jahan kahin bhi purani lok paramparaen prachlit hain, vahan ‘chinkna’ ishvariya uphar mana jata hai. in arthon men ki ‘ishvar apko prasann rakhe’ ya ap ‘chirayu’ hon. hinduon men chink ko lekar anek tarah ki manyataen prachlit hain. kai bar ek hi ‘chink’ ke anek matalab nikal ate hain jaise yatra par niklne ke purva svabhavik dhang se chink ka ana ek manyatanusar kisi apriya ghatna ki suchak hoti hai. kuch nasvar sunghakar ya sardi jukam ke samay ki chink ka koi arth nahin hota. ghar ke bhitar agar koi ap par chink de ya chink ki hava dain ankh par par jae to yah bura mana jata hai. apke piche ya apki bain ankh par chinkna achcha mana jata hai. agar apki upasthiti men koi lagatar chinke to yah apke lie samriddhi ke agaman ka sanket hai.
ek chink ashubh mani jati hai, kintu uske sath ki dusri chink uske ashubh prabhav ko katne vali kahi jati hai. kahin-kahin manyata iske viprit bhi hai. nind men bistar se uthte samay ya khane ke samay ka chinkna ashubh lakshan mana jata hai. par bhojan ke bad chink ka ana shubh aur susvadu bhojan ki punah prapti ka sanket hota hai.
kisi ashubh prakritik sanket ko dekhte samay chinkne se uska prabhav jata rahta hai. kisi nae karya ki yojna banate ya kisi yatra par jate samay ki chink ane vale avrodhon ki suchak hoti hai. yatra ya padyatra ke samay chink ane par kuch der rukakar jane ki manyata hai. kisi basti ya muhalle men pravesh karte samay agar koi chink de to mana jata hai ki jis karya se ap ae hain, vah pura nahin hoga. nai poshak pahnte samay chinkne ka arth shubh lagaya jata hai.
yani yah aur nae vastra milne ka sanket hai. marij jab ilaj karane davakhane men pravesh karta hai, us samay use ‘chink’ ane ka arth shubh nikala jata hai. kintu kahin-kahin dharna iske viprit bhi hain. kisi grihasvami ke darvaje par chinkna uske lie nuksandeh mana jata hai. koi agar apke samne chink de to kuprabhav ko dur karne ke lie prabhu ki stuti karni chahie ya dhai shvans ruk kar fir age barhna chahie. isse kuprabhav kam ho jata hai.