adi anadi kal se dharm sammat rahe bharatavarsh men sanatan devi-devtaon ke pujan kram men dhan ki adhishthatri devi vishnu priya lakshmi ji ki aradhna vibhinn abhishton ki purti ke lie ki jati hai. itihas gavah hai ki vaidik kalin tray mahadevi yatha mahakali, mahalakshmi v mahasarasvati men ek mahalakshmi ko dhan, vaibhav, aishvarya, sanpatti v sukh-sanpda ka adhar svikara jata hai jinki upasna ka kramvar rup guptakal ke purva se sanpurn bhartiya prayadvip men nirbadh rup se drishtigat hota hai.
prachin bhartiya itihas ke adhyayan anushilan se gyat hota hai ki kitne hi rajvanshon ne rajmhishi v kul devi ke rup men devi mahalakshmi ko sthan diya hai. aur to aur rajkiya patra, raj muhar v arth vibhag ke kagjat bhi lakshmi devi ke ankan se yukt hain. aise to sanpurn desh men mata lakshmi ke kitne hi devalay virajman hain jinka apna mahimakari itihas raha hai par in sabon ke madhya tirupti ki mata padmavti mandir ka vishisht sthan hai jise dev shri venkteshvar svami ki adrdhangini rupi adhishthatri shakti svikara jata hai. tirupti nagar mukhyalay se takriban panch ki.mi. duri par alamelu mangapuram arthat triruchanur men devi ji ka yah devalay virajit hai jise kaliyug ki jagrat lakshmi devi ke rup men puja jata hai. sthaniya star par ise ‘mangapadma’ bhi kaha jata hai jahan ka sarvapradhan punyamay tirth paù sarovar hai. isi paù sarovar ke pas mata padmavti ka vishal v akarshak mandir shobhayman hai. kaha jata hai ki shri padmavti devi ke darshan ke bad hi tirumal tirupti yatra ka punyafal sahaj men prapt ho jata hai.
puran prasiddh tathya hai ki triruchanur men svami shukdev ji ne tapasya ki thi to tirupti nagarasth sant ramanuj ne 15vin shatabdi men tirumala parvat ke niche govind raj ki vigrah sthapit ki thi. tirupti tirumala dev-sthanam arthat titi. di. ki taraf se jin devalyon ka rag-bhog sahit samast karyon ka nirvahan kiya jata hai usmen mata padmavti mandir bhi ek hai. itihas spasht karta hai ki is punyakari mandir ka pratham nirman pallav shasan kal men hua jise kalantar men chol shaskon ne navshringar pradan kiya. mandir se jure dharmik katha batate hain
ki narad ji ke karan lakshmi v padmavti devi ke vad-vivad ko dekhakar shri nivas (vishnu) shilarup dharan kar tirumala parvat par virajman ho gae. is par lakshmi v padmavti donon ko shrinivas ne adesh diya, tadanantar lakshmi v padmavti shri nivas ke vaksh sthal men pravesh kar gayin. is par dev shrinivas ne kaha- he padmavti, he lakshmi rupini ! tum apni nij svarup ko jo mere baen vakshasthal men samahit ki ho usi ansh tatva se paù sarovar men pravesh kar sada bhakton ki raksha karo. main pratyek din adhi rat ke bad tumhare yahan akar suprabhav ke samay anand vilay men raman karunga. shrinivas ji ke adeshanusar devi ne dev shilpi shri vishvakarma dvara nirmit paù sarovar men pravesh kar shilarup dharan kiya aur us jamane se lekar aj tak jan-jan ka uddhar kar rahi hain.
vivaran hai ki devi lakshmi barah varsh bad apni gahan tapasya ke uprant alamelu mangapuram men ek padm (lal kamal pushpa) par bhagvan shri bala ji ko darshan dekar kritya-kritya ho gayin. kahin-kahin aisa bhi vivaran aya hai ki devi akash raj ke yahan kanyarup men prakat huin jise akash raj ne kanya ko ghar le akar putri ke rup men palan kiya yahi jo ek lal kamal pushp men prakat huin. inka vaivahik sanskar shri bala ji ke sang sanpann hua. is sarovar ki ganna tirupti ke punyaprad 365 tirthon men ki jati hai. kahte hain vivah men bala ji devta ne dhan ke devta shri kuber svami se karj lie the jiski varshik purti dan vasul kar kiya ja raha hai. yahi karan hai ki ‘shri venkteshvar mahatmya’ men bala ji svayan kahte hain ‘he devi ! tum mere bhakton ko apar dhan sampatti do tabhi to ve hamare dham men dan karenge aur ham karj mukt ho paenge. yahi karan hai ki tirupti darshan ke pahle ya bad (apni manyata v vij brahmanon ke matanurup) bhakt bandhu mata ji ke is divya dham ka darshan avashya karte hain.
mata ji ka yah mandir char-char vishal dvar v gopuram se yukt hai. iska alankrit uncha shikhar dur se hi nimantran deta pratit hota hai. mata ji ke is dham men tirupti ki hi bhanti prasad rup men laddu milta hai. darshan ke nam par shulk ki bhi vyavastha hai. yahan andar men mata ji ke sthan ke alave bhole bhandari, murugn-svami, ganesh, bhairav, kali v sarasvati tirth bhi virajman hain. vivaran hai ki bagair padmavti devi darshan ke tirupti darshan apurn hai. tirupti relve steshan v bas staind ke sath ganutur, rejigunda athva chennai se yahan ana sahaj hai.
aise to pure desh men dvadash pradhan devi tirth men pancham sthan par shobhit kolhapur ki mahalakshmi, rameshvaram ka mahalakshmi tirth, chanba ka lakshmi narayan mandir, kashi ki lakshmi, dvand ki mahalakshmi, panji ki mata lakshmi, vindhyachal ki ashtabhuji man, jagannath puri ki mahalakshmi, uttarakhand ka bagand narayan mandir, shri nagar ki mata lakshmi, mathura lal darvaja ki mata lakshmi adi ka pure desh men nam hai to kashmir ki mata vaishno devi, odisha ki mata tarini, patna ki mata patn-devi, gaya ki mata sarvamangla gauri aur ujjain ki harsiddhi mata ko lakshmi svarupa svikara jata hai. aise arab sagar ke tat par malabar hils ki uttari disha men bhulabhai marg par sthit mahalakshmi mandir desh ke lakshmi ji ke adhunik tirthon men uttamottam hai.
tirupti nagar mane mata ji ke is mandir ke alave kodandaram svami mandir, shri kapileshvar svami mandir, shri nivas mandir, govind ram svami mandir, iskaen mandir, murugan svami mandir adi ke darshan ka apna vidhan hai. yahan se karib 30 kimiduri par ‘‘kalahasti tirtha’’ ka darshan bhi jankar log avashya karte hain jahan ki vayutatva ling katha pure desh men prasiddh hai.
mata ji ke is darbar men aise to salon bhar yatri v bhaktavanrid ate hain par ‘‘vaikunth mahotsava’ men yahan til bhar rakhne ki bhi jagah shesh nahin rahti. sachmuch padmavti mandir mahalakshmi ji ka manglkari tirth hai jiske darshan se samast badhaon ki vimukti ho manav pragti path par agrasar ho jata hai.