दर्शन कीजिए पार्थसारथी मंदिर का

darshan kijie parthasarthi mandir ka  

Ank ke aur Lekh | Sambandhit Lekh | Views : 735 |  
vishal alankrit v chittakarshaka shikhar, minakari se yukta gaupur, susajjit stanbhon par tike, sabhamandap aur bare parkote ke sath-sath dev stanbh v shilpa-kaushl se paripurn vishal sinh dvar se jure dakshin bhartiya devalyon ka bhartiya sabhyata sanskriti men utkrishta sthan hai. aj bhi sanpurn dakshin bharat ke shatabdik sthanon par aise khyatnam devalay hain jinka apna sudirgh itihas raha hai aur inke darshan se bite hue yug ki smriti sahaj men jivant ho jati hai. aisa hi ek devalay tamilnadu pradesh ki rajdhani chennai men nagrkhand tripliken men virajman hai jise aranyula parth sarthi mandir kaha jata hai. chennai ka parth sarthi mandir dravir kala sanskriti ka ek utkrishta udaharan hai jise chennai kshetra ke sarva puratan jivant devalay ke rup men abhihit kiya jata hai. yah mandir vartaman men madras prant ke purane nagriya kshetra tripliken men avasthit hai jiska prachin nam ‘tiruvallikeni’ athva ‘‘tiru-alli-keni’’ tha. svikar kiya jata hai ki praja men dharmik sandesh pradan karne v dharma tatva ki dhvaja dur desh tak fahrane ke uddeshya se is mandir ka nirman athvin shatabdi men pallav raja narsinh varman dvara kiya gaya. aise darshan kijie parthasarthi mandir ka kahin-kahin raja ke rup men danti varman ka nam bhi milta hai. ise age ke samay men chol rajaon dvara fir bad men vijayanagar samrajya ke shaskon dvara yatheshth sahayta, suraksha v sanraksha pradan kiya gaya. is mandir kshetra se prapt abhilekhon se iske itihas par vishad prakash parta hai jo multah ‘tamil’ v ‘telugu’ men hai. is mandir men pashan utkirnan ka bara hi achcha karya hua hai. bhagvan shri krishn ko samarpit vaishnava sanpraday ke 108 divya desh men iski ganna ki jati hai. alankrit pradesh dvar se pravesh karne ke bad 36 pashan stanbhon par tika vishal sabha mandal par kar gopurm men bhitar pravesh karne par svarn mandit stanbh ka darshan kiya ja sakta hai. yahan ke pratyek stanbh par pashan kalakarita ka utkrisht namuna dekha ja sakta hai jis par kisi na kisi pauranik dharmakhyan se jure kathanak ka vishisht chitran kiya gaya hai. is chitran ka rup ankn v minakari dekhne yogya hai. mandir pravesh ke baen taraf mandir ka karyakal hai jo mandir ki vyavastha par pura najar rakhta hai. sanprati mandir men kuch nirman karya chal raha hai. andar men panch sirhi charhakar pravesh karne par shri partha-sarthi dev ka darshan kiya ja sakta hai jinke ek taraf shri devi v dusri or bhu-devi ka sthan hai. samne men niche charn ki pratikriti rakha gaya hai. upar men alankrit v akarshak chandi chatra aur piche men rangin chamkdar shisha laga dene se yahan ki akarshakata dvigunit hui hai. samne ke devalay men devi man (mahalakshmi) ka sthan hai. log charhave ke rup men jo bhi le jate hain use devta ke samaksh bhav arpan kar de diya jata hai. yahan dipdan ka vishesh mahatva hai yahi karan hai ki mandir ke bahar dip ki khub bikri hoti hai. kahte hain dakshin bharat ke panch prasiddha vaishnav devalay jo kramshah shrirangam, ahobil, kombil, vilipulur aur kanchi puram men sthapit hai, ki bhanti yah devalay bhi atishay mahatva ka hai. is devalay men naynar santane ka vigrah bhi dekha ja sakta hai to anyanya bhartiya sant khaskr saptarishiyon ko bhi yahan devta ki bhanti sthan diya gaya hai. multah is mandir men shri vishnu ke panch rup-avtaron ka vishad chitran hua hai jinke nam hain nrisinh, ram, vardraj, rangnatham aur shri krishn. yahan vishnu jaya (lakshmi ji) bhovavali aman bhi chote se mandir men virajit hain. vivaran hai ki 16vin shatabdi men vijayanagar ke rajaon ne yahan nav sanskar karaya uske bad yah mandir desh prasiddh ho gaya. is devalay men parth sarthi ke alave shriram parivar, balram, satyaki, pradyumn, aniruddh, bhagya lakshmi va piche men mahavishnu vrajrajay, andal svami, soenadam raja adi ke sthan hain. is devalay se age ek mandir men ram lakshman janki ka akarshak vigrah darshaniya hai. parth sarthi mandir ko utsavon ka devalay bhi kaha jata hai jahan salane bhar dharmik anushthan ka ayojn hota rahta hai. yahan ke pradhan utsavon men janvri-farvri men thai, farvri-march men bhabhi, marcha-aprail men panuni, aprail mai men chaitirai, mai-jun men vaigasi, jun-julai men ati, sitanbr-aktubar men puratsi, aktubr-navanbar men tripasi aur navanbr-disanbar men kartigai ke sath-sath disanbr-janvri men margajhi utsav men dur-dur ke bhakton ka agaman hota hai. aise yahan ka sarvaprasiddh varshik punyakari tithi ‘shri vaikunth ekadshi hai, tab panch saptah ka mela yahan lagta hai. yahan ke ek karmi umavageshvaran batate hain ki utsav ke dinon men mandir men vishesh vyavastha ki jati hai taki bhakton ko koi pareshani n ho. is bar jun mah ke dvitiya saptah men ayojit kunbhabhishek samaroh ke dauran yahan desh-videsh ke vibhinn hisson se lakhon shraddhaluon ka agaman hona is bat ka sakshi hai ki jan-jan ke bich is devalay ke prati atut vishvas v agadh nishtha hai. vartaman men yah devalay 1650 i. ke karib navshringar ke sath upasthit hua hai jahan kuch vishesh utsava divas ko chorakar pratah chah se barh baje tak aur sayankal char se nau baje tak khula rahta hai. mandir men vishesh darshan ke lie shulk ki bhi vyavastha hai jo bis athva pachas ru. ke tikat ke rup men dey hai. dakshin bhartiya sthapatya kala aur uski shailigat kshetriya vibhinnataon ke vyakhyan smarak ke rup men prastut shri parth sarthi mandir n sirf chennai varan sanpurn dakshin bhartiya devalyon men panktey hai jise desh ka ekmev arjun ka svatantra mandir bataya jata hai. yah janne ki bat hai ki bharat ke pahle pahal char mahangron men ek madras ka hi naya nam ab chennai hai jahan chote-bare shatadhik devalyon ke bich nau ki prasiddhi chaturdik hai. ismen shri parth sarthi ke alave niche varnit mandiron ka darshan kiya ja sakta hai. chenamba mandir: svikar kiya jata hai ki mata chenamba ke hi nam se chennai nagar ka namkrn hua hai. inhen madras kshetra ki rakshika devi (adhishthatri shakti) mana jata hai. sahukar peth men shri balaji mandir se thori duri par mata ji ka chittakarshak devalay virajman hai. bala ji mandir: chennai ke sahukar peth ke sannikat yah mandir shri bala ji ko samarpit hai. mandir ke andar garbh grih men shri devi v bhu devi ke madhya shri bala shri svami ka vigrah darshaniya hai. andar bhag men paribhraman sthal men shri lakshmi ji ka akarshak mandir hai. mandir ke bahri kshetra men ganesh, kartikey, radha-krishn, shri ram lakshman janki v lakshmi narayan adi ke akarshak sthan hai. kapalishvar mandir: apne akarshaka 36 mitar unche pravesh dvar v utkrishta shikhar ke sath jagrit shaiv tirtha ke rup men kapalishvar (kapaleshvar) mahadev ki ganna ki jati hai jo mehlapur (mailapur) muhalle men virajman hain. mandir ke bahri parikrama marg men mayureshvar ling hai jahan mayuri ke rup men parvati ji bhagvan shankar ki aradhna kar rahi hain. mandir men hi parvati ji aur subrahmanyam svami ka mandir hai. is devalay men shri ganesh, natraj va naynar ko bhi sthan diya gaya hai. mandir ke samaksh vishal sarovr hai jiske madhya men tapunuma gunbj pratyek darshakon ko anand pradan karta hai. asht lakshmi mandir: yah mandir samudra (arab sagr) ke kinare vishal dvar ke andar men avasthit hai jahan ki divaren kanyakumari mandir ki tarf rangin bani hanai. yahan devi lakshmi ke athon rup ka alg-alag mandir nichle v upri tal par virajit hai. mandir ke chat se samudra ka darshana sukhkari pratit hota hai. yah mandir mukhyatah iliyats bich ke kinare hai. iske alave raghvendra mandir, arul-mijju marundishvar mandir, vishvarup adhivyadhihra mandir, thapthanbli mandir, iskaen mandir, shri nivas mandir, shri murugn svami mandir adi yahan ki dharmik falak ko samriddh bana raha hai. shri parthasarthi mandir ke punyakarini ko ‘kairavani’ kaha gaya hai jahan indira, jhoma, agni, min v vishnu ke rup men kund ka sthan hai. vishesh pujn avasar par is sarovar ki shobha dekhte banti hai. astu ! adhunikta se sarabor chennai nagar men shri parth sarthi mandir darshana ka apna anand hai jahan chennai sentral relve steshan v bas tarminl se savari sahaj men mil jate hain. sach kahen to mandir ke pratham darshan se hi pallavkalin kalakarita ankhon ke age jivant ho jati hai.
Kya aapko lekh pasand aaya? Subscribe
Kya aapko lekh pasand aaya? Subscribe


