hoti hai. grahan janit dosh dur karne hetu anushthan vidhi: chandeshvar ke anusar chandragrahan janit arisht se bachne ke lie dahi, shahad, ras, chandi ke chandrama ko kanse ke patra men rakhakar dhak kar chandrama ka safed fulon se pujan karna chahie. suryagrahan janit arisht se bachne ke lie surya ke anuman se sone ka surya (sone ka chitra banakr), dadhi, shahad, ghrit se purn patra men use rakhakar, tanbe ke patra se dhak kar, surya ka lal pushp v vastron se parvakal men pujan karna chahie.
grahan ke samay ko bitakar purva mukh hokar apne isht devta ko namaskar karke, snan, dan adi se pavitra hokar sab saman brahman ko de dena chahie. is vidhan se jo grahan snan karta hai use grahan janit arisht prabhavit nahin kar pate.
smriti nirnay men kaha gaya hai ki suryagrahan men surya ka jap v dan aur chandragrahan men chandra tatha rahu ka jap v dan karna chahie. suryagrahe raverjapyan danan kuryadyathavidhi. chandragrahe tu tajjapyan rahudanan tatha japah.. samanya jan apni shakti evan samathrya ke anusar dan adi kar sakte hain. vaise sanpurn grahan kal men apne isht dev ka jap, pujan adi karte rahne tatha grahan moksh ke bad snan, dan adi karne se grahjnit arisht nahin hota hai.
grahan kal men sadhna evan grahon ka upay: grahan kal men kie gae prayog, sadhna, tantrik kriyaen adi saflta ke shikhar par pahunchane men sahayak hoti hai. atah grahan kal jab chal raha ho, usi samay sadhna sanpann karni chahie. sadhnaen evan prayog karne se purva kuch savdhaniyan avashya rakhen. grahan aranbh hone se purva hi samagri adi sadhna sthal par ekatrit kar len. dhule hue shuddh vastra pahle se taiyar rakhen.
kanbal athva kush ka bana asan taiyar rakhen. jap karne hetu mala sanbhal kar rakh len. yah bhi dhyan rakhen ki yadi apke sath koi anya vyakti bhi sadhna karne vala ho to gaumukhi ka prayog karen, jisse jap karte hue hath najar n ae. grahan aranbh hone se purva hi snan adi kar sadhna sthal men pravesh kar len tatha grahan samapt hone par punah snan karke hi pujan samagri ko hath lagaen. grahan samapt hone par yathashakti dan punya avashya karen.
kisi bhi harijan, korhi, apang ko apne pahnne ke kapre, anaj adi apne sharir par se sat bar ghuma kar dan karen. vivah-badha nivaran hetu: yadi bahut prayatn karne par bhi putra/putri ya svayan, larke/lrki ka vivah nahin ho raha ho to usse yah prayog sanpann karaen. samagri: shiv panchakshari yantra, siddhi hetu mala, chandan, thal, dhupdip evan asan.
mantra: ¬ gauri pati mahadevay mam ichchit var praptyarth gaurya namah.
(kanya ke lie yah chetan evan siddh mantra hai) putra ya larke lie ‘var’ shabd ki jarah ‘vadhu’ shabd ka prayog karen. sarvapratham ek thali men chandan se ¬ banakar us par pushp evan vilvapatra bicha den. ab shiv panchakshari yantra sthapit kar len tatha dip, dhup, agarabatti jalaen.
asan uni ho to shreshth rahega. asan par sidhe baithakar shraddha evan vishvaspurvak panach mala jap karen. (mala shuddh v siddh ho) panch mala jap ke bad thali ko vaise hi rahne den aur panch bar ¬ namah shivay ka uchcharan karen. fir snan karke shuddh vastra dharan karane aur shiv panchakshari yantra ko shuddh jal se pavitra karke puja sthan men sthapit kar pujan karen aur yathashakti dan punya karen.
grih klesh nivaran prayog: mantra: shanti kuru pardeshvar, sarvasiddhi pradayak. bhukti-mukti dayak dev, namaste-namaste svaha..
samagri: parad shivling, vilvapatra, panchamrit, rudraksh mala.
grahan prayog: grahan kal se purva vilva patra adi ekatrit kar len. grahan kal aranbh hone par ek bare bartan men chandan se ¬ bana kar vilva patra niche rakhakar parad shivling ko us par sthapit karen ab panchamrit (dudh, dahi, ghi, shahad, shakkara) bana len. parivar ka koi bhi ek sadasya rudraksh mala se mantra-uchcharan kar mala ginta rahe v shesh sadasya uske sath uchcharan karte rahen. ab upasthit parivar ke sabhi sadasya dhire-dhire mantra ka uchcharan karte hue panchamrit parad shivling par charhate rahen. yah abhishek nirantar karte rahane, jab tak ki panch mala puri n ho jae. jab tak mala jap chalta rahe parivar ka pratyek sadasya abhishek men hissa len. panch mala samapt hone par parad shivling ko panchamrit men hi duba hua rahne den.
snan kar shuddh vastra dharan karen aur shivling ko panchamrit se nikalakar shuddh jal se dhokar apne puja grih men sthapit karen. yah shivling apki har abhilasha ko purn karne men sahayak hoga. parivarik sanbandh atyant majbut v shubh hoga.
