प्रभु मिलन की आकांक्षा

prabhu milan ki akanksha  

Ank ke aur Lekh | Sambandhit Lekh | Views : 425 |  
mira kahai prabhu hari avinasi, tan man tahi patai re.’ mira kahti hai ki main tumhen yah kah dun ki mujhe jabse yah avinashi mila hai, jabse yah shashvat mila hai, tab se mera tan-man, atma sab ek ho gae hain. ve dvandva bhitar ke gae; main nidrvandva ho gai hun. ve jo bhitar khand-khand the mere, ve sab samapt ho gae hain; main akhand ho gai hun. akhand se juro to akhand ho jaoge. sadharntah admi sansar men jita hai to khand-khand rahta hai, kyonki kitne khandon se tum jure ho. ek hath pashchim ja raha hai, ek hath purab ja raha hai. ek pair dakshin ja raha hai, ek pair uttar ja raha hai. tum kat gae. ek ichcha kahti hai - dhan kama lo; ek ichcha kahti hai - pad bana lo; ek ichcha kahti hai ki gyan arjit kar lo; ek ichcha kahti hai yahin sansar ki chinta men pade, thora svarg men bhi intjam kar lo, kabhi kuch dan-punya bhi kar lo. aisi hajar ichchaen hain - aur tum hajar ho gae hajar ichchaon ke karan. aur in sabmen kalah hai. ye ichchaen ek disha men bhi nahin ja rahi hain, kyonki agar dhan kamana hai to pad n kama paoge. agar pad kamana hai to dhan ganvana parega. chunav larna ho to dhan ganvana hi parega. aur dhan kamana ho to fir chunav larne se jara bachna parega. agar svarg men kuch pad-pratishtha pani ho, vahan kuch sone ke mahlon men vas karna aur chandi ke raston par chalna ho, to fir admi ko yahan bhukhe marna pare, upvas karna pare - ityadi. tapashcharya karni pare. akankshaen viprit hain. sharir kahta hai- bhojan karo. man ki akankshaen lobh se bhari hain; vah kahta hai ki yahan kya karna bhojan, svarg men hi kar lenge ikattha. abhi kuch din ki bat hai, gujar lo; vahan sharab ke chashme bah hare hain. man kahta hai - sundar stri ja rahi hai, kyon chor de rahe ho? ek man kahta - is stri men uljhe to fir apsaraen nahin milengi aur khayal rakhna, fir pachtaoge. are, yah to do din ki bat hai; ek dafa pahunch gae svarg, to apsaraen milengi. fir bhogna sukh-hi-sukh anantkal tak. aisa man anek-anek khandon men banta hai. in khandon ke karan tum bhi khandit ho gae ho; tumhari ekta tut gai hai. sare shastron ka shastra ek hi hai ki tum ek ho jao. lekin tum ek kaise hooge; jab ek hi akanksha rah jae. us ek akanksha ko hi ham ram kahte hain. us ek akanksha ka arth hi yah hai ki ram ke siva kuch bhi nahin pana hai. baki sab pana usi par charha dena hai; bas ek parmatma ko pa lena hai. jab ek hi akanksha rah jaegi to tum ek hi ho jaoge. aur koi upay nahin hai. tumhare bhitar yog sadhne ka aur koi upay nahin hai. jitni akankshaen, utne tukre. yah bat to tumhari samajh men a jaegi ki jitni akankshaen utne tukre ho jate hain. har akanksha ek tukra lekar bhagne lagti hai. jab ek hi akanksha rah jaegi to tum akhand hue. vahi hai arth - ‘mero man ramhi ram ratai re.’ ek hi akanksha bachi hai. bas ek hi ko pane ki dhun savar hui hai. sab dhunen kho gain. sabhi dhunen usi men lin ho gain. jaise sab chote-chote nadi-nale akar ganga men sammilit ho gae hain, aur ganga sagar ki taraf - aise hi sab choti-choti ichchaen ek virat ichcha ban gai hain prabhu ko pane ki aur sari akankshaen usi men sammilit ho gai hain. ek hi lakshya bacha. fir jyada der tum ruk n sakoge. bahoge apne-ap, sagar tak pahunch jaoge. chote-chote nale sagar tak nahin pahunch sakte; raste men kho jaenge, marusthalon men ur jaenge. lekin sab ichchaen mil jaen aur ek abhipsa ban jae... . abhipsa shabd ka yahi arth hai. abhipsa ka arth hota hai - sari ichchaen ek ichcha men nimajjit ho gain. choti-choti lapten sab ek virat lapat men kho gain. tum ek mashal ban gae. ab is avinashi se lagan lag gai; ab tan aur man ke bich jo fasla tha vah pat gaya. ab koi fasle nahin rahe. ab koi bhed nahin rahe. ab koi khand nahin rahe. main akhand ho gai hun.
Kya aapko lekh pasand aaya? Subscribe
Kya aapko lekh pasand aaya? Subscribe


paravidyaon ko samarpit sarvashreshth masik jyotish patrika  August 2006

bhavishyakathan ke vibhinn pahlu sabhyata ke prarambhik kal se hi prachlit rahe hain. vartaman paridrishya men jyotish, ankshastra, hastarekha shastra evan mukhakriti vigyan sarvadhik lokapriya hain. pratyek vyakti ko apne jivan ki agami ghatnaon ki jankari prapt karne ki ichcha hoti hai. iske lie vah in vidhaon ke vidvanon ke pas jakar sampark karta hai. fyuchar samachar ke is visheshank men mukhyatah hastarekha shastra evan mukhakriti vigyan par prakash dala gaya hai. in vishyon se sambandhit anek ullekhniya alekhon men shamil hain - hatheli men pae jane vale chihn aur unka prabhav, panch minat men parhie hath ki rekhaen, vivah rekha evan uske fal, santan paksh par vichar karne vali rekhaen, shani grah se hi nahin hai bhagya rekha ka sanbandh, jaen abraham aur shahrukh khan ki hastarekhaon ka adhyayan, kaise karen var-kanya ka hastamilan, upayon se badli ja sakti hai hastarekhaen, chehre se janie svabhav adi. inke atirikt sthayi stambhon ke anya mahatvapurn alekh bhi shamil hain.

Subscribe

Apne vichar vyakt karein

blog comments powered by Disqus
.