navratra evan dipavli visheshank  October 2015

fyuchar samachar ka yah visheshank devi durga evan dhan ki devi lakshmi ko samarpit hai. vartaman bhautikvadi yug men dhan ki mahatta sarvopri hai. pratyek vyakti ki ichcha adhik se adhik dhan arjik karne ki hoti hai taki vah khushhal, samriddh evan vilasita purn jivan vyatit kar sake. halanki ishvar ne har vyakti ke lie alg-alag anupat men khushi evan dhan nishchit kar rakhe hain, kintu manonukul sampannata ke prayas bhi avashyak hai. is visheshank men anek utkrisht alekhon ka samavesh kiya gaya hai jo am logon ko devi lakshmi ki kripa prapt kar sampannata arjit karne ke lie margadarshan pradan karte hain. in alekhon men se kuch mahatvapurn alekh is prakar hain- man durga ke vibhinn rup, dipak aur dipotsav ka pauranik mahatva evan itihas, dipavli ka pujan kab aur kaise karen, dipavli ke din kiye jane vale dhandayak upay, tantra sadhna ek vivechan adi in alekhon ke atirikt kuch dusre sthayi stambhon ke alekh men samavisht kiye gaye hain.

Subscribe

Apne vichar vyakt karein

blog comments powered by Disqus
.