rajya-bhay ya dand se mukti ke lie: mantra:
¬ krin krin krin ¬..
samagri: mahakali yantra, mauli, kunkum, evan mitti ke 5 dipak . vidhi: grahan kal men mahakali yantra par mauli-nara chori lapet kar 5 kunkum ka tika laga den, fir uparyukt mantra ke 51 bar jap kar use pratah kal jamin men gahra gaddha karke daba den. isse rajya karmachari ko rajya bhay se mukti milti hai.
mahakali yantra ko tamra patra men rakhen v 5 dipak taiyar karen. pratyek dipak ko bari bari se mantra ka ek mala jap karte hue prajvalit karen. is prakar panchon dipak jalane tak panch mala jap pura ho jaega. prayog samapti par panchon dipak v yantra ko nadi men visarjit kar den. aisa karne se dand sanbandhi bhay se mukti milti hai.
shani dosh nivarak prayog:
mantra: ¬ pran prin praun shan shanye namah..
samagri: shani yantra, kali urad, kala kapra v shani mala. yadi ap shanidev ki sarhe sati athva dhaiyya ke prabhav men hai, ya shani ki ashubh dasha ke prabhav men hai to ap is prayog ko sanpann kar shani dosh v uski ashubhta se mukt ho sakte hain.
grahan ke samay athva amavasya ke tatkal bad kisi bhi shanivar ko ratri men yah prayog is prakar sanpann karen. ek chaiki ya bajot par kale kapre ko bicha den, aur us par sabut kale urad ki dheri banaen, thora sa sindur chirken. ab is par shani yantra khara sthapit karen v karve tel ka dipak jalaen aur dhup karen.
jap sanpurn hone par yantra, mala, urad adi kale kapre ki potli men bandh len. yadi apke nivas ke as-pas tin raste (tiraha) parte hon to potli vahan dal den aur bina piche dekhe ghar laut aen. ghar akar snan karen evan shraddha se dan punya karen.
grahan ke dauran grahon ki shanti ke upay, mantra-jap adi: grahan kal men kush ke asan par baithakar gyarah hajar gayatri mantra japne se rojgar prapti ke lie kie gae prayason men saflta mil sakti hai. rog mukti hetu mahamrityunjay yantra ko grahan kal ke avasar par panchamrit snan karate hue mahamrityunjay mantra ka jitna sanbhav ho sake jap karna athva karvana chahie. aisa karne se evan jis panchamrit se yantra ko abhishikt karaya gaya use rog grast vyakti ko pilane se (nyunatam matra men) labh hota hai.
grahan kal men kalasarp yog men janme log shanti karva kar doshmukt ho sakte hain. kal sarp dosh nivaran yantra ki pran pratishtha kar sakte hain. kalasarp dosh nivaran yantra, mantra, laeket athva anguthi dharan karne se vishesh fal milta hai. vibhinn devi devtaon ke stotra, kavach path adi karna shantidayak hota hai. onkaray namo namah mantra ka jap karne se grahan ke dosh se bacha ja sakta hai.
prithvi ka uddhar karne vale vishnu bhagvan ke stotra ka path athva vishnu sahasranam, shriram sahasranam stotra ka grahan ke parvakal men path karne se chamatkarik fal milta hai. vividh prakar ke kamnapuraka/samasya nivaran yantra, tabij, gande adi grahan parva men taiyar kiye ja sakte hain jo shighra fal dete hain. ann dan, vastra dan, svarn ya rajat dan, pashu dan, chayadan, tula dan adi purohit ke nirdeshanusar sankalp lekar karna shubh faldayak hota hai.
shanti karm ke lie surya, chandra, rahu aur ketu ke mantron ka jap tatha in grahon ki vastuon ka brahman ko dan kiya ja sakta hai. ratri ke samay, visheshakar chandra grahan ke dauran, vidyadayak mantron ka jap karne se manokamna ki purti hoti hai. artharthi log dhan aishvarya ki prapti ke nimitt shriyantra ko apne samaksh rakhakar kankdhara stotra, shri sukt, lakshmi sukt, shriyantra bij mantra evan kuber yantra ke samaksh kuber mantra ka jap kar sakte hain.
vyapar badha nivaran hetu vanaspati tantra ke prayog, jari-buti dharan, siddhi pradayak tantrik vastuen, dakshinavarti shankh, siyar singi, hatthajori adi galle ya tijori men sthapit kie ja sakte hain. sabhi prakar ki yantra, mantra, tantra sanbandhit kriyaon ya sadhnaon ki siddhi hetu grahan kal uttam mana gaya hai. lal kitab ke vividh prakar ke kalyankari totkon ka prayog kar sakte hain. nav grah pira nivarak yantron ka grahan kal men prayog karna shubh fal deta hai.
nishkarsha: grahan nakshatron, grahon ki sthiti se juri ek khagoliya ghatna hai. iska jyotishiya dharmik evan vaigyanik mahatva hai.
ab kahin bhi kabhi bhi bat karen fyuchar point jyotishacharyon se. abhi paramarsh karne ke liye yahan klik karen.